Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

 CAPITULO NUEBE

Un Muher Inteligente

Un Muher Inteligente

1-3. (a) Dicon e cas di Abigail tabata den peliger? (b) Kico nos lo bay analisa tocante e muher remarcabel aki?

ABIGAIL por a mira cu e hoben tabata morto spanta, y cu rason. Un peliger grave tabata menasa nan. Cuatershen guerero tabata riba caminda pa bin mata tur hende homber di e cas. Ta kico a pasa anto?

2 Tur e problema a cuminsa cu Nabal, casa di Abigail. El a trata algun homber na un manera cruel y onbeschoft locual ta su custumber, pero e biaha aki si el a dal su dede duro: El a insulta e comandante di un grupo di guerero leal y bon entrena. Pesey un di e trahadornan di Nabal—kisas un wardador di carne—a core bin cerca Abigail cu e speransa cu e lo a haya un manera pa scapa nan. Pero kico un solo muher por a haci contra henter un ehercito?

Kico un solo muher por a haci contra henter un ehercito?

3 Prome cu nos bay wak kico Abigail a haci, laga nos haya sa algo mas di e muher remarcabel aki. Ki clase di muher Abigail tabata? Kico a provoca e crisis aki? Y kico nos por siña for di su ehempel di fe?

“Inteligente y Bunita di Apariencia”

4. Ki clase di homber Nabal tabata?

4 Abigail cu Nabal no tabata pas cu otro. Nabal no por a haya un mihor casa, mientras cu Abigail no por a haya un pio casa. Ta berdad cu Nabal tabata rico y pesey a considera su mes hopi importante. Pero kico otro hende tabata pensa di dje? Wel, no ta facil pa haya un otro personahe den Bijbel cu ta ser menciona cu mas desprecio. Su nomber so caba a nifica “Bobo” of “Dòmverstant (BPK).” Nos no sa si ta ora el a nace nan a dun’e e nomber ey of si esey tabata un beinam cu el a haya despues debi na su comportacion. En todo caso, e nomber tabata pas p’e. Nabal tabata “bruto y di mala fe.” Niun hende no tabata por cu ne. E tabata un abusador y un burache, un homber cu tur hende tabatin miedo di dje.—1 Sam. 25:2, 3, 17, 21, 25.

5, 6. (a) Kico bo ta haya tabata e cualidadnan mas atractivo di Abigail? (b) Kico lo por a pone Abigail casa cu un homber cu no a sirbi pa nada manera Nabal?

 5 Pero Abigail tabata totalmente diferente for di Nabal. Su nomber a nifica “Mi Tata A Bira Contento.” Mayoria di tata ta sinti nan orguyoso si nan tin un yiu muher bunita, pero un tata sabi ta mas feliz ora su yiu muher tin un bunita caracter y personalidad. Lamentablemente, hopi biaha sa sosode cu personanan cu ta bunita di pafo no ta worry pa cultiva bon cualidad manera sano huicio, sabiduria, curashi y fe. Pero esey no tabata e caso cu Abigail. Segun Bijbel, ademas di ta bunita, e “tabata inteligente.” Kiermen, e tabata un muher di sano huicio, un muher cu a uza su cabes.—Lesa 1 Samuel 25:3.

6 Kisas un hende lo por puntra su mes ta dicon un mucha muher asina inteligente a casa cu un homber cu no a sirbi pa nada? Corda cu den e temponan ey, mayornan tabata busca casa pa nan yiu of mester a duna nan aprobacion pa un matrimonio tuma luga. Den caso di Abigail, ta su mayornan tabata na fabor di e matrimonio? Acaso nan a busca Nabal p’e casa cu ne pasobra nan tabata impresiona cu su rikesa y posicion prominente? Of ta pobreza a pone nan aproba e matrimonio? En todo caso, Nabal su rikesa no a hacie un bon casa.

7. (a) Kico mayornan awe mester evita si nan kier pa nan yiunan tin un punto di bista corecto di matrimonio? (b) Kico Abigail tabata determina pa haci?

7 Mayornan sabi ta siña nan yiunan pa nan tin un punto di bista corecto di matrimonio. Nan no ta anima nan yiunan pa casa pa cosnan material. Tampoco nan no ta presiona nan pa cuminsa enamora mientras cu ainda nan no tin e madurez pa carga responsabilidad di hende casa. (1 Cor. 7:36) Pero Abigail tabata casa caba. Y sea loke sea e motibo pakico el a casa cu Nabal, e tabata determina pa haci lo mihor cu e tabata por den su situacion.

“El A Desprecia Nan”

8. Ken Nabal a insulta, y dicon nos por bisa cu esey no tabata sabi di su parti?

8 Pero awor Nabal a haci Abigail su situacion mas dificil cu nunca. E homber cu Nabal a insulta tabata David, un fiel sirbidor di Dios. Profeta Samuel a ungi David como sucesor di Rey Saul. (1 Sam. 16:1, 2, 11-13) David tabata biba den desierto hunto cu su 600 guereronan leal pa scapa di Rey Saul, kende tabata hopi jaloers y tabata busca manera pa mat’e.

9, 10. (a) Den ki situacion dificil David y su hombernan tabata trata di sobrevivi? (b) Dicon Nabal lo mester a aprecia loke David cu su hombernan tabata haci? (Wak tambe e nota na paragraf 10.)

9 Nabal tabata biba na Maon, pero e tabata traha cerca di e  stad Carmelo (of Carmel), y probablemente e tabatin tereno eynan tambe. * Nabal tabatin 3.000 carne, y e stadnan ey tabata keda meymey di un region eleva, yen di sabana cu tabata bon pa cria carne. Pero e resto di e area ey tabata mondi desola: Pazuid tabatin e inmenso desierto di Paran y den direccion oost tabatin e caminda cu a hiba na Lama Salo y cu tabata pasa door di terenonan desola, yen di cueba y baranca. Ta den e region ey David cu su hombernan tabata lucha pa sobrevivi; nan tabata biba di loke nan a jaag y casi sigur nan a pasa basta miseria. Na varios ocasion nan a topa e hobennan cu tabata cuida e carnenan di e homber rico Nabal.

10 Con e soldaatnan ey a trata e wardadornan? Lo tabata facil pa de bes en cuando nan coy un carne bay cu ne, pero nan no a haci esey. Al contrario, nan a proteha e tounan y e sirbidornan di Nabal. (Lesa 1 Samuel 25:15, 16.) Bida di e wardadornan ey no tabata facil. Den e tempo ey tabatin masha hopi bestia salbahe, y como cu e area ey tabata cerca di Israel su frontera di zuid, trupa di bandido hopi biaha tabata ataca nan. *

11, 12. (a) Con David a mustra tacto y respet den e mensahe cu el a manda pa Nabal? (b) Dicon e manera cu Nabal a reacciona riba e mensahe no tabata bon?

11 Lo mester tabata basta trabou pa alimenta tanto homber asina den desierto. Pesey un dia, David a manda dies mensahero cerca Nabal pa pidie yudansa. David a scoge un bon momento: ora di pela carne, un periodo cu e hendenan normalmente sa ta hopi generoso y den ambiente di fiesta. Ademas, David a scoge su palabranan cu cuidou y a dirigi su mes na Nabal cu hopi respet. Hasta el a referi na su mes como “bo yiu David”, reconociendo asina cu Nabal tabata mas grandi cu ne. Con Nabal a reacciona?—1 Sam. 25:5-8.

12 El a bira razo! Ora e hoben menciona na principio a describi e escena na Abigail, e di cu Nabal “a desprecia [“rous”, BPK]” e mensaheronan di David. Na bos halto e homber pichiri ey a nenga di comparti su pan, awa y carni cu nan. El a haci bofon di David y a describie como un homber insignificante y como un catibo cu a huy. Sin duda Nabal tabata pensa mescos cu Saul, kende tabatin rabia riba David. Ni Nabal ni Saul no tabatin e punto di bista di  Jehova. Jehova a stima David y no a mir’e como un catibo rebelde, sino como e futuro rey di Israel.—1 Sam. 25:10, 11, 14.

13. (a) Con David a reacciona na prome instante riba e insulto di Nabal? (b) Kico e principio di Santiago 1:20 ta siña nos tocante e reaccion di David?

13 Ora David a tende con Nabal a reacciona, el a bira furioso. “Faha boso spada”, el a ordena su guereronan. E tambe a arma su mes y a sali bay cu 400 homber, cla pa ataca Nabal y mata tur hende homber di su cas, manera el a hura cu e lo haci. (1 Sam. 25:12, 13, 21, 22) Ta di compronde cu David a rabia, pero su manera di expresa su rabia no tabata bon. Manera Bijbel ta bisa: “Rabia di hende no ta produci loke ta husto den bista di Dios.” (Sant. 1:20) Pero con Abigail por a salba e hendenan di su cas?

“Bendiciona Sea Bo Discernimento”

14. (a) Den ki sentido Abigail a dal e prome paso pa corigi e fayo cu Nabal a comete? (b) Ki les nos ta siña for di e contraste entre Nabal y Abigail? (Wak tambe e nota.)

14 Den cierto sentido, Abigail ya a dal e prome paso pa corigi e fayo teribel ey di Nabal. Na contraste cu su esposo, e si tabata dispuesto pa scucha. E cria hoben a bisa cu Nabal tabata “un homber asina perverso cu ningun hende no por papia cu ne.” * (1 Sam. 25:17) Lamentablemente, Nabal tabata haya su mes asina importante cu e no tabata kier scucha ningun hende. Te awe e actitud arogante ey ta hopi comun. Pero e hoben tabata sa cu Abigail si no tabata asina, y sin duda ta pesey el a bay cerca dje cu e problema aki.

Na contraste cu Nabal, Abigail si tabata dispuesto pa scucha

15, 16. (a) Con Abigail a demostra cu e tabata manera e esposa capaz describi den e buki di Proverbionan? (b) Dicon loke Abigail a haci no tabata un falta di respet pa e autoridad di su casa?

15 Abigail a realisa di biaha con grave e situacion tabata y a actua mesora. Nos ta lesa cu “e ora ey Abigail a haci lihe lihe.” Cuater biaha den e relato aki Bijbel ta bisa cu Abigail a haci lihe. El a prepara un regalo generoso pa David cu su hombernan: pan, biña, carni di carne, maishi tosta, rasenchi y figo. Ta bisto cu Abigail a tuma su responsabilidad como ama di cas na serio, y e tabata sa precies kico e tabatin den cas, mescos cu e esposa capaz describi den e buki di Proverbionan. (Prov. 31:10-31) El a manda su crianan bay dilanti cu e regalo, y e mes a sigui nan tras. “Ma e no a conta su esposo Nabal nada”, segun e relato.—1 Sam. 25:18, 19.

 16 Acaso esaki ta indica cu Abigail no a respeta e autoridad di su esposo como cabes di e famia? No, di ningun manera. Corda cu Nabal a trata un sirbidor ungi di Jehova cu hopi falta di respet, y esey a pone bida di hopi hende inocente na peliger. Si Abigail a sinta man crusa sin haci nada, e tambe lo no tabata responsabel pa loke su casa a haci? En todo caso, e mester a pone sumision na Dios prome cu sumision na su esposo.

17, 18. (a) Con Abigail a acerca David y kico el a bisa David? (b) Dicon e palabranan di Abigail a yega na David su curason?

17 No a tarda mucho cu Abigail a topa David cu su hombernan. El a baha lihe for di su burico y a buig abou dilanti di David. (1 Sam. 25:20, 23) Anto el a splica David precies con e tabata sinti y a rog’e pa tene misericordia di Nabal y di su hendenan di cas. Kico el a bisa cu a yega na David su curason?

‘Por fabor, laga bo sirbiente papia cu bo’

18 Pa cuminsa, el a tuma e culpa riba dje y a pidi David pordon’e. Despues el a reconoce cu su casa realmente tabata bobo, manera su nomber ta indica, y kisas e kier a bisa David cu no tabata bale la pena p’e rebaha su mes pa castiga un homber asina. Ademas, el a demostra cu el a mira David como Jehova su representante ora el a bisa cu David tabata ‘bringa e batayanan di Jehova.’ Tambe el a indica cu e tabata sa cu Dios a priminti di haci David rey, pasobra el a bisa cu Jehova lo a ‘establece David como gobernante di Israel.’ Hasta el a urgi David pa no haci nada cu lo a hacie culpabel di sanger of cu despues lo por a “causa tristeza [of] remordimento di curason.” (Lesa 1 Samuel 25:24-31.) Palabranan sabi y conmovedor!

19. Con David a reacciona riba e palabranan di Abigail, y dicon el a elogi’e?

19 Anto con David a reacciona? El a acepta e regalo di Abigail y a bis’e: “Bendiciona sea e SEÑOR Dios di Israel, kende a manda bo e dia aki pa contra cu mi, y bendiciona sea bo discernimento, y bendiciona sea abo mes, kende a kita mi awe di drama sanger.” David a elogi’e pa e curashi cu e tabatin di bin topa cu ne, y el a reconoce cu Abigail a prevenie di drama sanger inocente. El a bisa Abigail: “Bay bo cas na paz.” Y humildemente el a agrega: “Mi a scucha bo.”—1 Sam. 25:32-35.

“Mira, Bo Sirbiente”

20, 21. (a) Dicon ta admirabel cu Abigail a bay bek cerca su casa? (b) Con Abigail a demostra curashi y sano huicio ora el a scoge e momento pa papia cu Nabal?

20 Riba caminda pa cas, Abigail no por a keda sin pensa riba e encuentro ey. E mester a ripara e diferencia entre David, un homber fiel y amabel, y e homber bruto cu e tabata casa cu ne. Pero e  no a sigui pensa riba esey. Bijbel ta bisa: “Anto Abigail a bin cerca Nabal.” Si, el a bay bek cerca su casa, determina pa cumpli cu su papel como esposa lo mihor cu e tabata por. E tabatin cu laga Nabal sa di e regalo cu el a duna David cu su hombernan pa asina evita un matanza. Al fin y al cabo, Nabal tabatin derecho di sa esey. Abigail mes a dicidi di conta Nabal, prome cu e tende for di boca di otro hende kico su casa a haci, ya cu esey lo tabata mas berguensa ainda. Pero e no por a cont’e asina cu el a yega cas, pasobra Nabal tabata festeha manera un rey y tabata pata pata burachi.—1 Sam. 25:36.

Cu curashi Abigail a conta Nabal kico el a haci pa salba Nabal su bida

21 Un biaha mas, Abigail a demostra sano huicio. El a warda te su siguiente mainta, ora cu Nabal su wayaba a pasa, pa cont’e kico el a haci. Ademas, Abigail a demostra cu e tabata un muher cu curashi, pasobra mainta su casa lo tabata mas na tino, pero tambe lo tabatin mas chens cu e homber lo a rabia y hacie daño. El a cont’e tur loke a pasa. Casi sigur Abigail a pensa cu su casa lo a bira furioso of hasta violento. Pero pa su sorpresa, Nabal a keda sinta keto keto, “manera un piedra.”—1 Sam. 25:37.

22. Kico a pasa cu Nabal, y kico esey ta siña nos tocante tur e casonan di maltrato of dictadura cu ta tuma luga den casnan di famia?

22 Ta kico a pasa Nabal? Segun e relato: “Su curason a para den su curpa.” Nos no sa si ta un tipo di atake el a haya. Pero un dies dia despues, el a muri, y no ta parce cu ta unicamente pa motibo di un problema di salud. Bijbel ta bisa cu “SEÑOR a afligi Nabal, y el a muri.” (1 Sam. 25:38) Pues, asina e matrimonio dificil di Abigail a yega na un fin, danki na e castigo mereci cu Dios a duna Nabal. Jehova no ta interveni asina drasticamente awe. Pero e relato aki ta recorda nos cu e ta tuma nota di tur caso di maltrato of dictadura cu ta tuma luga den casnan di famia y cu, na su debido tempo, lo e rectifica tur asunto.—Lesa Lucas 8:17.

23. Ki bendicion mas Abigail a haya, y con el a demostra cu e ta humilde?

23 Abigail a libra for di su matrimonio infeliz, pero esey no tabata tur cos. Un bendicion mas tabata sper’e. Ora David a haya sa cu Nabal a muri, el a manda algun mensahero pa bay pidi Abigail pa casa cu ne. Con Abigail a reacciona? El a bisa: “Mira, bo sirbiente ta un cria pa laba pia di mi señor su sirbidornan.” Esta un humildad! Ora el a ofrece pa haci e tarea di un cria, el a demostra bon cla cu e chens di  casa cu David no a lag’e pensa cu e ta mas cu otro hende. Un biaha mas nos ta lesa cu el a actua lihe y dicidido, y mesora el a prepara pa bay cerca David.—1 Sam. 25:39-42.

24. Cua ta algun dificultad cu Abigail a enfrenta den su bida nobo, pero con su casa y su Dios a mir’e?

24 Acaso esaki a nifica cu di eynan padilanti su bida lo tabata manera un sprookje? Claro cu no, pasobra como esposa di David, bida lo no tabata semper facil. David tabata casa caba cu Ahinoam, y aunke Dios a permiti poligamia, e situacion ey lo no tabata facil pa muhernan fiel den e tempo ey. Ademas, David mester a supera hopi obstaculo y dificultad ainda prome cu e por a bira rey. Abigail a apoya David henter su bida, y cu tempo el a haya un yiu cu ne. Tambe el a bin realisa cu el a casa cu un homber cu tabata stim’e y proteh’e. Na un ocasion David a hasta salb’e for di man di secuestrado. (1 Sam. 30:1-19) Pues, David a imita Jehova Dios, kende ta balora y stima hende muher cu ta desplega sano huicio, curashi y fieldad.

^ par. 9 E stad aki tabata keda den zuid di Israel, na rand di e desierto di Paran. No mester confundi e stad Carmelo cu e famoso Sero Carmelo (of Sero di Carmel) cu tabata keda hopi mas ariba den noord, caminda profeta Elias tabatin un confrontacion cu e profetanan di Baal. (Wak Capitulo 10.)

^ par. 10 Den e tempo ey, e proposito di Jehova tabata pa e descendientenan di Abraham, Isaak y Jacob biba den e tera ey. Pesey David probablemente a sinti cu e tabata rindi un forma di sirbishi sagrado na Jehova ora el a proteha e doñonan di tereno y nan tounan contra invasor stranhero.

^ par. 14 E frase cu e hoben a uza literalmente ta nifica “yiu di belial (inutil; cu no ta sirbi pa nada).” Otro Bijbelnan ta inclui den nan traduccion di e frase aki e descripcion di Nabal como un hende “cu no ta scucha niun hende” y cu “no por discuti cu ne.”