Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Kico Bijbel Ta Siña Realmente?

 APENDIX

Dia di Huicio—Kico E Ta

Dia di Huicio—Kico E Ta

CON bo ta imagina Dia di Huicio? Hopi hende ta kere cu miles di miyones di alma lo presenta, un pa un, dilanti di e trono di Dios. Einan, Dios lo dicta sentencia di cada persona. Algun di nan lo haya e recompensa di un paradijs celestial, y otronan lo keda condena na tormento eterno. Sinembargo, Bijbel ta pinta completamente un otro cuadro di e periodo di tempo aki. E Palabra di Dios no ta describie como un tempo spantoso, sino como un tempo di speransa y restauracion.

Na Revelacion 20:11 y 12 nos ta lesa apostel Huan su descripcion di Dia di Huicio: “Mi a mira un gran trono blanco y esun cu tawata sinta riba dje, pa kende su presencia tera y shelo a hui bai, y ningun luga no a wordo haya pa nan. Y mi a mira e mortonan, grandi y chikito, para dilanti di e trono, y bukinan a wordo habri; y un otro buki a wordo habri, cual ta e buki di bida; y e mortonan a wordo husga for di loke tawata para skirbi den e bukinan, segun nan obranan.” Ken ta e Hues describi akinan?

Yehova Dios ta e Hues supremo di humanidad. Sinembargo, e trabou mes di husga e ta delega na un otro persona.  Segun Echonan 17:31, apostel Pablo a bisa cu Dios “a fiha un dia den cual e lo husga mundo cu husticia pa medio di un homber, kende el a apunta.” E Hues apunta aki ta Hesucristo resusita. (Huan 5:22) Pero ki tempo Dia di Huicio ta cuminsa? Con largo e ta dura?

E buki di Revelacion ta mustra cu Dia di Huicio ta cuminsa despues di e guera di Armagedon, despues di destruccion di Satanas su sistema di cosnan riba tera. * (Revelacion 16:14, 16; 19:19–20:3) Despues di Armagedon, lo sera Satanas y su demoñonan den un abismo pa mil aña. Durante e tempo ei, e 144.000 coherederonan celestial lo ta hues y lo “reina cu Cristo pa mil aña.” (Revelacion 14:1-3; 20:1-4; Romanonan 8:17) Dia di Huicio no ta un evento cu lo pasa pura pura y cu ta dura apenas 24 ora. E ta dura mil aña.

Durante e periodo di mil aña ei, Hesucristo lo “husga e bibonan y e mortonan.” (2 Timoteo 4:1) “E bibonan” lo ta e “multitud grandi” cu ta sobrevivi Armagedon. (Revelacion 7:9-17) Apostel Huan a mira tambe “e mortonan . . . para dilanti di e trono” di huicio. Manera Hesus a priminti, esnan “cu ta den graf lo tende [Cristo] su bos, y lo sali” pa medio di un resureccion. (Huan 5:28, 29; Echonan 24:15) Pero a base di kico lo husga tur hende?

Segun e vision di apostel Huan, “bukinan a wordo habri”, y “e mortonan a wordo husga for di loke tawata para skirbi den e bukinan, segun nan obranan.” Acaso e bukinan aki ta un registro di e hendenan su obranan di pasado? No, e huicio lo no ta basa riba loke hende a haci prome cu nan a muri. Con nos sa esei? Bijbel ta bisa: “Esun cu a muri ta libra di pica.” (Romanonan 6:7) Pues anto, e hendenan resusita lo lanta cu un registro limpi limpi, ya cu nan picanan di antes a ser cansela. Pesei e bukinan mester ta representa Dios su rekisitonan adicional. Pa biba pa semper, tanto e sobrevivientenan di Armagedon como esnan resusita lo tin cu obedece e mandamentonan  di Dios, incluso cualkier rekisito nobo cu Yehova lo por revela durante e mil aña. Pues, lo husga hende a base di loke nan ta haci durante Dia di Huicio.

Dia di Huicio lo duna miles di miyones di hende nan prome chens di siña tocante Dios su boluntad y cumpli cu ne. Esaki ta nifica cu un obra di educacion lo tuma luga na gran escala. En berdad e ora ei, “e habitantenan di mundo ta siña husticia.” (Isaias 26:9) Sinembargo, no ta tur hende lo ta dispuesto pa cumpli cu Dios su boluntad. Isaias 26:10 ta bisa: “Maske misericordia wordo mustra na e malbado, e no ta siña husticia; e ta trata inhusto den e tera di rectitud, y no kier mira e mahestad di SEÑOR.” E malbadonan aki lo ser mata permanentemente durante Dia di Huicio.—Isaias 65:20.

Na fin di e Dia di Huicio, e personanan cu ainda ta na bida lo “biba” den e pleno sentido di e palabra como hende perfecto. (Revelacion 20:5) Pues, durante Dia di Huicio humanidad lo ser restaura na su estado original perfecto. (1 Corintionan 15:24-28) E ora ei lo tuma luga un ultimo test. Dios lo saca Satanas for di caminda e ta sera y lo permitie gaña humanidad pa ultimo biaha. (Revelacion 20:3, 7-10) E hendenan cu resistie lo disfruta di e cumplimento completo di Bijbel su promesa: “E hustonan lo hereda e tera, y lo biba den dje pa semper.” (Salmo 37:29) Si, Dia di Huicio lo ta un bendicion pa tur hende fiel!

^ par. 1 Relaciona cu Armagedon, wak Perspicasia pa Compronde e Scritura, na Spaño, Volumen 1, pagina 680-681, 1086-1087, y capitulo 20 di Adora e Unico Dios Berdadero, ambos publica door di Testigonan di Yehova.

 

Mas Informacion

E TOREN DI VIGILANCIA

Kico e Fin Ta Nifica?

Bo tabata sa cu e mensahe di Bijbel tocante e fin ta un bon noticia?