Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO DIESNUEBE

Un Bon Tata y un Homber di Fe

Un Bon Tata y un Homber di Fe

1, 2. (a) Kico tabata spera Jose cu su famia? (b) Ki mal noticia Jose mester a duna su casa?

JOSE a pone e ultimo bulto riba lomba di e burico. Segun cu e tabata caricia e bestia, el a wak rond di dje. Ainda solo no a sali riba Betlehem. Jose tabata preocupa! Su famia chikito tabatin un biahe largo nan dilanti. Figura bo, Egipto! Un pais straño, idioma straño, custumbernan straño. Nan lo por a adapta nan mes na tur e cosnan ey?

2 No tabata facil pa Jose duna su casa stima, Maria, e mal noticia. Pero el a tuma un curashi y a cont’e cu un angel a bis’e den un soño cu Rey Herodes kier a mata nan yiu chikito! Pues, nan tabatin cu sali for di Betlehem mesora. (Lesa Mateo 2:13, 14.) Maria tabata hopi preocupa. Ni Maria ni Jose no por a compronde dicon un hende lo kier a mata nan yiu chikito inocente. Pero nan tabatin confianza den Jehova y a prepara mesora pa bay Egipto.

3. Describi con Jose cu su famia a sali for di Betlehem. (Wak tambe e plachi.)

3 Henter Betlehem tabata na soño. Nan no tabata sa di e tragedia cu tabata spera nan. Jose, Maria y Hesus a sali keto keto for di e pueblito. Nan a bay direccion pazuid, y segun cu claridad di mainta a cuminsa sali di pariba, Jose lo a puntra su mes: ‘Con un simpel carpinte manera mi lo por proteha su famia contra enemigonan asina poderoso? Lo mi por percura pa e necesidadnan di mi famia? Lo mi por cumpli cu e tarea importante cu Jehova Dios a confia mi cu ne di cuida y cria e yiu asina unico aki?’ Jose tabatin obstaculonan enorme su dilanti. Segun cu nos ta analisa con el a supera cada un di nan, nos lo mira dicon ta necesario pa nos tur en general—y tatanan en particular—imita e fe di Jose.

Jose A Proteha Su Famia

4, 5. (a) Con e bida di Jose a cambia por completo? (b) Con un angel a trankilisa Jose?

4 Mas cu un aña prome, e bida di Jose a cambia por completo. E tempo ey e tabata biba ainda na Nazaret y tabata comprometi pa casa cu Maria, yiu muher di Heli. E tabata conoce Maria como un mucha muher decente cu tabata stima Jehova y su normanan. Pero diripiente a resulta cu Maria tabata na estado! Jose tabata plania pa  divorcia di Maria secretamente pa proteh’e di un escandalo. * Pero un angel a splica Jose den un soño cu Jehova a uza Su spirito santo pa laga Maria sali na estado. Tambe e angel a bis’e cu e yiu ey lo “salba su pueblo di nan picanan.” Y el a trankilisa Jose cu e palabranan: “No tene miedo di casa cu Maria.”—Mat. 1:18-21.

5 Como cu Jose tabata un homber husto y obedecido, el a haci manera e angel a bis’e. El a acepta e tarea di mas importante cu un hende por a ricibi, esta di cria y cuida no su mes yiu, sino e Yiu stima di Dios. Mas despues, pa cumpli cu un decreto di e emperador Romano, Jose cu su casa na estado a bay Betlehem pa registra nan mes. Eynan e yiu a nace.

6-8. (a) Kico a causa mas cambio den e bida di Jose y su famia chikito? (b) Kico ta indica cu ta Satanas a manda e “strea”? (Wak tambe e nota.)

6 Jose no a bay Nazaret bek cu su famia. Nan a keda biba na Betlehem, un 10 kilometer asina for di Jerusalem. Nan tabata pober, pero Jose a haci tur loke tabata na su alcance pa proteha y cuida Maria cu Hesus pa nan no pasa trabou. De echo, despues di poco tempo nan a bay biba den un cas humilde. Anto ora Hesus no tabata un baby mas—e tabatin kisas poco mas cu un aña—nan bida a bolbe cambia diripiente.

7 Un dia, un grupo di homber a yega na cas di Jose cu Maria. Nan tabata astrologo di Oriente cu a bin di basta leu, probablemente for di Babilonia. Nan tabata busca e mucha cu lo a bira rey di e Hudiunan, y nan a sigui un “strea” cu a trece nan te eynan. E hombernan tabata hopi respetuoso.

8 Sea cu e astrologonan a realisa esey of no, nan a pone Hesus den peliger grave. E “strea” cu nan a mira no a dirigi nan mesora na Betlehem. Mas bien, el a hiba nan Jerusalem, caminda nan a conta e Rey malbado Herodes cu nan tabata busca e mucha cu lo a bira Rey di e Hudiunan. * Esaki a haci e Rey hopi jaloers mes.

9-11. (a) Con un forsa mas poderoso cu Herodes of Satanas a interveni? (b) Con e biahe pa Egipto tabata distinto for di e manera cu mitonan den buki apocrifo ta describie?

9 Afortunadamente un forsa mas poderoso cu Herodes of Satanas a interveni, manera nos lo bay mira. Pa loke ta e bishitantenan, ora nan a yega na e cas di Hesus y a mir’e hunto cu su mama, nan a saca nan regalonan valioso—“oro, sencia blanco y mira”—sin pidi nada a cambio. Esaki lo mester tabata un gran sorpresa pa Jose cu Maria! Como cu e astrologonan tabatin intencion di bay conta  Herodes na unda nan a haya e mucha cu nan tabata busca, Jehova a interveni. Den un soño, el a duna e astrologonan instruccion pa bay cas bek via un otro ruta.—Lesa Mateo 2:1-12.

10 Poco despues cu e astrologonan a bay, e angel di Jehova a duna Jose e spiertamento aki: “Lanta ariba, coy e mucha cu su mama y huy bay Egipto, y keda ayanan te ora mi bisa bo pa bin bek, pasobra Herodes tin idea di laga busca e mucha pa mat’e.” (Mat. 2:13) Anto manera nos a mira na principio di e capitulo aki, Jose a obedece mesora. El a pone e siguridad di su yiu prome cu tur cos y a lanta bay Egipto cu su famia. Como cu e astrologonan pagano a duna nan regalonan asina valioso, Jose tabatin e recursonan necesario pa yuda nan durante nan biahe y estadia na Egipto.

Jose a actua dicidido y tabata dispuesto pa sacrifica tur cos pa proteha su yiu

11 Cierto mito y leyenda di bukinan apocrifo ta presenta e huida pa Egipto como un biahe yen di fantasia. Nan ta conta cu e yiu Hesus milagrosamente a haci e distancia mas cortico, stroba bandidonan peligroso di ataca nan y hasta laga palmanan di dadel buig pa asina su mama por a yega na e frutanan. * Pero en realidad, esaki tabata simplemente un biahe largo y pisa, rumbo pa un destino desconoci.

Jose a sacrifica su comodidad pa bienestar di su famia

12. Kico mayornan cu tin cu lanta nan yiunan den e mundo peligroso aki por siña for di Jose?

12 Mayornan por siña hopi for di e ehempel di Jose. Sin pensa dos biaha, el a bandona su trabou y sacrifica su comodidad pa proteha su famia. Ta bisto cu el a considera su famia como un encargo sagrado cu Jehova a dun’e. Mayornan awe tin cu lanta nan yiunan den un mundo peligroso; un mundo patapata di mal influencia cu por causa hobennan hopi sufrimento y hasta ruina nan bida. Sin duda, mama- y tatanan cu, mescos cu Jose, ta actua dicidido y ta haci esfuerso pa proteha nan yiunan di e mal influencianan ey ta merece nos respet!

Jose A Cuida Su Famia

13, 14. Dicon Jose cu Maria a bay biba bek na Nazaret?

13 Parce cu Jose y su famia no a keda Egipto hopi tempo, pasobra poco despues e angel a informa Jose cu Herodes a muri. Un profecia di antiguedad a bisa cu Jehova lo a yama su Yiu “for di Egipto.” (Mat. 2:15) Jose a yuda cumpli cu e profecia ey ora cu el a  bay for di Egipto y a hiba su famia bek na nan pais di origen. Pero unda nan lo a bay biba awor?

14 Jose tabata un homber prudente. E tabatin motibo pa teme Arkelao, sucesor di Herodes, pasobra e tambe tabata un Rey malicioso y asesino. Bou di guia di Dios, Jose a bay cu su famia mas panort, leu for di Jerusalem y tur su intriganan. El a bay bek Nazaret, na Galilea, caminda e tabata biba antes. Eynan e cu Maria a lanta nan famia.—Lesa Mateo 2:19-23.

15, 16. Con e trabou di Jose tabata, y cua ta algun herment cu e lo a uza?

15 Nan tabatin un bida simpel, pero no un bida facil. Bijbel ta yama Jose “e carpinte”, uzando un palabra cu a referi na un persona cu a haci tur sorto di cos cu palo. (Mat. 13:55) Un carpinte tabatin cu kap e palo, transport’e y pon’e seca. Despues el a uza e palo ey pa traha cas, boto, brug chikito, garoshi, wiel, yugo y tur tipo di herment pa traha den cunucu. Esey tabata trabou pisa. Hopi biaha un carpinte tabata traha banda di e entrada di su cas humilde of den un shop banda di e cas.

16 Jose a uza un variedad amplio di herment; hopi di nan e lo a haya di su tata. Podise el a uza square, chumbo, hacha, zaag, martiu, mokel, beitel y tambe varios tipo di lijm. Kisas el a uza un boor di man cu tabatin un boog cu e mester a move bay bin pa e traha. Y hasta e por tabatin algun clabo, aunke nan tabata hopi caro.

17, 18. (a) Kico Hesus a siña for di su tata di crianza? (b) Dicon Jose tabatin cu traha mas y mas duro?

17 Nos por imagina con ora Hesus tabata mucha chikito, e tabata para wak su tata di crianza traha. Cu su wowonan yen di curiosidad, lo el a sigui delaster un movemento di Jose. Sin duda, el a admira su tata su lomba hancho, brasanan muscular y mannan habil. E por a mira cu su tata tabata un homber fuerte y inteligente. Kisas Jose a cuminsa siñ’e con pa haci algun tarea simpel, manera con pa uza cuero di pisca seco como schuurpapier pa haci palo fini. Probablemente el a laga Hesus mira tambe kico tabata e diferencia entre e varios tipo di palonan cu el a uza, por ehempel, palo di figo sicamor, eik y oleifi.

Jose a siña su yiu e ofishi di carpinte

18 Hesus a siña tambe cu e homber fuerte ey cu tabata kap palo,  traha balki y pega tabla na otro, tabata hopi cariñoso tambe cu ne, cu su mama y cu su rumannan. Si, e famia di Jose y Maria a sigui crece, y cu tempo nan tabatin por lo menos seis yiu mas. (Mat. 13:55, 56) Jose tabatin cu traha mas y mas duro pa e por a cuida nan tur.

Jose tabata sa cu e cos di mas importante pa su famia tabata nan relacion cu Dios

19. Kico Jose a haci pa satisface e necesidad spiritual di su famia?

19 Pero Jose tabata sa cu e cos di mas importante pa su famia tabata nan necesidad spiritual, si, nan relacion cu Dios. Pues, el a dedica tempo na siña su yiunan tocante Jehova Dios y Su leynan. E cu Maria tabata hiba nan sinagoga cu regularidad, caminda nan tur por a tende e lesamento di Ley y su splicacion. Kisas Hesus tabatin masha hopi pregunta tocante Jehova y su leynan despues di reunionnan asina, y Jose a haci su best pa contesta nan. Ademas, Jose tabata hiba su famia na e fiestanan religioso cu tur aña nan tabata celebra na Jerusalem. Por ehempel, pa asisti na e fiesta di Pesag, of Pasco Hudiu, nan mester a haci un biahe di 120 kilometer pa bay celebra e fiesta y bolbe biaha e mesun distancia ey pa bin cas bek. Na tur nan a pasa kisas dos siman for di cas.

Jose tabata hiba su famia regularmente na e tempel di Jerusalem pa adora Jehova

20. Con cabesnan di famia cristian por imita e ehempel di Jose?

20 Cabesnan di famia cristian awe tambe ta sigui casi e mesun rutina. Nan ta sacrifica nan mes pa nan yiunan y ta pone e educacion spiritual di nan yiunan prome cu tur otro cos, incluso prome cu nan mes comodidad. Nan ta haci hopi esfuerso pa siña nan yiunan tocante Jehova na cas y tambe pa bay reunion- y asambleanan cristian cu nan. Mescos cu Jose, nan sa cu e mihor cos cu nan por haci pa nan yiunan ta di siña nan tocante Jehova.

“Tur Ansha”

21. Con e temporada di e fiesta di Pasco Hudiu tabata pa e famia di Jose, y ki ora Jose cu Maria a ripara cu Hesus no tabat’ey?

21 E relato biblico ta conta nos algo cu a sosode tempo Hesus tabatin 12 aña. Manera tabata custumber, Jose a hiba su famia Jerusalem pa celebra e fiesta di Pasco Hudiu. Gruponan grandi di famia tabata biaha hunto. Tabata lente, y e paisahe den cunucu tabata berde y yena cu flor. Segun cu nan tabata yega e terenonan mas desola cu tabata subi bay Jerusalem, hopi di e hendenan tabata canta e salmonan bon conoci cu nan a yama cantica di subida. (Sal. 120-134) E stad lo tabata hopi druk, kisas cu cientos di miles di  hende. Despues di e fiesta, e famianan tabata rumbo pa cas atrobe. Jose cu Maria, talbes cu mil y un cos di haci, a asumi cu Hesus tabata biahando hunto cu otro hende den e grupo, kisas cu algun miembro di famia. Pero despues cu nan a biaha henter dia, nan a haya e susto di nan bida: Hesus no tabat’ey!—Luc. 2:41-44.

22, 23. Kico Jose y Maria a haci ora nan a realisa cu Hesus no tabata hunto cu nan, y kico Maria a bis’e ora cu finalmente nan a hay’e?

22 Tur preocupa, nan a bira bay bek te Jerusalem pa busc’e. Nan a cana rond di e stad, den e cayanan cu awor tabata parce desola, gritando: ‘Hesus, Hesus!’ Na unda e mucha ey por tabata? Riba e di tres dia ainda nan tabata busc’e! Acaso Jose a cuminsa puntra su mes si el a faya gravemente cu e encargo sagrado cu Jehova a dun’e? Finalmente, nan a bay busca den tempel. Nan a drenta den un camber  grandi caminda tabatin hopi maestro versa den Ley, y ey Hesus tabata sinta meymey di nan! Esta un alivio Jose y Maria lo mester a sinti!—Luc. 2:45, 46.

23 Hesus tabata sinta ta scucha e maestronan ey y tabata haci nan hopi pregunta. E hombernan tabata asombra di e contestanan cu e tabata duna y di cuanto cos e tabata compronde. Pero Maria y Jose a keda babuca. Bijbel no ta indica cu Jose a bisa algo. Sinembargo, Maria su palabranan a expresa precies loke tur dos tabata sinti: “Mi yiu, pakico bo a haci asina cu nos? Ami cu bo tata tabata busca bo tur ansha.”—Luc. 2:47, 48.

24. Con Bijbel ta pinta un cuadro realistico di loke mayornan ta enfrenta?

24 Asina, cu djis un par di frase, e Palabra di Dios ta pinta un cuadro realistico di e preocupacionnan y stress cu mayornan ta  enfrenta, hasta den caso di un yiu perfecto! Den e mundo peligroso aki tin hopi cos cu ta pone mayornan biba “tur ansha”, pero e relato aki mester ta un gran consuelo pa nan. E ta mustra cu Jehova ta compronde e dificultadnan cu mayornan ta enfrenta.

25, 26. Con Hesus a contesta su mayornan, y con Jose lo a sintie en conexion cu e palabranan di su yiu?

25 Pues, Hesus tabata tur e tempo ey den tempel, e luga caminda el a sintie mas cerca di su Tata celestial, Jehova, y caminda el a purba di siña mas tanto posibel di dje. El a contesta su mayornan cu tur sinceridad: “Pakico boso tabata busca mi? Boso no tabata sa cu mi mester ta den cas di mi Tata?”—Luc. 2:49.

26 Jose siguramente a pensa hopi biaha riba e palabranan ey despues. Podise el a hasta sinti su mes orguyoso di nan, pasobra con cu bay bin, el a haci su best pa siña su yiu di crianza stima Jehova y mir’e como su tata. Y aunke ainda Hesus tabata un mucha, ya caba e tabata sa kico un tata amoroso y cariñoso ta. Sin duda, esey tabata debi na e manera cu Jose a trata cu ne.

27. Si abo ta un tata, ki privilegio bo tin, y con bo por imita e ehempel di Jose?

27 Si abo ta un tata, bo ta realisa cuanto bo ehempel ta influencia e opinion cu bo yiunan ta forma di loke ta un bon tata: un persona amoroso y protectivo? Esta un bunita privilegio esey ta! Y si bo tin yiu di crianza, corda riba e ehempel di Jose y trata cada yiu como un persona unico y valioso. Yuda nan hala mas cerca di nan Tata celestial, Jehova Dios.—Lesa Efesionan 6:4.

Jose A Cumpli cu Su Responsabilidad

28, 29. (a) Kico e palabranan di Lucas 2:51 y 52 ta siña nos tocante Jose? (b) Con Jose a yuda su yiu “aumenta den sabiduria”?

28 Bijbel ta revela djis un par di cos mas di Jose, pero ta bale la pena analisa nan. Nos ta lesa cu Hesus “a keda sumiso” na su  mayornan. Tambe Bijbel ta bisa cu “Hesus a sigui crece fisicamente y aumenta den sabiduria, y mas y mas e tabata haya aprobacion di Dios y di hende.” (Lesa Lucas 2:51, 52.) Kico e palabranan ey ta bisa nos tocante Jose? Varios cos. Pa cuminsa, Jose tabata un bon cabes di cas, pasobra su yiu perfecto a respet’e y a somete su mes na e autoridad di su tata; cu otro palabra, Hesus a obedece Jose.

29 Tambe nos ta siña cu Hesus a sigui aumenta den sabiduria. Jose siguramente a yuda Hesus gana e sabiduria ey. Den e tempo ey tabata circula un texto bieu entre e Hudiunan—cu te awe bo por hay’e pa lesa—cu ta bisa cu ta solamente hombernan cu tin hopi tempo liber por bira realmente sabi. Anto segun e dicho ey, hombernan di ofishi, manera carpinte, cunukero y smid, no tin e sabiduria pa distingui entre loke ta bon y malo y no ta den posicion di husga otro hende ni “bo no ta haya nan caminda hende ta conta parabola.” Despues, ora Hesus a bira grandi, el a demostra cu e idea ey ta absurdo. Ademas, como mucha, sin duda el a tende su tata di crianza—un humilde carpinte—papia hopi biaha palabranan sabi tocante loke ta bon y malo den bista di Jehova!

30. Con Jose a pone un bon ehempel pa cabesnan di famia awe?

30 Ademas, e echo cu Hesus a crece bira un homber fuerte y saludabel ta otro prueba cu Jose a percura bon pa su famia. Tambe, Jose a siña su yiu un ofishi y a prepar’e pa haci un bon trabou. Hesus no solamente tabata conoci como yiu di e carpinte, sino tambe como “e carpinte.” (Mar. 6:3) Pues, Jose a entren’e bon. Cabesnan di famia awe ta haci bon di imita Jose: Nan ta percura pa e bienestar fisico di nan yiunan y ta haci sigur cu despues e yiunan mes por gana nan pan.

31. (a) Na ki tempo Jose probablemente a muri? (Inclui e  cuadro.) (b) Ki ehempel Jose a laga atras pa nos imita?

31 E relato di Bijbel ta bolbe papia di Hesus ora el a batisa cu 30 aña di edad. Jose no ta ser menciona mas den e relato. Parce cu Maria ya tabata viuda ora cu Hesus a cuminsa cu su trabou di predica. (Wak e cuadro “ Ki Tempo Jose A Muri?”) Pero asina mes, Jose a laga algo bunita atras: Un ehempel excelente di un tata cu semper a proteha y cuida su famia y cu a cumpli cu su responsabilidad te na final. Tur tata, tur cabes di famia, eigenlijk tur cristian, ta haci bon di imita e fe di Jose.

^ par. 4 Den e tempo ey nan tabata considera compromiso mes serio cu casamento.

^ par. 8 E “strea” aki no tabata un fenomeno natural di astronomia, ni no ta Dios a mand’e. Ta bisto cu ta Satanas a uza e suceso sobrenatural ey como parti di su plan malbado pa caba cu Hesus.

^ par. 11 Bijbel ta mustra bon cla cu Hesus a haci su “prome milager” despues cu el a batisa.—Juan 2:1-11.