Sigui pa e contenido

Sigui pa e di dos menu

Testigonan di Jehova

Papiamento (Aruba)

Den Ki Sentido e Sacrificio di Hesus Ta un “Rescate pa Hopi” Hende?

Den Ki Sentido e Sacrificio di Hesus Ta un “Rescate pa Hopi” Hende?

Loke Bijbel ta bisa

E sacrificio di Hesus ta e medio cu Dios ta uza pa libra, of salba, humanidad for di pica y morto. Bijbel ta referi na e sanger drama di Hesus como un prijs di rescate. (Efesionan 1:7; 1 Pedro 1:18, 19) Pesey, Hesus a bisa cu el a bin “pa duna su bida como prijs di rescate pa hopi” hende.—Mateo 20:28, Beibel Santu.

Dicon tabatin mester di un “rescate pa hopi” hende?

Dios a crea e prome hende, Adam, perfecto, esta, sin pica. Adam tabatin e oportunidad di biba pa semper, pero el a perde esaki ora el a desobedece Dios. (Genesis 3:17-19) Consecuentemente, tur Adam su yiunan a hereda pica. (Romanonan 5:12) Pesey, Bijbel ta bisa cu Adam a “bende” su mes y su yiunan como esclavo di pica y morto. (Romanonan 7:14) Pues, como cu tur Adam su yiunan tabata imperfecto, niun di nan no por a cumpra loke Adam a perde.—Salmo 49:7, 8.

Dios tabatin duele di e descendientenan di Adam; nan tabata sin speransa. (Juan 3:16) Pero Dios ta un Dios di husticia. Pues, e no por a djis pasa por halto di nan picanan of pordona nan picanan sin un motibo valido. (Salmo 89:14; Romanonan 3:23-26) Dios ta stima humanidad, pesey el a pone e base legal pa hende haya pordon di pica y pa elimina pica pa semper. (Romanonan 5:6-8) E base legal aki ta e prijs di rescate cu Hesus a paga.

Kico e rescate ta encera?

Den Bijbel, e palabra “rescate” ta abarca tres idea:

  1. Un pago.Numbernan 3:46, 47.

  2. Loke ta percura liberacion of redencion.Exodo 21:30.

  3. E balor ekivalente di loke mester ser paga. *

Laga nos wak con e tres ideanan aki ta bin padilanti den caso di e rescate di Hesucristo.

  1. Un pago. Bijbel ta bisa cu a cumpra cristiannan “pa un prijs.” (1 Corintionan 6:20; 7:23) E prijs ey ta e sanger di Hesus cu el a uza pa “cumpra hende pa Dios for di tur tribu, idioma, pueblo y nacion.”—Revelacion 5:8, 9.

  2. Liberacion. E sacrificio di Hesus ta e rescate cu ta libra nos di pica.—1 Corintionan 1:30; Colosensenan 1:14; Hebreonan 9:15.

  3. Balor Ekivalente. Hesus su sacrificio ta coresponde exactamente cu e bida humano perfecto cu Adam a perde. (1 Corintionan 15:21, 22, 45, 46) Bijbel ta bisa: “Mescos cu mediante desobediencia di esun hende ey [Adam] hopi a bira pecador, asina tambe mediante obediencia di esun persona aki [Hesucristo] hopi lo bira husto.” (Romanonan 5:19) Esaki ta yuda nos compronde dicon morto di un solo homber por a paga e rescate pa hopi pecador. En realidad, e sacrificio di Hesus ta “un rescate corespondiente pa tur hende” cu dal e pasonan necesario pa beneficia di esaki.—1 Timoteo 2:5, 6.

^ par. 11 Den Bijbel, e palabranan original cu ta ser traduci como “rescate” ta transmiti e idea di un prijs, of algo di balor cu ta ser duna a cambio di otro cos. Por ehempel, e verbo Hebreo kafár basicamente ta nifica cubri. Generalmente, e ta nifica cubri, of pordona, pica. (Salmo 65:3) E sustantivo kófer ta referi na e prijs cu ta ser paga pa cubri algo of cumpra algo bek. (Exodo 21:30) Di mes manera, e palabra Griego lítron, cu mayoria di biaha ta ser traduci como “rescate”, por nifica tambe “prijs di rescate.” (Mateo 20:28; Beibel Santu) Escritornan Griego a uza e expresion aki pa referi na e placa cu ta ser paga pa cumpra libertad di un preso di guera of un esclavo.

Mas Informacion

Kico Bijbel Ta Siña Realmente?

Dios Su Regalo di Mas Grandi—E Rescate

Kico ta e rescate? Con abo por beneficia di dje?