• Con Dios ta mira bida?

  • Con Dios ta mira aborto?

  • Con nos ta mustra respet pa bida?

1. Ken a crea tur cos bibo?

YEHOVA “ta e Dios berdadero; e ta e Dios bibo”, profeta Yeremias a bisa. (Yeremias 10:10) Ademas, Yehova Dios ta e Creador di tur cos bibo. Criaturanan celestial a bisa Yehova: “Abo a crea tur cos, y pa motibo di bo boluntad nan tawata existi, y a wordo crea.” (Revelacion 4:11) Den un cantica di alabansa na Dios, Rei David a bisa: “Serca bo e fuente di bida ta.” (Salmo 36:9) Pues anto, bida ta un regalo di Dios.

2. Kico Dios ta haci pa sostene nos bida?

2 Tambe Yehova ta sostene nos bida. (Echonan 17:28) E ta percura e cuminda cu nos ta come, e awa cu nos ta bebe, e aire cu nos ta respira y e tera riba cua nos ta biba. (Echonan 14:15-17) Yehova a haci esaki den un manera cu ta haci bida agradabel. Pero pa disfruta di bida plenamente, nos tin cu siña e leinan di Dios y obedece nan.—Isaias 48:17, 18.

MUSTRA RESPET PA BIDA

3. Kico Dios a pensa di e asesinato di Abel?

3 Dios kier pa nos tin respet pa bida, tanto pa nos mes bida como pa bida di otro hende. Por ehempel, den tempo di Adam cu Eva, nan yiu homber Cain a bira hopi rabia riba su ruman mas jong Abel. Yehova a spierta Cain cu su rabia lo por hib’e na pica serio. Cain a ignora e spiertamento ei. El “a lanta contra su ruman Abel y a mat’e.” (Genesis  4:3-8) Yehova a castiga Cain pasobra el a asesina su ruman.—Genesis 4:9-11.

4. Con Dios a enfatisa e punto di bista corecto di bida den e Lei di Moises?

4 Miles di aña despues, Yehova a duna e pueblo di Israel leinan pa yuda nan sirbie na un manera aceptabel. Como cu el a duna e leinan aki pa medio di profeta Moises, hende sa yama nan e Lei di Moises. Un parti di e Lei di Moises a bisa: “No mata.” (Deuteronomio 5:17) Esaki a laga e Israelitanan mira cu Dios ta duna balor na bida humano y cu hende mester duna balor na bida di otro.

5. Con nos mester mira aborto?

5 Kico di e bida di un yiu cu no a nace ainda? Wel e Lei di Moises a declara: “Den caso cu algun homber ta lucha cu otro y nan lastima un mohe na estado y su yiunan ta sali si, pero ningun accidente fatal no sosode, e ta keda obliga di paga daño sin falta conforme loke e doño di e mohe impone riba dje; y e tin cu dun’e pa medio di hues. Pero si un accidente fatal sosode, e ora ei bo tin cu duna alma pa alma.” (Exodo 21:22, 23, NW) Pues segun e Lei, ta incorecto pa causa morto di un baby den bariga di su mama. Si, asta e bida di un yiu cu no a nace ainda ta precioso pa Yehova. (Salmo 127:3) Esaki ta nifica cu aborto ta malo.

6. Dicon nos no mag odia nos prohimo?

6 Respet pa bida ta encera cu nos tin e punto di bista corecto di nos prohimo. Bijbel ta bisa: “Ken cu odia su ruman ta un matado; y boso sa cu ningun matado no tin bida eterno ta permanece den dje.” (1 Huan 3:15) Si nos kier bida eterno, nos tin cu elimina tur odio pa nos prohimo for di nos curason, pasobra odio ta e origen di mayoria acto di violencia. (1 Huan 3:11, 12) Ta sumamente importante pa nos siña stima otro.

7. Menciona algun practica cu ta demostra un falta di respet pa bida.

7 Kico di mustra respet pa nos propio bida? Normalmente  hende no kier muri, pero tin ta risca nan bida en busca di placer. Por ehempel, hopi hende ta uza tabaco, marihuana of otro tipo di droga. E substancianan ei ta perhudica e curpa y hopi biaha ta mata hende cu ta uza nan. Un persona cu tin e custumber di uza e substancianan aki no ta mira bida como algo sagrado. E practicanan aki ta impuro of sushi den bista di Dios. (Romanonan 6:19; 12:1; 2 Corintionan 7:1) Pa sirbi Dios na un manera aceptabel, nos tin cu stop cu e practicanan ei. Aunke kisas ta hopi duro pa stop, Yehova por duna nos e yudansa necesario. Y e ta aprecia e esfuerso cu nos ta haci pa trata nos bida como un regalo precioso cu nos a haya di dje.

8. Dicon semper nos mester ta conciente di siguridad?

8 Si nos tin respet pa bida, semper nos lo percura pa nos ta conciente di siguridad. Nos lo no ta negligente ni nos lo no tuma riesgonan djis pa placer of pa excitacion. Tambe nos lo evita coremento di auto descabeya y deportenan violento of peligroso. (Salmo 11:5) Dios su lei pa Israel di antiguedad a declara: “Ora bo traha un cas nobo [cu un dak plat], traha un rand na bo dak, pa bo no trece culpa di sanger riba bo cas, si un hende cai for di dje.” (Deuteronomio 22:8) Na harmonia cu e principio describi den e lei ei, percura pa den bo cas cosnan manera trapi ta den bon condicion, ya un hende no ta trompica, cai y keda seriamente lesiona. Si bo tin auto, haci sigur cu e ta safe pa core cu ne. No laga bo cas ni bo auto ta un peliger pa bo ni pa otro hende.

9. Si nos tin respet pa bida, con nos lo trata bestia?

9 Kico di bida di un bestia? Esei tambe ta sagrado pa e Creador. Dios ta permiti hende mata bestia pa haya cuminda y paña of pa proteha nan mes contra peliger. (Genesis 3:21; 9:3; Exodo 21:28) Sinembargo, trata bestia cruel of mata nan djis pa diberticion ta malo y ta demostra un menosprecio grandi pa e santidad di bida.—Proverbionan 12:10.

 MUSTRA RESPET PA SANGER

10. Con Dios a mustra cu tin un conexion entre bida y sanger?

10 Despues cu Cain a mata su ruman Abel, Yehova a bisa Cain: “Bos di bo ruman su sanger ta sclama na mi for di suela.” (Genesis 4:10) Ora Dios a papia di Abel su sanger, e tawata kiermen Abel su bida. Cain a kita Abel su bida, y awor Cain lo mester a haya castigo. Tawata como si fuera Abel su sanger, of bida, tawata sclama na Yehova pa husticia. E conexion entre bida y sanger a bolbe keda demostra despues di e Diluvio di tempo di Noe. Prome cu Diluvio, hende a come solamente fruta, berdura, grano y noot. Despues di Diluvio, Yehova a bisa Noe cu su yiu hombernan: “Tur loke ta move, cu ta biba, lo ta cuminda pa boso; mi ta duna boso tur, mescos cu mi a duna e yerba berde.” Sinembargo, Dios a pone e restriccion aki: “Solamente, boso no mag come carni cu su bida, esta, su sanger.” (Genesis 1:29; 9:3, 4) Claramente, den bista di Yehova e bida y sanger di un criatura ta estrechamente liga cu otro.

11. Ki uzo di sanger Dios a prohibi for di tempo di Noe?

11 Nos ta mustra respet pa sanger door di no com’e. Den e Lei cu Yehova a duna e Israelitanan, el a manda: “Si un homber . . . den yagmento cohe un bestia of un parha cu boso mag come, e mester basha su sanger afo y tapa e sanger cu tera. . . . Mi a bisa e yiunan di Israel: ‘Boso no mag come sanger di ningun sorto di carni.’” (Levitico 17:13, 14) Dios su mandamento pa no come sanger di bestia, un mandamento cu el a duna pa prome biaha na Noe un 800 aña prome, ainda tawata na vigor. Yehova su punto di bista tawata bon cla: Su sirbidonan por a come carni di bestia pero no e sanger. Nan mester a basha e sanger riba suela, de echo, debolbiendo e bida di e criatura na Dios.

12. Spirito santo a duna ki mandamento relaciona cu sanger den prome siglo y cu ta valido te awe?

12 Cristiannan ta bou di un mandamento similar. E  apostelnan y otro hombernan cu tawata hiba delantera entre e siguidonan di Hesus den prome siglo, a reuni hunto pa dicidi cua mandamentonan tur hende den e congregacion cristian mester a obedece. Nan a yega na e conclusion aki: “A parce bon na spirito santo y na nos pa no pone carga mas pisa riba boso, sino e cosnan necesario aki: pa boso abstene boso mes di cosnan sacrifica na idolo, di sanger, di cosnan cu a wordo sofoca [locual a laga e sanger keda den e carni] y di fornicacion.” (Echonan 15:28, 29; 21:25) Pues nos mester ‘abstene di sanger.’ Den bista di Dios, haci esei ta mesun importante cu evita idolatria y inmoralidad sexual.

Si bo docter a bisa bo abstene di alcohol, lo bo inyecta alcohol den bo benanan?

13. Mustra cu un ehempel dicon e mandamento pa abstene di sanger ta encera abstene di transfusion di sanger.

13 E mandamento pa abstene di sanger ta encera transfusion di sanger? Si. Un ehempel: Supone cu un docter mester bisa bo pa abstene di bebida alcoholico. Esei simplemente lo kiermen cu bo no mag bebe alcohol pero si bo por inyecta e alcohol den bo benanan? Claro cu no! Asina tambe, abstene di sanger ta nifica no tum’e di ningun manera den nos curpa. Pues e mandamento pa abstene di sanger ta nifica cu nos lo no permiti ningun hende duna nos transfusion di sanger.

14, 15. Si docternan ta bisa cu un cristian mester haya un transfusion di sanger, con lo e reacciona, y dicon?

14 Pero kico si un cristian ta seriamente herida of tin cu haci un operacion grandi? Supone cu docternan ta bisa cu e mester haya un transfusion di sanger sino e ta muri. Claro cu e cristian no kier muri. Den un esfuerso pa conserva Dios su regalo precioso di bida, lo e acepta otro tipo di tratamento cu no ta encera mal uzo di sanger. Pues anto, si e tipo di cuido medico ei ta disponibel lo e purba haya esei y lo acepta cierto alternativanan pa sanger.

15 Un cristian lo kibra Dios su lei djis pa e keda na bida un poco mas largo den e sistema aki? Hesus a bisa: “Ken  cu kier salba su bida lo perd’e; ma ken cu perde su bida pa mi causa lo hay’e.” (Mateo 16:25) Nos no kier muri. Pero si nos purba scapa nos bida actual door di kibra Dios su lei, nos ta core e peliger di perde bida eterno. Ta sabi di nos parti anto pa pone nos confiansa den e echo cu Dios su lei ta corecto, teniendo pleno fe cu si nos muri pa cualkier motibo, nos Dunador di Bida lo corda nos den e resureccion y lo duna nos bek e precioso regalo di bida.—Huan 5:28, 29; Hebreonan 11:6.

16. Kico Dios su sirbidonan ta firmemente determina pa haci relaciona cu sanger?

16 Awe, fiel sirbidonan di Dios ta firmemente determina pa sigui Dios su instruccion tocante sanger. Nan no ta com’e den ningun forma. Tampoco nan no ta acepta sanger pa motibonan medico. * Nan tin sigur cu e Creador di sanger sa kico ta mihor pa nan. Abo ta kere cu e sa?

E UNICO UZO CORECTO DI SANGER

17. Den Israel di antiguedad, cua tawata e unico uzo di sanger cu tawata aceptabel pa Yehova Dios?

17 E Lei di Moises a enfatisa e unico uzo corecto di sanger. Relaciona cu e adoracion cu Yehova a rekeri di e Israelitanan di antiguedad, el a manda: “Bida di e carni ta den e sanger, y mi a duna boso esaki riba altar pa haci expiacion  pa boso alma; pasobra ta e sanger ta haci expiacion pa e alma.” (Levitico 17:11) Ora cu e Israelitanan a peca, nan por a haya pordon door di ofrece un bestia y mester a laga pone un poco di su sanger riba e altar na e tabernakel of mas despues na e tempel di Dios. E unico uzo corecto di sanger tawata den tal sacrificio.

18. Ki beneficio y bendicion nos por haya door cu Hesus a drama su sanger?

18 Cristiannan berdadero no ta bou di e Lei di Moises y pesei nan no ta ofrece sacrificio di bestia ni pone sanger di bestia riba un altar. (Hebreonan 10:1) Sinembargo, e uzo di sanger riba altar den tempo di Israel di antiguedad a prefigura e sacrificio precioso di e Yiu di Dios, Hesucristo. Manera nos a siña den Capitulo 5 di e buki aki, Hesus a duna su bida humano pa nos door di laga su sanger ser drama como un sacrificio. Despues el a subi na shelo y a  ofrece Dios un biaha pa semper e balor di su sanger drama. (Hebreonan 9:11, 12) Esei a pone e base pa nos picanan ser pordona y a habri e caminda pa nos haya bida eterno. (Mateo 20:28; Huan 3:16) E uzo ei di sanger a resulta di ta sumamente importante! (1 Pedro 1:18, 19) Solamente pa medio di fe den e balor di Hesus su sanger drama nos por haya salbacion.

Con bo por mustra respet pa bida y sanger?

19. Kico nos mester haci pa nos por ta “inocente di e sanger di tur hende”?

19 Nos por ta masha gradicido mes na Yehova Dios pa e regalo amoroso di bida! Acaso esei no mester motiva nos pa conta otro hende tocante e oportunidad di haya bida eterno a base di fe den Hesus su sacrificio? Teniendo e mesun interes profundo pa bida di hende cu Yehova tin, lo motiva nos pa conta nan esei cu smak y gran entusiasmo. (Ezekiel 3:17-21) Si nos cumpli diligentemente cu e responsabilidad aki, nos lo por bisa mescos cu apostel Pablo: “Mi ta inocente di e sanger di tur hende. Pasobra mi no a laga di declara na boso henter e proposito di Dios.” (Echonan 20:26, 27) Un excelente manera pa demostra cu nos tin gran respet pa bida y sanger ta door di conta hende tocante Dios y su proposito.

^ par. 16 Pa mas informacion riba alternativanan pa transfusion di sanger, wak e capitulo “Alternativanan di Calidad pa Transfusion” di e foyeto Con sanger por salba bo bida? publica door di Testigonan di Yehova.