Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Dios Tin Bon Noticia pa Nos!

 LES 7

Kico e Reino di Dios Ta?

Kico e Reino di Dios Ta?

1. Kico e Reino di Dios ta?

Kico ta haci Hesus un Rey ideal?—MARCO 1:40-42.

E Reino di Dios ta un gobierno celestial. Lo e reemplasa tur otro gobierno y lo cumpli cu Dios su boluntad tanto den cielo como riba tera. E noticia tocante e Reino di Dios ta un bon noticia. Pronto e Reino di Dios lo satisface hende su necesidad di un bon gobierno. Lo e uni tur hende cu ta biba riba tera.—Lesa Daniel 2:44; Mateo 6:9, 10; 24:14.

Un gobierno mester tin un hende na cabes. Pesey, Jehova a nombra su Yiu, Hesucristo, como Rey di Su Reino.—Lesa Revelacion 11:15.

2. Dicon Hesus ta e Rey ideal?

E Yiu di Dios ta e Rey ideal pasobra e ta bondadoso, y e ta para firme pa loke ta berdad. (Juan 1:14) Tambe e tin tur e poder cu e mester tin pa yuda hende pasobra lo e goberna tera completo for di cielo. Despues cu el a haya resureccion, el a subi na cielo y a sinta warda na man drechi di Jehova. (Hebreonan 10:12, 13) Finalmente, Dios a dun’e poder pa cuminsa goberna.—Lesa Daniel 7:13, 14.

3. Ken lo goberna hunto cu Hesus?

Den Bijbel, e grupo di hende cu lo goberna hunto cu Hesus den cielo ta ser yama “e santonan.” (Daniel 7:27) E promenan di e grupo aki cu Dios a scoge ta Hesus su fiel apostelnan. Te den nos tempo Jehova a sigui scoge homber y muher fiel pa forma parti di e grupo aki. Mescos cu Hesus, nan ta resucita cu un curpa spiritual.—Lesa Juan 14:1-3; 1 Corintionan 15:42-44.

 Cuanto hende ta bay cielo? Hesus a papia di un “tou chikito.” (Lucas 12:32) Total nan lo ta 144.000, y nan lo goberna tera hunto cu Hesus.—Lesa Revelacion 14:1.

4. Kico a sosode ora Hesus a cuminsa goberna?

E Reino di Dios a cuminsa goberna na 1914. * E prome cos cu Hesus a haci ora el a bira Rey tabata di tira Satanas y su demoñonan abou na tera. Satanas a bira furioso y a cuminsa causa hopi problema riba tera. (Revelacion 12:7-10, 12) Desde e tempo ey, sufrimento a aumenta drasticamente. Guera, hamber, epidemia y temblor ta parti di un “señal” cu pronto e Reino lo tuma mando completo di asuntonan riba tera.—Lesa Lucas 21:7, 10, 11, 31.

5. Kico e Reino di Dios ta logrando?

Pa medio di un obra mundial di predicacion, e Reino di Dios ya caba ta uniendo un multitud grandi di hende di tur nacion. Miyones di hende humilde ta somete nan mes na Hesus. Nan lo haya proteccion ora e Reino di Dios destrui e mundo malbado aki. Pues, ken cu kier beneficia di e Reino di Dios mester siña obedece Hesus.—Lesa Revelacion 7:9, 14, 16, 17.

Durante un periodo di 1.000 aña, e Reino lo cumpli cu Dios su proposito original pa humanidad. Tera completo lo bira un paradijs. Na fin di e periodo ey Hesus lo entrega e Reino bek na su Tata. (1 Corintionan 15:24-26) Bo conoce un hende cu lo bo tin gana di conta tocante e cosnan cu bo a siña di e Reino di Dios?—Lesa Salmo 37:10, 11, 29.

 

^ par. 6 Pa mas detaye tocante con profecia biblico ta señala na 1914, wak pagina 215-218 di e buki Kico Bijbel Ta Siña Realmente?

Mas Informacion

Kico Bijbel Ta Siña Realmente?

Nos Ta Bibando den “e Ultimo Dianan”?

Analisa con e actitud y conducta di e hendenan rond di nos ta duna prueba cu nos ta bibando den “e ultimo dianan” cu Bijbel a predeci.

KEN AWE TA HACI E BOLUNTAD DI JEHOVA?

Con e Trabou di Predica di Testigonan di Jehova Ta Organisa?

Nos ta sigui e ehempel cu Hesus a pone tempo cu e tabata riba Tera. Kico ta algun di e formanan di predica aki?