Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Kico Bijbel Ta Siña Realmente?

 CAPITULO DIESUN

Dicon Dios Ta Permiti Sufrimento?

Dicon Dios Ta Permiti Sufrimento?
  • Ta Dios a causa e sufrimento cu tin den mundo?

  • Ki cuestion a lanta den e hofi di Eden?

  • Con Dios lo drecha e daño cu sufrimento humano a causa?

1, 2. Ki clase di sufrimento hende ta confronta awe, hibando hopi di nan na haci ki pregunta?

DESPUES di un bataya teribel den un pais asota pa guera, a dera e miles di civilnan cu a ser mata, principalmente hende mohe y mucha, den un solo graf rondona di crus chikito. Riba cada crus tawatin skirbi: “Dicon?” Tin biaha esaki ta e pregunta di mas doloroso cu tur. Hende ta puntra esei yen di tristesa ora cu guera, desaster, malesa of crimen kita bida di nan sernan keri inocente, destrui nan cas of causa nan masha hopi sufrimento den otro manera. Nan kier sa dicon tal tragedia ta sosode cu nan.

2 Dicon Dios ta permiti sufrimento? Si Yehova Dios ta todopoderoso, amoroso, sabi y husto, dicon mundo tin asina tanto odio y inhusticia? Abo a yega di puntra bo mes e cosnan aki?

3, 4. (a) Kico ta mustra cu no ta malo pa puntra dicon Dios ta permiti sufrimento? (b) Kico Yehova ta pensa di maldad y sufrimento?

3 Ta malo pa puntra dicon Dios ta permiti sufrimento? Tin hende ta precupa cu si nan haci un pregunta asina, esei ta nifica cu nan no tin suficiente fe of cu nan ta mustra falta di respet pa Dios. Sinembargo, ora bo lesa Bijbel lo bo ripara cu hende fiel, temeroso di Dios, tawatin  pregunta similar. Por ehempel, profeta Habacuk a puntra Yehova: “Pakico bo ta haci mi mira inikidad, y ta haci mi mira maldad? Si, destruccion y violencia ta mi dilanti; tin desunion y pleito ta lanta.”—Habacuk 1:3.

Yehova lo caba cu tur sufrimento

4 Acaso Yehova a scual e fiel profeta Habacuk pasobra el a haci tal pregunta? No. Mas bien Dios a inclui Habacuk su palabranan sinsero den e registro inspira di Bijbel. Tambe Dios a yud’e haya un comprondemento mas cla di e asunto y un fe mas grandi. Yehova kier haci mescos pa bo. Corda cu Bijbel ta siña cu ‘e ta percura pa bo.’ (1 Pedro 5:7) Dios ta odia maldad y e sufrimento cu esei ta causa, mucho mas cu cualkier hende ta odia nan. (Isaias 55:8, 9) Dicon anto tin asina tanto sufrimento den mundo?

DICON TIN ASINA TANTO SUFRIMENTO?

5. Ki motibonan hende sa duna como splicacion pa sufrimento humano, pero kico Bijbel ta siña?

5 Hende di varios religion a bai serca nan lider- y guianan religioso pa puntra dicon tin asina tanto sufrimento. Hopi biaha e contesta cu nan ta haya ta cu sufrimento ta Dios su boluntad y cu for di hopi tempo pasa el  a determina tur cos cu mester sosode, incluso susesonan tragico. Hopi otro hende ta tende como contesta cu Dios su camindanan ta misterioso of cu e ta laga hende muri—asta mucha—pa asina e por tin nan den shelo serca dje. Pero manera bo a siña, Yehova Dios nunca ta causa loke ta malo. Bijbel ta bisa: “Leu sea di Dios di haci maldad, y di e Todopoderoso di comete inikidad”!—Job 34:10.

6. Dicon hopi hende ta haci e fout di culpa Dios pa e sufrimento cu tin den mundo?

6 Bo sa dicon hende ta haci e fout di culpa Dios pa tur e sufrimento cu tin den mundo? Den hopi caso, nan ta culpa Dios Todopoderoso pasobra nan ta pensa cu e ta e berdadero gobernante di e mundo aki. Nan no sa un berdad simpel pero importante cu Bijbel ta siña. Bo a siña e berdad ei den Capitulo 3 di e buki aki. E berdadero gobernante di e mundo aki ta Satanas e Diabel.

7, 8. (a) Con mundo ta refleha e personalidad di su gobernante? (b) Con imperfeccion humano y “tempo y suseso imprevisto” a contribui na sufrimento?

7 Bijbel ta declara bon cla: “Henter mundo ta bou di control di e malbado.” (1 Huan 5:19) Ora bo pensa un rato riba esaki, bo no ta haya cu esei ta logico? E mundo aki ta refleha e personalidad di e criatura spiritual invisibel cu ta “gaña henter mundo.” (Revelacion 12:9) Satanas ta odioso, engañoso y cruel. Pues e mundo, bou di su influencia, ta yen di odio, engaño y crueldad. Esei ta un motibo pakico tin asina tanto sufrimento.

8 Un di dos motibo pakico tin asina tanto sufrimento ta cu—manera nos a trata den Capitulo 3—humanidad ta imperfecto y pecaminoso for di tempo di e rebelion den e hofi di Eden. Hende pecaminoso ta inclina na lucha pa domina otro, y esaki ta resulta den guera, opresion y sufrimento. (Eclesiastes 4:1; 8:9) Un di tres motibo  pa sufrimento ta “tempo y suseso imprevisto.” (Eclesiastes 9:11, NW) Den un mundo cu no tin Yehova como su Gobernante protectivo, hende kisas ta sufri pasobra pa casualidad nan ta na e luga robes na e momento robes.

9. Dicon nos por ta sigur cu Yehova tin un bon motibo pa permiti sufrimento sigui?

9 Pa nos ta un consuelo pa sa cu Dios no ta causa sufrimento. E no ta responsabel pa e gueranan, crimennan, opresion of asta desasternan natural cu ta pone hende sufri. Pero toch nos kier sa, Dicon Yehova ta permiti tur e sufrimento aki? Si e ta e Todopoderoso, e tin e poder pa stop e. Dicon anto e no ta uza su poder pa haci esei? E Dios amoroso cu nos a siña conoce mester tin un bon motibo.—1 Huan 4:8.

UN CUESTION SUMAMENTE IMPORTANTE A SURGI

10. Kico Satanas a cuestiona, y con?

10 Pa nos haya sa dicon Dios ta permiti sufrimento, nos tin cu bai bek na e tempo cu sufrimento a cuminsa. Ora Satanas a pone Adam cu Eva desobedece Yehova, un cuestion importante a surgi. Satanas no a cuestiona Yehova su poder. Asta Satanas sa cu Yehova su poder no tin limite. Satanas mas bien a cuestiona Yehova su derecho di goberna. Door di yama Dios un mentiroso cu ta sconde loke ta bon for di su subditonan, Satanas a acusa Yehova di ta un mal gobernante. (Genesis 3:2-5) Satanas a bisa indirectamente cu lo a bai humanidad mas mihor sin Dios su gobernacion. Esaki tawata un atake contra Yehova su soberania, esta, su derecho di goberna.

11. Dicon Yehova no a djis destrui e rebeldenan den Eden?

11 Adam cu Eva a rebela contra Yehova. De echo, nan a bisa: “Nos no tin mester di Yehova como nos Gobernante. Nos por dicidi pa nos mes loke ta bon y loke ta malo.” Con Yehova por a resolve e cuestion ei? Con  lo e por a siña tur criatura inteligente cu e rebeldenan tawata ekiboca y cu su caminda ta realmente esun mihor? Un persona lo por bisa cu Dios simplemente mester a destrui e rebeldenan y cuminsa di nobo. Pero Yehova a declara su proposito di yena e tera cu desendientenan di Adam cu Eva, y e tawata kier pa nan biba den un paradijs riba tera. (Genesis 1:28) Yehova semper ta cumpli cu su proposito. (Isaias 55:10, 11) Ademas, destruccion di e rebeldenan den Eden lo no a contesta e pregunta cu a surgi relaciona cu Yehova su derecho di goberna.

12, 13. Duna un ehempel cu ta mustra dicon Yehova a permiti Satanas bira gobernante di e mundo aki y dicon Dios a permiti hende goberna nan mes.

12 Laga nos duna un ehempel. Imagina cu un docente ta splica su alumnonan con pa resolve un som of problema dificil di matematica. Un alumno sabi pero rebelde ta pretende cu e docente su manera di resolve e problema ta robes. Pa indica cu e docente no ta capasita, e rebelde aki ta insisti cu e sa un manera mucho mas mihor pa resolve e problema. Algun alumno ta pensa cu e tin rason,  y nan tambe ta bira rebelde. Kico e docente mester haci? Si e saca e rebeldenan for di klas, ki efecto esei lo tin riba e otro alumnonan? Nan lo kere cu e alumno rebelde y esnan cu a join e tin rason, toch? Tur e otro alumnonan den klas lo por perde respet pa e docente, pensando cu e tin miedo cu nan lo proba cu e ta robes. Pero supone cu e docente permiti e rebelde mustra e klas con e lo a soluciona e problema.

E alumno ta mas cualifica cu e docente?

13 Yehova a haci algo paresido na loke e docente ta haci. Corda cu e rebeldenan den Eden no tawata e uniconan envolvi. Tawatin miyones di angel ta wak. (Job 38:7; Daniel 7:10) E manera cu Yehova a atende e rebelion lo tawatin un gran efecto riba tur e angelnan ei y cu tempo riba tur criatura inteligente. Pues, kico Yehova a haci? El a permiti Satanas mustra con Satanas lo a goberna humanidad. Tambe Dios a permiti hende goberna nan mes bou di guia di Satanas.

14. Ki beneficio lo resulta di Yehova su decision di permiti hende goberna nan mes?

14 E docente den nos ehempel sa cu e rebelde y e alumnonan cu a tuma parti p’e ta robes. Pero e sa tambe cu door di duna nan e chens di purba proba nan punto, henter e klas lo beneficia. Ora e rebeldenan fracasa, tur alumno honesto lo mira cu e docente ta esun cualifica pa dirigi e klas. Nan lo compronde dicon despues di esei e docente lo saca ken cu rebela for di klas. Asina tambe, Yehova sa cu tur hende y angel di curason honrado lo beneficia di mira cu Satanas y su compañeronan rebelde a fracasa y cu hende no por goberna nan mes. Mescos cu Yeremias di pasado, nan lo siña e berdad sumamente importante aki: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan.”—Yeremias 10:23.

 DICON ASINA TANTO TEMPO?

15, 16. (a) Dicon Yehova a permiti sufrimento sigui pa asina tanto tempo? (b) Dicon Yehova no a preveni cosnan manera crimennan horibel?

15 Pero dicon Yehova a permiti sufrimento sigui pa asina tanto tempo? Y dicon e no ta percura pa cos malo no sosode? Wel, considera dos cos cu e docente den nos ehempel lo no haci. Na prome luga, lo e no stop e alumno rebelde di presenta su caso. Na di dos luga, e docente lo no yuda e rebelde proba su caso. Asina tambe, considera dos cos cu Yehova a determina di no haci. Na prome luga, e no a stop Satanas y esnan cu a tuma parti p’e di purba proba cu nan tin rason. Pesei tawata necesario pa laga tempo pasa. Durante e miles di añanan di historia humano, hende a haya chens di purba tur forma di goberna nan mes, esta, gobernacion humano. Humanidad a haci algun avance den ciencia y riba otro terenonan, pero inhusticia, pobresa, criminalidad y guera a bai di malo pa piyo. Awor a keda demostra cu gobernacion humano ta un fracaso.

16 Na di dos luga, Yehova no a yuda Satanas goberna e mundo aki. Por ehempel, si Dios lo mester a preveni crimennan horibel, de echo lo e ta dunando sosten na e caso di e rebeldenan, no ta berdad? Dios lo a laga hende pensa e ora ei cu kisas hende por goberna nan mes sin resultadonan desastroso, no ta berdad? Si Yehova lo mester a actua den e manera ei, lo el a participa den un mentira. Sinembargo, “ta imposibel pa Dios gaña.”—Hebreonan 6:18.

17, 18. Kico Yehova lo haci cu tur e daño cu a resulta door di e gobernacion di hende y door di e influencia di Satanas?

17 Pero kico di tur e daño cu a ser haci durante e tempo largo di rebelion contra Dios? Ta bon pa nos corda cu Yehova ta todopoderoso. Pesei e por y lo drecha e daño cu sufrimento humano a causa. Manera nos a siña caba, lo  bai drecha e daño causa na nos planeta door di comberti e tera den Paradijs. Lo elimina e efectonan di pica pa medio di fe den Hesus su sacrificio di rescate, y lo cansela e efectonan di morto mediante e resureccion. Pues anto, Dios lo uza Hesus “pa e destrui e obranan di Diabel.” (1 Huan 3:8) Yehova lo cumpli cu tur esaki net na tempo. Nos por ta contento cu e no a actua mas prome, pasobra su pasenshi a duna nos e oportunidad di siña e berdad y sirbie. (2 Pedro 3:9, 10) Mientrastanto, Dios a keda activo buscando adoradonan sinsero y yudando nan soporta cualkier sufrimento cu lo por bin riba nan den e mundo aki yen di problema.—Huan 4:23; 1 Corintionan 10:13.

18 Tin hende kisas ta puntra nan mes, Dios no por a preveni tur e sufrimento aki door di crea Adam cu Eva di tal manera cu nan lo no por a rebela? Pa contesta e pregunta ei bo tin cu corda riba un regalo precioso cu Yehova a duna bo.

CON LO BO UZA E REGALO CU DIOS A DUNA BO?

Dios lo yuda bo soporta sufrimento

19. Ki regalo precioso Yehova a duna nos, y dicon nos mester aprecia su balor?

19 Manera a wordo menciona den Capitulo 5, Dios a crea hende cu boluntad liber. Bo ta realisa ki un regalo precioso esei ta? Dios a traha masha hopi bestia mes, y por lo general ta instinto ta dirigi nan. Hende a traha algun robot cu nan por programa pa sigui tur ordo. Nos lo tawata felis si Dios a traha nos manera robot? No. Nos ta contento cu nos tin e libertad di scohe ki clase di persona nos lo kier ta, ki rumbo  den bida nos lo sigui, ki amistadnan nos lo forma, etcetera. Nos gusta tin un cierto grado di libertad, y esei ta loke Dios kier pa nos tin.

20, 21. Con ta e mihor manera cu nos por uza e regalo di boluntad liber, y dicon nos lo mester kier haci esei?

20 Yehova no ta interesa den sirbishi obliga. (2 Corintionan 9:7) Un ehempel. Cu kico un mayor lo keda mas contento—ora un yiu expresa su gratitud di curason of ora e hacie obliga? Pues e pregunta ta: Con abo lo uza e boluntad liber cu Yehova a duna bo? Satanas, Adam y Eva a uza nan boluntad liber na e manera di mas malo. Nan a rechasa Yehova Dios. Kico abo lo haci?

21 Bo tin e oportunidad pa uza e regalo maraviyoso di boluntad liber na e mihor manera cu tin. Bo por join e miyones di personanan cu a tuma un posicion firme na banda di Yehova. Nan ta haci Dios contento pasobra activamente nan ta participa den proba cu Satanas ta un mentiroso y un gran fracaso como gobernante. (Proverbionan 27:11) Abo tambe por haci esei door di scohe e rumbo corecto di bida. Den e siguiente capitulo nos lo splica esaki.

Mas Informacion

CURSO DI BIJBEL

Dicon Analisa Loke Bijbel Ta Bisa?

Bijbel ta duna contesta pa e preguntanan importante di bida na miyones di hende rond mundo. Abo kier ta un di nan?