Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Dios Tin Bon Noticia pa Nos!

 LES 14

Dicon Dios Tin un Organisacion?

Dicon Dios Tin un Organisacion?

1. Dicon Dios a organisa e nacion di Israel di pasado?

Dios a organisa e descendientenan di e patriarca Abraham como un nacion y a duna nan un codigo di ley. El a yama e nacion ey “Israel” y a duna nan e responsabilidad di proteha su palabra y pega na adoracion berdadero. (Salmo 147:19, 20) Di e manera ey, hende di tur nacion por a ricibi bendicion pa medio di Israel.—Lesa Genesis 22:18.

Dios a scoge e Israelitanan pa nan a sirbi como su testigonan. Historia di e pueblo aki ta mustra ki beneficio hende por saca si nan obedece Dios su leynan. (Deuteronomio 4:6) Pues, pa medio di Israel otro nacionnan por a siña conoce e Dios berdadero.—Lesa Isaias 43:10, 12.

2. Dicon cristiannan berdadero ta un grupo organisa?

Cu tempo e nacion di Israel a perde Dios su aprobacion; pesey Jehova a reemplas’e cu e congregacion cristian. (Mateo 21:43; 23:37, 38) Awor, na luga di e Israelitanan, ta e cristiannan berdadero ta Jehova su testigonan.—Lesa Echonan 15:14, 17.

Hesus a organisa su siguidornan pa predica y haci discipel den tur nacion. (Mateo 10:7, 11; 24:14; 28:19, 20) E obra aki ta yegando su culminacion durante e conclusion di e era aki. Pa prome biaha den historia, Jehova a uni miyones di hende for di tur nacion den adoracion berdadero. (Revelacion 7:9, 10) Cristiannan berdadero ta bon organisa pa yuda otro y anima otro. Rond mundo, nan ta sigui e mesun programa di instruccion biblico na nan reunionnan.—Lesa Hebreonan 10:24, 25.

 3. Con e organisacion di Testigonan di Jehova di nos tempo a cuminsa?

Den e decada di 1870, un grupo chikito di studiante di Bijbel a cuminsa saca na cla berdadnan biblico cu pa hopi tempo tabata scondi. Nan a haya sa cu Hesus a organisa e congregacion cristian pa haci e trabou di predica. Pesey, nan a start un campaña internacional di predica e mensahe di Reino. Anto na 1931 nan a adopta e nomber Testigonan di Jehova.—Lesa Echonan 1:8; 2:1, 4; 5:42.

4. Con e organisacion di Testigonan di Jehova ta funciona awe?

Den prome siglo, congregacionnan cristian di hopi pais a beneficia di e guia di un cuerpo gobernante central cu a reconoce Hesus como Cabes di congregacion. (Echonan 16:4, 5) Awe tambe, rond mundo Testigonan di Jehova ta beneficia di e guia cu nan ta haya di un Cuerpo Gobernante cu ta consisti di ancianonan cu tin hopi experencia. E Cuerpo aki ta supervisa e sucursalnan di Testigonan di Jehova cu ta traduci, imprimi y distribui literatura biblico den mas cu 600 idioma. Di e manera ey, e Cuerpo Gobernante por duna instruccion y animacion for di e Scritura na mas cu 100.000 congregacion rond mundo. Anto den cada congregacion tin homber cualifica cu ta sirbi como anciano, of superintendente. E hombernan aki ta stima e tou di Dios y ta cuid’e.—Lesa 1 Pedro 5:2, 3.

Testigonan di Jehova ta bon organisa pa predica e bon noticia y haci discipel. Mescos cu e apostelnan, nos ta predica di cas pa cas. (Echonan 20:20) Tambe nos ta ofrece estudio di Bijbel na hende sincero cu kier haya sa e berdad. Pero Testigonan di Jehova no ta djis un organisacion; nos ta manera un famia cu tin un Tata amoroso. Nos ta manera ruman homber y ruman muher cu ta interesa den otro. (2 Tesalonicensenan 1:3) Ya cu e pueblo di Jehova ta organisa pa sirbie y pa yuda otro hende, nan ta e famia di mas feliz na mundo.—Lesa Salmo 33:12; Echonan 20:35.