Sigui pa e contenido

Sigui pa e di dos menu

Testigonan di Jehova

Papiamento (Aruba)

Dios Realmente Ta Existi?

Dios Realmente Ta Existi?

E contesta cu Bijbel ta duna

Si, Bijbel ta duna prueba palpabel cu Dios ta existi. E ta anima nos pa cultiva fe den Dios, no pa kere ciegamente den creencianan religioso, sino, mas bien, pa uza nos “capacidad di pensa” y “capacidad mental.” (Romanonan 12:1; 1 Juan 5:20, nota) Laga nos analisa e siguiente pruebanan cu ta basa riba Bijbel:

  • E echo cu den universo tin bida y cu e ta asina bon organisa ta demostra cu tin un Creador. Bijbel ta bisa: “Naturalmente, ta hende a traha tur cas, ma esun cu a traha tur cos ta Dios.” (Hebreonan 3:4) Maske e rasonamento aki ta simpel, hopi hende bon studia ta hay’e convencente. *

  • Hende tin e deseo natural di busca un proposito den bida, un tipo di hamber cu si nos no satisfac’e ta laga nos sinti un bashi. E hamber aki ta loke Bijbel ta yama nos “necesidad spiritual”, cu ta inclui e deseo di conoce y adora Dios. (Mateo 5:3; Revelacion 4:11) E necesidad spiritual aki ta demostra cu tin un Dios di amor cu a crea nos y cu kier pa nos satisface e necesidad ey.—Mateo 4:4.

  • Den Bijbel tin profecia cu a ser skirbi siglonan prome y cu a cumpli te den e minimo detaye. E echo cu e profecianan aki tabata asina exacto ta demostra cu nan no a origina for di hende, sino di un forsa sobrehumano.—2 Pedro 1:21.

  • Escritornan di Bijbel tabatin conocemento cientifico cu tabata hopi mas avansa compara cu esun di hende di e tempo ey. Por ehempel, den pasado hopi hende tabata kere cu un olifanti, porco of toro tabata carga Tera. Na contraste, Bijbel ta bisa cu Dios “ta colga Tera riba nada.” (Job 26:7) Ademas, ora Bijbel ta describi e forma di Tera, e ta uza e palabra “circulo”, of “globo”, pa yuda nos compronde cu Tera ta rondo. (Isaias 40:22; Beibel Santu) Hopi hende ta pensa cu e splicacion mas logico ta cu e escritornan di Bijbel a haya e informacionnan ey for di Dios.

  • Bijbel ta contesta hopi pregunta dificil. Ora hende no haya contesta riba e tipo di preguntanan aki, nan por pensa cu Dios no ta existi. Por ehempel: Si Dios ta amor y todopoderoso, dicon tin tanto sufrimento y maldad na mundo? Dicon religion ta causa asina tanto problema?—Tito 1:16.

^ par. 4 Por ehempel, e astronomo Allan Sandage a bisa di universo: “Mi ta haya cu ta sumamente improbabel cu un structura asina harmonioso a origina di caos. Mester tin un fuente principal di ordo y organisacion. Pa mi, Dios ta un misterio, pero e ta e splicacion di e milager di existencia, dicon cosnan ta existi.”