Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO BINTI

“Mi Ta Kere”

“Mi Ta Kere”

1. Con Marta tabata sintie, y dicon?

MARTA tabata blo mira e graf di su ruman su dilanti: un cueba seya cu un piedra. E tabata sinti un tristeza profundo. E no por a kere cu su ruman stima Lazaro no t’ey mas. E cuater dianan aki cu a pasa, for di momento cu Lazaro a hala su ultimo rosea, tabata dianan largo di tristeza y di hopi bishita di condolencia.

2, 3. (a) Con Marta lo a sintie ora el a mira Hesus? (b) Kico e palabranan di Marta a revela?

2 Y awor, Hesus, e amigo mas stima di su ruman Lazaro, tabata dilanti di Marta. Probablemente Marta a bira mas tristo ainda ora el a mira Hesus, pasobra e tabata e unico persona na mundo cu por a salba su ruman. Pero toch Marta a haya un consuelo ora el a papia cu Hesus, eynan na rand di e pueblito Betania. Despues di un rato cu e tabata hunto cu Hesus, el a cuminsa sinti su mes mas mihor. Hesus su mirada cariñoso y su compasion profundo a anim’e manera semper. El a haci Marta algun pregunta cu a yud’e concentra riba su fe y su speransa den e resureccion. E combersacion aki a pone Marta expresa un di su declaracionnan di mas importante: “Mi ta kere cu abo ta Cristo, e Yiu di Dios, Esun cu mester a bin na mundo.”—Juan 11:27.

3 Manera e palabranan ey ta mustra, Marta tabata un muher cu un fe remarcabel. E poco cu Bijbel ta bisa tocante dje ta siña nos algun les valioso cu por fortalece nos fe. Laga nos repasa e prome biaha cu Bijbel ta menciona Marta.

“Ansha y Preocupa”

4. Ki relacion Marta y su famia tabatin cu Hesus?

4 Nos tin cu bay bek lunanan prome na Betania. Lazaro tabata na bida ainda y bon di salud, y e tabata prepara pa ricibi e persona di mas importante na su cas: Hesucristo. Lazaro, Marta y Maria tabata tres ruman adulto cu tabata biba hunto. Algun experto riba tereno di Bijbel ta kere cu Marta tabata e  ruman mayo, ya cu e tabata sirbi como anfitrion y tabatin biaha a ser menciona prome. (Juan 11:5) Nos no sa si un di nan tres a yega di casa. En todo caso, nan tabata hopi bon amigo di Hesus. Durante Hesus su sirbishi na Judea, caminda el a haya hopi oposicion, e tabata keda na nan cas. Sin duda, Hesus tabata hopi contento cu cerca nan e por a haya paz y sosten.

5, 6. (a) Dicon Marta tabata hopi ocupa durante Hesus su bishita? (b) Maria a probecha di ki oportunidad unabes cu Hesus tabata cerca nan?

5 Marta principalmente, tabata esun cu a crea un ambiente agradabel y hospitalario den cas. E tabata un muher diligente y balente cu tabata constantemente ocupa. Esey tabata e caso tambe ora Hesus tabatin cu bin bishita nan. Mesora Marta a plania un comemento special pa su distinguido huesped, kende kisas lo a bin cu algun amigo tambe. Hospitalidad tabata hopi importante den e tempo ey. Ora un huesped yega, nan a cumind’e cu un sunchi, kita su sandalia, laba su pia y hunta su cabes cu azeta perfuma refrescante. (Lesa Lucas 7:44-47.) Nan tabata haci tur cos pa e huesped sinti su mes na cas.

6 Marta cu Maria tabatin hopi trabou di haci relaciona cu Hesus su bishita. Maria, kende tin biaha ta ser considera como mas sensitivo y pensativo cu Marta, siguramente a yuda su ruman na cuminsamento cu e preparacionnan. Pero unabes cu Hesus a yega, cos a cambia. Hesus a probecha di e ocasion aki pa siña e hendenan presente e berdad, y el a hacie na un manera maestral! Contrario na e lidernan religioso di su tempo, Hesus a respeta hende muher, y gustosamente el a siña nan tocante e Reino di Dios, e tema di su predicacion. Maria, entusiasma pa e oportunidad aki, a cay sinta na pia di Hesus y no a perde ni un palabra.

7, 8. Dicon Marta a bira asina ansha, y con el a expresa esey finalmente?

7 Nos por imagina con nervioso Marta a cuminsa bira. Cu tur e platonan cu e tabatin pa prepara y tur e otro cosnan di atende pa su invitadonan, el a bira mas y mas ansha y preocupa. Segun cu e tabata core bay bin, e tabata mira su ruman muher sinta eynan sin ta yud’e cu nada. Lo no sorprende nos si el a cunsumi, hala rosea hopi grandi y cera su cara cada biaha cu el a cana pasa banda di Maria. E so no por a haci tur e trabou aki!

8 Finalmente, Marta no por a wanta mas, y el a explota. El a interumpi Hesus, bisando: “Señor, bo no ta mira cu mi ruman ta laga mi so atende tur cos? Bis’e bin yuda mi anto.” (Luc. 10:40) E palabranan ey tabata fuerte. Varios Bijbel ta traduci su  pregunta asin’aki: “Señor, no ta importa bo ...?” Anto despues cu el a bisa esey, el a pidi Hesus corigi Maria, esta, mand’e bay sigui haci su trabou.

9, 10. (a) Con Hesus a contesta Marta? (b) Dicon nos sa cu Hesus no a menosprecia tur e esfuerso cu Marta a haci pa prepara un bankete?

9 Hesus su contesta probablemente a sorprende Marta, mescos cu el a sorprende hopi hende cu despues a lesa e relato ey den Bijbel. Cu un tono cariñoso Hesus a contest’e: “Marta, Marta, bo ta ansha y preocupa cu hopi cos. Ma poco cos ta necesario, of hasta un so. Pa loke ta Maria, el a scoge e mihor parti, y lo no kita esey for di dje.” (Luc. 10:41, 42) Kico Hesus tabata kiermen? Acaso e tabata acusa Marta di ta stima cos material mas cu Dios? Of el a menosprecia tur e esfuerso cu Marta tabata haci pa prepara un bon cuminda?

Aunke Marta tabata “ansha y preocupa cu hopi cos”, el a acepta e coreccion humildemente

10 No. Hesus por a mira bon cla cu Marta a haci tur e trabou ey cu amor y bon intencion. Ademas, Hesus no a haya cu un muestra di hospitalidad cu a encera hopi cos di come y di bebe riba su mes tabata algo malo. Mas prome, gustosamente el a disfruta di “un bankete grandi” cu Mateo a organisa na su cas p’e. (Luc. 5:29) E problema no tabata e comemento cu Marta tabata prepara, sino su prioridadnan. Marta a concentra asina tanto riba preparacion di su bankete cu el a perde for di bista loke tabata mas importante. Kico esey tabata?

Hesus a aprecia Marta su hospitalidad y tabata sa cu el a haci esey cu amor y bon intencion

11, 12. Con Hesus a corigi Marta?

11 Hesus, e Yiu unigenito di Jehova Dios, tabata den cas di Marta pa siña hende e berdad. Nada por tabata mas importante cu esey, ni sikiera e delicioso bankete y e preparacionnan cu Marta a haci. Hesus sin duda a haya duele cu Marta tabata perde e oportunidad unico aki pa fortalece su fe, pero toch el a laga Marta mes dicidi kico e ta scoge. * Pero tabata di mas si pa Marta pidi Hesus obliga Maria pa e tambe perde e oportunidad di siña e berdadnan ey.

12 Pesey Hesus a corigi Marta bondadosamente: El a ripiti su nomber suavemente y pa calm’e a sigur’e cu no tabatin nodo  di bira “ansha y preocupa cu hopi cos.” Un cuminda simpel di un of dos plato lo tabata suficiente, specialmente si e tabata acompaña pa un bankete spiritual. Pues, di ningun manera Hesus lo no a kita for di Maria “e mihor parti” cu el a scoge, esta, di sinta scuch’e!

13. Kico nos por siña for di loke Hesus a bisa Marta?

13 Loke a pasa na cas di Marta tin lesnan valioso pa siguidornan di Cristo awe. Por ehempel, nos no mester laga nada stroba nos di satisface nos “necesidad spiritual.” (Mat. 5:3) Claro cu nos kier imita Marta su generosidad y su spirito diligente, pero nos lo no kier bira asina “ansha y preocupa” cu e aspectonan menos importante di hospitalidad cu nos ta perde lo  mas importante. E motibo principal pakico nos ta asocia cu nos rumannan no ta pa gosa di e cuminda cu lo sirbi, sino pa comparti donnan spiritual y pa por tin un intercambio di estimulo. (Lesa Romanonan 1:11, 12.) Un ocasion asina por ta hopi edificante hasta si nos sirbi e cuminda di mas simpel.

Nan A Haya Nan Ruman Stima Bek

14. Dicon nos por ta sigur cu Marta a acepta e coreccion di Hesus?

14 Acaso Marta a acepta Hesus su conseho bondadoso y a siña for di dje? Aparentemente cu si, pasobra den e introduccion di e relato emocionante tocante Lazaro, apostel Juan ta recorda nos: “Awor bon, Hesus tabata stima Marta y su ruman muher y Lazaro.” (Juan 11:5) Esaki tabata varios luna despues di Hesus su bishita na Betania, describi anteriormente. Claro cu Marta no a keda rabia cu Hesus pasobra Hesus a conseh’e. Al contrario, el a acepta e coreccion di buena gana. Den esaki tambe Marta a pone un excelente ehempel di fe pa nos, pasobra cua di nos no tin mester di poco coreccion de bes en cuando?

15, 16. (a) Kico Marta casi sigur a haci ora su ruman a bira malo? (b) Dicon Marta y Maria su speransa a caba na nada?

15 Ora Lazaro a bira malo, Marta casi sigur a dedica su mes na cuid’e. El a haci tur loke e tabata por pa su ruman haya alivio y bira bon. Toch Lazaro su salud a sigui bay atras. Su ruman muhernan a keda casi nonstop na su lado pa cuid’e. Cuanto biaha Marta lo no a wak e cara bleek di su ruman y corda riba e hopi añanan cu nan a pasa hunto, compartiendo alegria y pena?

16 Ora Marta y Maria a mira cu nan no por a haci nada mas pa Lazaro, nan a manda un mensahe pa Hesus. E tabata predica na un distancia di dos dia di biahe for di nan. Nan mensahe tabata simpel: “Señor, bo amigo stima ta malo.” (Juan 11:1, 3) Nan tabata sa cu Hesus a stima nan ruman, y nan tabata convenci cu e lo a haci tur su posibel pa yuda su amigo. Pero nan speransa cu Hesus lo a yega na tempo a caba na nada: Lazaro a muri.

17. Kico a laga Marta confundi, y con el a reacciona ora el a tende cu Hesus tabata yegando nan pueblito?

17 Marta y Maria a yora e morto di nan ruman homber y a haci e preparacionnan pa su entiero. Nan a ricibi hopi bishita di hende di Betania y bisindario. Pero ainda nan no a tende nada di Hesus. Segun cu dianan tabata pasa, Marta siguramente lo a keda mas y mas confundi pa esey. Por fin, cuater dia despues cu Lazaro a muri, Marta a tende cu Hesus tabata yegando  nan pueblito. Cu e vigor cu semper el a demostra, hasta den e momento dificil aki di su bida, Marta a lanta mesora y a sali bay topa Hesus sin bisa Maria nada.—Lesa Juan 11:18-20.

18, 19. Marta a expresa ki speransa, y dicon su fe tabata remarcabel?

18 Ora Marta a mira su Maestro, el a expresa e pensamento cu a tormenta e dos ruman muhernan tur e dianan ey: “Señor, si bo tabata akinan, mi ruman lo no a muri.” Pero a pesar di tur cos, Marta no a perde fe ni speransa, pasobra el a sigui bisa: “Y toch te ainda mi sa cu tur loke bo pidi Dios, Dios lo duna bo.” Mesora Hesus a bisa algo pa fortalece su fe: “Bo ruman lo lanta for di morto.”—Juan 11:21-23.

19 Marta a kere cu Hesus tabata papia tocante e resureccion den futuro, pesey el a contest’e: “Mi sa cu lo e lanta den e resureccion riba e ultimo dia.” (Juan 11:24) Su fe den e siñansa ey tabata remarcabel. Algun lider religioso hudiu, e saduceonan,  tabata nenga cu lo bay tin un resureccion, a pesar cu e Palabra di Dios ta siña esey bon cla. (Dan. 12:13; Mar. 12:18) Pero Marta tabata sa cu Hesus si a siña hende tocante e speransa di resureccion y hasta a resucita varios persona, aunke niun di nan no tabata morto pa asina tanto dia manera Lazaro. Marta naturalmente no tabata sa kico lo a bay pasa.

20. Kico nos ta siña for di e palabranan di Hesus y Marta na Juan 11:25-27?

20 Hesus e ora ey a haci un declaracion inolvidabel cu ta confirma cu Jehova Dios a duna su Yiu e autoridad pa den futuro e resucita hende na un escala mundial. Hesus a bisa: “Ami ta e resureccion y e bida.” Anto el a puntra Marta: “Bo ta kere esaki?” Marta e ora ey a contest’e loke nos a trata na principio di e capitulo aki. E tabatin fe cu Hesus tabata e Cristo, of Mesias, cu e tabata e Yiu di Jehova Dios y cu e tabata esun cu e profetanan a anuncia cu lo a bin na mundo.—Juan 5:28, 29; lesa Juan 11:25-27.

21, 22. (a) Con Hesus a revela su sintimento pa hende cu ta yora morto di un ser keri? (b) Describi e resureccion di Lazaro.

21 Jehova Dios y su Yiu Hesucristo ta aprecia hende cu tin fe manera di Marta? Loke Marta a mira tuma luga poco despues ta contesta esey claramente. Marta a core bay busca su ruman muher. Despues el a mira con conmovi Hesus a keda ora el a papia cu Maria y tur e bishitantenan cu tabata compañ’e. Tambe Marta a mira e lagrimanan di Hesus ora cu el a expresa su tristeza profundo pa e dolor cu morto ta causa. Ademas, el a tende Hesus duna ordo pa kita e piedra cu tabata tapa e graf di su ruman.—Juan 11:28-39.

22 Marta, kende semper tabata hopi realistico, a protesta cu e curpa mester tabata hole malo caba pasobra ya Lazaro tabatin cuater dia morto. Hesus a bis’e: “Mi no a bisa bo cu si bo kere lo bo mira e gloria di Dios?” Marta a kere, y en berdad el a mira e gloria di Jehova Dios. Na e momento ey mes Jehova a duna su Yiu poder pa resucita Lazaro! Loke a sosode e ora ey lo mester a keda graba den Marta su memoria pa resto di su bida: e ordo cu Hesus a duna, “Lazaro, bin pafo!”; e zonidonan leve for di e cueba segun cu Lazaro a lanta para y, lora den paña di morto, a cana pocopoco bin pafo; e ordo cu Hesus a duna pa “los e pañanan for di dje y lag’e bay”; y naturalmente, e abraso fuerte di e tres rumannan cu tabata super contento. (Lesa Juan 11:40-44.) Marta su tristeza a disparce completamente!

Marta su fe den Hesus a ser recompensa ora cu su ruman a resucita

23. Kico Jehova y Hesus kier haci pa bo, pero kico abo tin cu haci?

23 E relato aki ta mustra cu e resureccion di e mortonan no  ta djis un ilusion; e ta un siñansa biblico cu ta duna consuelo y cu a keda comproba pa echonan real. (Job 14:14, 15) Jehova y su Yiu gusta recompensa e fe di nan sirbidornan, manera nan a haci den e caso di Marta, Maria y Lazaro. Nan tin hopi recompensa warda pa bo tambe si bo cultiva un fe fuerte.

“Marta Tabata Sirbi Nan”

24. Kico ta e ultimo cos cu Bijbel ta bisa di Marta?

24 Despues di esaki Bijbel ta menciona Marta un biaha so mas. Tabata un siman prome cu Hesus su morto. Hesus tabata sa ki sufrimento tabata ward’e, y atrobe el a busca trankilidad den cas di su amigonan na Betania. Di eynan el a cana e tres kilometernan pa yega Jerusalem. Na Betania, Hesus cu Lazaro tabata comiendo na cas di Simon e leproso, y eynan nos ta haya e ultimo bista di nos personahe: “Marta tabata [esun cu a] sirbi nan.”—Juan 12:2.

25. Dicon ruman muhernan manera Marta ta un bendicion pa congregacionnan awe?

25 Esey ta net un cos pa Marta! E prome biaha cu nos ta lesa di dje den Bijbel, e tabata traha, y e ultimo biaha cu ta mencion’e ainda nos ta hay’e ta traha, haciendo su best pa percura pa otro hende. Awe, ruman muhernan manera Marta ta un bendicion pa e congregacion cristian. Semper tal ruman muhernan generoso y trahador ta demostra nan fe den Jehova ora nan ta traha duro p’e y yuda otro hende. Marta a keda demostra su fe di e manera ey? Muy probablemente cu si. Y ta bon mes, pasobra e fe ey lo a yud’e persevera a pesar di obstaculo cu lo a presenta den su bida despues.

26. Con Marta su fe a yud’e?

26 Un par di dia despues, Marta a enfrenta e morto teribel di su Maestro stima Hesus. E mesun hipocritanan asesino cu a mata Hesus a purba di mata Lazaro tambe, ya cu pa motibo di su resureccion hopi hende tabata pone fe den Hesus. (Lesa Juan 12:9-11.) Y naturalmente morto, cu tempo, a kibra e banchi di cariño cu tabata uni Marta cu su dos rumannan. Nos no sa con of ki tempo esey a sosode, pero nos por ta sigur cu e fe precioso di Marta a yud’e persevera te na fin di su bida. Esta un bon ehempel di fe pa cristiannan awe!

^ par. 11 Den e sociedad Hudiu di prome siglo, hende muher por lo general no tabatin mag di ta presente ora un maestro tabata duna enseñanza. Hende muher tabata concentra mas riba siña haci tareanan di cas. Kisas pesey pa Marta tabata hopi straño pa mira su ruman muher sinta na pia di un maestro pa siña for di dje.