Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO BINTIDOS

El A Keda Leal bou di Prueba

El A Keda Leal bou di Prueba

1, 2. Kico Pedro lo a spera ora Hesus tabata papia na Capernaum, pero kico a sosode en bes di esey?

PEDRO tabata observa e hendenan cu tabata scucha Hesus. Nan tabata den e sinagoga di Capernaum, e stad caminda Pedro tabata biba. Su negoshi di piscamento tambe tabata eynan, na e costa noord di Lama di Galilea. Y hopi di su amigo-, famia- y compañeronan di trabou tambe tabata biba eynan. Sin duda, Pedro tabatin hopi gana pa tur e hendenan ey tambe reconoce Hesus como e Mesias. Mare nan tambe tabata contento di por a siña tocante e Reino di Dios for di e mihor maestro den historia. Pero parce cu esey lo no a bay sosode e dia ey.

2 Hopi di e hendenan a stop di scucha Hesus. Pedro por a tende algun di nan critica e mensahe di Hesus. Pero loke mas a molestia Pedro tabata e reaccion di algun di e discipelnan di Hesus mes. Nan no tabata mustra contento ni emociona mas cu e berdadnan nobo cu Hesus a siña nan. Bo por a mira cu nan tabata irita, hasta rabia. Algun di nan a bisa na bos halto cu Hesus su discurso tabata ofensivo. Nan no kier a sigui scucha mas y a sali bay for di sinagoga. Loke tabata pio ta cu nan no a sigui Hesus mas.—Lesa Juan 6:60, 66.

3. Kico Pedro su fe a yud’e haci na varios ocasion?

3 Esey tabata un momento dificil pa Pedro y e otro apostelnan tambe. Nan tampoco no a compronde mucho bon loke Hesus a bisa e dia ey. Sin duda, Pedro por a mira cu si tuma e palabranan di Hesus literalmente, nan en berdad lo por tabata ofensivo. Kico Pedro lo haci? No tabata prome biaha cu su lealtad na su Maestro a ser poni na prueba, ni lo no tabata ultimo biaha. Laga nos wak con Pedro su fe a yud’e supera e problemanan ey y keda leal.

El A Keda Leal ora Otronan A Bandona Hesus

4, 5. Menciona algun cos cu Hesus a haci y bisa cu tabata contrario na loke hende a spera di dje.

4 Hopi biaha, Hesus a laga Pedro keda sorprendi. Bes tras bes,  su Maestro a bisa y haci cosnan net contrario di loke hende a spera di dje. Por ehempel, un dia prome, Hesus milagrosamente a duna miles di hende cuminda. Como resultado, nan a purba di hacie rey. Pero el a sorprende hopi di nan ora cu el a kita bay for di eynan y manda su discipelnan Capernaum cu boto. E mesun anochi ey, segun cu e discipelnan tabata nabega riba Lama di Galilea meymey di un tormenta, Hesus a bolbe sorprende nan ora el a cana riba awa bin cerca nan. Na e ocasion ey, el a siña Pedro un les importante tocante fe.

5 Su manece, e discipelnan a ripara cu e multitud a sigui nan te na e otro banda di e lago. Kico Hesus a haci? El a scual e hendenan pa nan actitud materialista! Aparentemente, nan no tabata busca Hesus pasobra nan kier a siña mas berdad for di dje, sino pasobra nan tabata kier p’e bolbe duna nan cuminda milagrosamente. (Juan 6:25-27) Den sinagoga na Capernaum, Hesus a sigui papia di e asunto, y un biaha mas e no a bisa loke e hendenan a spera; el a siña nan un berdad cu tabata importante pero cu nan a haya ofensivo.

6. Ki ilustracion Hesus a uza, y con su oyentenan a reacciona?

6 Hesus no tabata kier pa e hendenan ey bin cerca dje djis pasobra e tabata duna nan cuminda. E tabata kier pa nan realisa cu ta Dios a mand’e, y cu Dios lo duna nan bida eterno solamente si nan pone fe den e sacrificio di Hesus y sigui su ehempel. Pa yuda nan compronde esey, el a compara su mes cu mana, e pan cu a baha for di cielo den tempo di Moises. Como cu algun hende a protesta contra esey, el a uza un otro ilustracion mas bibo. El a splica cu pa nan haya bida eterno nan mester a come su carni y bebe su sanger. Mas e hendenan a protesta e ora ey. Algun a bisa: “E palabranan aki ta ofensivo; ken por scucha nan?” Hopi discipel di Hesus mes tambe a dicidi di bay lag’e, manera nos a mira den e introduccion. *Juan 6:48-60, 66.

7, 8. (a) Kico Pedro no a compronde ainda tocante e papel di Hesus? (b) Con Pedro a contesta e pregunta cu Hesus a haci e apostelnan?

7 Con Pedro a reacciona? E tambe lo a sintie confundi, pasobra ainda e no a compronde cu Hesus mester a muri pa cumpli cu e boluntad di Dios. Pero toch e no a bay laga Hesus manera e otro discipelnan caprichoso a haci e dia ey. Con bin? Pasobra Pedro tabatin algo cu a hacie diferente for di e hendenan ey. Kico esey tabata? Laga nos sigui analisa e relato.

 8 Hesus a bira puntra su apostelnan: “Acaso boso tambe kier bay?” (Juan 6:67) E pregunta tabata dirigi na e 12 apostelnan, pero Pedro tabata esun cu a contest’e. E tabatin custumber di haci esey. Kisas e tabata mayo di nan tur. Of simplemente e no por a keda sin bisa kico e tabata pensa. En todo caso, e tabata esun di mas franco di e grupo. Y su contesta e biaha aki tabata hopi memorabel: “Señor, cerca ken nos lo bay? Abo tin e palabranan cu ta hiba na bida eterno.”—Juan 6:68.

9. Con Pedro a demostra lealtad na Hesus?

9 E palabranan ey no ta conmove bo? Ta bisto cu Pedro su fe den Hesus a yud’e cultiva un cualidad hopi valioso: lealtad. Pedro a mira bon cla cu Hesus tabata e unico Salbador cu Jehova a percura y cu pa un persona salba, e mester a scucha loke Hesus tabata siña hende tocante e Reino di Dios. Pedro tabata sa cu hasta si e no a compronde tur loke Hesus a bisa, e no por a bay ningun otro caminda pa haya e aprobacion di Dios y e bendicion di bida eterno.

Nos mester keda leal na e siñansanan di Hesus, hasta ora nan no ta loke nos a spera of no ta cuadra cu nos preferencianan personal

10. Con nos por imita e lealtad di Pedro awe?

10 Bo tambe ta sinti asina? Lamentablemente, awendia hopi hende ta bisa cu nan ta stima Hesus, pero nan no ta leal na dje. Pa nos ta leal na Cristo, nos tin cu stima su siñansanan mescos cu Pedro a stima nan. Nos mester haci esfuerso pa siña nan, compronde nan y biba di acuerdo cu nan, hasta ora algun di e siñansanan ey ta sorprende nos pasobra nan no ta loke nos a spera of no ta cuadra cu nos preferencianan personal. Solamente si nos keda leal, nos por tin e speransa di haya e bida eterno cu Hesus ta ofrece nos.—Lesa Proverbionan 21:21.

El A Keda Leal ora Hesus A Corigie

11. Unda Hesus a bay cu su siguidornan? (Wak tambe e nota.)

11 Poco despues di e periodo druk ey, Hesus a bay riba un biahe largo rumbo panort hunto cu su apostelnan y algun discipel. Sero Hermon tabata situa na e frontera di mas noord di e Tera Priminti, y de bes en cuando hende por a mira su top cubri cu sneeuw hasta for di e awanan blauw di Lama di Galilea. Mas cerca e grupo tabata yega di e sero ey, mas halto e tabata mustra nan dilanti. Nan tabata riba e caminda cu a hiba na e pueblitonan den bisindario di Cesarea Filipo. * Den e paisahe bunita ey, cu un bista riba gran parti di e Tera Priminti, Hesus a haci su siguidornan un pregunta importante.

12, 13. (a) Dicon Hesus kier a sa kico e multitud tabata pensa di dje? (b) Con Pedro su contesta a demostra cu e tabatin berdadero fe?

 12 Hesus a puntra nan: “Ken e multitud ta bisa cu mi ta?” Nos por imagina con Pedro a keda wak Hesus den su cara, tumando nota un biaha mas di su mirada penetrante y di e bondad y inteligencia extraordinario di su Maestro. Hesus kier a sa ki conclusion su oyentenan a saca for di loke nan a mira y tende. E discipelnan di Hesus a cont’e algun di e ideanan robes cu e hendenan tabatin tocante su identidad. Pero Hesus kier a sa mas. Acaso su siguidornan mas pega tambe tabata pensa mescos? Pues, el a puntra nan: “Ma boso, ken boso ta bisa cu mi ta?”—Luc. 9:18-20.

13 Un biaha mas, Pedro no a pensa dos biaha pa contesta. Cu palabranan cla y firme el a contesta loke tabata e sintimento di hopi di nan presente. El a bisa: “Abo ta Cristo, Yiu di e Dios bibo.” Nos por imagina con Hesus, cu un smile, a elogi’e. El a splica Pedro cu ta Jehova Dios—y no hende—a revela e berdad importante aki na esnan cu tabatin berdadero fe. Si nos wak bon, Jehova a permiti Pedro compronde un di e berdadnan di mas grandi cu el a yega di revela: e identidad di Cristo, e Mesias priminti!—Lesa Mateo 16:16, 17.

14. Hesus a duna Pedro ki responsabilidad importante?

14 Profecia di antiguedad a menciona e Cristo aki como un piedra cu e trahadornan lo a rechasa. (Sal. 118:22; Luc. 20:17) Hesus tabata referi na e profecianan ey ora el a revela cu Jehova lo establece un congregacion riba e piedra, of baranca, cu Pedro a caba di identifica como e Cristo. Despues Hesus a encarga Pedro cu algun privilegio hopi importante den e congregacion ey. E no a duna Pedro un puesto mas halto cu e otro apostelnan, manera tin hende ta pretende, pero el a dun’e responsabilidadnan importante. El a duna Pedro “e yabinan di e Reino.” (Mat. 16:18, 19) Cu otro palabra, Hesus a duna Pedro e privilegio di habri e oportunidad di drenta e Reino di Dios pa tres grupo di hende: prome e Hudiunan, despues e Samaritanonan y finalmente hende cu no tabata Hudiu.

15. Con bin Pedro a papia serio cu Hesus, y kico el a bisa?

15 Mas despues Hesus a bisa cu esnan cu ricibi mas responsabilidad lo tin cu duna mas cuenta y rason, y e caso di Pedro a comproba esey. (Luc. 12:48) Hesus a sigui splica mas berdad tocante e Mesias, manera e echo cu lo e tabatin cu sufri y muri na Jerusalem. Pero loke Hesus a bisa a shock Pedro. El a hala Hesus un banda y a  papia serio cu ne: “Sea bondadoso cu bo mes, Señor; esey sigur lo no pasa cu bo.”—Mat. 16:21, 22.

16. Con Hesus a corigi Pedro, y ki bon les nos tur por saca for di Hesus su palabranan?

16 Ta claro cu Pedro tabatin tur bon intencion. Pesey Hesus su contesta mester tabata manera un baño di awa friu p’e. Hesus a bira lomba p’e, wak e otro discipelnan—kendenan kisas tabata pensa mescos cu Pedro—y a bisa: “Kita for di mi dilanti, Satanas! Bo ta un piedra di trompica pa mi, pasobra bo no tin e pensamento di Dios, sino di hende.” (Mat. 16:23; Mar. 8:32, 33) Nos por saca un bon les for di esaki. Ta hopi facil pa laga hende su manera di pensa bira mas importante cu Dios su manera di pensa. Den tal caso por sosode cu hasta si nos intencion ta pa yuda un hende, sin cu nos kier nos por ta bezig ta anima e persona ey pa haci algo cu ta agrada Satanas en bes di agrada Dios. Pero laga nos bay bek na e relato di Pedro y wak con el a reacciona riba e coreccion.

17. Kico Hesus tabata kiermen ora el a bisa Pedro pa ‘kita for di su dilanti’?

17 Naturalmente, Pedro tabata sa cu Hesus no tabata kiermen cu literalmente e tabata Satanas e Diabel. Con cu bay bin, Hesus no a papia cu Pedro manera el a papia cu Satanas. El a bisa Satanas: “Bay for di aki”, mientras cu el a bisa Pedro: “Kita for di mi dilanti.” (Mat. 4:10) Hesus no a rechasa Pedro como apostel, pasobra el a mira su bon curason y su potencial; simplemente el a corigi Pedro su manera di pensa robes den e asunto aki. Hesus tabata kiermen cu Pedro mester a stop di para su dilanti manera un obstaculo, y mas bien mester a cana su tras como un discipel cu tabata apoy’e.

Si nos kier hala mas cerca di Hesucristo y Jehova, nos tin cu acepta disciplina humildemente y siña for di dje

18. Con Pedro a demostra su lealtad, y con nos por imit’e?

18 En bes di haya mal beis, rabia cu Hesus of contesta bek, Pedro a acepta e coreccion cu humildad. Asina el a bolbe demostra su lealtad. Nos tur cu ta sigui Cristo mester di coreccion de bes en cuando. Pero si nos kier pa esey yuda nos hala mas cerca di Hesucristo y su Tata, Jehova Dios, nos tin cu acepta disciplina humildemente y siña for di dje.—Lesa Proverbionan 19:20.

Pedro a keda leal hasta ora el a haya coreccion

El A Ser Recompensa pa Su Lealtad

19. Ki declaracion sorprendente Hesus a haci, y kico kisas Pedro a puntra su mes?

19 Poco despues Hesus a bolbe haci un declaracion sorprendente.  El a bisa: “Di berdad mi ta bisa boso cu tin algun hende para akinan cu lo no muri prome cu nan mira e Yiu di hende bin den su Reino.” (Mat. 16:28) E palabranan ey, sin duda, a haci Pedro hopi curioso. Kico Hesus lo tabata kiermen? Kisas Pedro a puntra su mes si despues di e coreccion cu el a caba di haya e lo a bin na remarca pa tal privilegio.

20, 21. (a) Describi e vision cu Pedro a mira. (b) Kico e combersacion entre e figuranan den e vision a yuda Pedro compronde?

20 Wel, un siman despues, Hesus a bay cu Santiago, Juan y Pedro riba “un sero halto” (kisas Sero Hermon, cu no tabata keda mucho leu). Lo mester tabata anochi, pasobra e tres hombernan tabata bringa nan soño. Pero mientras cu Hesus tabata haci oracion, algo a sosode cu a core cu nan soño.—Mat. 17:1; Luc. 9:28, 29, 32.

21 Diripiente, Hesus su apariencia a cuminsa cambia. Su cara a cuminsa briya manera solo, y su paña tambe a bira un blanco briyante. Anto nan a mira dos figura aparece banda di Hesus: uno a  representa Moises y e otro, Elias. Nan tabata combersa cu ne tocante “con e mester a bay for di e mundo aki, locual lo mester a sosode na Jerusalem.” Aparentemente, nan tabata papia tocante su morto y resureccion. Pedro a compronde bon cla e ora ey cu e tabata robes ora el a bisa Hesus cu e lo no a bay pasa den e sufrimento doloroso ey!—Luc. 9:30, 31.

22, 23. (a) Con Pedro a demostra bondad y entusiasmo? (b) Ki otro recompensa Pedro, Santiago y Juan a ricibi e anochi ey?

22 Pedro a sinti cu e mester participa di un manera of otro den e vision fascinante aki y kisas hasta purba di lag’e dura un poco mas largo. Na dado momento a parce cu Moises y Elias tabata bay laga Hesus. Pesey Pedro a bisa: “Maestro, ta masha bon cu nos ta akinan; pues laga nos lanta tres tent: un pa bo, un pa Moises y un pa Elias.” Claro cu e personahenan aki no tabatin mester di tent, pasobra esaki tabata un vision y nan tabata simplemente un representacion simbolico di dos sirbidor di Jehova cu tabatin basta tempo morto caba. Pero Pedro no a realisa kico e tabata papia. Asina mes, su bondad y entusiasmo ta atrae nos na dje.—Luc. 9:33.

Pedro, hunto cu Santiago y Juan, a ser recompensa cu un vision impresionante

23 E anochi ey Pedro, Santiago y Juan a ricibi un otro recompensa. Un nubia a forma y cuminsa tapa nan cu su sombra. Y un stem for di e nubia a bisa: “Esaki ta mi Yiu, esun cu mi a scoge. Scuch’e.” Tabata e stem di Jehova Dios! Anto e vision a termina, y nan tabata nan so cu Hesus riba e sero.—Luc. 9:34-36.

24. (a) Con e vision di e transfiguracion a beneficia Pedro? (b) Den ki manera e vision di e transfiguracion por yuda nos awe?

24 Esta un regalo maraviyoso e vision di e transfiguracion ey tabata pa Pedro, y pa nos tambe! Decadanan despues, el a skirbi tocante e privilegio cu e tabatin e anochi ey: El a mira Hesus den su futuro puesto como glorioso Rey celestial y tambe e tabata un “testigo ocular di su splendor magnifico.” E vision ey a confirma hopi profecia di e Palabra di Dios y a fortalece Pedro su fe, di manera cu e por a persevera bou di e pruebanan cu e tabatin cu enfrenta den futuro. (Lesa 2 Pedro 1:16-19.) E vision ey por tin e mesun efecto riba nos tambe si nos imita Pedro su ehempel. Con nos por imit’e? Nos ta haci esey si nos keda leal na Hesus, siña for di dje, acepta su disciplina y coreccion y siguie humildemente tur dia.

^ par. 6 Nos por mira bon cla con lihe e hendenan aki a cambia di opinion. Apenas un dia prome nan a proclama cu entusiasmo cu Hesus tabata un profeta di Dios; anto wak con nan a reacciona awor.—Juan 6:14.

^ par. 11 For di Lama di Galilea, cu tabata keda un 210 meter bou di nivel di lama, nan a cana un 50 kilometer a traves di regionnan cu paisahe hopi bunita te yega na un haltura di 350 meter riba nivel di lama.