Keta ifingi

Keta menu iyingi

Keta ifi filipo

Abaketi ba Yehova

Kyangonde

Ngimba IBaibolo Likutumanyisya Isyafiki?

 Mutu 19

Mukindilile Ukuya Pabumanyani na Yehova

Mukindilile Ukuya Pabumanyani na Yehova

1, 2. Ngimba amasiku agha tubaghile ukubwagha kughu ubutuli?

MUFWANIKISYE ukuti mukwenda ubulendo loli kuli umbelo uwamaka fiyo. Kumwanya amabingu ghighele, ifula yamaka yikwanda ukutima. Mukwanda ukulonda amalo aghakuti mwifisemo. Indumbula yinu yikuya m’malo linga mughaghile amalo amanunu aghakuti mwifisemo.

2 Amasiku agha tukwaghana nindamyo isi sifwene itolo ni fula yamaka. Ifindu nkisu fikukindilila ukonangika. Yo nongwa mubaghile ukwilalusya ukuti, ‘Ngimba ubutuli mbaghile ukubwagha kughu?’ Yumo uyu alembile Salimo atile, ‘Yo uwe buponelo bwangu nukuti yo uwe ilinga lyangu, Kyala wangu uyu nunsubile.’ (Salimo 91:2) Yehova abaghile ukututula ku ndamyo syitu syosa isi tukwaghana nasyo m’masiku agha. Umwene ikutupa ulusubilo lwa findu ifinunu ifi fikwisa mu nkyeni.

3. Ngimba tubaghile ukubomba bulebule ukuti Yehova atufighilileghe?

3 Ngimba Yehova abaghile ukutufighilila bulebule? Umwene abaghile ukututula ukuti tumalane nindamyo isi tukwaghana nasyo. Yehova wamaka fiyo ukukinda aliwesa uyu abaghile ukonanga ubumi bwitu. Indamyo isi tubaghile ukwaghana nasyo lino, tukuya nulusubilo ukuti Yehova ikwisa pakusosyapo syosa mu nkyeni. IBaibolo likutukasya ukuti: ‘Tuyeghe ndughano lwa Kyala.’ (Yuda 21) Linga tukulonda ukuti Yehova atutuleghe linga twaghene nindamyo tukulondiwa ukukindilila ukuya nawe pabumanyani. Ngimba tubaghile ukubomba bulebule?

TUNDAGHISYEGHE YEHOVA PA ISI IKUTUBOMBELA

4, 5. Ngimba Yehova ikunangisya bulebule ukuti atughanile?

4 Ukuti tuye pabumanyani na Yehova, tukulondiwa  ukumanya isi umwene abombile ukunangisya ukuti atughanile fiyo. Ghela ukwinong’onela syosa isi Yehova atubombile twebandu. Atupele ikisu ikinunu iki kili ni fyakumela fingi pampene ni finyamana ifyakukindanakindana. Atupele ifyakulya ifinunu fiyo ukuti fyo tulyeghe na misi amanunu aghakunwa. Yehova atumanyisye ingamu yake m’Baibolo nutuyilo twake utununu. Loli ukukinda fyosa, umwene atunangisye ulughano ulukulumba pakuntuma umwanake, Yesu, ukuti ise atufwile uswe. (Yohani 3:16) Panongwa ya ikemo lya Yesu, uswe tukulindilila ifinunu mu nkyeni.

5 Yehova imike Ubunyafyale pamo ukuti iboma kumwanya, kangi Mesiya yo isa kulaghilagha. Ubunyafyale ubu bulipipi ukuti busosyepo indamyo syosa. Ubunyafyale ubu bukwisa pakupangisya ikisu kyosa ukuya Paladaiso, muno mukwisa kuya ulutengano nulusekelo akabalilo kosa. (Salimo 37:29) Injila iyingi iyi Yehova anangisyile ulughano lwake kumyitu yakuti atumanyisye muno uswe tubaghile ukuyila nubumi ubununu m’masiku agha. Ikutubula kangi ukuti twiputeghe kumyake, umwene ikupilika inyiputo syitu akabalilo kosa. Yehova ikunangisya naloli ukuti anganile umundu aliwesa pamwene.

6. Pakuti lino tumenye isi Yehova atubombile, ngimba tukulondiwa ukubomba isyafiki?

6 Pakuti lino tumenye muno Yehova atughanile, ngimba uswe tukulondiwa ukubomba isyafiki? Mundaghisyeghe panongwa ya syosa isi ikubabombela. Syakitima fiyo ukuti abandu bingi amasiku agha batikundaghisya Yehova. Momuno syayilile apa Yesu ali pa kisu. Pakabalilo kamo Yesu abumbulwisye abandu 10 aba bali nububine bwa bukoma, loli yumoywene yo ayobile ukuti ndagha Yesu. (Luka 17:12-17) Nanuswe tukulondiwa ukufwana nu mundu uyu ayobile ukuti ndagha Yesu. Akabalilo kosa tukulondiwa ukundaghisya Yehova.

7. Ngimba tunganeghe Yehova ukufika poki?

7 Nuswe tukulondiwa kangi ukuti tunangisyeghe ulughano lwitu kwa Yehova. Yesu abamanyisye abafundiwa bake ukuti banganeghe Yehova ni ndumbula yabo yosa, nu moyo wabo  ghosa, namahala ghabo ghosa. (Belenga Matai 22:37.) Ngimba amasyu agha ghikusanusya isyafiki?

8, 9. Ngimba tubaghile ukunangisya bulebule ukuti tunganile Yehova?

8 Ngimba ukuyoba ukuti tunganile Yehova pakwene kufwene? Hayi. Linga tunganile Yehova ni ndumbula yitu, nu moyo witu, na mahala ghitu ghosa tubaghile ukunangisya ulughano lwitu kumyake mu mbombo syitu. (Matai 7:16-20) IBaibolo likutumanyisya ukuti linga tunganile Kyala kukuya kupepe ukupilikila indaghilo syake. Ngimba ukupilikila indaghilo isya Yehova kukafu? Hayi, panongwa yakuti ‘indaghilo syake sikaya sito.’—Belenga 1 Yohani 5:3.

9 Linga tukumpilikila Yehova, tukuya nubumi ubununu kangi tukuhoboka. (Yesaya 48:17, 18) Ngimba findu fiki ifi fibaghile ukututula ukuti tuseghelele kwa Yehova? Isagha tukete.

MUKINDILILE UKUYA PABUMANYANI NA YEHOVA

10. Nongwa yafiki mukulondiwa ukukindilila ukumanyila isya Yehova?

10 Ngimba fiki fibatulile ukuti muye pabumanyani na Yehova? Ukumanyila iBaibolo kubatulile ukuti mum’manye kanunu Yehova nukuya nawe pabumanyani. Ubumanyani bwinu na Yehova bufwene nu moto ughu mukulonda ukuti ghukindilile ukwaka. Ukuti umoto ghukindilile ukwaka ghukulondiwa ukongelesyangapo imbabu, numwe mukulondiwa ukukindilila ukumanyila isya Yehova ukuti ubumanyani bwinu bukindilile ukuya bwamaka.—Isya Mbupingamu 2:1-5.

Ukuti umoto ghukindilile ukwaka ghukulondiwa imbabu, nanuswe ukuti tukindilile ukungana Yehova tukulondiwa ukukindilila ukumanyila

11. Ngimba iBaibolo likuya pakubatula bulebule linga mukukindilila ukumanyila?

11 Linga mukukindilila ukumanyila iBaibolo, mukuya pakumanyila ifindu fingi ifi fikuya pakubafika pa ndumbula. Keta muno abafundiwa balipilikile bo Yesu ikubalingania ubusololi bwa m’Baibolo. Abene batile: ‘Bule kali indumbula syitu sikapyagha m’myitu, bo ikuyoba nanuswe mu njila nukulingania isya m’masimbo?’—Luka 24:32.

12, 13. (a) Ngimba findu fiki ifi fibaghile ukubombiwa nu lughano lwitu kwa Kyala? Lingania (b) Ngimba tubaghile ukubomba isyafiki ukuti ulughano lwitu kwa Kyala lukindilile?

 12 Ukufwana namuno abafundiwa ba Yesu balipilikile bo bapilikisye kanunu amalemba, lumo momuno numwe mwalipilikile bo mwandile ukulipilikisya kanunu iBaibolo. Isi syabatulile ukuti mum’manye Yehova nukumughana. Nukuti lino mutikulonda ukuti ulughano lwinu kwa Yehova lutalale.—Matai 24:12.

13 Linga muli pabumanyani na Yehova, mukulondiwa ukwiyipa nindumbula yinu yosa ukuti ubumanyani bwinu bukindilile ukuya bwamaka. Mukulondiwa ukukindilila ukumanyila isya Yehova na Yesu nukwinong’onelapo syosa isi mukumanyila namuno mubaghile ukusikongela pa bumi bwinu. (Yohani 17:3) Linga mukumanyila iBaibolo, mwilalusyeghe ukuti: ‘Ngimba ngumanyilapo isyafiki isya Yehova? Nongwa yafiki ngulondiwa ukungana Yehova ni ndumbula yangu yosa nu moyo wangu ghosa?’—1 Timoti 4:15.

14. Ngimba ulwiputo lubaghile ukutula bulebule ukuti ubumanyani bwitu na Yehova buye bwa maka?

 14 Linga muli num’manyani winu, mukuyobesania nawe pipipipi, yo nongwa ubumanyani bwinu bukukindilila ukuya bwamaka. Momuno siyilile nubumanyani bwitu na Yehova, linga tukuyoba nawe mu lwiputo pipipipi, ulughano lwitu kumyake lukuya lwamaka. (Belenga 1 Batesalonike 5:17.) Ulwiputo Kyabupe kyapamwanya iki Kyala atupele. Akabalilo kosa tuyobeghe nawe mu lwiputo ukufumila pasi pa ndumbula. (Salimo 62:8) Tungandisaniagha inyiputo syitu, loli tuyobeghe nawe isi tuli nasyo mu ndumbula. Linga tukukindilila ukumanyila iBaibolo nukwiputa ukufumila mu ndumbula, ulughano lwitu kwa Yehova lukuya pakukindilila ukuya lwamaka.

MUBABULEGHE ABANGI ISYA YEHOVA

15, 16. Ngimba umwe mukuyiketa bulebule imbombo yakufumusya?

15 Linga tukulonda ukukindilila ukuya pabupipi na Yehova, tukulondiwa kangi ukubabulako abangi isya lusubilo ulu tuli nalo. Ukubabulako abangi isya Yehova lo lusako lunywamu. (Luka 1:74) Iyi yo mbombo iyi Yesu abapele abaKristu bosa aba bwanaloli. Aliwesa ikulondiwa ukuti afumusyeghe amasyu amanunu agha Bunyafyale bwa Kyala. Ngimba mwandileko ukufumusya ku bangi?—Matai 24:14; 28:19, 20.

16 Untumiwa Pauli aketagha ukuti imbombo yakufumusya yali yakulondiwa fiyo kumyake. Umwene ayiketagha imbombo iyi ukuya ‘Kyuma.’ (2 Bakorinti 4:7) Ukufumusya ku bangi isya Yehova nisya bwighane bwake, yo mbombo yakulondiwa fiyo ukubomba ukukinda syosa. Ukufumusya yo njila iyi mukumbombela Yehova, kangi umwene ikuhoboka fiyo linga tukubomba imbombo iyi. (Bahiburi 6:10) Imbombo ya kufumusya yibaghile ukutula umwe na aba mukubafumusyila. Nongwa yakuti mwesa mukutuliwa ukuti muye pabumanyani na Yehova nukuti musakabe ubumi bwa bwila na bwila.  (Belenga 1 Bakorinti 15:58.) Ngimba yilipo imbombo iyi mubaghile ukuhoboka nayo fiyo ukukinda ukufumusya?

17. Nongwa yafiki imbombo yakufumusya yikulondiwa ukubombiwa mwambibimbibi?

17 Imbombo yakufumusya yikulondiwa ukubombiwa mwambibimbibi. Tukulondiwa ‘ukufumusya amasyu’ kangi tukulondiwa ‘ukufumusya mbibimbibi.’ (2 Timoti 4:2) Abandu bikulonda ukuti bapilike isya Bunyafyale bwa Kyala. IBaibolo likuyoba ukuti: ‘Isiku lya Kyala ilikulumba liseghelile, lilipipi fiyo, kangi likwendelela itolo!’ Kangi ‘sitisa kukabila mma’. (Zefaniya 1:14; Habakuku 2:3) Pasyele panandi ukuti Yehova onange ikisu ikibibi iki kikulongosiwa na Setano. Bo isi sikali ukubombiwa abandu bikulondiwa ukusokiwa tasi ukuti basale ukubomba ubwighane bwa Yehova pamo hayi.

18. Nongwa yafiki tukulondiwa ukuti twiputeghe kwa Kyala pampene na baKristu abinitu?

18 Yehova ikulonda ukuti tumwiputeghe pampene na baKristu abinitu aba bwanaloli. IBaibolo likuyoba ukuti: ‘twinong’onelaneghe twe babo batupu nukukasania, ukuti tunangisyeghe ulughano nukubomba imbombo inunu; tungalekagha ukwaghanila pampene bo mumo bamo balupelile lwiho itolo, loli tukumbusanieghe, sisisi syo sikindilileghe itolo bo mukwagha ilisiku liseghelile.’ (Bahiburi 10:24, 25) Tukulondiwa ukughelaghela ukuti twaghiwengepo pa ngomano syosa. Ingomano sikutupa ulusako lwakuti tukasanieghe na bakamu bitu.

19. Ngimba findu fiki fibaghile ukututula ukuti tukindilileghe ukubaghana abakamu bitu na balumbu?

19 Linga mukubuka ku ngomano mukuya pakubagha abamanyani abanunu aba babaghile ukubatula ukuti mukindilile ukumwiputa Yehova. Mukuya pakubagha abakamu na balumbu abakukindanakindana, aba bope bikughelaghela ukumwiputa Yehova. Ukufwana nanuwe bope bakaya bagholofu, kangi utubalilo tumo bikonanga. Linga bakonangile simo, ubahobokeleghe. (Belenga Bakolosi 3:13.) Akabalilo kosa  muketeghe inunu isi abakamu binu na balumbu bafwanisye ukubomba, isi sibaghile ukubatula ukuti mukindilileghe ukubaghana nukukindilila ukuya pabumanyani bwa maka na Yehova.

UBUMI BWANALOLI

20, 21. Ngimba ‘ubumi bwanaloli’ findu fiki?

20 Yehova ikulonda ukuti abamanyani bake bosa bikaleghe nu bumi ubununu. IBaibolo likutumanyisya ukuti ubumi nkisu ikipya bwisakuya bununu fiyo ukukinda m’masiku agha.

Yehova ikulonda fiyo ukuti twise tuhobokeghe nu “bumi bwanaloli.” Ngimba mukwisa pakubwagha?

21 Amasiku agha abandu bingi bikuya nubumi ifinja 70 lumo 80, loli mu nkyeni tukwisa kuya nu bumi ubusita kufwa. Tukwisa pakuhoboka nu ‘bumi bwa bwila na bwila’ nu mbili wa bugholofu, ulutengano, kangi nulusekelo mu paladaiso. Ubumi ubu bo iBaibolo likuyoba ukuti “Bumi bwanaloli.” Yehova afingile ukutupa ubumi bwanaloli ubu, loli tukulondiwa ‘ukubukolesya’ fiyo ukuti tusakabe.—1 Timoti 6:12, 19.

22. (a) Ngimba tubaghile ukubomba isyafiki ukuti ‘tubukolesye ubumi bwanaloli’? (b) Ngimba patwibene tubaghile ukubwagha ubumi bwa bwila na bwila? Lingania.

22 Ngimba tubaghile ukubomba bulebule ukuti ‘tubukolesye ubumi bwanaloli’? Tukulondiwa ‘ukubomba inunu’ kangi ukuya ‘bakabi mu mbombo inunu.’ (1 Timoti 6:18) Isi sikusanusya ukuti tukulondiwa ukukonga isi tukumanyila m’Baibolo. Tumenye kangi ukuti patwibene tukabaghila ukukaba ubumi bwanaloli. Loli kyo kyabupe iki Yehova abapele abandu bake panongwa ya ‘ipyana lyake.’ (Baroma 5:15) Yehova ikulonda fiyo ukubapa ababombi bake abasubiliwa ikyabupe iki.

23. Nongwa yafiki mukulondiwa ukusala kanunu lino?

23 Mwilalusye ukuti, ‘Ngimba ngumwiputa Kyala mu njila iyi ikwitikiskya? Linga muketile ukuti mukulondiwa ukuchenja fimo, muchenje mwanakalinga. Linga tukunsubila fiyo Yehova nukumpilikila, umwene ikuyagha malo ghitu ghakuponelamo. Yehova isakubafighilila abandu bake pakabalilo aka isakonanga ikisu kya Setano iki. Pabumalilo Yehova ikwisa  pakuketesya ukuti ubwighane bwake bufwanisiwe ukuti abandu bosa bali m’Paladaiso. Linga musalile kanunu lino, mukwisa kubwagha ubumi bwanaloli.