Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Kico Bijbel Ta Siña Realmente?

 CAPITULO DOS

Bijbel—Un Buki for di Dios

Bijbel—Un Buki for di Dios
  • Den ki maneranan Bijbel ta distinto for di tur otro buki?

  • Con Bijbel por yuda bo enfrenta problemanan personal cu exito?

  • Dicon bo por confia e profecianan cu tin para skirbi den Bijbel?

1, 2. Den ki maneranan Bijbel ta un regalo emocionante di Dios?

BO POR corda un biaha cu bo a yega di haya un regalo masha special serca un bon amigo of amiga? Probablemente, esei no solamente a emociona bo sino cu tambe bo a sinti bo hopi felis. De echo, un regalo ta bisa bo algo di e dunado, esta, cu e ta aprecia bo amistad. Sin duda bo a gradici bo amigo of amiga pa su regalo cu ta un muestra di atencion.

2 Bijbel ta un regalo for di Dios, un regalo pa cua nos por ta hopi gradicido. E buki unico aki ta revela cosnan cu di otro manera nos lo no a haya sa nunca. Por ehempel, e ta conta nos tocante creacion di e shelonan yen di streya, di tera y di e prome homber y mohe. Den Bijbel tin principionan confiabel pa yuda nos enfrenta e problemanan y precupacionnan di bida cu exito. Bijbel ta splica con Dios lo cumpli cu su proposito y trece mihor condicionnan riba tera. Bijbel si ta un regalo hopi emocionante!

3. Kico e echo cu Yehova a percura pa nos haya e Bijbel ta bisa nos di Yehova, y dicon esaki ta conmove nos?

3 Ademas, Bijbel ta un regalo cu ta conmove nos, pasobra e ta revela algo tocante Esun cu a dun’e, Yehova Dios. E echo  cu el a percura pa nos haya un buki asina ta prueba cu e kier pa nos siña conoc’e bon. Si, Bijbel por yuda bo hala serca Yehova.

4. Kico ta impresiona bo tocante e distribucion di Bijbel?

4 Si bo tin un Bijbel, bo no ta e unico. Hende a publica e Bijbel—sea completo of en parte—den mas cu 2.300 idioma, pues e ta disponibel pa mas cu 90 porshento di e poblacion di mundo. Como promedio, mas cu un miyon Bijbel ta wordo distribui tur siman! Hende a produci miles di miyones di Bijbel, sea completo of en parte. Un cos ta sigur, no tin ningun otro buki manera Bijbel.

E “Traduccion di Mundo Nobo di e Santo Scritura” ta disponibel na hopi idioma

5. Den ki manera Bijbel ta “inspira pa Dios”?

5 Ademas, Bijbel “ta inspira pa Dios.” (2 Timoteo 3:16) Den ki manera? Bijbel mes ta contesta: “Hombernan santo di Dios a papia, inspira door di spirito santo.” (2 Pedro 1:21) Pa ilustra esaki: Un comerciante kisas ta laga un secretaria skirbi un carta. Den e carta tin pensamento y instruccion di e comerciante. Pesei realmente ta su carta, no di e secretaria. Di mesun manera, Bijbel ta contene Dios su mensahe, no di  e hombernan cu a skirbie. Pues, di berdad henter e Bijbel ta “e palabra di Dios.”—1 Tesalonicensenan 2:13.

HARMONIOSO Y EXACTO

6, 7. Dicon e harmonia cu tin entre e diferente partinan di Bijbel ta hopi remarcabel?

6 Bijbel a wordo skirbi durante un periodo di 1.600 aña. Su escritornan a biba na diferente tempo y a bin for di tur gremio. Algun tawata cunukero, piscado y wardado di carne. Otronan tawata profeta, hues y rei. Lucas, un di e escritornan di Evangelio, tawata docter. Apesar cu e escritornan di Bijbel a bin di varios antecedente, tur parti di Bijbel ta harmonisa of cuadra cu otro for di cuminsamento te final. *

7 E prome buki di Bijbel ta conta nos con e problemanan di humanidad a cuminsa. E ultimo buki ta mustra cu henter e tera lo bira un hofi, un paradijs. Tur e informacion cu tin den Bijbel ta abarca miles di aña di historia y cada parti di un manera of otro ta yuda nos compronde kico ta Dios su proposito y con lo e cumpli. E harmonia cu tin entre e diferente partinan di Bijbel ta impresionante, pero ta esei ta loke nos ta spera di un buki cu ta bin di Dios.

8. Duna algun ehempel cu ta mustra cu Bijbel ta exacto den asuntonan cientifico.

8 Bijbel ta exacto den asuntonan cientifico. E tin asta informacion cu tawata hopi avansa pa su tempo. Por ehempel, den e buki di Levitico tawatin leinan pa antiguo Israel tocante cuarentena y higiena, mientras cu e nacionnan rond di nan no tawata sa nada di e asuntonan ei. Na un tempo cu hende tawatin ideanan robes tocante e forma di nos planeta tera, Bijbel a referi na dje como un circulo. (Isaias 40:22) Cu exactitud Bijbel a bisa cu tera ‘ta colga riba nada.’ (Job 26:7)  Claro cu Bijbel no ta un buki pa studia ciencia. Pero ora e ta menciona asuntonan cientifico, e ta exacto. Esaki ta loke nos lo a spera di un buki for di Dios, no ta asina?

9. (a) Den ki maneranan Bijbel ta mustra cu su historianan ta exacto y confiabel? (b) Kico e honestidad di e escritornan biblico ta bisa bo di Bijbel?

9 Bijbel su historianan tambe ta exacto y confiabel. Su relatonan ta spesifico. Nan ta inclui no solamente e nomber di cierto personanan sino tambe nan liña di desendencia. * Na contraste cu otro historiadonan, kende hopi bes no a menciona e derotanan di nan propio pueblo, escritornan biblico si tawata honesto. Asta nan a skirbi nan propio fayonan y e fayonan di nan nacion. Por ehempel, den e buki biblico di Numbernan, e escritor Moises ta admiti e eror serio cu el a comete pa cua el a haya un bon scual. (Numbernan 20:2-12) Tal honestidad ta masha scars den otro relatonan historico, pero nos ta hay’e den Bijbel pasobra e ta un buki for di Dios.

UN BUKI DI SABIDURIA PRACTICO

10. Dicon no ta un sorpresa cu Bijbel ta un buki practico?

10 Como cu Bijbel ta inspira pa Dios, e ta “util pa siñansa, pa reprendemento, pa coreccion.” (2 Timoteo 3:16) Si, Bijbel ta un buki practico. E ta refleha un comprondemento profundo di hende su naturalesa. Pero esei no ta un sorpresa, pasobra Bijbel su Autor, Yehova Dios, ta e Creador. E ta compronde nos manera di pensa y nos emocionnan mas mihor cu nos mes. Ademas, Yehova sa kico nos mester pa nos ta felis. E sa tambe ki rumbo den bida nos mester evita.

11, 12. (a) Riba ki topico Hesus a papia den su Sermon Riba Sero? (b) Ki otro asuntonan practico Bijbel ta considera, y dicon su conseho ta semper bai balioso?

11 Tuma por ehempel Hesus su speech cu nan ta yama  e Sermon Riba Sero cu ta para skirbi na Mateo capitulo 5 te cu 7. E speech aki tawata maestral. E ta un bon ehempel con pa siña hende. Den dje Hesus a papia riba varios topico, entre otro, e manera pa haya berdadero felicidad, con pa resolve desacuerdo, con pa haci oracion y con pa tin e punto di bista corecto di cosnan material. E palabranan di Hesus ta mesun poderoso y practico awe cu nan tawata tempo cu el a papia riba nan.

 12 Algun principio di Bijbel ta trata cu bida di famia, custumber di trabou y relacion cu otro hende. E principionan di Bijbel ta conta pa tur hende, y su conseho semper ta probechoso. Loke Dios a bisa via profeta Isaias ta resumi e sabiduria cu nos ta haya den Bijbel: “Ami ta SEÑOR bo Dios, kende ta siña bo, pa bo prospera.”—Isaias 48:17.

UN BUKI DI PROFECIA

E escritor biblico Isaias a predeci e caida di Babilonia

13. Ki detayenan Yehova a inspira profeta Isaias pa skirbi tocante Babilonia?

13 Den Bijbel tin cantidad di profecia, di cua hopi a cumpli caba. Considera un ehempel. Mediante profeta Isaias (cu a biba den siglo 8 prome cu nos era), Yehova a profetisa cu e stad di Babilonia lo a ser destrui. (Isaias 13:19; 14:22, 23) El a duna detayenan spesifico con esaki lo a sosode. Ehersitonan invasor lo a seca e riu di Babilonia y marcha drenta den e stad sin cu nan tin cu bringa. Esei no ta tur cos. Isaias su profecia asta a menciona nomber di e rei cu lo a conkista Babilonia—Ciro.—Isaias 44:27–45:2.

14, 15. Con algun detaye di Isaias su profecia tocante Babilonia a cumpli?

14 Un 200 aña despues—riba e anochi di 5 pa 6 di october di aña 539 prome cu nos era—un ehersito a kampeer serca di Babilonia. Ken tawata su comandante? Un rei di Persia cu yama Ciro. Pues, escenario tawata cla pa e cumplimento di un profecia asombroso tuma luga. Pero e ehersito di Ciro lo a invadi Babilonia sin un bataya, manera Bijbel a predeci?

15 E Babilonionan tawatin un fiesta e anochi ei y a sinti nan mes sigur tras di e murayanan solido di nan stad. Mientrastanto, Ciro na un manera sabi a desvia e awa di e riu cu tawata core door di e stad. No a dura hopi cu e awa a baha suficiente pa su hombernan por a pasa door di e riu y yega na e murayanan di e stad. Pero con e ehersito di  Ciro lo por a drenta paden di e murayanan di Babilonia? Pa un of otro motibo, e anochi ei e soldanan a descuida y a laga e portanan di e stad habri!

16. (a) Kico Isaias a predeci tocante e resultado final di Babilonia? (b) Con Isaias su profecia tocante e desolacion di Babilonia a cumpli?

16 Bijbel a predeci tocante Babilonia: “Di generacion pa generacion nunca mas e lo wordo habita ni pobla; ni Arabir lo no arma su tent ayanan, ni wardado di carne lo no pone su tou di carne drumi ayanan.” (Isaias 13:20) E profecia aki a haci mas cu predeci caida di e stad. El a mustra cu Babilonia lo a keda permanentemente desola. Bo por mira evidencia di e cumplimento di e palabranan aki. E sitio inhabita di antiguo Babilonia—cu ta keda un 80 kilometer pasuit di Bagdad, Irak—ta prueba cu loke Yehova a papia mediante Isaias a cumpli: “Lo mi barie cu e basora di destruccion.”—Isaias 14:22, 23. *

Ruinanan di Babilonia

17. Con e cumplimento di profecia biblico ta haci bo fe mas fuerte?

 17 Bo fe ta bira mas fuerte ora cu bo considera con Bijbel ta un buki di profecia confiabel, no ta berdad? De echo, si Yehova Dios a cumpli cu su promesanan di pasado, nos tin tur motibo pa ta sigur cu lo e cumpli tambe cu su promesa di transforma e tera den un paradijs. (Numbernan 23:19) Si, nos tin “e speransa di bida eterno, cu Dios, kende no por gaña, a priminti hopi siglonan pasa.”—Tito 1:2. *

“E PALABRA DI DIOS TA BIBO”

18. Ki declaracion potente apostel cristian Pablo a haci tocante “e palabra di Dios”?

18 For di loke nos a considera den e capitulo aki, ta bisto  cu Bijbel ta realmente un buki unico. Sinembargo, su balor ta bai mucho mas leu cu e harmonia cu tin entre su diferente partinan, su exactitud cientifico y historico, su sabiduria practico y su profecianan confiabel. Apostel cristian Pablo a skirbi: “E palabra di Dios ta bibo y activo y mas skerpi cu cualkier spada di dos filo, y ta penetra te na e division di alma y spirito, y di scarnir y tuti, y ta capas pa husga e pensamentonan y intencionnan di curason.”—Hebreonan 4:12.

19, 20. (a) Con Bijbel por yuda bo examina bo mes? (b) Con bo por mustra bo gratitud pa Dios su regalo unico, esta, Bijbel?

19 Lesamento di e “palabra” of mensahe di Dios den Bijbel por cambia nos bida. E por yuda nos haci un bon examinacion di nos mes. Kisas nos ta bisa cu nos ta stima Dios, pero e manera cu nos ta reacciona riba loke su Palabra inspira—Bijbel—ta siña, lo revela nos berdadero pensamentonan, asta e berdadero intencionnan di nos curason.

20 Bijbel ta realmente un buki for di Dios. E ta un buki cu nos mester lesa, studia y stima. Mustra bo gratitud pa e regalo divino aki door di sigui analisa su contenido. Segun cu bo ta haci esei, lo bo haya un comprondemento profundo di Dios su proposito pa humanidad. Den e siguiente capitulo nos lo trata kico precis e proposito ei ta y con lo e ser realisa.

^ par. 6 Aunke tin hende ta bisa cu cierto partinan di Bijbel ta contradeci otro, e declaracionnan ei ta infunda. Wak capitulo 7 di e buki E Bijbel—e Palabra di Dios of e palabra di hende? publica door di Testigonan di Yehova.

^ par. 9 Por ehempel, tuma nota di e liña di desendencia detaya di Hesus cu tin na Lucas 3:23-38.

^ par. 16 Pa mas informacion riba profecia biblico, wak pagina 27-29 di e foyeto Un Buki pa Tur Hende, publica door di Testigonan di Yehova.

^ par. 17 E destruccion di Babilonia ta djis un ehempel di profecia di Bijbel cu a cumpli. Otro ehempelnan ta, entre otro, e destruccion di Tiro y di Ninive. (Ezekiel 26:1-5; Sofonias 2:13-15) Ademas, e profecia di Daniel a predeci cu un serie di imperio mundial lo a bin na poder despues di Babilonia. Esakinan a inclui Medopersia y Grecia. (Daniel 8:5-7, 20-22) Wak e articulo di Apendix, “Hesucristo—E Mesias Priminti”, pa un consideracion di e tantisimo profecianan Mesianico cu a cumpli den Hesucristo.