Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO DIESDOS

El A Haya Consuelo Cerca Su Dios

El A Haya Consuelo Cerca Su Dios

1, 2. Kico a tuma luga riba e dia di mas dramatico di Elias su bida?

ELIAS tabata core den awasero segun cu tabata bira mas y mas scur. Ainda e tabatin un bon pida caminda su dilanti prome cu e yega Jezreel, y e no tabata jong mas. Toch el a sigui core sin cansa, pasobra ‘e man di Jehova’ tabata riba dje. Nunca prome e no a sinti tanto energia asina. Figura bo cu el a hasta core bay laga e cabaynan cu tabata hala e garoshi di Rey Acab!—Lesa 1 Reynan 18:46.

2 Awor Elias tabatin e caminda pa su so. Bo por imagina cu segun cu e tabata core den e palo di awa cu tabata yobe, el a pensa riba tur e cosnan cu a pasa riba e dia di mas dramatico di su bida. Sero Carmelo a keda leu aya su tras den e scuridad di e tormenta. Riba e sero ey, Jehova a uza Elias pa dal adoracion di Baal un golpi duro y milagroso: El a desenmascara 450 profeta di e dios ey como gañadonan malicioso y a ehecuta nan. Esaki sin duda tabata un victoria glorioso pa Jehova, e Dios di Elias, y pa adoracion berdadero. Despues di esey, Elias a suplica Jehova pa pone fin na e secura cu tabata asota e pais pa tres aña y mey. Y awasero a cuminsa cay!—1 Rey. 18:18-45.

3, 4. (a) Ora Elias tabata riba caminda pa Jezreel, dicon kisas el a carga speransa cu cos lo a drecha? (b) Cua preguntanan nos lo bay analisa?

3 Segun cu Elias tabata core e 30 kilometernan den awasero p’e yega Jezreel, kisas el a pensa cu awor si e situacion lo a bay drecha. Awor si Acab lo mester cambia! Despues di loke Acab a mira sosode riba e dia aki, lo e no por a haci nada otro cu bandona adoracion di Baal, pone ordo riba su casa Jezabel y stop di persigui e sirbidornan di Jehova.

‘Elias a core yega Jezreel prome cu Acab’

4 Ora cos ta bay bon, ta normal cu nos ta cuminsa carga mas speransa. Kisas nos ta pensa cu cos lo sigui drecha y hasta kere cu porfin lo peor ta tras di lomba. Lo no ta nada straño si Elias tambe a pensa asina, pasobra e “tabata un homber cu e mesun sintimentonan cu nos.” (Sant. 5:17) Pero en realidad, su problemanan  no a termina ainda. Al contrario, un par di ora despues lo e tabatin asina tanto miedo y sintie asina desanima, cu el a desea di muri. Kico a pasa? Y con Jehova a yuda su profeta rebiba su fe y curashi? Ban wak.

Un Buelta Inespera

5. Acab a haya mas respet pa Jehova despues di e sucesonan riba Sero Carmelo, y con nos por sa esey?

5 Ora Acab a yega su palacio na Jezreel, el a duna un indicacion cu el a cambia, cu el a arepenti? Wel, Bijbel ta bisa: “Acab a conta Jezabel tur loke Elias a haci, y con el a mata tur e profetanan cu spada.” (1 Rey. 19:1) Tuma nota cu ora e Rey a conta su casa loke a pasa e dia ey, e ni sikiera a menciona Jehova, e Dios di Elias. Acab no tabata un homber cu a pensa manera Dios ta pensa. El a mira e sucesonan milagroso di e dia ey como simpel obra di hende, esta, “loke Elias a haci.” Ta bisto cu e no a haya respet pa Jehova Dios. Y con su casa vengativo a reacciona?

6. Ki mensahe Jezabel a manda pa Elias, y kico esey a nifica?

6 Jezabel tabata furioso! Cu yen di rabia, el a manda e siguiente mensahe pa Elias: “Cu e diosnan haci asina cu mi y pio ainda, si mañan na e ora aki mi no haci bo bida manera bida di un di nan.” (1 Rey. 19:2) Esey si tabata un menasa di morto spantoso! Eigenlijk Jezabel a hura cu e mes lo tin cu muri si pa e siguiente dia e no logra mata Elias pa venga su profetanan di Baal. Mientrastanto, Elias a busca un posada humilde na Jezreel pa e por a pasa e anochi di mal tempo ey. Diripiente nan a lant’e for di soño pa dun’e e mensahe spantoso cu e Reina a manda p’e. Con Elias a sintie ora el a scucha e palabranan ey?

Desanimacion y Miedo Ta Podera di Elias

7. Ki efecto e menasa di Jezabel tabatin riba Elias, y kico Elias a haci?

7 Si acaso Elias a pensa cu e guera contra adoracion di Baal tabata yegando su fin, na e momento ey e mester a realisa cu esaki tabata djis un soño. Jezabel no a entrega. Ya el a laga mata masha hopi profeta fiel di Jehova caba, y awor a parce cu Elias lo tabata e siguiente. Ki efecto e menasa di Jezabel tabatin riba Elias? Bijbel ta bisa nos cu “Elias a haya miedo.” Acaso Elias a cuminsa imagina su mes di e morto cruel cu tabata ward’e na man di Jezabel? Si ta riba e cosnan ey el a keda pensa, no ta nada straño cu el a perde curashi y bira desanima. En todo caso, el a “huy bay pa scapa su bida.”—1 Rey. 18:4; 19:3.

Si nos kier mantene nos curashi, nos no mester keda pensa riba tur cos malo cu lo por pasa cu nos

8. (a) Con Pedro tabatin e mesun problema cu Elias? (b) Ki les nos por siña for di Elias y Pedro?

8 Elias no tabata e unico homber di fe cu miedo a yega di  podera di dje. Siglonan despues, algo similar a pasa cu apostel Pedro. Por ehempel, un biaha cu Hesus a laga Pedro cana riba awa pa bin cerca dje, e apostel a cuminsa “wak e tormenta.” El a haya miedo y a cuminsa sink. (Lesa Mateo 14:30.) Pues, e ehempel di Elias y di Pedro ta siña nos un les valioso: Si nos kier mantene nos curashi, nos no mester keda pensa riba tur cos malo cu lo por pasa cu nos. Nos tin cu concentra riba e Fuente di nos speransa y poder.

“Ta Basta”!

9. Describi e huida di Elias y con lo e tabata sinti su mes.

9 Morto spanta, Elias a huy bay Beerseba, un stad cerca di e frontera zuid di Juda, un 150 kilometer leu den direccion zuidwest. El a laga su sirbidor eynan y a bay den desierto su so. Segun e relato, el a haci “un biahe di un dia.” Pues aparentemente el a cuminsa trempan, ora solo tabata saliendo, y a bay sin nada di come of bebe. Tur desanima y den panico, el a lucha den un solo cayente door di un teritorio seco y salbahe. Segun cu solo tabata baha pocopoco na horizonte, Elias a keda sin niun tiki energia. Morto cansa el a cay sinta bou di un mata, e unico cos cu por a dun’e un tiki proteccion den e area desola ey.—1 Rey. 19:4.

10, 11. (a) Kico Elias tabata kiermen cu loke el a bisa den su oracion na Jehova? (b) Uzando e textonan cita, describi con otro personanan devoto na Dios a sinti nan ora nan tabata desanima.

10 Elias, den su desesperacion, a pidi Jehova pa lag’e muri. El a bisa: “Mi no ta mihor cu mi tatanan.” Su antepasadonan no tabata nada mas cu stof den nan graf, y nan no por a yuda ningun hende mas. (Ecl. 9:10) Elias a sintie mesun inutil. Ta pesey el a sclama: “Ta basta”! Cu otro palabra, pakico sigui biba?

11 Mester ta un sorpresa pa nos cu un sirbidor di Dios por ta asina desanima? No necesariamente. Bijbel ta menciona un cantidad di homber y muher fiel cu a yega di sinti nan asina tristo cu nan a desea di muri, entre nan, Rebeca, Jacob, Moises y Job.—Gen. 27:46; 37:35; Num. 11:13-15; Job 14:13.

12. Con nos por imita e ehempel di Elias si un dia nos sinti nos hopi desanima?

12 Awe, nos ta biba den un ‘tempo critico, dificil pa trata cu ne.’ Pues, no ta nada straño cu hopi hende, hasta sirbidornan fiel di Dios, sa sinti nan mes desanima. (2 Tim. 3:1) Si un dia bo  haya bo den un situacion asina, sigui e ehempel di Elias: expresa bo sintimentonan na Dios. Al fin y al cabo, Jehova ta e “Dios di tur consuelo.” (Lesa 2 Corintionan 1:3, 4.) Laga nos wak con el a consola Elias.

Jehova A Yuda Su Profeta

13, 14. (a) Con Jehova, via e angel, a demostra su interes amoroso pa su profeta den problema? (b) Dicon ta un gran consuelo cu Jehova sa tur cos di cada un di nos, incluso nos limitacionnan?

13 Con bo ta kere Jehova a sintie ora el a wak abou for di cielo y mira su profeta stima, drumi bou di e mata ey den desierto, ta suplic’e p’e muri? Nos no mester pensa dos biaha. Despues cu Elias a pega soño, Jehova a manda un angel cerca dje. Suavemente e angel a mishi cu ne y a bis’e: “Lanta y come.” Elias a haci esey, y e angel bondadosamente a pone un cuminda simpel p’e: pan cayente y awa. Elias a corda pa bisa e angel danki? Unico cos cu Bijbel ta bisa ta cu e profeta a come, bebe y bay drumi bek. Lo e tabata mucho desanima pa papia? En todo caso, e angel a lant’e pa di dos biaha, kisas ora dia tabata habri. Un biaha mas el a bisa Elias: “Lanta y come.” Y el a agrega e palabranan remarcabel aki: “Pasobra e biahe ta mucho largo pa bo.”—1 Rey. 19:5-7.

14 Dios a laga e angel sa unda Elias tabata bay. E tabata sa tambe cu e biahe lo tabata mucho pisa pa Elias haci riba su propio forsa. E experencia aki di Elias ta un gran consuelo pa nos. E ta siña nos cu nos ta sirbi un Dios cu sa mas mihor cu nos mes kico ta e bon cosnan cu nos kier haci. Ademas, e ta cla pa yuda nos, pasobra e sa kico ta e cosnan cu nos no por haci riba nos mes forsa. (Lesa Salmo 103:13, 14.) Con Elias a beneficia di e cuminda ey?

15, 16. (a) Kico e cuminda cu Elias a haya for di Jehova a yud’e haci? (b) Con Jehova ta sostene su sirbidornan awe, y con nos por beneficia di esey?

15 Bijbel ta bisa: “[Elias] a lanta y a come y bebe, y den e forsa di e cuminda ey el a bay cuarenta dia y cuarenta nochi te ora cu el a yega Horeb, e sero di Dios.” (1 Rey. 19:8) El a yuna 40 dia y 40 anochi, mescos cu Moises a haci un seis siglo prome cu ne, y Hesus, un dies siglo despues di dje. (Exo. 34:28; Luc. 4:1, 2) E cuminda ey so no a caba cu tur su problemanan, pero si el a dun’e un forsa extraordinario. Imagina bo, e homber di edad aki a lucha door di e desierto desola ey pa casi un luna y mey, dia aden dia afo, siman aden siman afo!

16 Awe tambe Jehova ta sostene su sirbidornan. E no ta duna nan cuminda literal via un milager; mas bien, e ta duna nan algo  cu ta hopi mas importante: cuminda spiritual, esta, loke nan tin mester pa nan por tin un bon relacion cu ne. (Mat. 4:4) Ora nos ta siña tocante Dios mediante su Palabra y publicacionnan cu ta basa riba Bijbel, nos ta alimenta nos mes den sentido spiritual. E cuminda spiritual ey no ta caba cu tur nos problemanan, pero si e ta yuda nos wanta cosnan cu di otro manera lo ta insoportabel. Ademas, e ta hiba na “bida eterno.”—Juan 17:3.

17. Unda Elias a bay, y dicon e luga ey tabata importante?

17 Elias a cana casi 320 kilometer te ora cu porfin el a yega Sero Horeb (Sero di Sinai), un luga importante den historia. Eynan Jehova Dios a aparece hopi aña prome na Moises, via un angel, den un mata na candela. Y tabata eynan tambe cu mas despues Jehova a cera e pacto di Ley cu e nacion di Israel. Eynan Elias a bay sconde den un cueba.

Jehova A Consola y Fortalece Su Profeta

18, 19. (a) Kico e angel di Jehova a puntra Elias, y con el a contest’e? (b) Elias su contesta a revela cu e tabata desanima pa cua tres motibo?

18 Na Horeb, Jehova tabatin un “palabra” pa Elias, y el a transmiti esaki aparentemente via un angel. E mensahe a consisti di un simpel pregunta: “Kico bo ta haci akinan, Elias?” Probablemente e angel a haci e pregunta cu un tono amabel, pasobra Elias a considera esaki como un invitacion pa desahoga su mes. Y ta esey mes Elias a haci! El a bisa: “Mi a traha masha duro pa SEÑOR, e Dios di ehercitonan, pasobra e yiunan di Israel a bandona bo alianza, a basha bo altarnan abou y a mata bo profetanan cu spada. Y ta ami so a keda; y nan ta busca pa kita mi bida.” (1 Rey. 19:9, 10) Su palabranan a revela por lo menos tres motibo pakico e tabata desanima.

19 Di prome, Elias a sinti cu su trabou tabata pornada. A pesar cu pa hopi aña el a ‘traha masha duro pa Jehova’, poniendo Dios su nomber sagrado y su adoracion prome cu tur cos, e situacion a sigui bay di malo pa pio. E pueblo a sigui mescos, rebelde y sin fe, mientras cu adoracion falso a sigui plama tur caminda. Di dos, Elias a sintie su so. El a bisa: “Ta ami so a keda”, comosifuera e tabata e unico hende den henter e nacion ey cu ainda tabata sirbi Jehova. Di tres, Elias tabatin miedo. Nan a mata hopi profeta mescos cu ne, y e tabata convenci cu awor su beurt a yega. Kisas no tabata facil pa Elias expresa e sintimentonan ey, pero e no a laga orguyo of berguensa strob’e. Ora el a haci oracion, el a conta Dios tur loke e tabata sinti, y asina el a pone un bon ehempel pa tur persona fiel.—Sal. 62:8.

20, 21. (a) Describi kico Elias a mira ora el a bay para na entrada di e cueba riba Sero Horeb. (b) Kico Jehova su demostracion di poder a siña Elias?

 20 Con Jehova a alivia Elias su miedo y preocupacion? E angel a bisa Elias pa bay para na entrada di e cueba. El a haci esey, sin sa kico tabata sper’e. Diripiente, a lanta un biento hopi fuerte mes! E biento ey lo mester a zona hopi duro, pasobra e tabata asina fuerte cu el a scheur sero y kibra baranca na pida pida. Purba di imagina Elias para eynan. Kisas e tabata wowo tapa y cu su paña di lana grof duro teni, segun cu biento tabata ranca na dje. Despues e mester a bringa pa e no perde su balansa, pasobra tera a cuminsa sacudi: temblor! Apenas el a bin bij di esey ora cu un candela grandi a oblig’e drenta e cueba bek pa proteha su mes contra e cayente intenso.—1 Rey. 19:11, 12.

Jehova a uza su poder inmenso pa consola Elias y anim’e

21 Den tur e tres casonan ey, e relato ta bisa nos cu Jehova no tabata presente den ningun di e demostracionnan espectacular aki di forsanan di naturaleza. Elias tabata sa cu Jehova no tabata un dios di naturaleza of di gaña gaña manera Baal, kende su adoradornan engaña tabata alaba como “e jinete di e nubianan”, esta, esun cu a laga awasero cay. Jehova ta e berdadero Fuente di tur e poder inmenso cu tin den naturaleza, y tambe e ta infinitamente superior cu tur loke el a traha. Ni sikiera cielo literal no por contene Jehova! (1 Rey. 8:27) Pero con tur esaki a yuda Elias? Wel, corda riba e miedo cu e tabatin. Siendo cu e tabatin un Dios manera Jehova na su banda, un Dios cu tin tur e poder enorme ey na Su disposicion, e no tabatin nodo di teme Acab ni Jezabel!—Lesa Salmo 118:6.

22. (a) Con e ‘stem suave’ a sigura Elias cu e tabata un sirbidor hopi valioso? (b) Ken probablemente tabata esun cu a papia cu un ‘stem suave’? (Wak e nota.)

22 Despues cu e candela a pasa, a reina un silencio y Elias a tende “zonido di un brisa [of, “stem”, NW] suave.” E stem a bolbe invit’e pa e desahoga su mes, di manera cu pa di dos biaha el a expresa su preocupacionnan. * Kisas esey a dun’e un poco mas alivio. Pero loke e ‘stem suave’ a sigui bis’e, sin duda a consol’e mas hopi. Jehova a sigura Elias cu e tabata un  di su sirbidornan hopi valioso. Con Jehova a haci esey? El a revela na dje varios cos cu e tabata bay haci ainda relaciona cu e guera contra adoracion di Baal na Israel. Ta bisto cu Elias su trabou no tabata pornada, pasobra e proposito di Dios lo a ser realisa pase loke pase. Ademas, ainda Jehova tabatin trabou pa Elias haci, pasobra el a dun’e algun instruccion specifico p’e cumpli cu ne.—1 Rey. 19:12-17.

23. Cua ta e dos maneranan cu Jehova a yuda Elias cu su soledad?

23 Pero kico di e soledad cu Elias tabata sinti? Jehova a haci dos cos relaciona cu esey. Di prome, el a bisa Elias pa ungi Eliseo como e profeta cu lo a bira su sucesor. E homber mas jong aki lo a bira Elias su compañero y ayudante pa varios aña. Esey tabata un consuelo y alabes algo practico. Di dos, Jehova a revela e noticia emocionante aki: “Mi ta laga shete mil na Israel, tur rudia cu no a dobla pa Baal, y tur boca cu no a sunch’e.” (1 Rey. 19:18) Pues, Elias no tabata su so! Lo mester tabata un consuelo p’e di tende cu tabatin miles di hende fiel cu a nenga di adora Baal. Nan tabatin mester di Elias. E mester a sigui cu su sirbishi fiel pa e por tabata un bon ehempel pa nan di lealtad inkebrantabel na Jehova den e tempo dificil ey. E palabranan di e mensahero di Jehova—e ‘stem suave’—mester a conmove Elias profundamente. Pa Elias, ta comosifuera Dios mes a papia cu ne.

Bijbel por ta manera e ‘stem suave’, basta nos lag’e guia nos awe

24, 25. (a) Den ki sentido nos por scucha Jehova su ‘stem suave’ awe? (b) Dicon nos ta sigur cu Elias a acepta e consuelo cu Jehova a dun’e?

24 Mescos cu Elias, nos tambe ta keda hopi impresiona cu e forsanan inmenso di naturaleza, y cu rason. Creacion ta un demostracion bibo di e poder di e Creador. (Rom. 1:20) Te awe Jehova ta gusta uza su poder inmenso pa yuda su sirbidornan fiel. (2 Cro. 16:9) Pero e ta papia cu nos mas detayadamente via e paginanan di Bijbel. (Lesa Isaias 30:21.) Den un sentido, Bijbel por ta manera e ‘stem suave’ ey, basta nos lag’e guia nos awe. Den su paginanan precioso, Jehova ta corigi nos, anima nos y tambe reafirma su amor pa nos.

25 Elias a acepta e consuelo cu Jehova a dun’e riba Sero Horeb? Claro cu si! Poco despues, Elias, e profeta fiel y balente cu a lucha contra adoracion falso, tabata bek den accion. Si nos tambe tuma na pecho e palabranan inspira di Dios, esta, “e consuelo for di e Scritura”, nos lo por imita Elias su fe.—Rom. 15:4.

^ par. 22 Kisas e ‘stem suave’ aki tabata di e mesun angel cu Jehova a uza pa entrega Su “palabra” menciona na 1 Reynan 19:9. Versiculo 15 ta referi na e angel aki simplemente como “SEÑOR” of Jehova. Esaki kisas ta laga nos corda riba e angel cu Jehova a uza pa guia Israel den desierto y di ken Dios a bisa: “Mi nomber ta den dje.” (Exo. 23:21) Claro cu nos no por bisa sigur cu esaki ta referi na Hesus, pero ta bon pa tuma nota cu den su existencia prehumano, el a fungi como “e Palabra”, e Vocero special di Jehova pa su sirbidornan.—Juan 1:1.