Keta ifingi

Keta menu iyingi

Keta ifi filipo

Abaketi ba Yehova

Kyangonde

Ngimba IBaibolo Likutumanyisya Isyafiki?

 Mutu 12

Ngimba Mubaghile Ukubomba Isyafiki Ukuti Muye Pabumanyani na Kyala?

Ngimba Mubaghile Ukubomba Isyafiki Ukuti Muye Pabumanyani na Kyala?

1, 2. Ngimba bandu baliku aba bali bamanyani ba Yehova?

NGIMBA mundu aliku uyu mukulonda ukuti aye m’manyani winu? Mundu uyu mukuhoboka nawe. Mundu uyu mukupilikana nawe fiyo. Pamo uyu ali nakayilo akanunu aka numwe mukunyonywa ukuya nako.

2 Yehova ikusala abandu bamo ukuya bamanyani bake. Yumo wa bandu aba ali Abrahamu. (Yesaya 41:8; Yakobu 2:23) Yehova alinganile kangi Davidi. Pakabalilo kamo Yehova ayobile ukuti Davidi ‘mundu uyu indumbula yake yikuhoboka nawe.’ (Imbombo Sya Batumiwa 13:22) Yope unsololi Danieli ali ‘mundu nganiwa fiyo’ na Yehova.—Danieli 9:23.

3. Nongwa yafiki Yehova asalile Abrahamu, Davidi na Danieli ukuya bamanyani bake?

3 Ngimba findu fiki fyapangisye Abrahamu, Davidi, na Danieli ukuya bamanyani ba Yehova? Yehova alimbulile Abrahamu ukuti: “Usitike isi ngubulile.” (Ubwandilo 22:18) Yehova ikuya pabumanyani nabandu aba bikumpilikila. Bope nabandu bafikolo fyosa babaghile ukuya pabumanyani na Yehova. Umwene ayobile ku baIsraeli ukuti: ‘Linga mukunyitika une po nisakuyagha Kyala winu, nanumwe mwisakuyagha bandu bangu.’ (Yeremiya 7:23) Numwe mukulondiwa ukumpilikila Yehova linga mukulonda ukuya pabumanyani nawe.

YEHOVA IKUBAFIGHILILA ABAMANYANI BAKE

4, 5. Ngimba Yehova ikufighilila bulebule abamanyani bake?

4 IBaibolo likuyoba ukuti Yehova ikulonda injila ya ‘kubapa amaka aba bikwininga kumyake ni ndumbula yosa.’  (2 Syambukulu 16:9) Pa Salimo 32:8, Yehova afingile ku bamanyani bake atile: ‘Nikukubulagha uwe nukukumanyisya injila iyi ubaghile ukwendamo. Nikukulongosya uwe, ghope na maso ghangu ghikulindagha pa pamyako.’

5 Tuli nundughu witu uyu atikulonda ukuti tuye pabumanyani na Yehova, loli Yehova ikulonda ukutupoka. (Belenga Salimo 55:22.) Uswe pakuya bamanyani ba Yehova, tukumbombela nindumbula yitu yosa. Tukusubiliwa na pakabalilo ka ndamyo. Tuli nulusubilo lwamaka lwakufwana na ulu wa masalimo ali nalo, uyu alembile isya Yehova atile: ‘Namanga ali kukiboko kyangu ikililo, po lelo ndisakusukanikagha.’ (Salimo 16:8; 63:8) Ngimba Setano ikughelaghela bulebule ukututolesya ukuya pabumanyani na Yehova?

ISI SETANO AYOBILE

6. Ngimba Setano ayobile ukuti fiki isya bandu?

6 M’mutu 11 twamanyile ukuti Setano akanile ubulaghili bwa Yehova, kangi ayobile ukuti Yehova ntungulu nukuti Yehova asobile pakuleka ukubapa Adamu na Eva ulusako lwakusala bene ifinunu ni fibibi. Ibuku lya Yobu lyope likutubula ukuti Setano ikususya bosa aba bikulonda ukuya pabumanyani na Kyala. Setano atile bikumbombela Kyala panongwa yakuti bakabe ifinunu kumyake loli bakangana mma. Setano ayobile kangi ukuti umwene abaghile ukupangisya aliwesa ukuleka ukumbombela Kyala. Isagha tukete isi tubaghile ukumanyilapo pa isi syabombiwe kwa Yobu na muno Yehova alinfighilile.

7, 8. (a) Ngimba Yehova ayobile fiki isya Yobu? (b) Ngimba Setano ayobile fiki isya Yobu?

7 Ngimba Yobu ali yonani? Ali mundu nnunu uyu aliko ifinja 3,600 ifi fikindilepo. Yehova ayobile ukuti pa kabalilo kala, akalipo umundu unnunu wakufwana na Yobu. Angindikagha Kyala kangi abengile imbibi. (Jobu 1:8) Naloli, Yobu ali m’manyani wa Yehova.

 8 Setano ayobile ukuti Yobu ambombelagha Yehova panongwa ya bulufu. Setano atile kwa Yehova: ‘Ngimba yikaya nongwa yakuti yo uwe umfighilile kosakosa, yuyo, inyumba yake na fyosa itolo ifi ali nafyo? Yuyuwe usisayile imbombo sya maboko ghake. Kangi fyope nifitimiwa fyake ufyolwisye nkisu. Loli lilino usosyeko fyosa ifi ali nafyo, po lelo atisa kuhaba ukukuhelula pabwelu itolo.’—Jobu 1:10, 11.

9. Ngimba Yehova alimwitikisye Setano ukubomba isyafiki?

9 Setano alinsyobekesyile Yobu ukuti ambombelagha Yehova ukuti akabe ifinunu. Setano ayobile kangi ukuti abaghile ukumpaghula Yobu pakumbombela Yehova. Yehova akalitikisye isi Setano ayobile, loli alimwitikisye Setano ukuti amughele Yobu linga ikumbombela Yehova panongwa ya bulufu pamo panongwa ya lughano.

SETANO IKUNGELA YOBU

10. Ngimba Setano amughelile bulebule Yobu, kangi Yobu abombile isyafiki?

10 Ikyakwanda, Setano ahiyile pamo ukuti ukonanga ifitimiwa fyosa ifya Yobu. Ukufuma apo aghoghile ababombi bingi ba Yobu. Pabumalilo, Setano aghoghile abana bosa 10 aba Yobu na kafulafumbi. Loli Yobu akalekile ukusubiliwa kwake kwa Yehova. ‘Muli syosa sisisi Yobu alinkusita nukutula inongwa nukundigha Kyala.’—Jobu 1:12-19, 22.

Yehova amusayile Yobu nongwa ya kusubiliwa kwake

11. (a) Ngimba Setano abombile kangi isingi siliku kwa Yobu? (b) Ngimba Yobu abombile isyafiki?

11 Setano akaghomokile nyuma. Ayobile kangi kwa Kyala ukuti: ‘lelo lilino ughupalamasye umbili wake, po lelo usikete atisakuhaba ukukuhelula pabwelu itolo.’ Setano alimpele Yobu ifilonda ifipela kinyanyasi fiyo. (Jobu 2:5, 7) Loli pope Yobu alinsubiliwa kwa Yehova. Ayobile atile: ‘Nisakwendelelagha ukwiyoba ukuti ngaya nimbibi nasimo une ukufika apa ngwakufwilagha!’—Jobu 27:5.

12. Ngimba Yobu anangisye bulebule ukuti Setano ntungulu?

12 Yobu akamenye nasimo isi Setano ayobile pamo isi  syapangisye ukuti aghane ni ndamyo. Umwene inong’onagha ukuti ali yo Yehova uyu alyandisye indamyo syosa sisisi. (Jobu 6:4; 16:11-14) Pope nalinga mo syayilile umwene akindilile ukumbombela Yehova mwakusubiliwa. Apa syabonike ukuti isi Setano ayobile syali syabutungulu. Yobu akali mundu wa bulufu. Ali m’manyani wa Kyala panongwa yakuti alinganile. Setano ali ntungulu!

13. Ngimba Yehova ambombile fiki Yobu panongwa ya kusubiliwa kwake?

13 Nalinga Yobu akamenye isi syabombiwagha kumwanya, loli akindilile ukuya nsubiliwa kwa Kyala nukunangisya ukuti Setano ali mbibi. Yehova alinsayile Yobu panongwa yakuti ali m’manyani unsubiliwa.—Jobu 42:12-17.

ISI SETANO IKUBAYOBA UMWE

14, 15. Ngimba Setano ayobile findu fiki ifi fikumpalamasya umundu aliwesa?

14 Mubaghile ukumanyilapo nyingi pa isi syabombiwe kwa Yobu. M’masiku agha Setano ikuyoba ukuti tukumbombela Kyala panongwa ya isi ikutubombela. Pa Jobu 2:4, Setano atile: ‘Umundu abaghile ukufileka fyosa ukuti abuponesye ubumi bwake.’ Pakuyoba ukuti umundu Setano akayobagha isya Yobu mwene, loli ayobagha isya bandu bosa ukuti abene bikulonda itolo ukukaba fimo kwa Kyala. Bo ifinja fingi fikindilepo ukufuma apa Yobu afwilile, Setano akindilile ukunsusya Yehova nukughela ababombi bake. Yo nongwa pa Isya Mbupingamu 27:11, tukubelenga ukuti: ‘We mwanangu uyeghe wamahala, po wisakuyihobosyagha indumbula yangu, bunobuno po nisakuya nasyo isya kumwamula linga ali nisya kundumbusya une.’

15 Numwe mubaghile ukusala ukumpilikila Yehova ukuti muye m’manyani wake. Linga mubombile isi kokuti mukunangisya ukuti Setano ntungulu. Nalinga mubaghile ukuti mukulondiwa tasi ukuleka ifindu fimo pabumi bwinu ukuti muye pabumanyani na Kyala, m’manye ukuti ukubomba isi  kununu fiyo. Setano ayobile ukuti umwe mukabaghila ukuya basubiliwa kwa Kyala linga mwaghene nindamyo. Umwene ikughelaghela ukututegha ukuti tuleke ukubomba ubwighane bwa Kyala. Ngimba ikubomba bulebule?

16. (a) Ngimba Setano ikubombela njila siliku ukuti abandu baleke ukumbombela Yehova? (b) Ngimba umwe mukwinong’ona ukuti Setano abaghile ukubasyoba bulebule ukuti muleke ukubombela Yehova?

16 Setano ikubombela ifipingo ifyakukindanakindana ukuti atutolesye ukuya pabumanyani na Kyala. Umwene ikutulondesya ‘bo yi ngalamu iyi yikubuna, ikundonda yumo uwa kum’mila.’ (1 Peteri 5:8) Buno mungaswighagha linga abakamu, abamanyani binu pamo abandu bamo bikuyoba ukuti muleke ukumanyila iBaibolo kangi lumo babaghile ukuyoba ukuti muleke ukubomba isi nunu. Linga isi sibombiwe mubaghile ukwinong’ona ukuti mukutamiwa. * (Yohani 15:19, 20) Utubalilo tumo Setano ikwinangisya ‘ukufwana wandumi wa lumuli.’ Umwene ikubombela injila iyi ukuti atusyobe ukuti tuleke ukumpilikila Yehova. (2 Bakorinti 11:14) Injila iyingi iyi Setano ikubombela ukuti tuleke ukumbombela Yehova ko kutupangisya ukuti twiboneghe ukuya bandu bamwalwemwalwe, nukuti tukabaghila ukufwanisya ukuya babombi ba Kyala.—Isya Mbupingamu 24:10.

MUPILIKILEGHE INDAGHILO ISYA YEHOVA

17. Nongwa yafiki tukumpilikila Yehova?

17 Linga tukumpilikila Yehova tukunangisya ukuti Setano ntungulu. Ngimba findu fiki ifi fibaghile ukututula  ukuti tuye bandu bakupilikila? IBaibolo likuyoba ukuti: ‘Bunobuno unganeghe Yehova wako nindumbula yako yosa, numoyo wako ghosa, namaka ghako ghosa.’ (Ukukumbusya Indaghilo 6:5 NWT) Tukumpilikila Yehova nongwa yakuti tunganile. Ulughano lwitu linga lukuya lunywamu kwa Yehova, tukuya nulweke fiyo lwakubomba syosa isi Yehova ikulonda. Untumiwa Yohani alembile atile: ‘Namanga ukungana Kyala, ko uku linga tusikongile indaghilo syake; isyene indaghilo syake syo sikaya sito.’—1 Yohani 5:3.

18, 19. (a) Ngimba findu fiki ifingi ifi Yehova atile fibibi? (b) Ngimba tukumanya bulebule ukuti Yehova akabaghila ukutusuma ukubomba isi tukabaghila ukufwanisya?

18 Ngimba findu fiki ifingi ifi Yehova ikutubula ukuti fibibi? Mukete ifindu ifi mubokosi lyakuti ‘ Mfibengeghe Ifi Yehova Afibengile.’ Pabwandilo mubaghile ukuketa ukuti ifindu fimo fikaya fibibi. Loli linga mubelengile amavesi ghamo m’Baibolo nukwinong’onelapo, mukuya pakuketa ukuti kununu ukukonga indaghilo isya Yehova. Mukuya  pakuketa kangi ukuti mukulondiwa ukuchenja ifindu fimo pabumi bwinu. Nalinga ukubomba isi kukaya kupepe, loli linga mwachenja, mukuya pakuya nulusekelo ulu lukuyapo panongwa yakuya bamanyani ba Kyala. (Yesaya 48:17, 18) Ngimba tukumanya bulebule ukuti tubaghile ukuchenja?

19 Yehova akabaghila ukutubula ukubomba isi tukabaghila ukufwanisya. (Ukukumbusya Indaghilo 30:11-14) Yehova pakuya M’manyani witu wa pandumbula, umwene atumenye kanunu fiyo ukukinda muno twimanyile. Amenye isi tubaghile ukufwanisya na isi tukabaghila. (Salimo 103:14) Untumiwa Pauli ikutukasya ukuti: ‘Kyala yo nsubiliwa, yo atisakubaleka ukuti mugheliweghe ukukinda pamaka ghinu. Loli linga mukugheliwa, isakubatendekekesya injila yakuponelamo ukuti mwimeghe namaka.’ (1 Bakorinti 10:13) Tuyeghe nulusubilo ukuti Yehova akabalilo kosa ikuya pakutupa amaka ghakubombela ifi finunu kumyake. Ikuya pakutupa ‘amaka amakindilisi’ ukuti atutule pakabalilo ka ndamyo. (2 Bakorinti 4:7) Panyuma pakuti atuliwepo  nu butuli bwa kyala, Pauli ayobile ukuti: ‘Mbaghile ukusibomba syosa, muli yuyo ikumba amaka.’—Bafilipi 4:13.

MUGHANEGHE ISI YEHOVA ASIGHANILE

20. Ngimba tuyilo tuliku utu tukongeghe, kangi nongwa yafiki?

20 Linga tukulonda ukuya bamanyani ba Yehova, tuleke ukubomba isi umwene asibengile, loli pali kangi isingi isi tukulondiwa ukuti tubombeghe. (Baroma 12:9) Abamanyani ba Kyala bikughana isi yope asighanile. Abamanyani aba, bikulongosoliwa pa Salimo 15:1-5. (Belenga.) Abamanyani ba Yehova bikukonga utuyilo twake nukunangisya ‘ulughano, ulusekelo, ulutengano, ubufisa lyoyo, ubololo, ubununu, ukwikola.’—Bagalatiya 5:22, 23.

21. Ngimba mubaghile ukubomba bulebule ukuti munangisyeghe utuyilo utu Kyala atughanile?

21 Ngimba mubaghile ukunangisya bulebule utuyilo utununu utu? Mukulondiwa ukumanyila isi Yehova ikulonda mwakubelenga nukumanyila iBaibolo akabalilo kosa. (Yesaya 30:20, 21) Linga mukubomba isi, ulughano lwinu kwa Yehova lukuya lunywamu kangi linga ulughano lwaya lunywamu, mukuya pakulonda ukuti mumpilikileghe.

22. Ngimba fiki fibaghile ukubombiwa linga mukubomba ifindu ifi Yehova ikuhoboka nafyo?

22 Ukuchenja uku mubaghile ukubomba, tungakufwanikisya nukufula imyenda imikulu nukufwala imyenda imipya. IBaibolo likuyoba ukuti tukulondiwa ‘umfula umundu unkulu’ numfwala ‘umundu umpya.’ (Bakolosi 3:9, 10) Nalinga ukubomba isi kukaya kupepe, loli linga tuchenjile utuyilo twitu nukwanda ukumpilikila Yehova, umwene ikufinga ukuti ikwisa kutupa ‘ifihombiwa.’ (Salimo 19:11) Naloli, linga musalile ukumpilikila nukukonga isi Yehova ikuyoba, po mwisa kunangisya ukuti Setano ntungulu. Mumbombeleghe Yehova panongwa yakuti munganile, mungambombelagha panongwa ya isi afingile ukuti isakubomba nkyeni. Linga mubombile isi mukwisa kuya m’manyani fiyo wa Kyala!

^ ipal.16 Isi sitikusanusya ukuti abandu aba bikulonda ukuti muleke ukumanyila iBaibolo ko kuti undaghili wabo yo Setano. Loli Setano yo “lya kyala ilya nkisu kikiki,” kangi ‘ikisu kyosa kili m’maka ghake.’ Nongwa ya isi tutikuswigha ukuketa abandu bikughela ukututolesya ukuti tuleke ukumbombela Yehova.—2 Bakorinti 4:4; 1 Yohani 5:19.