Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO SHETE

El “A Sigui Crece Hunto cu Jehova”

El “A Sigui Crece Hunto cu Jehova”

1, 2. Den ki circunstancia Samuel a papia cu e pueblo di Israel, y dicon e tabatin cu motiva nan pa arepenti?

SAMUEL, un homber fiel cu pa decadanan a sirbi como profeta y hues, a manda yama e nacion di Israel pa reuni na e stad Gilgal. Tabata luna di mei of juni—segun nos kalender moderno—y temporada di secura ya a cuminsa. E trigo tabata cla pa ser cosecha, y e cunucunan den e region tabata briya manera oro. Segun cu Samuel tabata observa cara di e hendenan presente, cu ya a keda keto pa scuch’e, e lo a puntra su mes ta con e lo por yega na nan curason.

2 E pueblo no a realisa con grave nan situacion tabata. Nan a insisti cu nan tabata kier un hende como rey. Nan no a compronde cu e peticion ey a demostra un gran falta di respet pa nan Dios, Jehova, y pa su profeta. En realidad, ta Jehova nan a rechasa como nan Rey! Con Samuel por a motiva nan pa nan arepenti?

Samuel su infancia ta siña nos cu nos por cultiva fe den Jehova a pesar di mal influencia

3, 4. (a) Dicon Samuel a menciona su hubentud? (b) Dicon nos por beneficia di Samuel su ehempel di fe?

3 Samuel a tuma palabra y a bisa e multitud: “Ami ta bieu y mi cabey ta blanco.” Sin duda, su cabey blanco a duna mas peso na su palabranan. El a sigui bisa nan: “Mi a cana boso dilanti for di mi hubentud te dia di awe.” (1 Sam. 11:14, 15; 12:2) Aunke Samuel tabata bieu, e no a lubida su hubentud. Su recuerdonan di e tempo ey ainda tabata fresco den su memoria. Debi na e decisionnan cu el a tuma tempo cu e tabata mucha, e por a bira un homber di fe y hiba un bida dedica na su Dios, Jehova.

4 Pero Samuel tabatin cu fortalece y proteha su fe constantemente, pasobra e hendenan rond di dje no tabatin fe ni tabata fiel na Dios. Awe, tampoco no ta facil pa fortalece nos fe, pasobra nos ta biba den un mundo malbado y sin fe. (Lesa Lucas 18:8.) Laga  nos wak kico nos por siña for di e ehempel di Samuel, cuminsando for di su infancia.

El A Sirbi Jehova Como Mucha

5, 6. Den ki manera Samuel su infancia no tabata normal, pero dicon su mayornan tabata sigur cu e tabata bon cuida?

5 Samuel no tabatin un infancia normal. Net despues cu el a stop di bebe pecho—kisas cu tres aña of poco mas grandi—el a cuminsa sirbi na e tabernakel di Jehova na Silo, un 30 kilometer for di su cas na Rama. Samuel su mayornan, Elcana cu Ana, a dedica nan yiu homber na Jehova pa un sirbishi special: Lo e tabata Nazareo pa resto di su bida. * Acaso esaki a nifica cu nan a rechas’e y no tabata stim’e?

6 Siguramente cu no! Nan tabata sa cu nan yiu tabata bon cuida na Silo. Sumo Sacerdote Eli sin duda lo a percura pa esey, ya cu Samuel tabata traha hunto cu ne. Ademas, na e tabernakel tabatin tambe hende muher cu a yuda den diferente area.—Exo. 38:8; Hues. 11:34-40.

7, 8. (a) Con e mayornan di Samuel a anim’e aña aden aña afo? (b) Kico mayornan awe por siña for di e mayornan di Samuel?

7 Ademas, Ana cu Elcana hamas lo por a lubida nan yiu mayo stima; e tabata e contesta di un oracion cu Ana a haci. Ana a pidi Dios dun’e un yiu homber y a priminti di dedica e yiu na un bida di sirbishi sagrado. Tur aña ora Ana tabata bishita Samuel, e tabata trece un mantel nobo sin manga p’e cu e tabata cose pa Samuel su sirbishi na e tabernakel. Sin duda, e mucha tabata spera ansiosamente riba e bishita di su mayornan. Lo e tabata gosa di e animacion y consehonan cu nan tabata dun’e, y nan lo a yud’e mira e balor di e gran privilegio cu e tabatin di por sirbi Jehova den un luga asina special.

8 Mayornan awe por siña hopi for di Ana cu Elcana. Hopi biaha, mayornan ta asina preocupa cu e necesidadnan material di nan yiunan cu nan ta lubida riba e salud spiritual di e yiunan. Pero e mayornan di Samuel a pone asunto spiritual na prome luga y esey tabatin un gran influencia riba e clase di persona cu Samuel a bira.—Lesa Proverbionan 22:6.

9, 10. (a) Describi e tabernakel y e sintimentonan di Samuel relaciona cu e luga sagrado ey. (Wak tambe e nota.) (b) Kico tabata algun di e tareanan di Samuel, y con bo ta kere hobennan awe por imita su ehempel?

9 Nos por imagina con Samuel, segun cu e tabata crece, tabata  bay explora e seronan rond di Silo. Para riba un di e seronan ey, e lo por a mira e stad y e vaye cu tabatin mas abou, y sin duda lo el a sinti un gran satisfaccion y orguyo cada biaha cu el a mira e tabernakel di Jehova. Esey en berdad tabata un luga sagrado. * El a ser traha un 400 aña prome bou di guia di Moises y tabata e unico centro di adoracion puro di Jehova na mundo.

10 E hoben Samuel a bin stima e tabernakel. Den e relato cu e mes a skirbi despues, el a bisa cu “Samuel tabata sirbi dilanti di SEÑOR—un mucha cu un efod di lino bisti.” (1 Sam. 2:18) E echo cu e tabata bisti un efod—un paña simpel sin manga—a indica cu e tabata yuda e sacerdotenan na e tabernakel. Aunke e no tabata pertenece na e grupo di sacerdote, e tabata encarga cu cierto tarea. Por ehempel, tur mainta e mester a habri e porta cu ta bay na e patio di e tabernakel y tambe e mester a yuda Eli cu tabata di edad avansa. Samuel a disfruta masha hopi di e privilegionan aki. Pero algo malo cu tabata tuma luga den e cas di Jehova a cuminsa molestia su curason inocente.

E No A Laga e Mal Ambiente Influenci’e

11, 12. (a) Kico tabata e causa di e picanan di Ofni cu Finees? (b) Ki tipo di maldad y corupcion Ofni cu Finees tabata practica na e tabernakel? (Wak tambe e nota.)

11 For di un edad hoben, Samuel tabata testigo di actonan teribel di maldad y corupcion. Eli tabatin dos yiu homber, Ofni cu Finees. Den e buki di Samuel, nos ta lesa cu nan “tabata malechornan di bèrdè i nan no tabatin kunes ku SEÑOR.” (1 Sam. 2:12BPK) E dos ideanan den e versiculo aki ta conecta cu otro. Ofni cu Finees tabata ‘malhechornan di berdad’ (literalmente, “yiunan di inutilidad”) pasobra nan no a respeta Jehova. Nan a menosprecia su normanan husto, y esey a hiba na tur nan otro picanan.

12 E Ley di Dios a bisa specificamente kico tabata tarea di e sacerdotenan y con nan mester a ofrece sacrificio na e tabernakel. Anto cu rason! E sacrificionan ey a representa tur loke Dios a haci—si, varios aspecto di e rescate cu el a percura—pa pordona pica pa asina hende por ta limpi den su bista y bin na consideracion pa haya su  guia y bendicion. Pero Ofni cu Finees a pone e otro sacerdotenan trata e ofrendanan ey cu gran falta di respet. *

13, 14. (a) Con hende sincero a ser afecta pa e maldad cu tabata tuma luga na e tabernakel? (b) Con Eli a faya cu su responsabilidad como sacerdote y como tata?

13 E hoben Samuel lo no por a kere su wowonan ora e tabata mira e abusonan ey tuma luga, sin cu ningun hende tabata haci nada. Ta cuanto hende pober, humilde y oprimi no a yega na e tabernakel cu e speransa di haya alivio y fortaleza spiritual, pa despues sali bay tur desapunta, ofendi of humilia? Y ta con Samuel lo a sintie ora el a haya sa cu Ofni cu Finees no tabata respeta Jehova su ley tocante moralidad sexual tampoco? Nan tabata tene relacion sexual cu e muhernan cu tabata sirbi na entrada di e tabernakel. (1 Sam. 2:22) Kisas Samuel a spera cu Eli lo a haci algo pa drecha e situacion.

E maldad di e yiunan di Eli lo mester a molestia e curason di Samuel

14 Eli tabata e persona indica pa corigi e problema aki cu tabata bay di malo pa pio. Como sumo sacerdote, e tabata responsabel pa loke a tuma luga na e tabernakel. Y como tata, e tabatin e obligacion di corigi su yiunan, pasobra loke nan a haci no a perhudica nan mes so, sino tambe cantidad di hende den e pais. Pero Eli a faya cu su responsabilidad como sacerdote y como tata, pasobra el a djis zundra nan un tiki. (Lesa 1 Samuel 2:23-25.) Pero su yiunan tabatin mester di un disciplina mas severo. Nan tabata comete pica riba cua tabatin pena di morto!

15. Jehova a manda ki mensahe fuerte pa Eli, y con e famia di Eli a reacciona riba esey?

15 E situacion a bira asina grave cu Jehova a manda “un homber di Dios”, un profeta cu su nomber no ta ser menciona, cerca Eli pa dun’e un mensahe fuerte di condenacion. Jehova a bisa Eli: “[Bo] ta honra bo yiu hombernan mas cu mi.” Anto el a informa Eli cu su dos yiunan malbado lo muri riba e mesun dia y cu e famia di Eli lo sufri masha hopi y hasta perde nan posicion privilegia como sacerdote. E spiertamento fuerte aki a pone e famia aki cambia nan comportacion? E relato ta mustra cu no.—1 Sam. 2:27–3:1.

16. (a) Kico e relato ta bisa nos tocante e progreso di Samuel? (b) Dicon bo ta haya e informenan ey conmovedor?

16 Acaso Samuel a laga nan influencia e tambe? No. Den e relato tristo aki nos ta haya de bes en cuando un rayo di luz: comentarionan  positivo tocante Samuel su crecemento y progreso. Corda cu na 1 Samuel 2:18 nos a lesa cu Samuel, siendo “un mucha”, tabata ‘sirbi fielmente dilanti di Jehova.’ Pues, for di un edad jong, Samuel a concentra riba su sirbishi na Dios. Mas leu den e relato nos ta lesa algo mas conmovedor ainda: “E mucha homber Samuel a sigui crece hunto cu Jehova.” (1 Sam. 2:21, NW) Segun cu e tabata crece, su relacion cu su Tata celestial a bira mas fuerte. Un amistad cera asina cu Jehova ta e mihor proteccion cu un hende por tin contra cualkier forma di maldad.

17, 18. (a) Con hobennan cristian por imita e ehempel di Samuel? (b) Kico ta mustra cu Samuel a scoge e caminda corecto?

17 Lo por tabata facil pa Samuel rasona cu si e sumo sacerdote y su yiunan mes tabata peca contra Jehova, e tambe lo por a haci kico cu e kier. Pero e mal comportacion di otro hende, incluso di hende den puesto di autoridad, no ta un excuus pa nos peca. Den nos tempo, hopi hoben cristian ta imita Samuel y ta “sigui crece hunto cu Jehova” door di cultiva un amistad personal y intimo cu ne, hasta ora hende rond di nan no ta un bon ehempel pa nan.

18 Ki recompensa Samuel a haya pa su manera di actua? Nos ta lesa: “Awor e mucha homber Samuel tabata crece den estatura y den gracia, tanto cerca SEÑOR como cerca hende.” (1 Sam. 2:26) Pues, Samuel tabata hopi stima, por lo menos cerca e hendenan kende nan opinion tabata importante p’e. Hasta Jehova tabatin hopi cariño pa e mucha aki pa motibo di su fieldad. Y Samuel lo mester tabata convenci cu su Dios lo a bay haci algo contra tur e maldad cu tabata tuma luga na Silo, pero kisas el a puntra  su mes ta ki dia esey lo a sosode. Wel, un anochi, e pregunta ey a haya contesta.

“Papia, Pasobra Bo Sirbidor Ta Scuchando”

19, 20. (a) Kico a pasa cu Samuel un marduga ora cu e tabata drumi? (b) Con Samuel a trata Eli? (c) Con Samuel a haya sa ta ken tabata yam’e?

19 Tabata casi bira mainta, pero ainda tabata scur; e lampi grandi cu tabata lusa den e tent tabata cendi ainda. Den e silencio, Samuel a tende un stem yam’e na su nomber. El a kere cu tabata Eli, kende ya tabata hopi bieu y casi ciego. Samuel a lanta y “core bay cerca Eli.” Nos por imagina e mucha, pia abou, ta core bay wak ta kico Eli tabatin mester. Esta un bunita escena! Samuel a trata Eli cu hopi respet y consideracion. A pesar di tur Eli su picanan, ainda e tabata e sumo sacerdote di Jehova.—1 Sam. 3:2-5.

20 Samuel a lanta Eli for di soño y bis’e: “At’ami aki, pasobra bo a yama mi.” Pero Eli a bis’e cu e no a yam’e y a mand’e bay drumi bek. Wel, e mesun cos a sosode dos biaha mas! Finalmente, Eli a compronde kico tabata pasando. Jehova no tabata comunica hopi mas cu su pueblo via vision of mensahe profetico, y esey no ta sorprende nos. Eli a realisa e ora ey cu ta Jehova a cuminsa papia atrobe, pero cu e mucha aki! Pesey Eli a bisa Samuel pa bay drumi bek y a siñ’e con e mester a contesta ora Jehova bolbe yam’e. Samuel a haci manera Eli a bis’e. Poco despues, el a bolbe tende e stem yam’e: “Samuel! Samuel!” E mucha a contesta: “Papia, pasobra bo sirbidor ta scuchando.”—1 Sam. 3:1, 5-10.

21. Con nos por scucha Jehova awe, y dicon ta bale la pena pa haci esey?

21 Por fin Jehova tabatin un sirbidor na Silo cu tabata scuch’e. Y esaki ta loke Samuel a sigui haci pa resto di su bida: Jehova tabata papia cu ne y semper e tabata scucha. Abo tambe ta haci esey? Nos no tin cu warda un stem sobrenatural papia cu nos den anochi. Den cierto sentido, Jehova ta papia cu nos tur dia: pa medio di su Palabra, Bijbel. Mas nos scucha Dios y obedec’e, mas grandi nos fe lo bira. Esey ta loke a pasa cu Samuel.

Aunke Samuel tabatin miedo, cu fe el a bisa Eli di e huicio di Jehova

22, 23. (a) Con e mensahe cu na principio Samuel tabatin miedo di duna Eli a cumpli? (b) Con e reputacion di Samuel a sigui crece?

22 E anochi ey a cambia e bida di Samuel por completo. El a haya un relacion special cu Jehova, pasobra el a bira su profeta y vocero. E mester a bay duna Eli un aviso final: E profecia contra e famia ey pronto lo a ser realisa. Na prome instante, Samuel tabatin miedo di duna Eli e mensahe di Jehova. Pero el a tuma un curashi y bis’e; y humildemente Eli a acepta e huicio divino. No a tarda mucho cu tur loke Jehova a bisa a cumpli: Israel a cuminsa un guera  contra e Filisteonan, Ofni y Finees tur dos a ser mata riba e mesun dia, y Eli mes tambe a muri ora cu el a tende cu enemigo a captura e Arca sagrado di Jehova.—1 Sam. 3:10-18; 4:1-18.

23 Pa loke ta Samuel, su reputacion como un profeta fiel a sigui crece. E relato ta bisa cu ‘Jehova tabata cu ne’, y ta agrega cu Jehova no a laga ningun di Samuel su profecianan keda sin cumpli.—Lesa 1 Samuel 3:19.

‘Samuel A Yama na Jehova’

24. Ki decision e Israelitanan a tuma na dado momento, y dicon esaki tabata un pica serio?

24 Acaso Israel a sigui e guia di Samuel y bira un pueblo fiel y spiritual? No. Na dado momento, e nacion a dicidi cu nan no tabata kier pa un simpel profeta sigui como hues riba nan. Nan tabata kier un rey, mescos cu e otro nacionnan. Riba instruccion di Jehova, Samuel a cumpli cu nan peticion. Pero e mester a spierta nan si di e gravedad di nan pica. No ta un hende nan a rechasa, sino Jehova mes! Pesey Samuel a manda yama e pueblo pa reuni na Gilgal.

Cu fe Samuel a pidi Jehova pa manda un tormenta, y Jehova a contesta su oracion

25, 26. Con Samuel porfin a yuda su pueblo na Gilgal mira con serio nan pica contra Jehova tabata?

25 Laga nos ban bek na e momento tenso menciona den e introduccion di e capitulo aki, caminda Samuel, ya di edad avansa, tabata a punto di papia cu e Israelitanan na Gilgal. Eynan el a repasa cu e pueblo su registro di fe y integridad. Ora el a caba, el a ‘yama na Jehova’ y a pidie manda un tormenta.—1 Sam. 12:17, 18.

26 Un tormenta den temporada di secura? Esey tabata algo nunca bisto! Kisas algun hende a duda cu esey por a pasa of kisas nan a haci bofon di Samuel, pero no pa mucho largo. Diripiente, cielo a bira scur. Biento a cuminsa suta e trigo den cunucu. Strena a cuminsa zona masha duro mes y awa a cuminsa basha. “E pueblo a haya gran temor pa SEÑOR y pa Samuel.” Por fin nan a realisa con serio nan pica tabata.—1 Sam. 12:18, 19.

27. Con Jehova ta recompensa hende cu ta imita e fe di Samuel?

27 Jehova a yuda Samuel yega na curason di e pueblo rebelde ey. Di e manera ey el a recompensa Samuel su fe. Desde e profeta su infancia, Jehova tabata haci esey: Samuel tabata pone fe den dje, y Jehova tabata recompens’e pa esey. Jehova no a cambia: Te awe e ta yuda tur hende cu ta imita e fe di Samuel.

^ par. 5 Un Nazareo mester a cumpli cu un promesa solem cu a inclui, entre otro, cu nan no tabata mag di bebe alcohol, ni pela ni corta nan barba. Den mayoria di caso nan tabata haci e promesa ey pa un periodo limita, pero algun di nan, manera Samson, Samuel y Juan Bautista, tabata Nazareo pa bida largo.

^ par. 9 E tabernakel tabatin un forma rectangular. Basicamente, e tabata un tent grandi riba un frame di palo. Sinembargo, e tabata traha di material di calidad halto: cuero di cacho di awa, telanan hopi bunita borda y palonan costoso, fura cu plata y oro. E tabernakel aki tabata situa den un patio rectangular, caminda tabatin tambe un altar impresionante pa haci sacrificio. Mas despues, nan a traha cuarto na banda di e tabernakel pa e sacerdotenan uza. Parce cu Samuel tabata drumi den un di e cuartonan ey.

^ par. 12 E relato ta duna nos dos ehempel di e falta di respet aki. Pa cuminsa, e Ley a bisa bon cla cua porcion di un sacrificio tabata pa e sacerdotenan. (Deu. 18:3) Pero na e tabernakel, e sacerdotenan malbado a bin cu completamente un otro sistema. Nan tabata djis manda nan sirbidornan bay hinca un forki grandi den e wea cu e carni tabata herbe aden, y saca cualkier bon pida carni pa nan. Ademas, ora hende a trece nan sacrificio pa kima riba altar, e sirbidornan mester a exigi pa e hendenan duna nan e carni curu, prome cu a ofrece e vet di e sacrificio na Jehova!—Lev. 3:3-5; 1 Sam. 2:13-17.