Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO BINTITRES

El A Siña for di e Maestro Kico Ta Pordon

El A Siña for di e Maestro Kico Ta Pordon

1. Ki ora tabata sin duda e pio momento di Pedro su bida?

PEDRO hamas lo por lubida e momento ey. Kico el a wak den e mirada di Hesus ora nan bista a topa? Decepcion of reproche? Nos no sa, pasobra e relato inspira ta djis bisa cu “Señor a bira wak Pedro.” (Luc. 22:61) Pero e solo mirada ey tabata suficiente pa Pedro realisa con grave su fayo tabata. El a caba di haci net loke Hesus a profetisa cu lo e haci pero cu e mes a hura cu hamas lo sosode, esta, nenga cu e conoce su Maestro stima. Esaki sin duda tabata e pio momento di Pedro su bida.

2. Kico Pedro mester a siña, y con nos por beneficia di su experencia?

2 Acaso tur cos a caba pa Pedro? No. Como cu Pedro tabata un homber di hopi fe, el a haya oportunidad di arepenti di su fayo y drecha su relacion cu Hesus. Tambe el a siña for di Hesus un les importante tocante pordon. Esey ta algo cu nos tur mester siña. Pues, laga nos wak con Pedro a siña e les dificil aki.

E Tabatin Hopi di Siña Ainda

3, 4. (a) Kico Pedro a puntra Hesus, y probablemente dicon? (b) Con Hesus a laga Pedro mira cu su manera di pensa a ser influencia pa e hendenan rond di dje?

3 Un seis luna prome, Pedro tabata na Capernaum, su pueblo natal. El a bay cerca Hesus y a puntr’e: “Señor, cuanto biaha mi ruman por peca contra mi y mi mester pordon’e? Te cu shete biaha?” Pedro lo a kere cu e tabata masha generoso, pasobra segun e lidernan religioso di e tempo ey ta tres biaha so mester a pordona un hende. Pero Hesus a contest’e: “No te cu shete biaha, sino te cu 77 biaha.”—Mat. 18:21, 22.

4 Acaso Hesus tabata kier pa Pedro tene un registro di cuanto biaha un persona a peca contra dje? No; mas bien, ora Hesus a cambia Pedro su 7 pa 77, e kier a indica cu bo no ta mustra cu bo stima un persona si bo ta pone un limite na e cantidad di biaha cu bo ta pordon’e. (1 Cor. 13:4, 5) Hesus a laga Pedro mira cu su manera di pensa a ser influencia pa e mentalidad di e hendenan rond di dje. Nan  tabatin un curason duro y no tabata dispuesto pa pordona otro. Hasta si nan a pordona mes, nan tabata tene registro di esey manera un accountant! Sinembargo, hende cu kier imita Dios mester ta dispuesto pa pordona otro libremente y bes tras bes.—Lesa 1 Juan 1:7-9.

5. Na ki momento nos ta realisa con importante pordon ta?

5 Pedro no a discuti cu Hesus. Pero e palabranan di su Maestro realmente a yega su curason? Hopi biaha nos ta bin compronde e importancia di pordon ora otro hende tin cu pordona nos. Esey ta loke a pasa poco prome cu Hesus su morto. Durante e oranan dificil ey, Pedro a comete varios fayo pa cua su Maestro mester a pordon’e.

Hesus A Pordona Pedro Bes Tras Bes

6. Con Pedro a reacciona ora Hesus a purba di siña su apostelnan un les di humildad, y con Hesus a trata cu ne?

6 Tabata un anochi hopi importante: e ultimo anochi di Hesus su bida como ser humano. Ainda e tabatin hopi cos di siña su apostelnan. Por ehempel, el a siña nan un bunita les di humildad. Con? Wel, el a laba nan pia; algo cu normalmente e cria di mas abou tabata haci. Na prome instante, Pedro a cuestiona loke Hesus kier a haci. Despues el a nenga di laga Hesus laba su pia. Despues el a insisti pa Hesus laba no su pia so, sino tambe su man y su cabes! Pero Hesus no a perde pasenshi cu ne. El a splica trankilamente dicon loke el a haci tabata importante y kico esey a nifica.—Juan 13:1-17.

7, 8. (a) Menciona algun manera mas cu Pedro a pone Hesus su pasenshi na prueba. (b) Con Hesus a sigui demostra un actitud bondadoso y cla pa pordona?

7 Poco despues di esey, Pedro a bolbe pone Hesus su pasenshi na prueba. E apostelnan a cuminsa discuti tocante cua di nan tabata esun di mas importante. Casi sigur Pedro tambe a tuma parti den e discusion bergonsoso aki cu a saca na cla nan sintimentonan di orguyo. A pesar di esey, Hesus a corigi nan bondadosamente y hasta a elogia nan pa algo bon cu nan a haci: nan a keda fiel na nan Maestro. Pero Hesus a profetisa tambe cu mas laat nan tur lo a bandon’e. Di biaha Pedro a contesta cu e si lo a keda fiel na Hesus, te na morto si tabata necesario. Pero Hesus a bis’e cu net lo contrario lo a bay pasa: E anochi ey mes, prome cu gay canta dos biaha, Pedro lo a nenga tres biaha cu e conoce su Maestro. Y Pedro e ora ey, no solamente a contradeci Hesus, sino hasta a blof cu e lo ta mas fiel cu tur e otro apostelnan!—Mat. 26:31-35; Mar. 14:27-31; Luc. 22:24-28; Juan 13:36-38.

8 Acaso awor si Hesus a perde pasenshi cu Pedro? No. Hasta den e momentonan dificil ey pa Hesus, el a sigui concentra riba e bon cualidadnan di su apostelnan imperfecto. Aunke e tabata sa cu Pedro  lo a lag’e na caya, toch el a bis’e: “Mi a suplica Dios pa bo, pa bo fe no debilita, y abo, unabes bo arepenti, fortalece bo rumannan.” (Luc. 22:32) Pues, Hesus a demostra cu e tabata convenci cu Pedro lo arepenti di su fayo y sigui sirbi Dios fielmente. Esta un actitud bondadoso y cla pa pordona!

9, 10. (a) Dicon Hesus mester a corigi Pedro den Hofi di Getsemani? (b) Kico e caso di Pedro ta laga nos corda?

9 Mas despues, den e Hofi di Getsemani, Hesus mester a corigi Pedro varios biaha. Hesus tabata den un dolor emocional intenso y tabatin mester di e sosten di su amigonan. Pues, el a pidi Pedro, Santiago cu Juan pa keda lanta mientras cu e tabata haci oracion. Pero Pedro y e otro dosnan cada bes tabata pega soño. Hesus a compronde pa nan y a pordona nan, pesey el a bisa: “E spirito tin e boluntad, ma e carni ta debil.”—Mar. 14:32-41.

10 Poco despues, a yega un multitud di hende cu flambeu y arma cu spada y klop. Tabata un momento pa actua cu prudencia y cu cuidou. Pero Pedro a haci net lo contrario. Sin pensa dos biaha, el a bula saca su spada y a kap e horea di Malco, un esclavo di e sumo sacerdote, kita afo. Den e situacion aki tambe Hesus a keda trankil. El a corigi Pedro y cura e horea di Malco. Ademas, el a splica su discipelnan pakico nan no mester uza violencia, y te awe su siguidornan ta sigui e principio ey. (Mat. 26:47-55; Luc. 22:47-51; Juan 18:10, 11) Ta bisto cu Pedro a comete hopi fayo pa cua Hesus mester a pordon’e. Su situacion ta laga nos corda cu nos tur tambe ta peca hopi biaha, y tur dia nos mester di e pordon di Dios. (Lesa Santiago 3:2.) Pero pa Pedro, e anochi ey no a caba. Lo peor mester a bin ainda.

Pedro Su Fayo di Mas Grandi

11, 12. (a) Con Pedro a demostra cierto grado di curashi despues cu nan a aresta Hesus? (b) Kico Pedro a blof cu e lo haci, y con el a faya cu esey?

11 Hesus a bisa e multitud cu si ta e nan tabata busca, nan mester a laga e apostelnan bay. Pedro mester a para mira nan mara Hesus, sin cu e por a haci nada. Despues el a huy bay, mescos cu e otro apostelnan.

12 Pedro cu Juan a stop di huy na mitar di caminda. Kisas nan tabata cerca di cas di Anas, e ex-sumo sacerdote, caminda nan a hiba Hesus na prome instante pa interog’e. Ora e hendenan tabata bay cu Hesus for di eynan, Pedro cu Juan a sigui nan, pero “na un bon distancia.” (Mat. 26:58; Juan 18:12, 13) Nos no por bisa cu Pedro tabata un cobarde. E echo cu el a sigui un multitud di hende arma ta indica cu e mester tabatin curashi. Anto no lubida cu el a herida un di nan caba. Pero toch nos no a mira Pedro demostra e tipo di lealtad  cu el a blof cu e tabatin, esta, cu e tabata dispuesto pa muri hunto cu su Maestro si tabata necesario.—Mar. 14:31.

13. Cua ta e unico manera corecto cu nos por sigui Cristo?

13 Awe tin hopi hende cu, mescos cu Pedro, kier sigui Cristo “na un bon distancia”, es decir, nan kier hacie sin cu otro hende ta ripara. Pero manera Pedro mes a skirbi despues, e unico manera cu nos por sigui Cristo corectamente ta si nos keda mas cerca di dje posibel y imita su ehempel den tur cos, sea loke sea e consecuencianan.—Lesa 1 Pedro 2:21.

14. Kico Pedro a haci durante e huicio di Hesus?

14 Pedro a sigui e multitud cuidadosamente, te na porta di cura di un di e casnan mas impresionante di Jerusalem. Esey tabata cas di Caifas, e sumo sacerdote rico y poderoso. Por lo general, nan tabata traha e casnan ey cu un patio meymey y un porta di cura dilanti. Pedro a yega na e porta di cura, pero e portier no kier a lag’e drenta. Juan tabata conoce e sumo sacerdote y tabata paden caba, pero el a bin na porta y a papia cu e portier p’e laga Pedro drenta. Aparentemente Pedro no a keda hunto cu Juan, y e no a purba di bay den e cas p’e por a apoya su Maestro tampoco. El a keda den e patio, caminda algun sirbidor y esclavo tabata pasa e anochi friu rond di un candela, observando e testigonan falso cu tabata drenta sali pa declara contra Hesus.—Mar. 14:54-57; Juan 18:15, 16, 18.

15, 16. Con e profecia di Hesus cu Pedro lo a neng’e tres biaha a cumpli?

15 Den claridad di e candela, e mucha muher portier cu a laga Pedro drenta por a mir’e mihor y a reconoc’e. El a acusa Pedro: “Abo tambe tabata hunto cu Hesus e Galileo!” El a coy Pedro di sorpresa, y Pedro a nenga mesora cu e conoce Hesus y hasta a bisa cu e no tabata compronde di kico e mucha muher tabata papia. Pedro a bay para e ora ey banda di e entrada pa e no hala atencion di ningun hende. Pero un otro mucha muher a mir’e y a bisa mescos: “E homber aki tabata hunto cu Hesus e Nazareo!” Pedro a hura: “Mi no conoce e homber ey!” (Mat. 26:69-72; Mar. 14:66-68) Kisas Pedro a tende un gay canta despues cu pa di dos biaha el a nenga cu e conoce Hesus, pero e tabata mucho nervioso pa corda riba loke Hesus a profetisa algun ora prome.

16 Un rato despues, Pedro keto bay tabata trata di no hala atencion. Pero un grupo di hende cu tabata den e patio a bin cerca dje. Un di nan tabata famia di Malco, e esclavo cu Pedro a herida. El a puntra Pedro: “No ta abo mi a mira den hofi hunto cu ne?” Awor si Pedro a sinti cu e mester a convence nan cu nan tabata robes. Pues, el a hura cu e no ta gaña, y aparentemente hasta a pidi pa maldicion bin riba dje si ta gaña e tabata gaña. Esey tabata di tres biaha cu Pedro  a nenga cu e conoce Hesus. E no a ni caba di papia cu un gay a canta; tabata e di dos cu Pedro a tende canta e anochi ey.—Juan 18:26, 27; Mar. 14:71, 72.

“Señor a bira wak Pedro”

17, 18. (a) Con Pedro a reacciona ora el a realisa e gravedad di e fayo cu el a comete? (b) Kico Pedro lo a pensa?

17 Net na e momento ey Hesus a sali para den un balcon cu bista riba e patio. E cu Pedro su bista a topa, manera a ser describi na principio di e capitulo aki. Pedro a realisa mesora cu el a faya gravemente. Tur kibra el a bay for di e patio. Sintimentonan di culpa tabata caba cu ne. El a cana bay den Jerusalem, bou di e luz di luna yen cu tabata ilumina e cayanan. Su wowo a yena cu awa, y e no por a ni mira bon unda e tabata bay. Anto e no por a contene su mes mas y a grita yora.—Mar. 14:72; Luc. 22:61, 62.

18 Despues di comete un fayo grandi asina, ta hopi facil pa un persona pensa cu su pica ta asina grave cu e no por haya pordon. Kisas Pedro tambe a pensa asina. Su Maestro lo por a pordon’e?

Pedro Su Pica Tabata Imperdonabel?

19. Con Pedro lo mester a sintie despues cu el a nenga Hesus, y dicon nos por bisa cu e no a cay den desesperacion?

19 Ta dificil pa nos imagina con tristo Pedro tabata ora mainta a habri. Anto e sucesonan di e dia ey lo a haci su dolor mas grandi ainda. Esta culpabel e lo mester a sintie ora cu mas laat riba e dia ey Hesus a muri despues di sufri pa basta ora! Pedro lo mester a sintie hopi malo cada biaha cu el a pensa con el a haci bida di su Maestro mas dificil riba su ultimo dia como ser humano. No tin duda cu Pedro a keda tur kibra, pero e no a cay den desesperacion. Segun e relato, no a tarda mucho cu e tabata den compania atrobe di e otro discipelnan. (Luc. 24:33) Sin duda, tur e apostelnan a sinti duele pa e manera cobarde cu nan a comporta nan mes e anochi teribel ey, y nan por a consola otro un poco.

20. Kico nos por siña for di un di e mihor decisionnan cu Pedro a tuma?

20 Nos por bisa cu aki Pedro a tuma un di e mihor decisionnan di su bida. Ora un sirbidor di Dios cay, loke mas ta conta no ta con grandi su caida ta, sino con determina e ta pa lanta bek y corigi su fayo. (Lesa Proverbionan 24:16.) Pedro a demostra cu e tabatin berdadero fe ora el a dicidi di ta hunto cu su rumannan a pesar cu e tabata sintie hopi tristo. Ora nos ta sinti hopi duele pa un fayo cu nos  a comete, kisas nos ta sinti gana di isola nos mes, pero esey ta peligroso. (Prov. 18:1) E cos sabi ta pa busca asociacion estrecho cu nos rumannan den fe pa asina recupera nos fortaleza spiritual pa por sigui sirbi Dios.—Heb. 10:24, 25.

21. Como cu Pedro tabata hunto cu su rumannan spiritual, ki noticia el a tende?

21 Como cu Pedro tabata hunto cu su rumannan spiritual, el a tende e noticia sorprendente cu e curpa di Hesus a disparce. Pedro cu Juan a core bay na e graf caminda nan a dera Hesus y cu nan a seya cu un piedra na e entrada. Juan, cu aparentemente tabata mas jong, a yega prome. Pero ora cu el a mira e entrada di e graf habri, el a duda pa drenta. Pero Pedro no. Aunke el a yega morto cansa, el a drenta paden sin pensa dos biaha. Y berdad e graf tabata bashi!—Juan 20:3-9.

22. Kico a pone tur duda y tristeza disparce for di Pedro su curason?

22 Na prome instante, Pedro no a kere cu Hesus a resucita, ni ora muhernan fiel a informa e discipelnan cu algun angel a bisa nan cu Hesus a lanta for di morto. (Luc. 23:55–24:11) Pero na final di e dia ey, tur duda y tristeza cu tabatin den Pedro su curason a disparce. Hesus tabata bibo! Awor e tabata un spirito poderoso, y pa demostra esey el a aparece na tur e apostelnan. Pero prome cu esey, el a haci algo special. Kico esey tabata? E apostelnan mes a bisa: “Señor di berdad a lanta for di morto y a aparece na Simon!” (Luc. 24:34) Mas despues, apostel Pablo tambe a skirbi tocante e dia remarcabel ey cu Hesus “a aparece na Cefas y despues na e 12 apostelnan.” (1 Cor. 15:5) Cefas y Simon ta otro nomber pa Pedro. E relatonan aki ta indica cu riba e dia ey Hesus a aparece na Pedro ora cu e tabata su so.

Pedro a comete hopi fayo pa cua Hesus mester a pordon’e, y nos tur tambe tur dia mester di e pordon di Dios

23. Dicon cristiannan awe cu comete pica grave tin cu corda riba e caso di Pedro?

23 Bijbel no ta duna e detayenan di e encuentro conmovedor ey entre Pedro cu Hesus. Nos por imagina si con emociona Pedro lo tabata di mira su Señor stima bibo atrobe y di por a bis’e cuanto duele e tabatin di loke el a haci. Mas cu tur cos, Pedro lo tabata kier pa Hesus pordon’e. Y no tin duda cu Hesus a pordon’e gustosamente. Cristiannan awe cu comete pica grave mester corda riba e caso di Pedro, y nunca pensa cu Dios no por pordona nan. Hesus a imita e personalidad di su Tata perfectamente, y Jehova ta “pordona abundantemente.”—Isa. 55:7.

Mas Prueba Cu El A Ser Pordona

24, 25. (a) Describi con Pedro a pasa su anochi piscando riba Lama di Galilea. (b) Con Pedro a reacciona riba e milager cu Hesus a haci?

24 Hesus a bisa su apostelnan pa bay Galilea, caminda e lo a topa nan atrobe. Ora nan a yega eynan, Pedro a dicidi di bay pisca riba  Lama di Galilea, y varios discipel a compañ’e. Un biaha mas Pedro tabata riba e lago caminda el a pasa gran parti di su bida. Sin duda, e zonido di e boto cu tabata kraak, e olanan cu tabata bati suavemente y e peso di e redanan den su man, a lag’e sinti su mes na cas. Pero henter anochi nan no a coy nada.—Mat. 26:32; Juan 21:1-3.

Pedro a bula den awa y a landa bay canto

25 Pero ora dia a habri, un persona na canto a bisa nan pa tira nan redanan na e otro banda di e boto. Nan a haci esey y a coy 153 pisca! Pedro tabata sa mesora ta ken e persona ey tabata. El a bula den awa y a landa bay canto. Na canto Hesus a sirbi su amigonan fiel  pisca cu el a cushina riba carbon. El a duna atencion special na Pedro.—Juan 21:4-14.

26, 27. (a) Ki oportunidad Hesus a duna Pedro? (b) Ki prueba Hesus a duna cu el a pordona Pedro completamente?

26 Hesus a puntra Pedro si e tabata stim’e “mas cu esakinan”, mustrando aparentemente riba e cantidad grandi di pisca cu nan a coy. Acaso e amor cu Pedro tabatin pa piscamento tabata mas grandi cu su amor pa Hesus? Algun dia prome, Pedro a nenga tres biaha cu e conoce Hesus. Awor Hesus a dun’e e oportunidad di confirma tres biaha dilanti di su amigonan cu e ta stima Hesus. Segun cu Pedro a haci esey, Hesus a bis’e kico e mester a haci pa demostra e stimacion ey: pone sirbishi sagrado na prome luga den su bida y alimenta, cuida y fortalece e tou di Cristo, esta, su siguidornan fiel.—Juan 21:15-17.

27 Asina Hesus a confirma cu Pedro ainda tabata un persona valioso p’e y pa su Tata. Bou di guia di Cristo, Pedro lo a hunga un papel hopi util den e congregacion. Esey tabata un prueba sobresaliente di Hesus su pordon! Sin duda, Pedro a keda hopi agradecido cu Hesus a pordon’e completamente, y el a siña for di su fayo.

28. Den ki manera Pedro a bira un baranca, manera su nomber ta nifica?

28 Pedro a cumpli fielmente cu su asignacion pa hopi aña. El a fortalece su rumannan, manera Hesus a mand’e haci riba e anochi prome cu su morto. (Luc. 22:32) Cu pasenshi y amor, el a alimenta y cuida e siguidornan di Cristo. E homber cu tabata yama Simon, y kende Hesus a duna e nomber Pedro—cu ta nifica Baranca—a biba di acuerdo cu e nomber ey. El a bira un bon ehempel di un persona fuerte, stabiel y confiabel pa tur hende den congregacion. Prueba di esey nos ta haya den e dos cartanan personal y cariñoso cu el a skirbi y cu a bira un parti valioso di Bijbel. E cartanan ey ta mustra tambe cu Pedro hamas a lubida e les cu el a siña for di Hesus tocante e berdadero nificacion di pordon.—Lesa 1 Pedro 3:8, 9; 4:8.

29. Con nos por imita e fe di Pedro y e misericordia di Hesus?

29 Laga nos tambe siña e les ey. Nos ta pidi Dios pordon tur dia pa e tantisimo fayonan cu nos ta comete? Nos ta acepta su pordon y ta keda convenci cu di berdad nos a bira limpi den su bista? Y nos ta pordona otro hende? Si nos ta haci eseynan, nos ta imitando e fe di Pedro y e misericordia di Hesus.