Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO DIESSHETE

“Ata Mi Aki! Jehova Su Sirbidor!”

“Ata Mi Aki! Jehova Su Sirbidor!”

1, 2. (a) Con un bishitante desconoci a cuminda Maria? (b) Dicon esaki tabata un momento crucial den bida di Maria?

MARIA a hisa su cara y asombra el a keda wak e bishitante cu a cana drenta su cas. E persona aki no a puntra pa su tata ni su mama. Ta cerca dje el a bin! E no por tabata di Nazaret; esey Maria tabata sa sigur. Den un pueblo chikito asin’aki, un hende desconoci ta hala atencion mesora, y esun aki tur hende lo a ripara sigur. Pa colmo, el a cuminda Maria na un manera hopi straño, bisando: “Bon dia, abo cu ta sumamente bendiciona, Jehova ta cu bo.”—Lesa Lucas 1:26-28.

2 Asina Bijbel ta laga nos cera conoci cu Maria, yiu muher di Heli, di e stad Nazaret na Galilea. Esaki tabata un momento crucial den su bida. E tabata comprometi pa casa cu un carpinte cu yama Jose, kende no tabata un homber rico, pero si un homber cu hopi fe den Dios. Pues, probablemente Maria tabatin un bon idea con su bida lo bay ta: Lo el a hiba un bida simpel; lo el a apoya su casa y yud’e cria nan yiunan. Pero diripiente, el a hay’e cu e bishitante aki cu a bin bis’e cu Dios tabatin un tarea special p’e, un responsabilidad cu lo a cambia su bida por completo.

3, 4. Kico nos tin cu pone un banda pa nos por compronde ken Maria tabata, y riba kico nos tin cu concentra?

3 Hopi hende ta haya straño cu Bijbel no ta conta nos mucho di Maria. Apenas Bijbel ta bisa nos algo di su famia, menos ainda di su personalidad y nada nada di su apariencia. Pero e poco cu e Palabra di Dios ta bisa di Maria ta hopi significativo.

4 Pa nos por compronde ken Maria tabata, nos mester deshaci prome di e ideanan cu religionnan a siña nan siguidornan tocante dje. Pues, laga nos lubida e tantisimo imagennan y cuadronan religioso cu hende a traha di dje. Laga nos pone un banda tambe e doctrinanan religioso super complica cu a duna e muher humilde aki titulonan eleva manera “Mama di Dios” y “Reina di Cielo.” Na luga di e cosnan ey, nos lo concentra riba loke Bijbel  realmente ta bisa di Maria. Esaki lo duna nos informacion valioso tocante su fe y tambe con nos por imita su ehempel.

Bishita di un Angel

5. (a) Kico nos ta siña tocante Maria for di e manera cu el a reacciona riba e cumindamento di angel Gabriel? (b) Ki les hopi importante nos por siña for di Maria?

5 Maria su bishitante no tabata un simpel hende, sino angel Gabriel. Ora el a yama Maria “sumamente bendiciona”, Maria a bira “tur aribabou [of, perturba]” y a purba di compronde ta kico e cumindamento aki por a nifica. (Luc. 1:29) Sumamente bendiciona door di ken? Maria no a spera di haya bendicion special cerca hende. Pero e angel tabata papia di e bendicion di Jehova Dios. Esey si tabata importante pa Maria, pero e no a asumi orguyosamente cu ya e tabatin Dios su aprobacion y bendicion. E ehempel di e hoben Maria ta siña nos un les hopi importante: Nos mester haci nos best pa haya Dios su aprobacion, y no asumi orguyosamente cu ya nos tin esey caba. Dios ta opone hende orguyoso, pero e ta stima y apoya hende humilde.—Sant. 4:6.

Maria no a asumi orguyosamente cu ya e tabatin Dios su aprobacion

6. Ki privilegio e angel a ofrece Maria?

6 Maria tabata bay tin mester di e humildad ey, pasobra e angel a ofrec’e un privilegio sumamente special: Lo el a haya un yiu cu lo a bira e persona di mas importante den historia. Gabriel a splic’e: “Jehova Dios lo dun’e e trono di su tata David, y lo e reina como Rey pa semper riba e cas di Jacob, y lo no tin fin na su Reino.” (Luc. 1:32, 33) Sin duda, Maria tabata sa cu mas cu mil aña prome Dios a priminti David cu un di su descendientenan lo goberna pa semper. (2 Sam. 7:12, 13) Pues, su yiu lo a bira e Mesias cu e pueblo di Dios tabatin siglonan ta warda riba dje!

Angel Gabriel a ofrece Maria un privilegio unico

7. (a) Kico e pregunta di Maria a revela tocante dje? (b) Kico hobennan awe por siña for di Maria?

7 Ademas, e angel a bisa Maria cu su yiu “lo ser yama Yiu di e Haltisimo.” Con un hende muher por a duna luz na e Yiu di Dios? Ademas, con Maria por a haya un yiu? E tabata comprometi cu Jose, pero ainda nan no a casa. Pesey Maria a puntra e angel francamente: “Con por ta, siendo cu nunca mi no a tene relacion cu ningun homber?” (Luc. 1:34) Tuma nota cu pa Maria no tabata un berguensa cu e tabata virgen. Al contrario, e tabata orguyoso di esey. Awendia, hopi hoben ta ansioso pa perde nan virginidad,  y nan ta haci bofon di esnan cu si ta balora nan virginidad. Un cos ta sigur, mundo a cambia hopi, pero Jehova si no. (Mal. 3:6) Mescos cu den tempo di Maria, Jehova tin hopi aprecio pa hende cu ta tene nan mes na su normanan moral.—Lesa Hebreonan 13:4.

8. Con Maria, siendo imperfecto, por a duna luz na un yiu perfecto?

8 Maria tabata un fiel sirbidor di Dios, pero e tabata imperfecto. Pues, con e por a duna luz na e Yiu di Dios, un yiu perfecto? Gabriel a splic’e: “Spirito santo lo baha riba bo, y poder di e Haltisimo lo tapa bo. Pa e motibo ey tambe, e yiu cu nace lo ser yama santo y Yiu di Dios.” (Luc. 1:35) “Santo” ta nifica limpi, puro, sagrado. Normalmente, hende ta pasa e condicion impuro y pecaminoso cu nan tin pa nan yiunan. Pero den e caso aki, Jehova lo a realisa un milager unico. E lo a transferi e bida di su Yiu for di cielo pa e bariga di Maria. Anto e lo a uza su spirito santo, of forsa activo, pa “tapa” Maria, protehando e yiu asina di tur mancha di pica. Maria a kere loke e angel a primintie? Con el a reacciona?

Maria Su Reaccion Riba e Palabranan di Gabriel

9. (a) Dicon hende no tin motibo pa duda den e relato tocante Maria? (b) Con Gabriel a fortalece e fe di Maria?

9 Hopi hende, incluso teologonan di cristiandad, tin problema pa kere cu un virgen por a duna luz. A pesar di tur nan siñansa, tin un simpel berdad cu nan no por capta. Gabriel a expres’e asin’aki: “Nada cu Dios bisa no ta imposibel.” (Luc. 1:37) Maria no a duda den e palabranan di Gabriel, pasobra e tabata un mucha muher cu hopi fe. Pero esey no kiermen cu el a kere tur cos pa loco. Mescos cu cualkier persona cu ta uza su sinti, Maria tabatin mester di prueba como base pa su fe. Y Gabriel tabata prepara pa dun’e mas prueba. El a menciona Elisabet, un famia di Maria, cu tur hende tabata sa cu no por a haya yiu y cu awor ya tabata un señora di edad. Milagrosamente Dios a laga Elisabet sali na estado.

10. Dicon e situacion no tabata niun tiki facil pa Maria?

10 Kico Maria lo a haci awor? E tabatin un tarea pa cumpli cu ne y suficiente prueba cu Dios lo bay haci tur loke Gabriel a bisa. Pero maske pa Maria tabata un gran privilegio di por duna luz na e Yiu di Dios, e situacion aki no tabata niun tiki facil p’e. Pa cuminsa, e mester a pensa riba su compromiso cu Jose. Jose lo a casa cu ne toch ora e haya sa cu e tabata na estado? Ademas, e responsabilidad riba su mes so caba lo por a parce algo enorme. E lo tabatin cu carga den su bariga e bida cu Dios a considera esun di mas precioso: su Yiu stima! Despues e lo mester a percura p’e ora e tabata un baby indefenso y proteh’e di e mundo malbado y cruel aki. Esta un responsabilidad pisa!

11, 12. (a) Con hasta hombernan fuerte cu tabata sirbi Dios fielmente a yega di reacciona ora Dios a duna nan tareanan dificil? (b) Kico e contesta cu Maria a duna Gabriel a revela?

 11 Bijbel ta mustra cu tabatin biaha cu hasta hombernan fuerte cu tabata sirbi Dios fielmente a vacila pa acepta asignacionnan dificil cu Dios a duna nan. Por ehempel, Moises a protesta cu e no tabata papia suficiente vlot pa sirbi como vocero di Dios. (Exo. 4:10) Jeremias a bisa cu e tabata “un mucha”, es decir, mucho jong pa acepta e tarea cu Dios a dun’e. (Jer. 1:6) Y Jonas a core bay for di su asignacion! (Jon. 1:3) Kico Maria lo a haci?

12 Maria su palabranan te awe ta impresiona tur hende di fe y ta refleha simpleza, humildad y obediencia. El a bisa Gabriel: “Ata mi aki! Jehova su sirbidor! Laga sosode cu mi manera bo a bisa.” (Luc. 1:38) Maria a considera su mes un simpel sirbidor of esclavo di Dios; su bida tabata completamente den man di su doño. Asina Maria tabata sinti pa cu su Doño, Jehova. E tabata sa cu e tabata safe den man di Jehova, cu Dios ta proteha hende fiel y cu Dios lo a bendicion’e si el a haci su best pa cumpli cu e tarea dificil aki lo mihor cu e tabata por.—Sal. 31:23.

Maria tabata sa cu e tabata safe den man di Jehova, e Dios cu ta proteha hende fiel

13. Con Maria su ehempel por yuda nos ora Dios ta pidi nos algo cu ta parce dificil of hasta imposibel?

13 Tin biaha Dios ta pidi nos haci cosnan cu por parce dificil, hasta imposibel. Sinembargo, den su Palabra e ta sigura nos hopi biaha cu nos por confi’e plenamente, ora nos pone nos mes den su man manera Maria a haci. (Prov. 3:5, 6) Nos ta haci esey? Si nos hacie, Jehova lo recompensa nos y esaki ta duna nos mas motibo pa pone fe den dje.

Maria A Bay Bishita Elisabet

14, 15. (a) Con Jehova a recompensa Maria ora el a bay bishita Elisabet y Zacarias? (b) Kico e palabranan di Maria cu ta para skirbi na Lucas 1:46-55 ta revela tocante dje?

14 Loke Gabriel a bisa tocante Elisabet a anima Maria hopi. Di tur e muhernan na mundo, ta ken lo por a compronde su situacion mihor cu Elisabet? Mesora Maria a dicidi di bishit’e y a bay na e region di sero di Juda, un biahe di tres pa cuater dia. Ora el a drenta cas di Elisabet y Zacarias, e sacerdote, Jehova a recompens’e cu un prueba mas pa fortalece su fe. Elisabet a tende Maria cumind’e y a sinti mesora cu e yiu den su bariga a bula di alegria. El a yena cu spirito santo y a yama Maria “mama di mi Señor.”  Dios a revela na Elisabet cu e yiu di Maria lo a bira su Señor, esta, e Mesias. Ademas, Dios a inspir’e pa elogia Maria pa su fieldad y obediencia cu e palabranan aki: “Feliz ta abo cu a kere.” (Luc. 1:39-45) Si, tur loke Jehova a priminti Maria lo a bira realidad!

E amistad di Maria cu Elisabet tabata un bendicion pa nan tur dos

15 Maria na su turno a papia y loke el a bisa a keda conserva den e Palabra di Dios. (Lesa Lucas 1:46-55.) Esey ta e caminda den Bijbel cu Maria a papia mas tanto, y e ta revela hopi di su persona. Por ehempel, nos por mira cu Maria tabata un mucha muher agradecido. El a alaba Jehova pasobra el a bendicion’e cu e privilegio di bira mama di e Mesias. Su palabranan ta mustra tambe e profundidad di su fe, pasobra el a referi na Jehova como esun  cu ta humilia hende orguyoso y poderoso, pero cu ta yuda hende pober y humilde cu ta desea di sirbie. Ademas, loke el a bisa ta duna prueba tambe di cuanto conocemento di Bijbel e tabatin. Segun un calculo, el a referi mas cu 20 biaha na e Scritura Hebreo! *

16, 17. (a) Con Maria y su yiu a demostra un actitud cu nos mester imita? (b) Maria su bishita cerca Elisabet ta laga nos mira kico?

16 Ta bisto cu Maria tabatin custumber di medita riba e Palabra di Dios. Pero el a keda humilde y a prefera di uza e palabranan di e Scritura pa expresa su mes en bes di bisa algo cu a refleha su mes punto di bista. E yiu cu tabata crece den su bariga cu tempo lo a demostra e mesun humildad. E yiu ey a bisa despues: “Loke mi ta siña hende no ta di mi, ma di esun cu a manda mi.” (Juan 7:16) Ta bon pa nos puntra nos mes: ‘Ami ta demostra e mesun respet ey pa e Palabra di Dios? Of mi ta prefera mi mes idea- y siñansanan?’ Maria sigur tabatin e actitud corecto.

17 Maria a keda mas o menos tres luna cerca Elisabet. Sin duda, nan a anima otro hopi. (Luc. 1:56) E relato conmovedor di e bishita aki ta laga nos mira cu un amistad por ta un gran bendicion. Si nos ta busca amigo cu di berdad ta stima nos Dios, Jehova, nos lo crece den sentido spiritual y nos relacion cu Jehova lo bira mas fuerte. (Prov. 13:20) Finalmente a bira tempo pa Maria bay cas bek. Kico Jose lo a bisa ora e haya sa cu Maria ta na estado?

Maria y Jose

18. Kico Maria a conta Jose, y con Jose a reacciona?

18 Maria probablemente no a warda te ora cu hende por a mira cu e tabata na estado pa papia cu Jose. Prome cu el a dun’e e noticia, kisas el a puntra su mes ta con e homber decente aki, temeroso di Dios, lo a reacciona. En todo caso, el a bay cerca dje y a cont’e tur loke a pasa. Manera nos por imagina, Jose a keda den shock. E tabatin gana di kere loke Maria a bis’e, pero tur cos tabata indica cu Maria a corta su horea. Bijbel no ta bisa kico Jose a pensa ni con el a rasona, pero si nos ta lesa cu el a dicidi di divorcia di Maria, pasobra den e tempo ey nan tabata considera un pareha comprometi como casa. Pero e no kier a pone Maria publicamente na berguensa of causa un escandalo, pesey el a dicidi di divorcia di dje den secreto. (Mat. 1:18, 19) Maria no a rabia pasobra Jose no kier a ker’e. Mas bien, lo e mester a sintie hopi tristo cu e homber cu e tabata stima tabata tur confundi.

19. Con Jehova a yuda Jose haci loke tabata corecto?

 19 Jehova bondadosamente a yuda Jose haci loke tabata corecto. Den un soño, e angel di Dios a bis’e cu di berdad Maria su embaraso tabata un milager. Esey lo mester tabata un gran alivio p’e! E ora ey Jose a dicidi di haci loke Maria tambe a haci for di principio: sigui e instruccion di Jehova. El a casa cu Maria y a prepara pa carga e responsabilidad unico di cuida e Yiu di Jehova.—Mat. 1:20-24.

20, 21. Kico parehanan casa y esnan cu tin pensa di casa por siña for di Maria y Jose?

20 Tanto hende casa como esnan cu tin pensa di casa por siña for di e ehempel di e pareha hoben aki cu a biba un 2.000 aña pasa. Despues, ora Jose a mira con Maria tabata cumpli cu su debernan di mama, lo e mester a keda contento cu el a haci loke e angel di Jehova a bis’e. Jose a mira e importancia di confia den Jehova ora di tuma decision grandi. (Sal. 37:5; Prov. 18:13) Y sin duda, el a sigui ta un persona prudente y amabel ora di tuma decision como cabes di cas.

21 Di otro banda, kico nos por siña for di e echo cu Maria tabata dispuesto pa casa cu Jose a pesar cu Jose a duda den dje? Aunke na prome instante tabata dificil pa Jose acepta loke Maria a cont’e, toch Maria tabata confi’e y warda riba dje p’e dicidi kico pa haci, pasobra al final ta e lo tabata e cabes di cas. No tin duda cu Maria a mira e importancia di tene pasenshi, y esaki ta un bon les pa muhernan cristian awe. Y por ultimo, tur loke a pasa lo mester a siña Jose cu Maria e balor di comunicacion franco y sincero.—Lesa Proverbionan 15:22.

22. Ki fundeshi e matrimonio di Jose cu Maria tabatin, y kico tabata spera nan?

22 E pareha hoben ey definitivamente a cuminsa nan matrimonio cu e mihor fundeshi posibel. Nan tur dos tabata stima Jehova Dios mas cu tur cos y tabata desea di agrad’e como mayornan responsabel y amoroso. Claro cu bendicionnan mas grandi tabata spera nan, pero tambe problemanan mas grandi. Nan tabatin nan dilanti e tarea di cria Hesus, kende lo a bira e homber di mas importante cu mundo a yega di conoce.

^ par. 15 Aparentemente Maria a cita, entre otro, e palabranan di e fiel muher Ana, kende tambe Jehova a bendiciona cu un yiu.—Wak e cuadro “Dos Oracion Remarcabel”, na Capitulo 6.