Sigui pa e contenido

Sigui pa e di dos menu

Testigonan di Jehova

Papiamento (Aruba)

Cifra of Number Tin Nificacion den Bijbel?

Cifra of Number Tin Nificacion den Bijbel?

E contesta cu Bijbel ta duna

Cifra of number den Bijbel hopi biaha por ta literal, pero tin biaha e por ta simbolico. Generalmente e contexto ta indica cu un cierto cifra tin nificacion simbolico. Laga nos wak algun ehempel di nificacion simbolico di algun cifra of number den Bijbel:

  • 1 Union. Por ehempel, Hesus a resa pidi Dios lo siguiente: “Pa nan tur [esta, su discipelnan] por ta un, mescos cu abo, Tata, ta den union cu mi y ami ta den union cu bo.”—Juan 17:21; Mateo 19:6.

  • 2 Den un caso legal dos testigo ta confirma si un asunto ta berdad of no. (Deuteronomio 17:6) Asina tambe, ripiticion di un vision of declaracion ta confirma cu e asunto ta sigur y berdad. Por ehempel, ora Jozef a interpreta un soño cu Farao di Egipto a haya, el a bisa: “Ku su Mahestat a soña dos bia meskos, ta pasobra Dios ta disididu i pasobra E ta bay realisá su plan pronto.” (Genesis 41:32, Beibel na papiamentu koriente) Ora ta trata di profecia, “dos cacho” por representa un gobernacion dobel, manera e profecia cu profeta Daniel a haya relaciona cu e Imperio di Medo-Persia.—Daniel 8:20, 21; Revelacion 13:11.

  • 3 Mescos cu tres testigo por duna prueba firme cu un asunto ta berdad of no, asina tambe ora ta ripiti un cos tres biaha, bo ta enfatic’e of establec’e firmemente.—Ezekiel 21:27; Echonan 10:9-16; Revelacion 4:8; 8:13.

  • 4 Esaki por representa e totalidad of cuadro completo di algo, manera por ehempel e expresion “e cuater skinanan di Tera.”—Revelacion 7:1; 21:16; Isaias 11:12.

  • 6 E echo cu e cifra seis ta menos cu shete—cu hopi biaha ta representa loke ta completo—e cifra aki por nifica algo incompleto, imperfecto of algo cu tin di haber cu enemigonan di Dios.—1 Cronicanan 20:6; Daniel 3:1; Revelacion 13:18.

  • 7 Hopi biaha e number aki ta nifica loke ta completo. Por ehempel, Dios a manda e Israelitanan marcha rond di e stad Jerico shete dia tras di otro y riba e di shete dia nan mester a marcha shete biaha. (Josue 6:15) Bijbel tin hopi ehempel similar di uzo di e number shete. (Levitico 4:6; 25:8; 26:18; Salmo 119:164; Revelacion 1:20; 13:1; 17:10) Ora Hesus a bisa Pedro cu e mester pordona su ruman “no te cu shete biaha, sino te cu 77 biaha”, e ripiticion di e number “shete” a indica cu e mester por pordona hende sin limite.—Mateo 18:21, 22.

  • 10 E cifra aki por nifica totalidad of loke ta completo.—Exodo 34:28; Lucas 19:13; Revelacion 2:10.

  • 12 E number aki ta representa un areglo divino y completo. Por ehempel, e vision cu apostel Juan a haya di cielo a encera un stad cu “12 piedra di fundeshi, y riba nan tabatin e 12 nombernan di e 12 apostelnan.” (Revelacion 21:14; Genesis 49:28) Pues, ora Bijbel ta ripiti e cifra 12 hopi biaha, e ta transmiti e idea di algo divino y completo.—Revelacion 4:4; 7:4-8.

  • 40 Varios periodo di huicio of castigo tabata liga cu e cifra 40.—Genesis 7:4; Ezekiel 29:11, 12.

Nificacion di number of cifra

E nificacion simbolico di numbernan menciona den Bijbel, segun e splicacion anterior, no tin nada di haber cu buscamento di nificacion tras di number, nan combinacion of totalidad den practicanan spiritista. Por ehempel, hudiu di e secta cabala ta analisa e Scritura Hebreo uzando un tecnica den cua nan ta purba descubri codigonan secreto. Dios ta condena e tipo di practicanan aki.—Deuteronomio 18:10-12.