E contesta cu Bijbel ta duna

Algun traduccion di Bijbel ta traduci e palabra Hebreo “Seol” y su ekivalente na Griego “Hades” como fierno; ambos ta nifica e graf comun di humanidad. (Salmo 16:10; Echonan 2:27) Hopi hende ta kere den un fierno di candela manera e plachi ta mustra. Pero e doctrina ey no ta cuadra cu loke Bijbel ta siña.

  1. Esnan cu ta den fierno no ta consciente di nada, pesey nan no por sinti dolor. “E mortonan no sa nada”, pasobra “no tin actividad ni planificacion ni sabiduria den Seol.”—Eclesiastes 9:5, 10, Beibel Santu.

  2. Bon hende ta bay fierno. E hombernan fiel Jacob y Job tabata sa cu nan lo a bay Seol of fierno .—Genesis 37:35; Job 14:13.

  3. E castigo pa pica ta morto y no tormento den fierno di candela. “Esun cu muri ta keda absolve di su pica.”—Romanonan 6:7.

  4. Un Dios di husticia lo no tormenta hende pa semper. (Deuteronomio 32:4) Ora e prome homber, Adam, a peca Dios a bis’e cu como castigo lo e simplemente stop di existi: “Stof bo ta, y na stof lo bo bolbe.” (Genesis 3:19, Beibel Santu) Pues, si Dios tabatin intencion di manda Adam fierno di candela, ta gaña lo el a gaña.

  5. Dios no ta pensa mes pa tormenta hende pa semper den candela. E idea di castiga hende den fierno di candela ta contradeci e siñansa di Bijbel cu “Dios ta amor.”—1 Juan 4:8; Jeremias 7:31.