Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Kico Bijbel Ta Siña Realmente?

 CAPITULO DIESSHETE

Hala Serca Dios den Oracion

Hala Serca Dios den Oracion
  • Pakico nos mester haci oracion na Dios?

  • Kico nos mester haci pa Dios tende nos?

  • Con Dios ta contesta nos oracionnan?

“Esun cu a traha shelo y tera” ta dispuesto pa tende nos oracionnan

1, 2. Dicon nos mester mira oracion como un gran privilegio, y dicon nos mester sa kico Bijbel ta siña tocante oracion?

COMPARA cu e universo inmenso, tera ta masha chikito. De echo pa Yehova, “Esun cu a traha shelo y tera”, e nacionnan ta manera un gota di awa for di un hemchi. (Salmo 115:15; Isaias 40:15) Pero toch Bijbel ta bisa: “SEÑOR ta serca di tur esnan cu ta sclama na dje, serca di tur esnan cu ta sclama na dje den berdad. E lo cumpli cu e deseo di esnan cu ta tem’e; tambe e lo tende nan sclamacion.” (Salmo 145:18, 19) Imagina bo kico esei ta nifica! E Creador todopoderoso ta serca di nos y lo tende nos si nos “sclama na dje den berdad.” Ta un gran privilegio nos tin di por haci oracion na Dios!

2 Sinembargo, si nos kier pa Yehova scucha nos oracionnan, nos tin cu resa na dje den e manera cu e ta aproba. Con nos por haci esaki a menos cu nos ta compronde loke Bijbel ta siña tocante oracion? Ta sumamente importante anto pa nos sa kico e Scritura ta bisa tocante e topico aki, pasobra oracion por yuda nos hala mas serca di Yehova.

PAKICO HACI ORACION NA YEHOVA?

3. Menciona un motibo importante pakico nos lo mester haci oracion na Yehova.

3 Un motibo importante pakico nos lo mester haci oracion  na Yehova ta cu e mes ta invita nos pa haci esei. Su Palabra ta anima nos: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Cristo Hesus.” (Filipensenan 4:6, 7) Sigur nos lo no kier ignora un areglo asina bondadoso cu e Gobernante Supremo di universo a haci pa nos!

4. Con oracion regular na Yehova ta fortalece bo relacion cu ne?

4 Un otro motibo pa resa ta cu hacimento di oracion riba un base regular na Yehova ta un manera pa fortalece nos relacion cu ne. Berdadero amigonan no ta comunica cu otro solamente ora nan tin mester di algo. Mas bien, bon amigo ta interesa den otro, y nan amistad ta bira mas fuerte segun cu nan ta expresa nan pensamentonan, precupacionnan y sintimentonan libremente. Den algun aspecto, e situacion ta casi mescos pa loke ta nos relacion cu Yehova Dios. Cu yudansa di e buki aki, bo a haya sa hopi cos cu Bijbel ta siña tocante Yehova, tocante su personalidad y su proposito. Bo a siña conoc’e como un berdadero persona. Oracion  ta duna bo e oportunidad di expresa bo pensamentonan y sintimentonan di mas intimo na bo Tata celestial. Segun cu bo ta haci esei, bo ta hala mas serca di Yehova.—Santiago 4:8.

KI REKISITONAN NOS TIN CU CUMPLI CU NE?

5. Kico ta mustra cu Yehova no ta scucha tur oracion?

5 Yehova ta scucha tur oracion? Wak kico el a bisa e Israelitanan rebelde den tempo di profeta Isaias: “Maske boso haci hopi oracion, lo mi no scucha. Boso mannan ta yen di sanger.” (Isaias 1:15) Pues, cierto accionnan por pone cu Dios no ta scucha nos oracionnan. Pesei pa Dios tende nos oracionnan cu aprobacion, nos tin cu cumpli cu algun rekisito basico.

6. Pa Dios por scucha nos oracionnan, kico ta e rekisito principal, y con nos por cumpli cu ne?

6 Un rekisito principal ta cu nos mester tin fe. (Mateo 21:22) Apostel Pablo a skirbi: “Sin fe ta imposibel pa agrad’e [Dios], pasobra esun cu bin serca Dios mester kere cu e ta, y cu e ta Esun cu ta recompensa esnan cu ta busc’e.” (Hebreonan 11:6) Berdadero fe no ta djis sa cu Dios ta existi y cu e ta tende y contesta oracion. Nos ta demostra nos fe pa medio di nos accionnan. Nos tin cu duna evidencia cla cu nos tin fe na e manera cu nos ta hiba nos bida tur dia.—Santiago 2:26.

7. (a) Dicon nos mester mustra respet ora nos ta papia cu Yehova den oracion? (b) Ora nos ta resa na Dios, con nos por mustra humildad y sinseridad?

7 Un otro rekisito di Yehova ta cu hendenan cu ta haci oracion na dje mester hacie cu humildad y sinseridad. Y nos tin motibo pa ta humilde ora nos ta papia cu Yehova, no ta berdad? Ora hende haya e oportunidad di papia cu un rei of un presidente, nan ta haci esei por lo general cu hopi respet, dunando reconocemento na e posicion halto di e gobernante. Cuanto mas respet nos lo mester mustra ora nos ta  acerca Yehova! (Salmo 138:6) De echo, e ta “Dios Todopoderoso.” (Genesis 17:1) Ora nos ta haci oracion na Dios, e manera cu nos ta acerc’e mester demostra cu humildemente nos ta reconoce nos posicion dilanti dje. Tal humildad lo motiva nos tambe pa resa di curason cu sinseridad, evitando oracionnan rutinario cu ta keda ripiti mesun cos.—Mateo 6:7, 8.

8. Con nos por actua na harmonia cu loke nos ta pidi den oracion?

8 Un otro rekisito pa Dios tende nos ta cu nos mester actua na harmonia cu nos oracionnan. Yehova ta spera di nos cu nos ta haci tur loke ta na nos alcanse pa traha conforme loke nos ta pidi p’e. Por ehempel, si nos ta pidi den oracion: “Duna nos awe nos pan di cada dia”, nos mester traha duro den cualkier trabou cu ta disponibel cu nos por haci. (Mateo 6:11; 2 Tesalonicensenan 3:10) Si nos ta pidi Dios yudansa pa vence un debilidad di carni, nos mester percura pa evita circunstancia- y situacionnan cu lo por hiba nos den tentacion. (Colosensenan 3:5) Fuera di e rekisitonan basico aki, tin preguntanan tocante oracion cu nos mester haya contesta riba nan.

CONTESTA RIBA ALGUN PREGUNTA TOCANTE ORACION

9. (a) Na ken nos mester haci oracion, y den nomber di ken? (b) Kico kiermen haci oracion den nomber di Hesus?

9 Na ken nos mester haci oracion? Hesus a siña su siguidonan haci oracion na “nos Tata cu ta den shelo.” (Mateo 6:9) Pues anto nos oracionnan mester ta dirigi solamente na Yehova Dios. Sinembargo, Yehova ta rekeri pa nos reconoce e nomber of posicion di su Yiu unigenito, Hesucristo. Manera nos a siña den Capitulo 5, Dios a manda Hesus na mundo pa sirbi como un rescate pa libra nos di pica y morto. (Huan 3:16; Romanonan 5:12) Hesus ta esun nombra como Sumo Sacerdote y Hues. (Huan 5:22; Hebreonan  6:20) Pesei e Scritura ta manda nos ofrece nos oracionnan pa medio di Hesus. Hesus mes a bisa: “Ami ta e caminda, y e berdad, y e bida; ni un hende no ta bin serca e Tata, sino pa medio di mi.” (Huan 14:6) Pa Dios tende nos oracionnan, nos tin cu haci oracion solamente na Yehova pa medio of den nomber di su Yiu.

10. Dicon nos no mester di ta den un posicion of postura spesifico ora nos ta haci oracion?

10 Nos curpa mester ta den un posicion special ora di haci oracion? No. Yehova no ta rekeri ningun posicion spesifico, sea di man of di henter e curpa. Bijbel ta siña cu ta aceptabel pa haci oracion den diferente posicion. Esakinan ta inclui sinta, inclina, hinca rudia y para. (1 Cronicanan 17:16; Nehemias 8:6; Daniel 6:10; Marco 11:25) Loke ta realmente importante no ta un of otro postura cu otro hende por mira, sino e actitud corecto di curason. De echo, durante nos actividadnan diario of ora nos ta confronta un emergencia, nos por haci un oracion silencioso na unda cu nos ta. Yehova ta tende oracionnan asina maske hende rond di nos kisas no a ripara mes cu nos a haci oracion.—Nehemias 2:1-6.

11. Menciona algun asunto personal cu apropiadamente nos por haci oracion tocante nan.

11 Kico nos por pidi p’e den oracion? Bijbel ta splica: “Si nos pidi cualkier cos conforme su boluntad, e [Yehova] ta tende nos.” (1 Huan 5:14) Pues nos por pidi den oracion cualkier cos cu ta na harmonia cu Dios su boluntad. Acaso ta su boluntad pa nos haci oracion tocante asuntonan personal cu ta molestia nos? Sigur cu si! Haci oracion na Yehova por ta casi mescos cu papia cu un amigo intimo. Nos por papia abiertamente, y ‘drama nos curason’ na Dios. (Salmo 62:8) Ta na su luga pa nos pidi pa haya spirito santo, pasobra e lo yuda nos haci loke ta corecto. (Lucas 11:13) Tambe nos por pidi guia pa tuma decisionnan sabi y pa haya fortalesa pa trata cu dificultadnan cu exito. (Santiago 1:5) Ora nos peca,  nos mester pidi pordon a base di Cristo su sacrificio. (Efesionan 1:3, 7) Claro cu nos no mester haci oracion tocante nos asuntonan personal so. Nos mester amplia nos oracionnan y pidi tambe pa otro hende—miembronan di famia y tambe pa rumannan den fe.—Echonan 12:5; Colosensenan 4:12.

12. Con nos por duna asuntonan relaciona cu nos Tata celestial e luga mas importante den nos oracionnan?

12 Asuntonan relaciona cu Yehova Dios mester ta di prome importancia den nos oracionnan. Nos sigur tin motibo pa expresa alabansa y gradicimento sinsero na Yehova pa tur su bondad. (1 Cronicanan 29:10-13) Hesus a duna e oracion modelo, cu ta para skirbi na Mateo 6:9-13. Den e oracion ei el a siña nos pidi pa Dios su nomber sea santifica, es decir, trata como santo of sagrado. Despues el a menciona pa Dios su Reino bin y pa su boluntad sosode na tera mescos cu den shelo. Ta ora el a caba di trata e asuntonan importante aki relaciona cu Yehova, Hesus a duna atencion na asuntonan personal. Pues, ora nos tambe ta duna Dios e luga mas importante den nos oracionnan, nos ta demostra cu nos ta interesa den mas cu solamente nos propio bienestar.

13. Kico e Scritura ta indica tocante e largura di oracionnan aceptabel?

13 Con largo nos oracionnan mester ta? Bijbel no ta pone ningun limite na con largo oracionnan priva of publico mester ta. Nan por varia di un oracion cortico prome cu come te na un oracion largo den priva ora cu nos ta drama nos curason na Yehova. (1 Samuel 1:12, 15) Sinembargo, Hesus a condena personanan husto den nan mes bista cu tawata haci oracionnan largo pa show off. (Lucas 20:46, 47) Oracionnan asina no ta impresiona Yehova. Loke ta importante ta pa nos haci oracion di curason. Pues, e largura di oracionnan aceptabel por varia segun e necesidad y circunstancia.

Dios por tende bo oracion na cualkier ocasion

14. Kico Bijbel kiermen ora e ta anima nos pa “haci oracion tur ora bai”, y ki consuelo esaki ta duna nos?

 14 Cu ki frecuencia nos mester haci oracion? Bijbel ta anima nos pa “haci oracion tur ora bai”, pa ta “dedica na oracion” y pa “haci oracion sin stop.” (Lucas 18:1; Romanonan 12:12; 1 Tesalonicensenan 5:17) Claro cu e declaracionnan aki no kiermen cu nos mester ta resando na Yehova na tur momento di dia. Mas bien, Bijbel ta urgi nos pa haci oracion cu regularidad, gradiciendo Yehova continuamente pa su bondad mustra na nos y acudiendo na dje pa guia, consuelo y fortalesa. Ta un gran consuelo pa sa cu Yehova no ta pone limite na con largo of cuanto biaha nos por papia cu ne den oracion, no ta asina? Si di berdad nos ta aprecia e privilegio di oracion, nos lo haya hopi oportunidad pa haci oracion na nos Tata celestial.

15. Dicon nos mester bisa “Amen” na final di oracionnan personal of publico?

15 Dicon nos mester bisa “Amen” na final di un oracion? E palabra “amen” ta nifica “siguramente” of “sea asina.” Tin ehempelnan den Bijbel cu ta mustra cu ta apropiado pa bisa “Amen” na final di oracionnan personal of publico. (1 Cronicanan 16:36; Salmo 41:13) Door di bisa “Amen” na final di nos propio oracion, nos ta confirma cu nos expresionnan tawata haci cu sinseridad. Ora nos bisa “Amen”—sea silenciosamente of na bos halto—na final di un persona su oracion publico, nos ta indica cu nos ta di acuerdo cu e pensamento cu el a expresa.—1 Corintionan 14:16.

CON DIOS TA CONTESTA NOS ORACIONNAN

16. Ki siguransa nos por tin relaciona cu oracion?

16 Yehova realmente ta contesta oracion? Sigur cu si! Nos tin un base firme pa ta sigur cu Esun “cu ta scucha oracion” ta contesta oracionnan sinsero di miyones di hende. (Salmo 65:2) Yehova por contesta nos oracionnan den varios manera.

17. Dicon nos por bisa cu Dios ta uza su angelnan y su sirbidonan riba tera pa contesta nos oracionnan?

 17 Yehova ta uza su angelnan y su sirbidonan riba tera pa contesta oracion. (Hebreonan 1:13, 14) Tin hopi experencia di personanan cu a pidi Dios yudansa den oracion pa compronde Bijbel y cu poco despues un sirbido di Yehova a tuma contacto cu nan. Experencianan asina ta duna prueba cu angelnan ta dirigi e trabou di predica e Reino. (Revelacion 14:6) Pa contesta e oracionnan cu nos haci den un momento di berdadero necesidad, Yehova por motiva  un cristian pa bin yuda nos.—Proverbionan 12:25; Santiago 2:16.

Como contesta riba nos oracion, Yehova por motiva un cristian pa bin yuda nos

18. Con Yehova ta uza su spirito santo y su Palabra pa contesta oracion di su sirbidonan?

18 Yehova Dios ta uza tambe su spirito santo y su Palabra, Bijbel, pa contesta oracion di su sirbidonan. Kisas e ta contesta nos peticion pa haya yudansa pa trata cu situacionnan dificil, door di duna nos guia y fortalesa mediante su spirito santo. (2 Corintionan 4:7) Hopi bes e contesta riba nos peticion pa haya guia ta bin for di Bijbel, mediante cua Yehova ta duna nos yudansa pa tuma decisionnan sabi. Nos por haya textonan biblico practico durante nos estudio di Bijbel personal y segun cu nos ta lesa publicacionnan cristian, manera e buki aki. Ademas puntonan biblico cu nos mester tene cuenta cu ne por hala nos atencion via loke ta ser bisa na un reunion di congregacion of via e comentarionan di un anciano di congregacion cu ta interesa den nos bienestar.—Galationan 6:1.

19. Kico nos mester corda si tin biaha ta parce cu nos no ta haya contesta riba nos oracionnan?

19 Si ta parce cu Yehova ta tarda pa contesta nos oracionnan, esaki nunca ta pasobra e no por contesta nan. Mas bien nos tin cu corda cu Yehova ta contesta oracion di acuerdo cu su boluntad y na su debido tempo. E conoce nos necesidadnan y sa con pa atende nan hopi mas mihor  cu nos mes. Hopi biaha e ta permiti nos sigui ‘pidi, busca y bati.’ (Lucas 11:5-10) E perseverancia ei ta mustra Dios cu nos deseo ta profundo y cu nos fe ta berdadero. Ademas, kisas Yehova ta contesta nos oracionnan den un manera cu no ta bisto pa nos. Por ehempel, kisas e ta contesta nos oracion relaciona cu un cierto prueba dificil, no door di kita e dificultad, sino door di duna nos e fortalesa pa soport’e.—Filipensenan 4:13, NW.

20. Dicon nos tin cu probecha plenamente di e precioso privilegio di oracion?

20 Nos mester ta masha gradicido cu e Creador di e inmenso universo aki ta serca di tur cu ta sclama na dje na e manera corecto den oracion. (Salmo 145:18) Laga nos probecha plenamente di e precioso privilegio di oracion. Si nos haci esei, nos lo tin e speransa gososo di hala mas y mas serca di Yehova, Esun cu ta scucha oracion.