Sigui pa e contenido

Sigui pa e di dos menu

Testigonan di Jehova

Papiamento (Aruba)

LOKE HOBENNAN SA PUNTRA

Kico Por Yuda Mi Trata cu Golpi di Bida?

Kico Por Yuda Mi Trata cu Golpi di Bida?

Cos malo por pasa cu tur hende, hasta cu hobennan. Bijbel ta bisa: “No ta semper esun cu ta core mas lihe ta gana e careda; no ta semper e ehercito mas poderoso ta gana e bataya ... Nan tur tin nan tempo bon y tempo malo.” (Eclesiastes 9:11, La Palabra de Dios para Todos) Con abo por deal cu golpi di bida? Wak dos ehempel.

 REBEKAH

Mi mayornan a divorcia ora mi tabatin 14 aña.

M’a purba di convence mi mes cu no ta berdad cu mi mayornan ta bay divorcia y cu mi tata djis tabatin mester di poco tempo pa su mes. E tabata stima mi mama; pakico lo e bay lag’e? Pakico lo e bay laga ami?

Tabata dificil pa mi papia cu un hende tocante loke tabata pasando. Mi no kier a ni pensa riba esey. Mi tabata rabia, aunke cu e tempo ey mi no a realisa esey. Mi tabatin hopi stress, y mi tabata drumi malo.

Ora mi tabatin 19 aña, mi mama a muri di cancer. E tabata mi mihor amiga.

E divorcio di mi mayornan ya a dal mi hopi duro; pero ora mi mama a muri, esey tabata mas duro ainda. Mi no a pasa over di su morto. Awor mi tin mas problema cu drumimento, y ainda mi tin hopi stress.

Pero mi a haya tambe algun cos cu a yuda mi. Por ehempel, Proverbionan 18:1 ta spierta nos pa no isola nos mes. Pues mi ta purba di sigui e conseho aki.

Como un testigo di Jehova, mi ta purba di lesa nos publicacionnan basa riba Bijbel, y esey ta anima mi. Un di e bukinan cu a yuda mi ora cu mi mayornan a divorcia tabata Questions Young People Ask—Answers That Work. Te awe mi ta corda e capitulo den Volumen 2 cu tin e tema “Mi Por Ta Feliz Bibando cu un di Mi Mayornan So?”

Un di mi textonan faborito pa trata cu stress ta Mateo 6:25 pa 34. Na versiculo 27, Hesus a puntra: “Cua di boso, ni maske cuanto e ansha, por rek su bida un crenchi?”

Tur hende ta pasa den cos malo, pero m’a siña di mi mama su ehempel cu ta e manera cu nos ta deal cu nan ta conta. El a pasa den hopi cos: divorcio y despues un maleza mortal. Ma a pesar di tur esey, el a keda cu un actitud positivo y a mantene su fe den Dios te na final. Nunca lo mi lubida tur loke cu el a siña mi tocante Jehova.

Algo pa pensa ariba: Con lesamento di Bijbel y di publicacionnan basa riba Bijbel por yuda bo trata cu golpi di bida?—Salmo 94:19.

 CORDELL

Ora mi tabatin 17 aña, m’a mira mi tata hala su ultimo rosea. E morto di mi tata tabata e cos di mas pio cu a yega di pasa den mi bida. Mi a keda hopi kibra.

Mi no por a kere cu mi tata a muri. Tabata comosifuera no t’e tabata bou di e laken cu nan a tap’e cu ne. M’a pensa den mi mes: Mañan lo e lanta. M’a sinti un bashi; m’a sinti mi perdi.

Ami cu mi famia ta testigo di Jehova, y nos congregacion tabata un gran sosten ora cu mi tata a fayece. Nan a duna nos di come, nan a compaña nos y nan a keda mustra interes. Y esey no tabata na cuminsamento so, sino pa basta tempo. Pa mi, esaki tabata un prueba cu testigonan di Jehova ta e cristiannan berdadero.—Juan 13:35.

Un texto cu a anima mi hopi ta 2 Corintionan 4:17 y 18. E ta bisa: “Aunke e tribulacion cu nos ta confronta ta leve y pa un tempo cortico, e ta resulta pa nos den un gloria cu ta bira mas y mas grandi y ta eterno; mientras cu nos ta fiha nos bista, no riba e cosnan cu hende ta mira, sino riba e cosnan cu hende no ta mira. Pasobra e cosnan cu hende ta mira ta temporal, ma e cosnan cu hende no ta mira ta eterno.”

E ultimo versiculo ey a duna mi hopi forsa. Mi tata su sufrimento tabata temporal, pero loke Dios a priminti pa futuro ta eterno. E morto di mi tata a pone mi pensa riba e manera cu mi tabata hiba mi bida y a yuda mi ahusta mi metanan.

Algo pa pensa ariba: Con un tragedia personal por yuda bo reevalua bo metanan den bida?—1 Juan 2:17.