Keta ifingi

Keta menu iyingi

Abaketi ba Yehova

Kyangonde

Ngimba Mohesi Aliko Naloli?

Ngimba Mohesi Aliko Naloli?

Isi Ibaibolo likuyoba

Ena Mohesi aliko naloli. Yo “ndaghili wa kisu iki,” uwandumi uyu alinsambukile Kyala nukwanda ukubomba imbibi. (Yohani 14:30; Baefesi 6:11, 12) Ibaibolo likuyoba utuyilo twa Mohesi ukwendela mu ngamu isi:

  • Setano, ili likusanusya “Ukususya.”—Yobu 1:6.

  • Mohesi, ili likusanusya “Uluheho.”—Ubusetuli 12:9.

  • Njoka, ukusanusya ukuti “Nsyobi.”—2 Bakorinti 11:3.

  • Ungeli.—Matai 4:3.

  • Ntungulu.—Yohani 8:44.

Ghakaya masyu itolo pamo kayilo kabibi

Bamo bikwinong’ona ukuti Setano masyu itolo pamo kayilo akabibi aka kali nkati myitu. Loli mu Baibolo mukwaghiwa inkhani isi Kyala nu Setano bayobesaniagha. Kyala ngolofu, po akabaghile ukuti ayobagha ku minong’ono amabibi agha ghali nkati myake. (Ukukumbusya Indaghilo 32:4; Jobu 2:1-6) Kangi akabalilo kamo Setano alingelile Yesu uyu akali nubutulanongwa myake. (Matai 4:8-10; 1 Yohani 3:5) Inkhani syosa sya mu Baibolo isi sikunangisya ukuti Setano aliko, ghakaya minong’ono amabibi agha tukuya nagho.

Ngimba syakuswighisya ukuti abandu bingi batikusubila ukuti Setano aliko? Hayi, panongwa yakuti Baibolo likuyoba ukuti Setano ikubombela ubutungulu ukuti afwanisye ubwighane bwake. (2 Batesalonike 2:9, 10) Ubutungulu bumo ubu ikubombela ko kubasyoba abandu ukuti umwene akayako.—2 Bakorinti 4:4.

Ubutungulu bumo pa nkhani ya Mohesi

Akapango: Lusifala yo ngamu yimo ya Mohesi.

Bwanaloli: Amasyu gha Chihiburi agha mu Baibolo ghasanusiwe ukuti “Lusifala” ghikusanusya ukuti “lutondwa lwa nubunju (ukubala).” (Yesaya 14:12) Inkhani ya pilemba ili yikunangisya ukuti ingamu iyi yabombeliwe pakuyoba sya kisu ikimoghi kya Babeloni, iki Kyala atile ikuya pakukikosya isoni panongwa yakwibona kwake. (Yesaya 14:4, 13-20) Amasyu ghakuti “(ukubala bo) lutondwa lwa nubunju” ghabombeliwe pakuseka ba Babuloni bo ubumoghi bwake bumalike.

Akapango: Setano ikutumiwa na Kyala ukuti ‘agheleghe abandu.’

Bwanaloli: Mohesi n’ndughu wa Kyala, akaya mbombi wake. Setano Mohesi ikunyoza nukususya ababombi ba Kyala.​—1 Peteri 5:8; Ubusetuli 12:10.