Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Kico Bijbel Ta Siña Realmente?

 CAPITULO DIESDOS

Biba na un Manera Cu Ta Agrada Dios

Biba na un Manera Cu Ta Agrada Dios
  • Con bo por bira Dios su amigo?

  • Den ki manera e cuestion cu Satanas a lanta ta envolve abo?

  • Ki conducta no ta agrada Yehova?

  • Con bo por biba na un manera cu ta agrada Dios?

1, 2. Menciona algun ehempel di hendenan cu Yehova a considera como su amigonan intimo.

KI CLASE di persona lo bo scohe como amigo of amiga? Muy probablemente lo bo kier compania di un hende cu ta comparti bo punto di bista, bo interesnan y norma- y balornan. Ademas, lo bo sinti bo atrai na un persona cu tin bon cualidadnan, manera honrades y bondad.

2 Atrabes di henter historia, Dios a scohe cierto hendenan como su amigonan intimo. Por ehempel, Yehova a yama Abraham su amigo. (Isaias 41:8; Santiago 2:23) Dios a referi na David como “un homber conforme mi curason” pasobra e tawata e clase di persona cu Yehova ta stima. (Echonan 13:22) Y Yehova a considera profeta Daniel como un persona “masha stima.”—Daniel 9:23.

3. Dicon Yehova a scohe cierto hendenan como su amigo?

3 Dicon Yehova a considera Abraham, David y Daniel como su amigonan? Wel, el a bisa Abraham: “Bo a obedece mi bos.” (Genesis 22:18) Pues Yehova ta hala serca di e personanan cu humildemente ta haci loke e ta pidi di nan. El a bisa e Israelitanan: “Obedece mi bos y lo mi ta boso Dios y boso lo ta mi pueblo.” (Yeremias 7:23) Si abo obedece Yehova, bo tambe por bira su amigo!

 YEHOVA TA FORTALECE SU AMIGONAN

4, 5. Con Yehova ta sostene su pueblo fuertemente?

4 Pensa un rato riba e beneficionan di un amistad cu Dios. Bijbel ta bisa cu Yehova ta en busca di oportunidad “pa e por sostene fuertemente esnan cu nan curason ta completamente di dje.” (2 Cronicanan 16:9) Con Yehova por sostene bo fuertemente? Salmo 32:8 ta indica un manera. Ei Yehova ta bisa: “Lo mi instrui bo y siña bo e caminda cu bo tin cu cana; lo mi conseha bo; mi wowo ta riba bo.”

5 Ki un expresion conmovedor di Yehova su cuido y interes! Lo e duna bo e guia necesario y proteha bo segun cu bo ta aplic’e. Dios kier yuda bo pasa cu exito door di bo dificultadnan y testnan. (Salmo 55:22) Pues si bo ta sirbi Yehova cu un curason completo, bo por tin e mesun confiansa cu e salmista cu a bisa: “Mi a pone SEÑOR semper mi dilanti; pasobra e ta na mi man drechi, lo mi no wordo movi.” (Salmo 16:8; 63:8) Si, Yehova por yuda bo biba na un manera cu ta agrad’e. Pero manera bo sa, Dios tin un enemigo cu lo kier stroba bo di haci esei.

E CUESTION CU SATANAS A LANTA

6. Ki acusacion Satanas tawatin relaciona cu hende?

6 Capitulo 11 di e buki aki a splica con Satanas e Diabel a cuestiona Dios su soberania. Satanas a acusa Dios di ta gaña y a bisa indirectamente cu no tawata husto cu Yehova no a laga Adam cu Eva dicidi pa nan mes loke ta bon y loke ta malo. Despues cu Adam cu Eva a peca y e tera a cuminsa yena cu nan desendientenan, Satanas a cuestiona tur hende su motibo pa actua. Satanas su acusacion tawata: “Hende no ta sirbi Dios pasobra nan stim’e. Duna mi un chens, y mi por bira cualkier hende contra Dios.” E relato di e homber cu yama Job ta mustra cu ta esaki ta loke Satanas a kere. Ken Job tawata, y con e tawata envolvi den Satanas su desafio?

7, 8. (a) Dicon Job a destaca entre e hendenan di e tempo ei? (b) Con Satanas a cuestiona Job su motibo pa sirbi Dios?

 7 Job a biba un 3.600 aña pasa. E tawata un bon hende, pasobra Yehova a bisa: “No tin ningun hende manera e riba tera, un hende perfecto y recto, cu ta teme Dios y cu ta aparta su mes for di maldad.” (Job 1:8) Job a agrada Dios.

8 Satanas a cuestiona Job su motibo pa sirbi Dios. Diabel a bisa Yehova: “Bo no a traha un trankera rond di [Job], rond di su cas, y rond di tur loke e tin na tur banda? Bo a bendiciona e trabou di su man, y su propiedadnan a aumenta den e tera. Ma saca bo man awor y mishi cu tur loke e tin; siguramente e lo maldiciona bo den bo cara.”—Job 1:10, 11.

9. Con Yehova a reacciona riba e desafio di Satanas, y dicon?

9 Pues, Satanas a argumenta cu Job a sirbi Dios djis pa loke e tawata haya a cambio. Tambe Diabel a bin cu e acusacion cu si pone Job na prueba, lo el a bira contra Dios. Con Yehova a reacciona riba e acusacion of desafio di Satanas? Siendo cu e cuestion tawatin di aber cu Job su motibo pa sirbi Dios, Yehova a permiti Satanas test Job. Di e manera aki, lo a keda demostra bon cla si Job tawata stima Dios of no.

SATANAS TA TEST JOB

10. Ki pruebanan Job a confronta, y con el a reacciona?

10 Poco despues Satanas a test Job den varios manera. Un parti di Job su bestianan a ser horta, y otronan a ser mata. Mayoria di su sirbidonan a ser mata. Esaki a trece problema economico. Un otro tragedia a tuma luga ora cu Job su dies yiunan a muri den un tormenta. Pero apesar di e susesonan teribel aki, “Job no a peca ni e no a culpa Dios.”—Job 1:22.

11. (a) Ki di dos acusacion Satanas a haci relaciona cu Job, y con Yehova a reacciona? (b) Con Job a reacciona riba su malesa doloroso?

11 Satanas no a entrega. Lo e mester a pensa cu maske Job por a soporta e perdida di su propiedadnan, sirbidonan y  yiunan, sigur lo e bai contra Dios si e bira malo. Yehova a laga Satanas dal Job cu un malesa repugnante y doloroso. Pero ni esaki no a pone Job perde su fe den Dios. Al contrario, el a bisa cu firmesa: “Te na mi morto lo mi no bandona mi integridad.”—Job 27:5.

Dios a recompensa Job pa e manera fiel cu el a actua

12. Con Job su conducta a duna prueba cu e acusacion di Diabel tawata falso?

12 Job no tawata sa cu ta Satanas tawata e causa di su problemanan. Como cu e no tawata sa e detayenan di e desafio cu Diabel a lanta contra Yehova su soberania, Job a teme cu ta Dios tawata e fuente di su problemanan. (Job 6:4; 16:11-14) Pero toch el a mantene su integridad na Yehova. Anto door di keda fiel Job a duna prueba cu Satanas su acusacion, di cu el a sirbi Dios pa motibonan egoista, tawata falso.

13. Kico a sosode pasobra Job tawata fiel na Dios?

13 Job su fieldad a permiti Yehova duna Satanas un bon contesta contra su acusacion ofensivo. Job di berdad tawata Yehova su amigo, y Dios a recompens’e pa e manera fiel cu el a actua.—Job 42:12-17.

CON ABO TA ENVOLVI

14, 15. Dicon nos por bisa cu e acusacion di Satanas relaciona cu Job ta conta pa tur hende?

14 E cuestion di integridad na Dios cu Satanas a lanta no tawata dirigi contra Job so. Abo tambe ta envolvi. Proverbionan 27:11 ta mustra esaki bon cla. Einan e Palabra di Yehova ta bisa: “Sea sabi, mi yiu, y haci mi curason contento, pa mi por contesta esun cu reprocha mi.” E palabranan aki, skirbi cientos di aña despues di Job su morto ta indica cu Satanas ta esun principal cu ta reprocha Dios y acusa Su sirbidonan. Si nos ta biba na un manera cu ta agrada Yehova, eigenlijk nos ta yuda duna un contesta na e acusacionnan falso di Satanas, y asina nos ta haci Dios su curason contento. Con esei ta laga bo sinti? Lo no ta  maraviyoso di por tin parti den contesta e acusacionnan falso di Diabel, asta si esei ta nifica cu bo tin cu haci cierto cambionan den bo bida?

15 Tuma nota di loke Satanas a bisa: “Tur loke un hende tin e lo duna pa su bida.” (Job 2:4) Door di bisa “un hende”, Satanas a mustra bon cla cu su acusacion no tawata conta pa Job so sino pa tur hende. Esei ta un punto hopi importante. Satanas a cuestiona bo integridad na Dios. Diabel lo kier mira bo desobedece Dios y bandona e caminda di husticia ora cu dificultadnan surgi. Con Satanas lo por purba logra esei?

16. (a) Ki metodonan Satanas ta uza pa purba aparta hende for di Dios? (b) Con Diabel lo por uza e metodonan aki contra bo?

16 Manera nos a considera den Capitulo 10, Satanas ta uza varios metodo pa aparta hende for di Dios. Na un banda, e ta ataca “manera un leon cu ta gruña, buscando ken e por devora.” (1 Pedro 5:8) Pues lo bo por mira Satanas su influencia ora cu amigo, famia of otro hende ta bai contra bo esfuerso pa studia Bijbel y aplica loke bo ta siña. * (Huan 15:19, 20) Di otro banda, Satanas ta sigui “disfrasa su mes como un angel di lus.” (2 Corintionan 11:14) Diabel por uza medionan sutil pa gaña bo y kita bo di biba na un manera cu ta agrada Dios. E por uza desanimacion tambe, podise door di laga bo sinti cu bo no ta suficiente bon pa agrada Dios. (Proverbionan 24:10) Sea cu Satanas ta actua manera “un leon cu ta gruña” of manera “un angel di lus”, su acusacion ta keda mescos: E ta bisa cu ora bo ta confronta dificultad of tentacion, lo bo stop di sirbi Dios. Con bo por contesta su acusacion y demostra bo integridad na Dios, manera Job a haci?

 OBEDECE YEHOVA SU MANDAMENTONAN

17. Kico ta e motibo principal pa obedece Yehova su mandamentonan?

17 Bo por contesta e desafio di Satanas door di biba na un manera cu ta agrada Dios. Kico esaki ta encera? Bijbel ta contesta: “Stima SEÑOR bo Dios cu henter bo curason, cu henter bo alma y cu tur bo forsa.” (Deuteronomio 6:5) Segun cu bo amor pa Dios ta crece, mas grandi bo deseo ta bira pa haci loke e ta rekeri di bo. Apostel Huan a skirbi: “Esaki ta e amor di Dios, cu nos ta warda su mandamentonan.” Anto si bo ta stima Yehova di henter bo curason, lo bo ripara cu “su mandamentonan no ta pisa.”—1 Huan 5:3.

18, 19. (a) Menciona algun di Yehova su mandamentonan. (Wak e cuadro “ Evita Loke Yehova Ta Odia.”) (b) Con nos por sa cu Dios no ta pidiendo demasiado for di nos?

18 Kico Yehova su mandamentonan ta? Algun di nan ta encera conducta cu nos tin cu evita. Por ehempel, tuma nota di e cuadro, titula “ Evita Loke Yehova Ta Odia.” Einan bo ta haya un lista di e tipo di conducta cu Bijbel claramente ta condena. Na prome bista, algun di e practicanan riba e lista kisas no ta parce dje malo ei. Pero despues cu bo medita riba e textonan biblico menciona, lo bo mira probablemente e sabiduria di e leinan di Yehova. Haci cambio den bo conducta por ta e reto di mas grandi cu bo a yega di confronta. Sinembargo, biba na un manera cu ta agrada Dios ta duna gran satisfaccion y felicidad. (Isaias 48:17, 18) Y e ta algo cu ta na bo alcanse. Con nos por sa esei?

19 Yehova nunca no ta pidi di nos mas di loke nos por haci. (Deuteronomio 30:11-14) E conoce nos potencial y nos limitacionnan mas mihor cu nos mes. (Salmo 103:14)  Ademas, Yehova por duna nos e fortalesa pa obedec’e. Apostel Pablo a skirbi: “Dios ta fiel, kende lo no permiti pa boso wordo tenta mas cu boso por soporta, ma hunto cu e tentacion e lo provee salida tambe, pa boso por soporta.” (1 Corintionan 10:13) Pa yuda bo soporta, Yehova por asta duna bo “poder mas aya di loke ta normal.” (2 Corintionan 4:7, NW) Despues cu Pablo a soporta hopi dificultad, e por a bisa: “Pa tur cos mi tin e forsa den birtud di esun cu ta duna mi poder.”—Filipensenan 4:13, NW.

 DESAROYA CUALIDADNAN CU TA AGRADA DIOS

20. Ki cualidadnan cu ta agrada Dios bo mester desaroya, y pakico nan ta importante?

20 Claro cu agrada Yehova ta encera mas cu djis evita loke e ta odia. Tambe bo tin cu stima loke e ta stima. (Romanonan 12:9) Bo ta sinti bo atrai na hende cu ta comparti bo punto di bista, bo interesnan y norma- y balornan, no ta asina? Yehova tambe. Pesei siña stima e cosnan cu Yehova ta stima. Salmo 15:1-5 ta describi algun di e cosnan aki, y  einan nos ta lesa tocante e hendenan cu Dios ta considera su amigo. Amigonan di Yehova ta desplega loke Bijbel ta yama “fruta di e spirito.” E ta inclui cualidadnan manera “amor, goso, pas, pasenshi, cariño, bondad, fieldad, mansedumbre, dominio propio.”—Galationan 5:22, 23.

21. Kico lo yuda bo desaroya cualidadnan cu Yehova ta stima?

21 Lesa y studia Bijbel regularmente lo yuda bo desaroya cualidadnan cu Yehova ta stima. Y siña loke Dios ta rekeri, lo yuda bo pone bo pensamentonan na harmonia cu Dios su manera di pensa. (Isaias 30:20, 21) Mas bo fortalece bo amor pa Yehova, mas grandi bo deseo pa biba na un manera cu ta agrada Dios lo ta.

22. Kico lo bo logra si bo ta biba na un manera cu ta agrada Dios?

22 Pa biba na un manera cu ta agrada Yehova ta rekeri esfuerso. Bijbel ta compara e proceso di cambia bo bida cu kitamento di bo personalidad bieu y bistimento di un nobo. (Colosensenan 3:9, 10) Pero relaciona cu e mandamentonan di Yehova, e salmista a skirbi: “Obediencia na nan ta trece gran recompensa cu ne.” (Salmo 19:11) Abo tambe lo ripara cu biba na un manera cu ta agrada Dios tin hopi recompensa. Door di haci esei, lo bo duna un contesta na e desafio di Satanas y haci Yehova su curason contento!

^ par. 16 Esaki no ta nifica cu Satanas personalmente ta controla hende cu ta bai contra bo. Pero Satanas ta e dios di e mundo aki, y henter mundo ta den su poder. (2 Corintionan 4:4; 1 Huan 5:19) Pues nos por spera cu ora nos ta hiba un bida cu ta agrada Dios esei lo ta un proceder cu no ta popular, y algun hende lo bai contra bo.