Keta ifingi

Keta menu iyingi

Keta ifi filipo

Abaketi ba Yehova

Kyangonde

Ngimba IBaibolo Likutumanyisya Isyafiki?

 Mutu 15

Injila ya Bwanaloli Yakumwiputila Kyala

Injila ya Bwanaloli Yakumwiputila Kyala

1. Ngimba yonani uyu abaghile ukutubula injila inunu iyakumwiputila Kyala?

IFIPANGA fingi fikuyoba ukuti fikumanyisya abandu ubwanaloli pakuyoba isya Kyala. Loli isi sikaya sya bwanaloli, panongwa yakuti abene bikumanyisya ifindu ifi fikaya fya bwanaloli pa fundo yakuti ngimba Kyala yonani kangi abandu bikulondiwa ukumwiputa bulebule? Ngimba tubaghile ukumanya bulebule injila ya bwanaloli yakumwiputila Kyala? Yehova mwene yo abaghile ukutubula muno tubaghile ukumwiputila.

2. Ngimba tubaghile ukumanya bulebule injila ya bwanaloli yakumwiputila Kyala?

2 Yehova atupele iBaibolo ukuti litutule ukuti tumanyile injila ya bwanaloli yakumwiputila. Mukulondiwa ukumanyila iBaibolo kangi Yehova ikuya pakubatula ukuti mupindule nifimanyilo ifi mukumanyila panongwa yakuti umwene ikubinong’onela fiyo.—Yesaya 48:17.

3. Ngimba Kyala ikulonda tubombeghe isyafiki?

3 Abandu bamo bikuyoba ukuti Kyala ikwitikisya ifipanga fyosa, loli ifi fileghene na ifi Yesu ayobile. Umwene atile: ‘Mungati aliwesa uyu ikuti, ‘We Ntwa, we Ntwa kumyangu,’ yo isakwingilagha mbunyafyale bwa kumwanya; loli uyu ikubomba ubwighane bwa Tata uyu ali kumwanya.’ Tukulondiwa fiyo ukumanyila isi Kyala ikulonda kangi tubombeghe ubwighane bwake. Ifundo iyi yakulondiwa fiyo panongwa yakuti Yesu ayobile ukuti abandu aba ‘batikupilikila indaghilo,’ bikuya ni nongwa kwa Kyala.—Matai 7:21-23.

4. Ngimba Yesu ayobile isyafiki ku aba bikubomba ubwighane bwa Kyala?

 4 Yesu atusokile ukuti linga tukulonda ukubomba ubwighane bwa Kyala, tukuya pakwaghana ni ndamyo nyingi. Atile: ‘Amwingileghe pa kipata ikifinye, buno kyelefu ikipata, nyelufu ninjila iyi yikulabila kubupyutiwa, bingi aba bikwenda papo. Kifinye nikipata, finye ninjila iyi yilabile kubumi, banandi abene aba bikuyagha.’ (Matai 7:13, 14) Ikipata ikifinye iki kikusanusya injila yanaloli yakumwiputila Kyala, yo yikutula abandu ukuti babwaghe ubumi bwa bwila na bwila. Ikipata ikyelufu kikusanusya injila iyi Kyala atikwitikisya ukuti abandu bamwiputileghe iyi yikulongosya ku bufwe. Loli Yehova atikulonda ukuti yumo asafwe. Yo nongwa ampele aliwesa ulusako lwa kumanyila iBaibolo.—2 Peteri 3:9.

INJILA YABWANALOLI YAKUMWIPUTILA KYALA

5. Ngimba mubaghile ukubamanya bulebule aba bikumwiputa Kyala munjila yabwanaloli?

5 Yesu ayobile ukuti tubaghile ukubamanya aba bikubomba ubwighane bwa Kyala. Tubaghile ukubamanya ukwendela mu isi bikusubila na isi bikubomba. Atile: ‘Mwisa kubamanyilagha museke syabo’. Alyongelile ukuti ‘Bunobuno ghosa umpiki unnunu ghukupa iseke inunu.’ (Matai 7:16, 17) Isi sitikusanusya ukuti aba bikumwiputa Kyala bagholofu. Loli ababombi ba Kyala akabalilo kosa bikughelaghela ukubomba inunu. Lino isagha tukete isi sibaghile ukututula ukumanya aba bikumwiputa Kyala munjila yabwanaloli.

6, 7. Ngimba ifimanyilo ifyabwanaloli fikufumagha kughu? Lingania. Ngimba tukumanyilapo isyafiki pa isi Yesu abombagha?

6 Ifi tukumanyila fikufuma m’Baibolo. IBaibolo likuti: ‘Buno ghosa amasimbo agha Mbepo wa Kyala aghatuyile, manunu ukumanyikisya, nukusitobosya imbibi, nukungolosya umundu, nukumfunda umundu amahala gha bugholofu, ukuti umundu wa Kyala ayeghe mpelelesye itolo,  uyu ilingenie ukubomba imbombo syosya inunu.’ (2 Timoti 3:16, 17) Untumiwa Pauli alembile ku baKristu ukuti: ‘Bo tubatwalile umwe ilisyu lya Kyala mwapilike nukwambilila. Mukalyambilile ukuti isyu lya bandu, loli mulinkulyambilila ukuti isyu lya Kyala, bo muno liyilile naloli; ili likubomba m’myinu mwe bitiki.’ (1 Batesalonike 2:13) Ukwiputa kwa naloli kukufuma m’masyu gha Kyala iBaibolo. Kutikwendela amahala gha bandu, inyiho pamo ifindu ifingi.

7 Fyosa ifi Yesu amanyisyagha fyali fya m’masyu gha Kyala. (Belenga Yohani 17:17.) Pa isi ayobagha, akolagha ifundo isya m’malemba. (Matai 4:4, 7, 10) Ababombi babwanaloli ba Kyala bikunkonga Yesu nukumanyisya ifi iBaibolo likuyoba.

8. Ngimba Yesu amanyisye ukuti fiki pa fundo ya kumwiputa Yehova?

8 Tumwiputeghe Yehova mwene. Pa Salimo 83:18 NWT pakuti: Yuyuwe, uwe ingamu yako yowe Yehova, uli Nkinde nkisu kyosa. Yesu alondagha ukuti abandu bam’manye kanunu Kyala wabwanaloli, yo nongwa abamanyisyagha abandu ingamu ya Kyala. (Belenga Yohani 17:6.) Yesu ayobile atile: ‘Umbungulukileghe Yehova Kyala wako, yo umbombeleghe yuyo mwene.’ (Matai 4:10 NWT) Pakuya babombi ba Kyala tukukonga isi Yesu abombagha. Tukumwiputa Yehova mwene, tukubombela ingamu yake kangi tukumanyisya abangi ingamu ya Kyala na isi isa kutubombela.

9, 10. Ngimba tukunangisya bulebule ulughano kwa aliwesa?

9 Tubaghaneghe abandu bosa. Yesu abamanyisye abafundiwa bake ukuti baghananeghe. (Belenga Yohani 13:35.) Fikaya nimbombo ukuti tufumile kughu, inyiho syitu, tuli balondo pamo bakabi. Ulughano lwitu kwa aliwesa luyeghe lwa bwanaloli ku bakamu na balumbu. (Bakolosi 3:14) Yo nongwa tutikubuka ku bwite kangi tutikughogha abandu. IBaibolo likuti: ‘Momuno bakindanile abana ba Kyala nabana ba mohesi. Wesa uyu linga atikubomba ubugholofu kangi atikungana uwamyabo, yo akaya mwana wa Kyala.’  Alyongelilepo atile, ‘tughananeghe; Tungayagha bo yu Kaini, uyu apapiwe mumbibi, popapo alinkungogha uwamyabo.’—1 Yohani 3:10-12; 4:20, 21.

10 Tukubombela akabalilo kitu, amaka ghitu ni findu fitu ukutula nukukasya abangi. (Bahiburi 10:24, 25) ‘Tukubabombela inunu abandu bosa.’—Bagalatiya 6:10.

11. Nongwa yafiki tukusubila ukuti Yesu yo njila yakubwaghila ubumi?

11 Tumpilikileghe Yesu panongwa yakuti umwene yo njila yakubuka kwa Kyala. IBaibolo likuti: ‘Bukayako ubupoki m’mundu uyungi, namanga yikayako ingamu iyingi kusi kumpalanga, iyi bapeghiwe abandu, muli iyi fikuti mo tubwaghile ubupoki.’ (Imbombo Sya Batumiwa 4:12) Mu mutu 5 m’buku ili, twamanyile ukuti Yesu atumiwe ukuti atabule abandu aba bikumpilikila ku butulanongwa. (Matai 20:28) Yehova asalile Yesu ukuti yo ise alaghile ikisu. Yo nongwa iBaibolo likutubula ukuti tukulondiwa ukumpilikila Yesu ukuti twise tubwaghe ubumi bwa bwila na bwila.—Belenga Yohani 3:36.

12. Nongwa yafiki tutikwingililapo pa ndyali?

12 Tungayagha pabumanyani ni ndyali. Yesu akalingililepo pa ndyali. Pakabalilo kamo apa agheliwagha, alimbulile undaghili wa Roma atile: “Ubunyafyale bwangu bukaya bwa nkisu iki.” (Belenga Yohani 18:36.) Ukufwana na Yesu, nanuswe tuli basubiliwa ku Bunyafyale bwa kumwanya, yo nongwa iyi kali tukwikala kughu, loli tutikwingililapo pa ifya ndyali. Loli iBaibolo likutubula ukuti twilambikeghe ku ‘balaghili aba bali pamwanya,’ agha gho maboma gha bandu. (Baroma 13:1) Tukupilikila indaghilo isya kisu kuno tukwikala. Loli pa fundo isi sikususania ni ndaghilo isya Kyala tukukonga abatumiwa aba bayobile batile: ‘umundu fikuti antileghe Kyala ukukinda abandu.’—Imbombo Sya Batumiwa 5:29; Marko 12:17.

13. Ngimba tukufumusya isyafiki isya bunyafyale bwa Kyala?

 13 Tukusubila ukuti Ubunyafyale bwa Kyala bwene bo bukwisa kumasya indamyo pa kisu. Yesu ayobile ukuti ‘inongwa inunu isya Bunyafyale sisisi’ sikuya pakufumusiwa nkisu kyosa. (Belenga Matai 24:14.) Likayapo iboma lya bandu ili libaghile ukubomba isi Ubunyafyale bwa Kyala bukwisa kubomba. (Salimo 146:3) Yesu atumanyisye ukuti twiputileghe Ubunyafyale bwa Kyala apa ayobile atile, ‘Ubunyafyale bwako bwiseghe, ubwighane bwako bubombiweghe, pasi apa bo kumwanya.’ (Matai 6:10) IBaibolo likutubula ukuti Ubunyafyale bwa Kyala bukwisa kupalaghania amaboma ghosa agha bandu po ubwene bukwisa kulaghila bwila na bwila.—Danieli 2:44.

14. Ngimba bo baliku aba uwe kusubila ukuti bikubomba ubwighane bwa Kyala?

14 Pa syosa isi tumanyile mwilalusye ukuti: ‘Ngimba bo baliku aba bikumanyisya isi iBaibolo likuyoba? Ngimba bo baliku aba bikubamanyisya abandu ingamu ya Kyala? Ngimba bo baliku aba bikunangisya ulughano ulwanaloli kwa aliwesa kangi bikusubila ukuti Kyala atumile Yesu ukuti ise atutabule? Ngimba bo baliku aba batikwingililapo pa ndyali? Ngimba bo baliku aba bikumanyisya ukuti Ubunyafyale bwa Kyala bwene bo bukwisa kumasya indamyo syitu?’ Bo Baketi ba Yehova bene.—Yesaya 43:10-12.

NGIMBA UMWE MUKUYA PAKUBOMBA ISYAFIKI?

15. Ngimba tubombeghe isyafiki ukuti Kyala itikisyeghe ukumwiputa kwitu?

15 Ukusubila itolo ukuti Kyala aliko kukaya kwakufwana. Namanga abandumi ababibi bikusubila ukuti Kyala aliko loli batikumpilikila. (Yakobu 2:19) Linga tukulonda ukuti Kyala itikisyeghe ukumwiputa kwitu, tutikulondiwa ukwitikisya itolo ukuti aliko, loli tubombeghe isi umwene ikuyoba.

16. Nongwa yafiki tukulondiwa ukuti tusokemo m’fipanga ifya butungulu?

 16 Ukuti Kyala itikisye ukumwiputa kwitu, tukulondiwa ukusokamo mu fipanga ifya butungulu. Unsololi Yesaya alembile atile, ‘Komma ukufipalamasya ifindu ifi fili mwiko ukufipalamasya, mwipeleghe ukuya bikemo polelo musumukeghe.’ (Yesaya 52:11; 2 Bakorinti 6:17) Yo nongwa tutikulondiwa ukubombako fyosa ifi fikukolelana nifipanga ifya butungulu.

17, 18. Ngimba “Babeloni Unkulumba findu fiki kangi nongwa yafiki kununu ukusokamo mwanakalinga?

17 Ngimba ifipanga ifya butungulu fyo filiku? Fyo fipanga fyosa ifi fikumanyisya ukuti tumbombeleghe Kyala mu njila iyi yikukindana na isi amasyu ghake ghikuyoba. Ifipanga ifya butungulu m’Baibolo fikukoleliwa “Babeloni Unkulumba.” (Ubusetuli 17:5) Nongwa yafiki? Nongwa yakuti ku Babeloni ko kwalyandile ifimanyisyo fingi ifya butungulu, bo Umpyuto wa nkabalilo ka Nowa ghukindile. Ifimanyisyo ifi fyalyambukile pa kisu kyosa. Abandu ba ku Babeloni basubilagha ukuti mwa kyala yumoywene muli aba kyala batatu. Mpaka lino ifipanga fingi fikumanyisya ukuti kuli aba kyala batatu mwa Kyala yumoywene, loli iBaibolo likutumanyisya kanunu ukuti alipo Kyala yumoywene, Yehova, kangi Yesu ukuti yo Mwana wa Kyala. (Yohani 17:3) Abandu ba ku Babeloni basubilagha kangi ukuti linga umundu afwile umughi wake ghukukindilila ukuya nubumi kangi ghubaghile ukufundiwa mu moto wa helo. Loli ubu butungulu.—Mukete Amasyu Gha Pabumalilo 14, na 17.

18 Kyala ayobile nganila ukuti mwalululu ifipanga ifya butungulu fikuya pakufundiwa. (Ubusetuli 18:8) Ngimba muketile inongwa inunu iyakusokelamo m’fipanga ifya butungulu mwanakalinga? Yehova ikulonda ukuti musokemo bo akabalilo kakali ukumalika.—Ubusetuli 18:4.

Linga mukumbombela Yehova na bandu bake, mukuya pakuya na bamanyani bingi pakisu kyosa

19. Linga musalile ukumbombela Yehova, ngimba umwene ikuya pakukufighilila bulebule?

 19 Linga musalile ukusokamo m’kipanga kyabutungulu ukuti mwande ukumbombela Yehova, abamanyani pamo aba mu mbumba yinu batikuya pakupilikisya inongwa iyi usalile ukubomba ifi, bamo bikwanda ukususya nukukughomola amaka. Loli Yehova akabaghila ukubaleka umwe. Ukuya pakuya yumo wa bandu mamiliyoni mingi aba baghanene naloli kangi ukuya pakuya nulusubilo lwakwisa kwikala pakisu bwila na bwila. (Marko 10:28-30) Lumo abinako na bakamu bako aba lino bakukususya bope nkyeni babaghile ukwisa pakwanda ukumanyila iBaibolo.

20. Nongwa yafiki kulondiwa ukumwiputa Kyala mu njila ya bwanaloli?

20 Kasyele akabalilo kanandi ukuti Kyala asosyepo bosa aba bikubomba imbibi nukuti Ubunyafyale bwake bulaghile ikisu. (2 Peteri 3:9, 13) Aka kisakuya kabalilo ka lusekelo! Aliwesa isakumwiputagha Yehova mu njila iyi umwene ikulonda. Lino ko kabalilo kanunu kumyako ukuti wande ukumwiputa Kyala mu njila ya bwanaloli.