Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Kico Bijbel Ta Siña Realmente?

 APENDIX

Nos Mester Celebra Dianan di Fiesta?

Nos Mester Celebra Dianan di Fiesta?

DIANAN di fiesta religioso y no religioso popular cu hende ta celebra den hopi parti di mundo awe, no a origina for di Bijbel. Kico anto ta origen di e celebracionnan ei? Si bo tin e posibilidad di haci investigacion den un biblioteca, lo bo haya interesante pa tuma nota di loke bukinan di consulta ta bisa tocante dianan di fiesta cu ta popular caminda bo ta biba. Considera un par di ehempel.

 Pasco di Resureccion. “No tin ningun indicacion di e celebracion di e fiesta di Pasco di Resureccion den e Testament Nobo”, segun The Encyclopædia Britannica. Con Pasco di Resureccion a cuminsa? Su raiz ta bin di adoracion pagano. Aunke e dia di fiesta aki ta supuestamente pa conmemora e resureccion di Hesus, e custumbernan conecta cu e temporada di Pasco di Resureccion no ta cristian. Por ehempel, pa loke ta “e coneu di Pasco”, The Catholic Encyclopedia ta bisa: “E coneu ta un simbolo pagano y semper tawata un simbolo di fertilidad.”

Celebracion di Aña Nobo. E fecha y custumbernan conecta cu celebracion di Aña Nobo ta varia di pais pa pais. Relaciona cu e origen di e celebracion aki, The World Book Encyclopedia ta declara: “E gobernante Romano Julio Cesar a establece 1 di januari como Dia di Aña Nobo na aña 46 P.C. E Romanonan a dedica e dia aki na Janus, e dios di entrada, porta y tur comienso. Luna di januari a haya su nomber for di Janus, kende tawatin dos cara, uno cu ta wak dilanti y e otro cu ta wak patras.” Pues celebracionnan di Aña Nobo ta funda riba tradicionnan pagano.

Halloween. The Encyclopedia Americana ta bisa: “Elementonan di e custumbernan conecta cu Halloween por ser haya bek den un ceremonia druida [un sacerdocio Kelta di antiguedad] di tempo precristian. E Keltanan tawatin fiesta pa dos dios principal, dios di solo y dios di e defuntonan . . . , kende su fiesta nan a tene dia 1 di november, cu ta comienso di e Aña Nobo Kelta. E fiesta di e defuntonan a keda incorpora gradualmente den e ritual cristian.”

Otro Dianan di Fiesta. No ta posibel pa trata tur e conmemoracionnan cu hende ta tene rond mundo. Sinembargo, dianan di fiesta cu ta halsa hende of organisacionnan humano no ta aceptabel pa Yehova. (Yeremias 17:5-7; Echonan 10:25, 26) Corda tambe cu e origen di celebracionnan religioso ta determina si nan ta agrada Dios of no. (Isaias 52:11; Revelacion 18:4) E principionan biblico menciona den Capitulo 16 di e buki aki lo yuda bo determina con Dios ta mira participacion den dianan di fiesta cu ta di caracter no religioso.