Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO DIESOCHO

“El A Keda Pensa Riba Kico Nan A Nifica”

“El A Keda Pensa Riba Kico Nan A Nifica”

1, 2. Describi e biahe di Maria, y splica dicon e biahe tabata dificil p’e.

MARIA a purba di sinta un poco mas comodo riba e burico. E tabatin basta ora ta core riba dje. Un poco mas dilanti, Jose tabata guia nan cu paso firme rumbo pa Betlehem. Maria a bolbe sinti e yiu move den su bariga.

2 Maria “tabata cerca di duna luz”, segun e relato di Bijbel. (Luc. 2:5) Mientras cu e pareha tabata pasa un cunucu tras di otro, kisas algun di e cunukeronan cu a mira nan a puntra nan mes pakico un muher den e condicion ey tabata biahando. Kico Maria tabata haci asina leu for di su cas na Nazaret?

3. Ki tarea Maria a ricibi, y kico nos lo bay siña tocante Maria?

3 Tur cos a cuminsa algun luna prome, ora cu e mucha muher Hudiu aki a ricibi un tarea unico den historia humano: bira mama di e futuro Mesias, e Yiu di Dios! (Luc. 1:35) Net ora cu e dianan pa Maria duna luz tabata yegando, e mester a haci un biahe. Varios suceso durante e biahe ey a pone su fe na prueba. Laga nos wak kico a yud’e keda fuerte den sentido spiritual.

E Biahe pa Betlehem

4, 5. (a) Dicon Jose cu Maria tabata riba caminda pa Betlehem? (b) E decreto di Cesar a laga cua profecia cumpli?

4 Jose cu Maria no tabata e unico hendenan biahando. Emperador Cesar Augusto a saca un decreto cu tur habitante di e pais mester a bay nan stad natal pa registra nan mes den un censo. Kico Jose a haci? Segun e relato: “Naturalmente Jose tambe a sali for di Galilea, for di e stad Nazaret, y a bay Judea, na e stad di David cu yama Betlehem, pasobra e tabata di e cas y famia di David.”—Luc. 2:1-4.

5 No ta pa casualidad Cesar a saca e decreto ey net na e tempo ey. Un 700 aña prome, un profecia a bisa cu e Mesias lo a nace na Betlehem. Tabatin un otro stad cu yama Betlehem cu a keda apenas 11 kilometer for di Nazaret. Pero e profecia a bisa specificamente cu e Mesias lo a bin di “Betlehem Efrata.” (Lesa Mikeas 5:2.)  Pa un hende yega e pueblito ey for di Nazaret, e mester a biaha un distancia di 130 kilometer, pasando via Samaria, y door di un area cu hopi sero. Ta na e Betlehem ey Jose tabatin cu bay pa registra su mes, pasobra esey tabata e stad natal di Rey David. Y tanto Jose como Maria tabata di e famia di David.

6, 7. (a) Dicon un biahe pa Betlehem lo no tabata nada facil pa Maria? (b) Unabes Maria tabata casa, con esey a influencia su decisionnan? (Wak tambe e nota.)

6 Y kico di Maria? El a apoya Jose su decision di cumpli cu e decreto? Maria tabata sa cu e biahe lo tabata hopi pisa p’e. Probablemente tabata cuminsamento di october y lo tabatin mas chens riba yobida leve, ya cu tabata casi final di e temporada seco. Ademas, na final di e biahe lo tabatin e parti mas pisa, pasobra Betlehem tabata situa riba un sero di mas cu 760 meter halto. E biahe casi sigur lo a dura mas largo cu normal, pasobra nan lo tabatin cu para hopi biaha pa Maria por a sosega. Cualkier hende muher den su condicion lo a prefera di keda cas, caminda su famia y amigonan por a yud’e ora cu e momento di duna luz yega. Sin duda, e mester tabatin curashi pa haci e biahe aki.

E biahe pa Betlehem no tabata nada facil

7 A pesar di tur esey, Lucas a skirbi cu Jose “a bay pa registra su mes hunto cu Maria.” Tambe e ta bisa cu Jose “a casa” cu Maria di acuerdo cu e compromiso matrimonial. (Luc. 2:4, 5) E echo cu Maria tabata casa cu Jose a haci un gran diferencia den e decisionnan cu Maria a tuma di e momento ey padilanti. El a  considera Jose como su cabes y a acepta e papel cu Dios a duna e esposa como ayudante di e esposo. Pues, el a apoya e decisionnan di Jose fielmente. * Maria tabata dispuesto pa obedece su casa den un situacion cu no tabata nada facil p’e, y asina el a demostra su fe.

8. (a) Kico mas lo por a motiva Maria pa bay Betlehem hunto cu Jose? (b) Dicon Maria su ehempel ta un gran animacion pa tur hende fiel na Dios?

8 Kico mas lo por a motiva Maria pa obedece Jose? Bijbel no ta bisa si e tabata sa di e profecia cu a bisa cu e Mesias lo a nace na Betlehem. Pero kisas esey tabata e caso, pasobra e profecia ey tabata bon conoci entre e lidernan religioso y hasta entre e pueblo en general. (Mat. 2:1-7; Juan 7:40-42) Y Maria tabata conoce e Scritura bon. (Luc. 1:46-55) En todo caso, Maria a dicidi di haci e biahe, sea pa obedece su casa, pa somete na un decreto civil, pa cumpli cu un profecia di Jehova of debi na un combinacion di e factornan ey. Asina el a laga un bon ehempel pa nos. Jehova ta aprecia masha hopi ora un hende, sea homber of muher, ta demostra un actitud obedecido y humilde. Anto Maria su ehempel ta un gran animacion pa tur persona fiel na Dios, pasobra den e tempo aki hopi hende no ta considera sumision un virtud.

 E Nacemento di Cristo

9, 10. (a) Riba kico Maria cu Jose kisas a pensa ora nan tabata acercando Betlehem? (b) Unda Jose cu Maria a pasa nochi, y dicon?

9 Maria lo mester a hala un rosea di alivio ora cu porfin el a cuminsa mira Betlehem leu aya. Segun cu nan tabata subi e seronan, nan a pasa varios hofi di oleifi (oleifi tabata un di e ultimo frutanan pa ser cosecha). Kisas Maria cu Jose a pensa riba e historia di Betlehem. E tabata un pueblito asina chikito cu, manera profeta Mikeas a bisa, ni sikiera e tabata ser conta entre e stadnan di Juda. Pero tabata eynan cu mas cu mil aña prome personanan manera Boaz, Noemi y despues David, a nace.

10 Ora Maria cu Jose a yega, nan a haya e pueblito yen yen di hende. Hopi a yega prome cu nan pa registra, y no tabatin luga pa nan den e luga di hospedahe. * No a keda nan niun otro opcion cu pasa anochi den un stal. Nos por imagina con nervioso Jose a bira ora el a mira su casa cuminsa sinti un dolor cu nunca prome el a sinti. Y e dolor tabata bira cada bes mas fuerte. Figura bo, net eynan su dolornan di parto a cuminsa!

11. (a) Dicon hende muher di tur parti di mundo por compronde kico Maria a pasa aden? (b) Den ki sentido asina Hesus tabata “prome yiu”?

11 Hende muher di tur parti di mundo sa kico Maria a pasa aden. Un 4.000 aña prome, Jehova a profetisa cu debi na pica hereda, hende muher lo sufri durante parto. (Gen. 3:16) Y no tin nada pa indica cu Maria tabata un excepcion. Respetando Maria su privacidad y e manera cu e parto a tuma luga, Lucas simplemente a bisa cu “el a duna luz na su prome yiu, un yiu homber.” (Luc. 2:7) Si, su “prome yiu” a nace, e prome di por lo menos shete yiu cu Maria a haya. (Mar. 6:3) Pero e yiu aki tabata esun di mas special. E tabata no solamente Maria su prome yiu, sino tambe “e prome di tur creacion” di Jehova, si, Dios su Yiu unigenito!—Col. 1:15.

12. Unda Maria a pone e baby, y dicon e realidad tabata otro for di loke ta keda presenta den hopi cuadro, obra teatral y escena di Pasco?

12 Awor e relato ta agrega un detaye hopi conoci: “El a lor’e den paña y pon’e den un pesebre.” (Luc. 2:7) Masha hopi cuadro, obra teatral y escena di Pasco rond mundo ta presenta esaki di un manera hopi sentimental y irealistico. Pero e realidad tabata otro. Pa cuminsa, un pesebre ta un baki cu bestia di cria ta come aden. Ademas, e famia tabata den un stal, sigur no e luga  di mas higienico of cu holo mas agradabel, ni e tempo ey ni aworaki. Y francamente bisa, ningun mayor lo no scoge un luga asina pa trece su yiu na mundo si e tin otro opcion! Normalmente, mayornan kier lo mihor pa nan yiunan. Maria cu Jose sigur lo kier a percura lo mihor pa e Yiu di Dios!

13. (a) Con Maria cu Jose a haci lo mihor cu nan tabata por den nan circunstancia? (b) Con mayornan sabi por imita e ehempel di Jose cu Maria?

13 Pero nan no a laga e situacion desagradabel ey descurasha nan. Simplemente nan a haci lo mihor cu nan tabata por den e circunstancia ey. Por ehempel, Maria mes a percura pa e baby y a lor’e bon den paña, y despues a pon’e drumi den e pesebre. Asina e yiu lo a keda bon proteha y cayente. Hasta den e situacion desagradabel aki, Maria a cuida su yiu mas mihor posibel. Ademas, tanto e como Jose tabata sa cu e cos di mas importante tabata pa cuid’e den sentido spiritual, esta, siñ’e stima Jehova. (Lesa Deuteronomio 6:6-8.) Mayornan sabi ta pone e mesun prioridadnan cu Jose y Maria segun cu nan ta lanta nan yiunan den e mundo di awe cu no tin balor pa cosnan spiritual.

Un Bishita Cu A Anima Maria cu Jose

14, 15. (a) Dicon e wardadornan tabata ansioso pa mira e yiu? (b) Kico e wardadornan a haci despues cu nan a mira Hesus den e stal?

14 Diripiente, un grupo di wardador di carne a core drenta e stal y kita e trankilidad cu tabata reina. Nan tabata ansioso pa mira e famia, specialmente e yiu recien naci. E hombernan aki tabata hopi entusiasma, y nan cara tabata briya di alegria. Poco prome, nan tabata hunto cu nan tounan den e seronan, pero nan a bin abou pura. * Nan a conta e mayornan sorprendi un cos maraviyoso cu a caba di pasa cu nan. Meyanochi, diripiente un angel a aparece na e wardadornan. E gloria di Jehova a briya tur rond di nan, y e angel a bisa nan cu e Cristo, of Mesias, a caba di nace na Betlehem. Nan lo a haya e yiu chikito eynan, lora den paña y drumi den un pesebre. Despues algo mas espectacular ainda a sosode: un multitud grandi di angel cu tabata alaba Dios a presenta!—Luc. 2:8-14.

15 No ta nada straño cu e hombernan humilde aki a bin Betlehem pura asina! Nan lo mester a keda hopi emociona ora nan a haya e yiu recien naci precies manera e angel a describie. Nan  no a tene e bon noticia pa nan so. “Nan a conta loke e angel a bisa nan ... Y tur hende cu a tende e cosnan cu e wardadornan di carne a conta nan a keda asombra.” (Luc. 2:17, 18) Aparentemente e lidernan religioso di e tempo ey tabata menosprecia wardador di carne. Sinembargo, tabata bisto cu Jehova si a aprecia e hombernan humilde y fiel aki. Pero ki efecto e bishita aki tabatin riba Maria?

Ta bisto cu Jehova a aprecia e wardadornan di carne humilde y fiel aki

16. Con Maria a demostra cu e tabata un persona cu realmente a medita, y kico a yud’e mantene su fe fuerte?

16 Maria lo mester tabata morto cansa despues di e parto, pero toch el a scucha atentamente na tur loke a ser bisa. Y no esey so, “Maria a warda tur e palabranan aki cuidadosamente den su curason, y el a keda pensa riba kico nan a nifica.” (Luc. 2:19) E mucha muher aki tabata realmente un persona cu a medita, si, el a pensa profundamente riba tur loke el a tende. El a compronde con importante e mensahe di e angel tabata. Su Dios, Jehova, tabata kier p’e sa ken e yiu cu el a haya tabata y ki papel importante e lo bay tin. Pesey Maria a haci mas cu djis scucha. El a warda e palabranan den su curason, ya asina e por a medita riba nan bes tras bes den e lunanan y añanan binidero. Sin duda, e meditacion ey tabata e clave cu a yuda Maria mantene su fe fuerte durante henter su bida.—Lesa Hebreonan 11:1.

Maria a scucha e wardadornan di carne atentamente y a warda nan palabranan den su curason

17. Con nos por imita e ehempel di Maria?

17 Abo awor, lo bo imita e ehempel di Maria? Jehova a yena e paginanan di Bijbel cu berdadnan spiritual sumamente importante. Pero nan lo no yuda nos cu nada si nos no presta atencion na nan. Con nos por haci esey? Nos tin cu lesa Bijbel cu regularidad, no como un simpel obra literario sino como e Palabra di Dios. (2 Tim. 3:16) Despues, mescos cu Maria, nos tin cu warda e palabranan spiritual ey den nos curason, y keda pensa riba kico nan ta nifica. Nos fe lo bira mas fuerte ora nos ta medita riba loke nos ta lesa den Bijbel y ta pensa riba maneranan pa pone e conseho di Jehova mas plenamente na practica.

Mas Palabra pa Keda Pensa Ariba

18. (a) Con Maria y Jose a cumpli cu Ley di Moises ora Hesus tabata baby? (b) Kico e ofrenda cu Jose y Maria a presenta na e tempel a revela tocante nan situacion financiero?

18 Ora e baby tabatin ocho dia, Maria cu Jose a laga circuncid’e,  manera Ley di Moises a prescribi. Y nan a duna e yiu e nomber Hesus, manera e angel a bisa nan. (Luc. 1:31) Despues, ora e yiu tabatin 40 dia, nan a hib’e e tempel na Jerusalem, un 10 kilometer leu for di Betlehem. Ey nan a presenta e ofrenda di purificacion cu Ley a stipula pa hende pober: dos tortelduif of dos paloma pichon. Kisas nan a sinti berguensa cu nan no por a ofrece un lamchi di carne y un paloma pichon of tortelduif manera otro mayornan por a afford. Pero hasta si tabata asina, nan a cumpli cu Ley lo mihor cu nan tabata por. En todo caso, nan a haya un tremendo animacion ora nan tabata eynan.—Lev. 12:6-8; Luc. 2:21-24.

19. (a) Con Simeon a duna Maria mas palabra pa e warda den su curason? (b) Con Ana a reacciona ora el a mira Hesus?

19 Simeon, un homber di edad, a acerca nan y a duna Maria mas palabra pa e warda den su curason. Jehova a priminti e homber aki cu lo e mira e Mesias prome cu e muri, y su spirito santo a revela na dje cu e baby Hesus tabata e Salbador priminti. Simeon a spierta Maria tambe cu un dia lo e sinti un dolor fuerte, comosifuera di un spada largo cu ta pasa door di su alma. (Luc. 2:25-35) Kisas e palabranan aki, pa duro cu nan tabata, a yuda Maria keda firme ora e momento dificil ey a yega, 33 aña despues. Despues di Simeon, un profeta cu yama Ana a mira e  baby Hesus, y el a cuminsa papia tocante dje cu tur hende cu tabata spera e liberacion di Jerusalem.—Lesa Lucas 2:36-38.

Maria cu Jose a haya bon animacion na e tempel di Jehova na Jerusalem

20. Dicon Jose cu Maria a tuma un bon decision di bay e tempel cu Hesus?

20 Jose cu Maria a tuma un bon decision di bay e cas di Jehova na Jerusalem cu nan baby. Asina nan a duna nan yiu un bon comienso: pa resto di su bida el a keda bishita e tempel di Jehova fielmente. Na e tempel, Jose cu Maria a ofrece Jehova lo mihor cu nan tabatin, y a cambio di esey nan a ricibi instruccion y palabranan di animacion. E dia ey, Maria siguramente a sali for di tempel cu un fe mas fuerte y cu su curason yen di berdad spiritual importante pa medita ariba y pa comparti cu otro hende.

21. Con nos por haci sigur cu nos fe lo sigui bira mas fuerte, mescos cu tabata e caso cu Maria?

21 Ta bunita pa mira cu hopi mayor awe ta sigui e ehempel ey. Mayornan testigo di Jehova ta bay reunion fielmente cu nan yiunan. E mayornan ey ta duna loke nan por y ta ofrece palabranan di animacion na nan rumannan den fe. Y nan ta sali for di e reunionnan cristian aki mas fuerte, mas feliz y yen di cos bon pa comparti cu otro hende. Ta un goso pa reuni hunto cu nan! Ora nos ta haci esey, nos lo ripara cu nos fe lo sigui bira mas fuerte, mescos cu tabata e caso cu Maria.

^ par. 7 Ripara e diferencia entre e biahe aki di Maria y un biahe anterior cu el a haci. Segun Bijbel, den e prome biahe: ‘Maria a lanta y a bay’ bishita Elisabet. (Luc. 1:39) E tempo ey, e tabata solamente comprometi. Kisas el a tuma e decision di bay sin consulta cu Jose. Pero despues cu nan a casa, Bijbel ta indica cu ta Jose a dicidi di haci e biahe, no Maria.

^ par. 10 Den e tempo ey, tur stad tabatin e custumber di pone un luga disponibel pa aloha biahero y caravana cu tabata di transito.

^ par. 14 E echo cu e wardadornan aki tabata pafo den cunucu hunto cu nan tounan e temporada ey ta confirma loke cronologia biblico ta indica: Cristo no a nace den december ora cu e tounan lo a keda mas cerca di cas. Mas bien, el a nace rond di principio di october.