Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Kico Bijbel Ta Siña Realmente?

 CAPITULO SHETE

Berdadero Speransa pa Bo Sernan Keri Cu A Muri

Berdadero Speransa pa Bo Sernan Keri Cu A Muri
  • Con nos por sa cu e resureccion realmente lo tuma luga?

  • Kico ta indica cu Yehova ta desea di resusita e mortonan?

  • Ken lo haya resureccion?

1-3. Ki enemigo ta persigui nos tur, y dicon un consideracion di loke Bijbel ta siña lo duna nos un poco alivio?

IMAGINA cu bo ta huyendo for di un enemigo cruel. E ta hopi mas fuerte y mas lihe cu bo. Bo sa cu e ta sin misericordia pasobra bo a mir’e mata algun di bo amigonan. Pero con cu bo purba core bai lag’e, e ta sigui yega mas serca. Parce cu no tin ningun scapatorio. Pero diripiente, ata un rescatado ta presenta na bo lado. E ta hopi mas poderoso cu bo enemigo, y e ta priminti di yuda bo. Ki un gran alivio bo ta sinti!

2 Den un sentido, bo ta ser persigui door di un enemigo asina. Y no abo so, nos tur. Manera nos a siña den e capitulo anterior, Bijbel ta yama morto un enemigo. Ni un di nos por core bai lag’e ni resistie. Mayoria di nos a mira con e enemigo aki a kita bida di hendenan cu nos stima. Pero Yehova ta hopi mas poderoso cu morto. E ta e Rescatador amoroso cu ya caba a demostra cu e por derota e enemigo aki. Y el a priminti di destrui e enemigo aki—morto—unabes pa semper. Bijbel ta siña: “E delaster enemigo cu lo wordo destrui ta morto.” (1 Corintionan 15:26) Esei ta bon noticia!

3 Laga nos considera brevemente con e enemigo, morto, ta afecta nos ora cu e kita bida di un hende cu nos conoce.  Esaki lo yuda nos compronde un promesa cu lo haci nos felis. E cos ta cu Yehova ta priminti cu e mortonan lo biba atrobe. (Isaias 26:19) Nan lo haya resureccion. Esei ta e speransa cu Dios ta duna nos.

ORA UN SER KERI MURI

4. (a) Dicon e manera cu Hesus a reacciona riba morto di un ser keri ta siña nos kico ta Yehova su sintimento tocante morto? (b) Hesus a desaroya ki amistad special?

4 Bo a yega di perde un ser keri? E dolor, tristesa y sintimento di impotencia por parce insoportabel. Na momentonan asina, nos tin cu acudi na e Palabra di Dios pa haya consuelo. (2 Corintionan 1:3, 4) Bijbel ta yuda nos compronde kico Yehova cu Hesus ta pensa tocante morto. Hesus semper a refleha cualidadnan di su Tata perfectamente, y tin un relato cu ta conta con Hesus a reacciona ora cu el a experencia e dolor di perde un ser keri. (Huan 14:9) Tur biaha cu Hesus tawata na Herusalem, e tawatin custumber di bai bishita Lazaro y su ruman mohenan, Maria y Marta, kendenan tawata biba na Betania, un stad djis eibanda. Nan a bira amigo intimo. Bijbel ta bisa: “Hesus tawata stima Marta y su ruman mohe y Lazaro.” (Huan 11:5) Pero manera nos a siña den e capitulo anterior, Lazaro a muri.

5, 6. (a) Con Hesus a reacciona ora cu e tawata hunto cu Lazaro su famia- y amigonan cu tawata yora? (b) Dicon Hesus su tristesa ta un animacion pa nos?

5 Con Hesus a sinti ora cu su amigo a muri? E relato ta bisa nos cu Hesus a bai serca Lazaro su famia- y amigonan segun cu nan tawata yora su morto. Ora Hesus a mira nan, “el a bira profundamente conmovi den spirito y masha emociona.” Anto e relato ta bisa: “Hesus a yora.” (Huan 11:33, 35) Hesus su tristesa a nifica cu e no tawatin ningun speransa? Absolutamente cu no. De echo, Hesus tawata sa cu algo maraviyoso tawata a punto di tuma luga. (Huan 11:3, 4) Pero toch el a sinti e dolor y tristesa cu morto ta trece.

 6 Den un sentido, Hesus su tristesa ta un animacion pa nos. E ta siña nos cu Hesus y su Tata, Yehova, ta odia morto. Pero Yehova Dios por lucha contra e enemigo ei y venc’e! Laga nos mira kico Dios a capasita Hesus pa haci.

“LAZARO, BIN PAFO!”

7, 8. Dicon e caso di Lazaro lo por a parce sin speransa pa e hendenan presente, pero kico Hesus a haci?

7 Lazaro tawata dera den un cueba, y Hesus a pidi pa kita e piedra cu a tapa entrada di e cueba. Marta no tawata di acuerdo pa haci esei pasobra despues di cuater dia, Lazaro su curpa mester a cuminsa putri caba. (Huan 11:39) Desde un punto di bista humano, ta ki speransa por tawatin?

E resureccion di Lazaro a resulta den gran alegria.—Huan 11:38-44

8 Pero nan a hala e piedra, y Hesus a yama na bos halto: “Lazaro, bin pafo!” Kico a sosode? “Esun cu a muri a bin pafo.” (Huan 11:43, 44) Bo por imagina e alegria di e hendenan presente? Sea cu Lazaro tawata nan ruman, famia, amigo of biciña, nan tawata sa cu el a muri. Sinembargo, at’e aki—e mesun homber stima—para meimei di nan atrobe. Esei lo mester a parce un cos increibel. Hopi hende sin duda lo a brasa Lazaro di alegria. Ki un victoria riba morto!

Elias a resusita e yiu homber di un biuda.—1 Reinan 17:17-24

9, 10. (a) Con Hesus a revela e Fuente di su poder pa resusita Lazaro? (b) Menciona algun beneficio di lesa e relatonan di resureccion den Bijbel.

9 Hesus no a pretende cu el a haci e milager asombroso aki cu su mes poder. Den su oracion djis prome cu el a yama Lazaro pa sali, el a mustra bon cla cu ta Yehova tawata e Fuente di e resureccion. (Huan 11:41, 42) Esaki no tawata e unico biaha cu Yehova a uza su poder pa resusita un hende morto. E resureccion di Lazaro ta un di e nuebe milagernan di resureccion cu tin para skirbi den e Palabra di Dios. * Ta un placer  pa lesa y studia e relatonan aki. Nan ta siña nos cu Dios no ta haci distincion di persona, pasobra entre esnan resusita tawatin hoben y bieu, homber y mohe, Israelita y no Israelita. Y ki un alegria e relatonan aki di Bijbel ta describi! Por ehempel, ora Hesus a lanta un hobensita for di morto, su mayornan “tawata for di nan mes di gran excitacion.” (Marco 5:42, NW) Si, Yehova a duna nan un motibo di alegra cu nunca nan lo no a lubida.

Apostel Pedro a resusita e mohe cristian Dorcas.Echonan 9:36-42

10 Claro cu e personanan cu Hesus a resusita, cu tempo a bolbe muri. Acaso esaki ta nifica cu no a bale la pena resusita nan? No. E relatonan biblico aki ta confirma berdadnan importante y ta duna nos speransa.

SIÑA FOR DI E RELATONAN DI RESURECCION

11. Con e relato di Lazaro su resureccion ta yuda confirma e berdad cu tin para skirbi na Eclesiastes 9:5?

11 Bijbel ta siña cu e mortonan “no sa nada.” Nan no ta na bida ni nan no tin un existencia conciente ningun caminda. E relato di Lazaro ta confirma e berdad aki. Ora Lazaro a bolbe na bida, acaso el a conta hende relatonan emocionante tocante shelo? Of el a spanta nan cu cuentanan horibel tocante un fierno di candela? No. Bijbel no tin ningun di e historianan ei for di boca di Lazaro. Durante e cuater dianan cu e tawata morto, e ‘no tawata sa nada.’ (Eclesiastes 9:5) Lazaro simplemente tawata drumi den morto.—Huan 11:11.

12. Dicon nos por tin sigur cu e resureccion di Lazaro realmente a tuma luga?

12 E relato di Lazaro ta siña nos tambe cu e resureccion ta un realidad, no un simpel cuenta di fantasia. Hesus a resusita Lazaro dilanti di un multitud di testigo. Asta e lidernan religioso, cu tawata odia Hesus, no a nenga cu e milager aki a sosode. Mas bien nan a bisa: “Kico nos ta haci? Pasobra e homber aki [Hesus] ta haci hopi milager.” (Huan 11:47)  Hopi hende a bai mira e homber resusita. Como resultado, mas hende ainda a pone fe den Hesus. Nan a mira Lazaro como un prueba bibo di e echo cu ta Dios a manda Hesus. E evidencia aki tawata asina poderoso cu algun di e lidernan religioso Hudiu di curason duro, a plania pa mata tanto Hesus como Lazaro.—Huan 11:53; 12:9-11.

13. Ki base nos tin pa kere cu Yehova realmente por resusita e mortonan?

13 Ta irealistico pa acepta e resureccion como un echo? No, pasobra Hesus a siña e hendenan cu algun dia “tur cu ta den graf” lo ser resusita. (Huan 5:28) Yehova ta e Creador di tur bida. Ta duro pa kere cu e por bolbe crea bida? Esei lo ta depende naturalmente di Yehova su memoria. E por corda nos sernan keri cu a muri? Wel, nos universo ta consisti di miles di miyones di streya, y toch Dios sa e nomber di cada un di nan! (Isaias 40:26) Pues, Yehova Dios por corda tur detaye di nos sernan keri cu a muri, y e ta cla pa restaura nan na bida.

14, 15. Manera nos por mira for di loke Job a bisa, kico ta indica cu Yehova ta desea di resusita e mortonan?

14 Bijbel ta siña nos cu Yehova ta ansioso pa resusita e mortonan. Con nos por ta sigur di esaki? E homber fiel Job a puntra: “Si un hende muri, lo e bolbe biba?” Job a papia di warda den graf te ora cu e tempo yega pa Dios corda riba dje. El a bisa Yehova: “Abo lo yama, y ami lo contesta bo; lo bo anhela na e obra di bo mannan.”—Job 14:13-15.

15 Pensa riba esei! Eigenlijk, Yehova ta anhela pa trece e mortonan bek na bida. No ta alentador pa sa cu Yehova ta sinti asina? Pero relaciona cu e futuro resureccion aki, ken lo ser resusita y na unda?

“TUR CU TA DEN GRAF”

16. E mortonan lo haya resureccion pa biba bou di ki clase di condicion?

16 E relatonan di resureccion den Bijbel ta siña nos hopi  cos tocante e benidero resureccion. E hendenan cu a ser restaura na bida aki mes riba tera a bolbe uni cu nan sernan keri. E futuro resureccion lo ta similar, pero hopi mas mihor. Manera nos a siña den Capitulo 3, Dios su proposito ta pa henter e tera wordo transforma den un paradijs. Pues e mortonan lo no resusita den un mundo yen di guera, criminalidad y malesa. Nan lo tin un oportunidad di biba pa semper riba e tera aki bou di condicionnan di pas y felicidad.

17. Con extenso e resureccion lo ta?

17 Ken lo resusita? Hesus a bisa cu “tur cu ta den graf lo tende [Hesus] su bos, y lo sali.” (Huan 5:28, 29) Asina tambe Revelacion 20:13 ta bisa: “Lama a entrega e mortonan cu tawata den dje, y morto y Hades a entrega e mortonan cu tawata den nan.” “Hades” ta referi na e graf comun di humanidad. (Wak e articulo di Apendix, “Kico Seol y Hades Ta?”) E graf colectivo aki lo ser haci bashi. Tur e miles di miyones di hendenan cu ta sosega den dje lo biba atrobe. Apostel Pablo a bisa: “Lo tin un resureccion di tanto e hustonan como e malbadonan.” (Echonan 24:15) Kico esei ta nifica?

Den Paradijs, e mortonan lo lanta y lo bolbe uni cu nan sernan keri

18. Ken lo ta inclui den “e hustonan” cu lo haya resureccion, y ki efecto e speransa aki por tin riba abo personalmente?

18 “E hustonan” ta inclui hopi di e hendenan cu nos ta lesa di dje den Bijbel cu a biba prome cu Hesus a bin na tera. Lo bo por pensa riba Noe, Abraham, Sara, Moises, Rut, Ester y hopi otro mas. Hebreonan capitulo 11 ta papia di algun di e homber- y mohenan aki cu tawatin fe firme den Dios. Pero “e hustonan” ta inclui tambe e sirbidonan di Yehova cu muri den nos tempo. Debi na e speransa di resureccion, nos por ser libra di cualkier miedo di muri.—Hebreonan 2:15.

19. Ken ta “e malbadonan”, y Yehova bondadosamente ta duna nan ki oportunidad?

19 Kico di tur e hendenan cu no a sirbi of obedece Yehova pasobra nunca nan no tawata sa di dje? Dios lo no lubida e  miles di miyones di hendenan ‘malbado’ aki. Nan tambe lo ser resusita y lo duna nan tempo pa siña tocante e Dios berdadero y sirbie. Durante un periodo di mil aña, lo resusita e mortonan y duna nan oportunidad di join hende fiel riba tera den sirbi Yehova. Lo ta un tempo maraviyoso. E periodo aki ta loke Bijbel ta referi na dje como Dia di Huicio. *

20. Kico ta Gehena, y ken ta bai einan?

20 Acaso esaki ta nifica cu tur hende cu a yega di biba lo haya resureccion? No. Bijbel ta bisa cu algun di e mortonan ta den Gehena, traduci como “fierno” den Beibel Santu. (Lucas 12:5) Gehena a haya su nomber for di un luga di dump sushi cu tawatin pafo di antiguo Herusalem. Einan hende tawata kima sushi y curpanan morto. E curpanan morto cu nan a tira einan tawata di personanan cu e Hudiunan no a considera digno di haya un entiero y un resureccion. Pues Gehena ta un simbolo apropiado di destruccion eterno. Aunke Hesus lo hunga un papel den husga e bibo- y e mortonan, Yehova ta e Hues final. (Echonan 10:42) Nunca Yehova lo resusita personanan cu e ta husga cu ta malbado y no kier cambia.

E RESURECCION CELESTIAL

21, 22. (a) Ki otro tipo di resureccion tin? (b) Ken tawata e prome persona cu a yega di ricibi un resureccion pa biba como persona spiritual?

21 Bijbel ta referi tambe na un otro tipo di resureccion, uno pa biba como un criatura spiritual den shelo. Den Bijbel nos ta haya un solo ehempel di e tipo di resureccion aki, esun di Hesucristo.

22 Despues cu nan a mata Hesus como hende, Yehova no a permiti su Yiu fiel keda den graf. (Salmo 16:10; Echonan 13:34, 35) Dios a resusita Hesus, pero no como hende. Apostel  Pedro a splica cu Cristo a ser “mata den e carni, ma haci bibo den e spirito.” (1 Pedro 3:18) Esaki tawata realmente un gran milager. Hesus tawata bibo atrobe como un persona spiritual poderoso! (1 Corintionan 15:3-6) Hesus tawata e prome persona cu a yega di ricibi e tipo di resureccion glorioso aki. (Huan 3:13) Pero lo e no tawata e ultimo.

23, 24. Ken ta forma Hesus su “tou chikito”, y cuanto nan lo ta?

23 Como cu Hesus tawata sa cu pronto lo e bolbe na shelo, el a bisa su siguidonan fiel cu lo el a “prepara un luga” pa nan einan. (Huan 14:2) Hesus a referi na esnan cu lo bai shelo como su “tou chikito.” (Lucas 12:32) Cuanto persona lo forma parti di e grupo relativamente chikito aki di cristiannan fiel? Segun Revelacion 14:1, apostel Huan a bisa: “Mi a wak, y ata e Lamchi [Hesucristo] tawata para riba Sero Sion, y hunto cu ne 144.000 cu tawatin su nomber y e nomber di su Tata skirbi na nan frenta.”

24 E 144.000 cristiannan aki, cu ta inclui Hesus su apostelnan fiel, ta haya resureccion pa biba den shelo. Na ki tempo nan resureccion ta tuma luga? Apostel Pablo a skirbi cu lo e sosode durante e tempo di Cristo su binida. (1 Corintionan 15:23) Manera lo bo siña den Capitulo 9, nos ta bibando awor den e tempo ei. Pues, di e poco personanan cu a resta di e 144.000, esnan cu muri den nos tempo ta resusita instantaneamente pa biba den shelo. (1 Corintionan 15:51-55) Sinembargo, e gran mayoria di humanidad tin e speransa di ser resusita den futuro pa biba den Paradijs riba tera.

25. Kico nos lo considera den e siguiente capitulo?

25 Si, Yehova realmente lo derota nos enemigo morto, y lo e disparce pa semper! (Isaias 25:8) Pero kisas bo ta puntra bo mes: ‘Kico esnan cu haya resureccion pa biba den shelo lo bai haci einan?’ Nan lo forma parti di e maraviyoso gobierno di Reino den shelo. Nos lo siña mas tocante e gobierno ei den e siguiente capitulo.

^ par. 9 E otro relatonan nos ta haya na 1 Reinan 17:17-24; 2 Reinan 4:32-37; 13:20, 21; Mateo 28:5-7; Lucas 7:11-17; 8:40-56; Echonan 9:36-42 y 20:7-12.

^ par. 19 Pa mas informacion riba Dia di Huicio y e base pa ser husga, sea asina bon di wak e articulo di Apendix, “Dia di Huicio—Kico E Ta?