Sigui pa e contenido

Sigui pa e di dos menu

Testigonan di Jehova

Papiamento (Aruba)

LOKE HOBENNAN SA PUNTRA

Con Mi Por Stop di Worry cu Tur Cos?

Con Mi Por Stop di Worry cu Tur Cos?

 Kico ta haci bo nervioso?

Abo sa sinti loke e hobennan menciona akibou a bisa?

“Constantemente mi ta pensa: Kico si ...? Kico si nos haya un accidente di auto? Kico si nos avion cay? Mi ta preocupa tocante cosnan cu normalmente otro hende lo no preocupa asina tanto cu ne.”—Charles.

“Mi ta preocupa pa tur cos. Mi ta sinti comosifuera mi ta core, core y core sin bay niun caminda. Mi ta traha mata curpa, pero mi no ta logra nada!”—Anna.

“Ora hende bisa mi cu mi ta bendiciona paso ainda mi ta bay scol, mi ta pensa: Nan no tin ni e minimo idea cuanto stress scol ta duna mi!”—Daniel.

“Mi ta sinti mi hopi presiona. Semper mi ta preocupa tocante loke lo por sosode of loke mi mester haci.”—Laura.

Realidad: Bijbel ta yama e tempo cu nos ta biba aden “temponan critico, dificil pa trata cu ne.” (2 Timoteo 3:1) Pesey, tanto adulto como hoben ta haya stress y ta preocupa.

 Semper ta malo pa preocupa?

E contesta ta no. Eigenlijk, Bijbel ta bisa cu ta bon pa nos preocupa pa esnan cu nos ta stima pa asina nos por agrada nan.—1 Corintionan 7:32-34.

Y laga nos ta franco, ora nos ta preocupa, esey por motiva nos pa actua. Por ehempel, supone cu bo tin un proefwerk otro siman. Si bo ta preocupa pa haya un bon punt, esey lo pone bo sinti bo obliga di cuminsa leer e siman aki mes!

Un cierto grado di preocupacion por yuda bo mira peliger tambe. Un teenager cu yama Serena a bisa cu “kisas bo ta sinti bo preocupa pasobra bo sa cu bo ta actuando robes y cu bo tin cu haci cambio pa asina bo consenshi por ta trankil.—Compara cu Santiago 5:14.

Realidad: Preocupacion por ta bon, basta e yuda bo tuma bon decision.

Pero, kico bo por haci si bo pensamentonan negativo ta pone bo sinti manera cos bo ta cera den un laberinto, of maze?

Preocupacion por pone bo sinti comosifuera bo ta cera den un laberinto, of maze, pero un hende cu ta wak cos for di un punto di bista diferente lo por yuda bo haya un salida

Ehempel: Richard di 19 aña a bisa: “Ora mi tin un problema, mi ta cuminsa pensa riba tur e posibel consecuencianan. Mi ta keda pensa riba esey te cu mi ta bira masha nervioso mes.”

Bijbel ta bisa cu “un curason trankil ta bida pa e curpa.” (Proverbionan 14:30) Di otro banda, preocupacion por causa un cantidad di sintoma desagradabel manera dolor di cabes, biramento di cabes y di stoma, y batimento di curason.

Kico bo por haci si bo ta preocupa mucho hopi y esey no ta yudando bo?

 Loke bo por haci

  • Puntra bo mes si bo tin bon motibo pa preocupa. “Ta bon pa bo preocupa cu bo responsabilidadnan pero no ta bon pa preocupa di mas. Preocupacion ta tene bo mente bezig, pero e no ta yuda bo cu nada. E ta manera un cacho cu ta keda core tras di su mes rabo.”—Katherine.

    Bijbel ta bisa: “Cua di boso, ni maske cuanto e ansha, por rek su bida un crenchi?”—Mateo 6:27.

    Esey ta nifica: Si preocupacion no yuda bo haya un solucion, tur loke e lo haci ta duna bo mas problema—of e por bira bo problema.

  • No preocupa cu e problemanan di mañan. “Pensa un rato. E cos cu bo ta preocupa cu ne lo ta importante mañan? Otro luna, otro aña of aki cinco aña?”—Anthony.

    Bijbel ta bisa: “No sea nunca ansha pa e dia di mañan, pasobra e dia di mañan lo tin su mes inkietudnan. Cada dia tin su mes problemanan.”—Mateo 6:34.

    Esey ta nifica: No tin masha sentido pa preocupa cu e problemanan di mañan. Algun di e problemanan ey nunca lo sosode.

  • Siña biba cu situacionnan cu bo no por cambia. “E mihor cos cu bo por haci ta prepara pa cierto situacionnan te caminda por. Pero bo tin cu acepta cu no ta tur cos ta den bo man.”—Robert.

    Bijbel ta bisa: “No ta esnan mas lihe semper ta gana e careda, ... ni no ta semper esnan cu tin conocemento tin exito, pasobra tempo y suceso imprevisto ta alcansa nan tur.”—Eclesiastes 9:11, NW.

    Esey ta nifica: Tin biaha bo no por cambia bo circunstancianan, pero bo por cambia bo punto di bista si.

  • Sea realistico. “Mi tin cu focus riba henter e situacion y no haya stress pa motibo di detaye. Mi tin cu dicidi kico ta mas importante y uza mi energia pa e cosnan ey.”—Alexis.

    Bijbel ta bisa: “Haci sigur kico ta e cosnan mas importante.”—Filipensenan 1:10.

    Esey ta nifica: Hende cu ta mira problema na un manera realistico tin menos chens di bira demasiado preocupa.

  • Papia cu un hende. “Tempo mi tabatin mas o menos 11 aña, mi tabata yega fo’i scol hopi nervioso, yen di miedo pa loke e dia di mañan lo trece cu ne. Mi mama cu mi tata tabata djis scucha ora mi tabata desahoga mi mes. Mi tabata contento cu mi tin nan. Mi por a confia nan y papia tur cos cu nan. Esey a yuda mi enfrenta e siguiente dia.”—Marilyn.

    Bijbel ta bisa: “Ansha den curason di hende ta hacie abati, ma un bon palabra ta hacie contento.”—Proverbionan 12:25.

    Esey ta nifica: Un mayor of un amigo lo por duna bo sugerencia pa yuda bo preocupa menos.

  • Haci oracion. “Oracion, na bos halto pa mi por tende mi mes papia, ta yuda mi. E ta yuda mi bisa loke tin mi nervioso en bes di keda cana rond cu ne den mi cabes. E ta yuda mi mira tambe cu Jehova ta mas grandi cu mi preocupacion.”—Laura.

    Bijbel ta bisa: “Tira tur boso inkietud riba [Dios], pasobra e ta interesa den boso.”—1 Pedro 5:7.

    Esey ta nifica: Oracion no ta un metodo pa resolve problema riba bo mes. Ora bo haci oracion, bo ta comunica cu Jehova Dios, kende ta priminti: “No desmaya, pasobra mi ta bo Dios. Lo mi fortalece bo, si, lo mi yuda bo.”—Isaias 41:10.