Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Imita Nan Fe

Introduccion

Introduccion

“Imita esnan cu pa medio di fe y pasenshi ta ricibi loke Dios a priminti.”—HEBREONAN 6:12.

1, 2. Con un superintendente biahero a considera e personahenan di Bijbel, y dicon nan lo por ta bon amigo pa nos?

“E TA papia tocante personahenan di Bijbel comosifuera nan ta bon amigo di dje.” Asina un ruman muher a bisa despues cu el a scucha un discurso di un superintendente biahero di edad. Y e ruman tabatin rason! E superintendente ey pa varios decada a studia Bijbel y siña hende for di dje. Ta pesey e homber- y muhernan di fe menciona den Bijbel en berdad tabata manera bon amigo di dje cu el a conoce henter su bida.

2 Lo no ta algo maraviyoso si nos por tabatin e personahenan biblico ey como amigo? Nan ta asina real pa bo? Imagina bo con lo tabata si nos por a pasa tempo cu nan y siña conoce hende manera Noe, Abraham, Ruth, Elias y Ester. Pensa riba e bon influencia cu nan lo por tabatin riba bo bida: e animacion y conseho valioso cu nan lo por a duna bo!—Lesa Proverbionan 13:20.

3. (a) Con nos por beneficia si nos studia bida di e homber- y muhernan di fe menciona den Bijbel? (b) Cua ta algun pregunta cu nos lo bay analisa?

3 Claro cu ta ora e ‘resureccion di hende husto’ tuma luga, nos lo por disfruta di e amistadnan ey den pleno sentido di palabra. (Echo. 24:15) Pero for di awor caba nos por saca beneficio si nos studia bida di e homber- y muhernan di fe menciona den Bijbel. Kico nos tin cu haci? Apostel Pablo a bisa: “Imita esnan cu pa medio di fe y pasenshi ta ricibi loke Dios a priminti.” (Heb. 6:12) Pero prome cu nos cuminsa studia e ehempel di homber- y muhernan di fe, laga nos analisa algun pregunta cu e palabranan di Pablo ta lanta: Kico ta fe, y dicon nos mester tin fe? Con nos por imita hende fiel di pasado?

Kico Ta Fe, y Dicon Nos Mester Tin Fe?

4. Kico hende ta pensa tocante fe, y dicon nan ta ekiboca?

4 Fe ta un bunita cualidad. Tur e homber- y muhernan cu nos lo bay analisa den e buki aki a consider’e un cualidad hopi valioso. Hopi hende awe no sa realmente kico fe ta encera. Nan ta pensa cu esey kiermen djis kere algo sin cu bo tin prueba of evidencia. Pero nan ta ekiboca. Fe no kiermen kere ciegamente, ni e no ta djis un sintimento. Ta peligroso pa kere cos ciegamente, y un sintimento por disparce un ora pa otro. No ta suficiente tampoco pa djis kere den Dios, pasobra Bijbel ta bisa cu “e demoñonan tambe ta kere esey, y nan ta tembla di miedo.”—Sant. 2:19.

5, 6. (a) Nos fe ta encera cua dos cos? (b) Uza un ilustracion pa splica con solido e fundeshi di nos fe mester ta.

 5 Berdadero fe ta encera mucho mas cu kere ciegamente den algo. Corda con Bijbel ta definie. (Lesa Hebreonan 11:1.) Segun Pablo, nos fe ta encera dos cos. E prome ta cu nos tin fe den cosnan cu realmente ta existi pero cu nos “no ta mira.” Por ehempel, nos no por mira e “realidadnan” den cielo, manera Jehova Dios, su Yiu of e Reino cu awor ta goberna. E di dos ta cu nos tin fe den ‘loke nos ta spera’, esta, sucesonan cu ainda no a tuma luga. Por ehempel, nos no ta mira e mundo nobo cu pronto e Reino di Dios lo trece. Acaso esey kiermen cu nos fe den e “realidadnan” ey y den ‘loke nos ta spera’ no tin base?

6 Al contrario! Pablo a mustra cu berdadero fe tin un fundeshi solido. Ora el a bisa cu fe ta “e confianza firme”, el a uza un expresion cu por ser traduci tambe como “acta di propiedad.” Supone cu un hende a dicidi di duna bo un cas. Lo e por djis duna bo e acta den bo man y bisa bo: “Ata bo cas nobo aki.” Naturalmente, e no kiermen cu lo bo bay biba riba e pida papel ey. Loke e kier bisa ta cu e documento legal ey ta un prueba asina palpabel cu bo ta doño di e cas, cu si bo tin e acta den bo man ta comosifuera ta e cas bo tin den bo man. Di igual manera, e evidencia riba cua nos fe ta basa ta asina solido, asina convencente, cu ta comosifuera nos ta mira caba tur loke nos ta kere aden.

7. Kico berdadero fe ta encera?

7 Pues, berdadero fe ta encera un confianza bon funda y un conviccion firme cu ta enfoca completamente riba Jehova Dios. Fe ta laga nos mir’e como nos Tata amoroso y confia cu tur su promesanan lo ser realisa sigur. Pero berdadero fe ta encera mas. Fe ta mescos cu algo bibo; bo mester aliment’e p’e keda na bida. Pues, bo mester expresa bo fe pa medio di obra, sino e ta muri.—Sant. 2:26.

8. Dicon fe ta asina importante?

8 Dicon fe ta asina importante? Pablo a duna un contesta interesante. (Lesa Hebreonan 11:6.) Ta solamente si nos tin fe nos por acerca Jehova y agrad’e. Pues, fe ta indispensabel si nos kier cumpli cu e proposito di mas eleva y noble di tur ser inteligente: glorifica nos Tata celestial, Jehova, y mantene un bon relacion cu ne.

9. Con Jehova a demostra cu e sa cu nos tin mester di fe?

9 Jehova sa cu nos mester di fe, pesey el a percura pa nos tin ehempelnan cu por siña nos con pa cultiva fe y demostr’e. E ehempel di hombernan fiel cu ta dirigi e congregacion cristian mes ta un bendicion di Jehova. Y su Palabra ta bisa: “Imita nan fe.” (Heb. 13:7) Pero Jehova a duna nos mas ehempel. Pablo a skirbi tocante ‘un nubia  grandi di testigo.’ E tabata referi na homber- y muhernan di antiguedad cu a laga un excelente ehempel di fe. (Heb. 12:1) Pero e lista di personanan fiel cu Pablo a menciona na Hebreonan capitulo 11 no ta completo. Bijbel tin cantidad di relato di bida real di hende homber y muher, di tur edad y di tur nivel di bida, cu a hiba un bida di fe y cu por siña nos hopi cos den e mundo sin fe aki.

Con Nos Por Imita e Fe di Otro Hende?

10. Con nos estudio personal por yuda nos imita e homber- y muhernan fiel menciona den Bijbel?

10 Bo no por imita un persona sin cu bo observ’e bon prome. Segun cu bo ta lesa e buki aki, lo bo ripara cu nos a haci hopi investigacion pa yuda bo observa e homber- y muhernan di fe aki. Lo ta bon si bo mes tambe haci algun investigacion adicional. Durante bo estudio personal, uza e publicacionnan cu bo tin pa bay mas profundo den Bijbel. Segun cu bo ta medita riba loke bo ta studia, purba di imagina e marco di circunstancia y background di e relatonan di Bijbel. Purba di mira e luga den bo mente, tende e zonidonan y hole e aromanan, comosifuera bo tabata eynan. Mas importante ainda, purba di saca afo ki sintimento e homber- y muhernan fiel ey tabatin. Asina nan lo bira mas real pa bo, mas conoci, y kisas lo bo hasta cuminsa mira algun di nan como bon amigo.

11, 12. (a) Ki ora lo bo sinti cu bo a siña conoce Abraham cu Sara mihor? (b) Con lo bo por beneficia di e ehempel di Ana, Elias of Samuel?

11 Ora cu di berdad bo siña conoce nan, lo bo kier imita nan. Por ehempel, supone cu e organisacion di Jehova a pidi bo pa expande bo sirbishi. Kisas bo a haya un asignacion nobo. Kisas nan a pidi bo bay biba na un luga cu tin mester di mas predicador urgentemente. Of talbes nan a pidi bo participa den un forma di predicacion cu ta nobo pa bo of cu bo no ta sinti bo mucho comodo cu ne. Mientras bo ta evalua e asignacion y ta haci oracion tocante dje, medita riba e ehempel di Abraham. Esey lo por ta un bon yudansa pa bo. E cu Sara tabata dispuesto pa bandona nan bida comodo na Ur, y Dios a bendiciona nan ricamente pa esey. Si bo tambe tuma un decision asina, lo bo sinti sin duda cu awor bo conoce nan mihor cu nunca.

12 Un otro ehempel. Kico si un persona hopi cerca di bo trata bo hopi malo mes, y bo ta sinti bo desanima, sin gana di bay reunion? Si bo medita riba e ehempel di Ana y wak con e no a laga e comportacion malo di Penina strob’e di rindi adoracion na Jehova, esey lo yuda bo tuma e decision corecto. Ademas, lo bo mira Ana mas manera un bon amiga. Asina tambe, si bo ta desanima pasobra bo ta pensa cu bo no bal nada, lo bo sinti bo mas pega na Elias ora bo studia  e situacion dificil cu e tabata aden y mira con Jehova a consol’e. Y hobennan na scol cu ta haya hopi presion di nan coleganan di scol inmoral kisas lo sinti nan mas pega na Samuel despues cu nan analisa con el a reacciona riba e mal influencia di e yiunan di Eli cu tabata sirbi na e tabernakel.

13. Splica dicon no ta asina cu ora bo ta imita e fe di un personahe biblico bo fe tin menos balor.

13 Bo ta pensa cu ora bo ta imita loke otro hende a haci pa demostra nan fe, bo fe lo tin menos balor pa Jehova? Claro cu no! Corda cu e Palabra di Jehova ta anima nos pa imita hende di fe. (1 Cor. 4:16; 11:1; 2 Tes. 3:7, 9) Ademas, algun di e personanan cu nos lo analisa den e buki aki mes tambe a imita otro hende fiel cu a biba prome cu nan. Por ehempel, den Capitulo 17, nos por tuma nota cu Maria aparentemente a cita e palabranan di Ana. Ta bisto cu el a considera Ana como un ehempel p’e. Esey kiermen cu Maria su fe no tabata fuerte? No! Al contrario, e ehempel di Ana a yuda Maria fortalece su fe, di manera cu e mes por a traha un bon nomber cerca Jehova Dios.

14, 15. Menciona algun caracteristica di e buki aki, y con bo por haci bon uzo di dje.

14 E buki aki por yuda bo fortalece bo fe. E capitulonan cu ta sigui ta un compilacion di e articulonan di e serie “Imita Nan Fe” cu a sali den e edicion publico di E Toren di Vigilancia. Pero nos a agrega algun informacion nobo. Cada capitulo tin preguntanan pa yuda bo considera e informacion y aplic’e. Specialmente pa e buki aki nos a crea plachinan hopi detaya y colorido y a drecha algun cu tabat’ey caba y a haci nan mas grandi. E mapanan y e liña di secuencia cronologico di algun suceso tambe ta hopi util. E buki Imita Nan Fe a ser prepara pa nos uz’e den nos estudio personal, di famia y di congregacion. Hopi famia lo disfruta tambe di simplemente sinta hunto y lesa e relatonan na bos halto.

15 Nos deseo ta pa e buki aki yuda bo imita e fe di Jehova su sirbidornan leal di pasado. Tambe nos ta spera cu segun cu bo ta haya un amistad mas cera cu bo Tata celestial, Jehova, bo fe lo bira mas fuerte.