Sigui pa e contenido

Sigui pa e di dos menu

Testigonan di Jehova

Papiamento (Aruba)

Kico Bijbel Ta Bisa Tocante Tattoo?

Kico Bijbel Ta Bisa Tocante Tattoo?

E contesta cu Bijbel ta duna

E unico caminda cu Bijbel ta papia di tattoo ta na Levitico 19:28. Eynan e ta bisa: “No ... tatua ningun marca na boso curpa.” (Beibel Santu) Dios a duna e nacion di Israel e mandamento aki pa asina separa nan for di e nacionnan rond di nan cu tabata pone tattoo di nomber of simbolo di nan diosnan riba nan curpa. (Deuteronomio 14:2) Aunke cristiannan no ta bou di e Ley cu Dios a duna e pueblo di Israel, e principio tras di e ley aki merece nos atencion.

Un cristian por pone tattoo na su curpa?

E siguiente textonan di Bijbel por yuda bo rasona riba e asunto aki:

  • Hende muher mester “dorna nan mes cu ... modestia.” (1 Timoteo 2:9, Testament Nobo di Nos Senjor Hesu-Cristo) E principio ey ta aplica tanto na hende muher como hende homber. Un cristian no mester hala mucho atencion na su mes ni laga otro hende sinti nan incomodo pa motibo di su apariencia.

  • Algun hende kier pone tattoo pa laga sa ki tipo di hende nan ta, mientras cu otronan ta haci esey pa mustra cu ta nan ta manda riba nan curpa. Sinembargo, Bijbel ta anima cristiannan: “Presenta boso curpa como un sacrificio bibo, santo, agradabel pa Dios, esta, un sirbishi sagrado cu boso ta rindi cu boso capacidad di pensa.” (Romanonan 12:1) Uza bo “capacidad di pensa” pa bo sa dicon bo kier pone tattoo. Si e motibo ta pa bo bay tras di moda of pa mustra cu bo ta pertenece na cierto grupo, corda cu bo por cambia di idea despues, pero un tattoo si ta permanente. Ora bo analisa bo motibonan, lo bo por tuma un decision sabi.—Proverbionan 4:7.

  • “E plannan di hende balente siguramente ta conduci na abundancia, ma tur esnan cu tin pura, siguramente ta resulta den pobreza.” (Proverbionan 21:5, Beibel Santu) Hopi biaha hende no ta pensa prome cu nan pone un tattoo, pero e decision ey por tin consecuencia di largo alcance riba nan relacion cu otro hende y nan trabou. Ademas, un tattoo por ta costoso y doloroso pa kita. Investigacionnan haci y tambe e negoshi lucrativo di kita tattoo ta duna prueba cu mayoria di hende cu a pone tattoo a bin lamenta esey despues.

 

Mas Informacion

PREGUNTA CU BIJBEL TA CONTESTA

Kico Ta e Boluntad di Dios pa Mi?

Bo tin cu haya un señal of yamada special pa sa kico Dios ta spera di bo? Haya sa e contesta cu Bijbel ta duna.