Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO DIESUN

El A Keda Vigila y A Warda cu Confianza

El A Keda Vigila y A Warda cu Confianza

1, 2. Ki tarea desagradabel Elias mester a cumpli cu ne, y ki diferencia tabatin entre e cu Acab?

ELIAS tabatin hopi gana di ta su so pa e por a resa na su Tata celestial. Pero e multitud di hende rond di dje a caba di mira e profeta berdadero aki laga candela baha for di cielo, y hopi di nan sin duda kier a haya fabor den su bista. Pero prome cu Elias por a subi te na top di Sero Carmelo pa haci oracion na Jehova den priva, e tabatin cu cumpli cu e tarea desagradabel di papia cu Rey Acab.

2 E dos hombernan ey tabata completamente distinto for di otro. Acab, bisti cu su pañanan luhoso di rey, tabata un apostata golos cu facilmente ta laga otronan influenci’e. Na otro banda, Elias tabatin su paña oficial di profeta bisti, un mantel simpel y grof, cosi probablemente di cuero di bestia of di lana di camel of cabrito. E tabata un homber di fe y integridad, y e tabatin hopi curashi. E dia ey, cu tabata yegando na su fin, a saca na cla ki tipo di hende cada un di nan tabata.

3, 4. (a) Dicon e dia ey a resulta un mal dia pa Acab y e otro adoradornan di Baal? (b) Cua ta algun pregunta cu nos lo analisa?

3 E dia a resulta di ta un mal dia pa Acab y e otro adoradornan di Baal. E religion pagano cu Acab y su casa, Reina Jezabel, tabata fomenta den e reino di dies tribu di Israel a ricibi un golpi pisa. Baal a keda desenmascara! E tabata un dios falso. E no por a ni cende un simpel candela, a pesar di e suplicanan desespera di su 450 profetanan y di nan baile- y ritonan sangriento. Baal no por a proteha e hombernan ey di nan ehecucion mereci tampoco. Pero e dios sin bida ey a faya den un cos mas, y e fracaso aki tabata a punto di bira mas bisto ainda. Pa mas cu tres aña, e profetanan di Baal a roga nan dios pa pone fin na e secura cu tabata asota e pais, pero Baal no por a haci esey. Pronto Jehova si lo a demostra su poder supremo door di pone fin na e secura.—1 Rey. 16:30–17:1; 18:1-40.

 4 Pero ki dia Jehova lo a interveni? Kico Elias lo a haci mientrastanto? Y kico nos por siña for di e homber di fe aki? Wel, laga nos ban analisa e relato.—Lesa 1 Reynan 18:41-46.

Un Homber di Oracion

5. (a) Kico Elias a bisa Acab haci? (b) Acab a siña algo for di e sucesonan di e dia ey?

5 Elias a bay cerca Acab y a bis’e: “Bay, come y bebe, pasobra tin zonido di un awasero pisa.” E Rey malbado aki a siña algo for di e sucesonan di e dia ey? Nos no ta lesa den e relato ningun palabra di arepentimento, ni ningun caminda cu e ta pidi e profeta yud’e busca e pordon di Jehova. No, simplemente Acab a lanta bay “come y bebe.” (1 Rey. 18:41, 42) Pero kico di Elias?

6, 7. Kico Elias a pidi den oracion, y dicon?

6 “Ma Elias a subi bay na cabes di Sero Carmelo; y el a sak abou te na suela y a pone su cara meymey di su rudianan.” Mientras cu Acab a bay yena su bariga, Elias a probecha di e oportunidad pa haci oracion na su Tata celestial. Tuma nota di e profeta su postura humilde: na rudia, cu su cabes baha casi pa yega su rudianan. Kico Elias a pidi den oracion? Bijbel ta bisa  nos na Santiago 5:18 cu Elias a pidi pa e secura yega na su fin. Probablemente ta un oracion asina el a haci riba cabes di Sero Carmelo.

E oracionnan di Elias a demostra cu su deseo tabata pa Dios su boluntad sosode

7 Mas prome, Jehova a dun’e e garantia: “Lo mi manda awasero riba e superficie di tera.” (1 Rey. 18:1) Pues, Elias a pidi den oracion pa laga Jehova su boluntad sosode, y un mil aña despues, Hesus a siña su discipelnan pa pidi mescos den oracion.—Mat. 6:9, 10.

8. Kico e ehempel di Elias ta siña nos tocante oracion?

8 E ehempel di Elias ta siña nos hopi cos tocante oracion. Loke tabata mas importante p’e ta pa Dios su boluntad cumpli. Pesey, ora nos ta haci oracion, ta bon pa nos corda cu “kico cu nos pidi [Dios] cu ta di acuerdo cu su boluntad, e ta tende nos.” (1 Juan 5:14) Claro cu pa nos por haci oracion cu Dios ta acepta, nos mester sa prome kico ta su boluntad. Esey ta duna nos un bon motibo pa traha tempo tur dia pa studia Bijbel. Ademas, Elias sin duda a pidi pa e secura yega na su fin pasobra el a mira cuanto e hendenan di su pais tabata sufri. Kisas el a expresa tambe su gratitud pa e milager cu el a mira Jehova haci e dia ey. Den nos caso, nos tambe kier pa nos oracionnan expresa nos gratitud sincero na Jehova y nos preocupacion pa e bienestar di otro hende.—Lesa 2 Corintionan 1:11; Filipensenan 4:6.

Elias Tabatin Pleno Confianza den Jehova y A Keda Vigila

9. Kico Elias a manda su sirbidor haci, y cua dos les nos lo bay analisa?

9 Elias tabata sigur cu Jehova lo a pone fin na e secura, pero e no tabata sa ki dia Jehova lo a hacie. Pues, kico e profeta a haci mientrastanto? Segun e relato: “El a bisa su sirbidor: ‘Subi bay awor, wak den direccion di lama.’ Asina el a subi bay y a wak, y a bisa: ‘No tin nada.’ Y shete biaha Elias a bisa: ‘Bay bek.’” (1 Rey. 18:43) E ehempel di Elias ta siña nos por lo menos dos les: Di prome, nos mester tin pleno confianza den Jehova y, di dos, nos mester keda vigila.

Elias tabata ansioso pa mira cualkier cos cu a indica cu Jehova tabata a punto di actua

10, 11. (a) Con Elias a demostra su confianza den e promesanan di Jehova? (b) Dicon nos tambe por tin e confianza ey?

10 Laga nos considera e prome les. Elias tabatin pleno confianza den e promesanan di Jehova. Pues, e tabata ansioso pa mira cualkier cos cu a indica cu Jehova tabata a punto di actua. El a manda su sirbidor subi bay un luga un poco mas halto pa  wak si e tabata mira un señal na horizonte cu awasero lo a bay cay. Sin mucho entusiasmo, e sirbidor tabata bisa cada biaha cu e bin bek: “No tin nada.” Aparentemente, e no tabata mira nada na horizonte y no tabatin ni un nubia den cielo. Pero bo ta corda kico Elias a caba di bisa Rey Acab? El a bisa: “Tin zonido di un awasero pisa.” Con e profeta por a bisa esey siendo cu no tabatin ni un nubia den cielo?

11 Elias tabata sa loke Jehova a priminti. Anto como Jehova su profeta y representante, e tabatin pleno confianza cu su Dios lo a cumpli cu Su palabra. Elias tabata asina sigur di esey cu tabata comosifuera e por a tende e awasero cay caba. Esaki ta laga nos corda loke Bijbel ta bisa di Moises: “El a sigui firme comosifuera el a mira Esun cu ta invisibel.” Dios ta asina real pa bo? E ta duna nos hopi motibo pa nos por tin e clase di fe ey den dje y den su promesanan.—Heb. 11:1, 27.

12. Con Elias a keda vigila, y con el a reacciona riba e noticia cu tabatin un nubia chikito?

12 Ban wak e di dos les awor: Elias a keda vigila. El a keda manda su sirbidor pa subi bay wak, y no un ni dos biaha, sino shete biaha! Nos por imagina cu su sirbidor a cansa di bay bin cada bes, pero Elias a keda spera ansiosamente riba un señal y no a entrega. Por fin, despues di e di shete biaha, e sirbidor a inform’e: “Mira, un nubia mes chikito cu man di hende ta sali for di lama.” Bo por imagina bo con e sirbidor a mustra cu su man e tamaño di un nubia chikito cu tabata subi na horizonte di Lama Grandi? Kisas e sirbidor no tabata hopi impresiona cu e pida nubia ey, pero pa Elias si esey tabata importante. Cu urgencia el a bisa su sirbidor: “Bay bisa Acab: ‘Prepara bo garoshi y baha bay, pa e awasero pisa no stroba bo.’”—1 Rey. 18:44.

13, 14. (a) Con nos por keda vigila mescos cu Elias? (b) Cua ta algun motibo cu nos tin pa actua cu urgencia?

13 Un biaha mas, Elias a duna nos un gran ehempel. Nos tambe ta bibando den e tempo cu Dios pronto lo dal paso pa cumpli cu su proposito. Elias tabata warda riba fin di e secura; e sirbidornan di Dios awe ta warda riba fin di e sistema mundial corupto aki. (1 Juan 2:17) Mescos cu Elias, nos mester keda vigila te ora e momento pa Jehova actua yega. Relaciona cu esey, Hesus, e Yiu di Dios, a spierta su siguidornan: “Keda vigila, pasobra boso no sa ki dia boso Señor ta bin.” (Mat. 24:42) Acaso Hesus tabata kiermen cu su siguidornan lo no tin ningun idea ki tempo e fin lo bin? No, pasobra el a papia ampliamente tocante con mundo lo ta den e dianan prome cu e fin. Awe, nos tur por mira  cumplimento di e señal detaya di e “conclusion di e era aki.”—Lesa Mateo 24:3-7.

Un nubia chikito a convence Elias cu Jehova tabata a punto di actua. E señal di e ultimo dianan ta motiva abo pa actua cu urgencia?

14 Cada faceta di e señal ey ta duna nos prueba cla y convencente cu e fin ta cerca. E pruebanan ey ta suficiente pa motiva nos pa sirbi Jehova cu un sentido di urgencia? No lubida cu un nubia chikito cu a subi na horizonte tabata suficiente pa convence Elias cu Jehova tabata a punto di actua. Acaso e fiel profeta ey a keda decepciona?

Jehova Ta Trece Alivio y Bendicion

15, 16. Kico a tuma luga rapidamente, y kico Elias kisas a puntra su mes tocante Acab?

15 E relato ta sigui bisa: “A sosode cu den un rato di ora cielo a bira preto di nubia y biento, y tabatin un awasero pisa. Y Acab a subi su garoshi y a bay Jezreel.” (1 Rey. 18:45) Tur cos a cuminsa sosode rapidamente. Mientras cu e sirbidor di Elias a bay duna Acab e mensahe di e profeta, cielo a yena cu nubia y a bira scur. Un biento fuerte a cuminsa supla. Por fin, despues di tres aña y mey, awasero a cay riba suela di Israel. E tera seco a guli delaster un gota. Un palo di awa a cay, y Riu Kison a yena y sin duda a laba e sanger di e profetanan di Baal bay cu ne. E Israelitanan rebelde tambe a haya e oportunidad di deshaci di e mancha teribel cu adoracion di Baal a trece riba e pais.

“Tabatin un awasero pisa”

16 Esey sigur ta loke Elias a spera cu lo a sosode! Kisas el a puntra su mes con Acab lo a reacciona riba e sucesonan dramatico cu tabata tumando luga. Acab lo a arepenti y bira lomba pa e adoracion impuro di Baal? E sucesonan di e dia ey a dun’e suficiente motibo pa haci e cambionan ey. Claro cu nos no sa kico Acab a pensa na e momentonan ey, pasobra e relato ta djis bisa nos cu e Rey “a subi su garoshi y a bay Jezreel.” El a siña algo? El a dicidi di cambia su bida? Loke a pasa mas despues ta laga nos compronde cu no. Pero ainda e dia ey no a caba pa Acab, ni pa Elias.

17, 18. (a) Kico a pasa cu Elias riba e caminda pa Jezreel? (b) Dicon e careda cu Elias a core di Sero Carmelo pa Jezreel tabata remarcabel? (Wak tambe e nota.)

17 E profeta di Jehova a cuminsa cana bay den e mesun  direccion cu Acab. E caminda su dilanti tabata largo, y e mester a cana den awasero y scuridad. Pero e ora ey un cos extraordinario a sosode.

18 “E man di SEÑOR tabata riba Elias, y el a faha su heup y a core yega Jezreel prome cu Acab.” (1 Rey. 18:46) Ta bisto cu ‘e man di Jehova’ tabata riba Elias na un manera sobrenatural. Jezreel tabata keda un 30 kilometer leu, y Elias no tabata dje jong ey mas. * Djis imagina con e profeta a coy su paña largo, fah’e na su heup—ya asina su pianan por a move libremente—y cuminsa core riba e caminda muha. El a core asina duro cu el a alcansa e garoshi di e Rey te pas’e voorbij!

19. (a) E energia y vigor cu Elias a haya di Dios ta laga nos corda riba cua profecia? (b) Kico Elias tabata sa sigur segun cu e tabata core bay Jezreel?

19 Esta un bendicion pa Elias! Lo mester tabata un experencia emocionante p’e pa sinti su mes asina fuerte, yen di energia y vigor, kisas hasta mas cu tempo e tabata jong. Loke a pasa cu ne ta laga nos corda riba e profecianan cu ta duna sirbidornan di Dios e garantia cu nan lo disfruta di vigor y salud perfecto den e binidero Paradijs riba Tera. (Lesa Isaias 35:6; Luc. 23:43) Un cos Elias tabata sa sigur segun cu e tabata core riba e caminda muha ey: E tabatin e aprobacion di su Tata, e unico Dios berdadero, Jehova!

20. Kico nos mester haci pa ricibi e bendicionnan di Jehova?

20 Jehova tin masha hopi gana di bendiciona nos. Y ta bale la pena pa nos haci tur loke nos por pa ricibi e bendicionnan ey. Mescos cu Elias, nos mester keda vigila y evalua e pruebanan convencente cu ta indica cu Jehova ta a punto di actua den e tempo peligroso y urgente aki. Y mescos cu Elias, nos tin tur motibo pa pone nos pleno confianza den e promesanan di Jehova, e “Dios di bèrdat.”—Sal. 31:5BPK.

^ par. 18 Aparentemente, Elias tabata un homber di edad caba na e tempo ey. Dicon nos ta bisa asina? Poco despues di e incidente aki, Jehova a asigna Eliseo pa fungi como sirbidor di Elias. Pues, Eliseo a bira conoci como esun cu “antes tabata basha awa riba e mannan di Elias.” (2 Rey. 3:11) Eliseo evidentemente a yuda Elias den asuntonan practico.