Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Dios Tin Bon Noticia pa Nos!

 LES 4

Ken Hesucristo Ta?

Ken Hesucristo Ta?

1. Con Hesus su bida a cuminsa?

Kico a haci Hesus un hende facil pa acerca?—MATEO 11:29; MARCO 10:13-16.

Distinto for di otro hende, Hesus a biba den cielo como un criatura spiritual prome cu el a bin na tera. (Juan 8:23) E tabata e prome creacion di Dios, y el a yuda crea tur otro cos. E ta e unico yiu cu Jehova a crea directamente y pesey Bijbel ta yam’e e Yiu “unigenito” di Dios. (Juan 1:14) Tambe Bijbel ta yama Hesus “e Palabra”, ya cu el a sirbi como vocero di Dios.—Lesa Proverbionan 8:22, 23, 30; Colosensenan 1:15, 16.

2. Dicon Hesus a bin na tera?

Pa Hesus por a nace como hende riba tera, Dios a transferi su bida for di cielo pa e matriz di un virgen Hudiu cu yama Maria. Pues, Hesus no tabatin un tata humano. (Lucas 1:30-35) Hesus a bin na tera (1) pa siña hende e berdad tocante Dios, (2) pa pone un ehempel con nos por haci e boluntad di Dios hasta ora nos haya nos cu dificultad y (3) pa duna su bida perfecto como un “rescate.”—Lesa Mateo 20:28.

3. Dicon nos mester di un rescate?

Un rescate ta e prijs cu ta ser paga pa libra un persona for di peliger di morto. (Exodo 21:29, 30) Originalmente, Dios no a crea hende pa bira bieu y muri. Con nos por sa esey? Dios a bisa e prome homber, Adam, cu si el a comete loke Bijbel ta yama “pica”, lo el a muri. Pues si Adam no a peca, lo e no a muri nunca. (Genesis 2:16, 17; 5:5) Segun Bijbel, morto a “drenta” e mundo di humanidad pa medio di Adam.  Asina, Adam a pasa pica y e castigo di morto pa tur su descendientenan. Nos tin mester di un rescate pa libra nos for di e castigo di morto cu nos a hereda for di Adam.—Lesa Romanonan 5:12; 6:23.

Ken por a paga e rescate pa libra nos for di morto? Ora nos muri, nos ta paga solamente pa nos picanan. Hende imperfecto no por paga pa pica di otro hende.—Lesa Salmo 49:7-9.

4. Dicon Hesus mester a muri?

Distinto for di nos, Hesus tabata un homber perfecto. Pues e no tabatin nodo di muri pa su picanan—nunca e no a haci pica tampoco. Mas bien, Hesus a muri pa e picanan di otro hende. Dios a demostra un amor extraordinario pa humanidad ora el a manda su Yiu bin muri pa nos. Hesus tambe a demostra su amor pa nos ora el a obedece su Tata y duna su bida pa nos picanan.—Lesa Juan 3:16; Romanonan 5:18, 19.

5. Kico Hesus ta haciendo actualmente?

Tempo cu Hesus tabata riba tera, el a cura hende enfermo, el a libra hende di nan sufrimento y a lanta hende for di morto. Cu esey el a demostra kico e lo haci den futuro pa tur hende obediente. (Mateo 15:30, 31; Juan 5:28) Despues cu Hesus a muri, Dios a resucit’e como un ser spiritual. (1 Pedro 3:18) Anto el a sinta na man drechi di Jehova te ora Dios a dun’e poder pa reina como Rey riba tera completo. (Hebreonan 10:12, 13) Actualmente Hesus ta reina como Rey den cielo, y su siguidornan ta anunciando e bon noticia ey rond mundo.—Lesa Daniel 7:13, 14; Mateo 24:14.

Pronto Hesus lo uza su poder como Rey pa pone fin na tur sufrimento y na esnan cu ta caus’e. Ken cu pone fe den Hesus y obedec’e lo haya bida den un paradijs riba tera.—Lesa Salmo 37:9-11.