Keta ifingi

Keta menu iyingi

Keta ifi filipo

Abaketi ba Yehova

Kyangonde

Mubaghile Ukuya Nulusekelo M’nyumba Yinu

 KIGHABA 7

Ukumanyisya Umwana Winu

Ukumanyisya Umwana Winu

‘Mungibwagha indaghilo syosa isi ngubapa umwe umusyughu. Mubamanyisyeghe abana binu.’—Ukukumbusya Indaghilo 6:6, 7

Bo Yehova andisye ubweghi, abapele abapapi imbombo yakumanyisya abana babo. (Bakolosi 3:20) Imbombo yakumanyisya umwana ukuti anganeghe Yehova nukuya mundu wamahala, ya mwebapapi. (2 Timoti 1:5; 3:15) Mumanyeghe isi umwana winu akwinoghona. Muyeghe bakwanda ukubomba isi mukum’manyisya umwana. Mubaghile ukum’manyisya kanunu umwana amasyu gha Yehova linga numwe mukughasunga mundumbula syinu.—Salimo 40:8.

 1 MUYEGHE BABUKE KU BANA BINU

ISI IBAIBOLO LIKUYOBA: ‘Muyeghe bengo ukupilika kangi mungayagha bengo ukukalala.’ (Yakobu 1:19) Amasyu agha ghakutula ukuti abana bayeghe babuke ukuyoba numwe. Bamanyeghe ukuti mukuya pakubapilikisya linga bakulonda ukuyoba numwe. Mukulondiwa ukuya babuke fiyo ukuti abana bayobe syosa isi bali nasyo. (Yakobu 3:18) Linga abana bamenye ukuti muli bakali, batabaghila ukuyoba syosa isi bali nasyo. Muyeghe bafisalyoyo ku bana binu. Mubabuleghe ukuti mubaghanile.—Matai 3:17; 1 Bakorinti 8:1.

ISI MUBAGHILE UKUBOMBA:

  • Muyeghe nakabalilo kakwangala na bana binu

  • Mwitikeghe apa linga bakulonda ukuyoba numwe

2 MUPILIKISYEGHE FIYO LINGA ABANA BAKUYOBA

ISI IBAIBOLO LIKUYOBA: ‘Uyu akwinoghonela ngani bo akali ukubomba akandu fikumwendela kanunu.’ (Isya Mbupingamu 16:20) Ukwinoghonelapo fiyo pa isi umwana oyoba kukutula ukuti mumanye kanunu muno mubaghile ukumutulila. Abana abingi batikwanda nukuyoba ubwanaloli bwa isi bali nasyo pamo isi bakulonda. ‘Umundu uyu akwamula bo atapilikisya tasi nkonyofu.’ (Isya Mbupingamu 18:13) Mungakalalagha mwanakalinga.—Isya Mbupingamu 19:11.

ISI MUBAGHILE UKUBOMBA:

  • Nalinga mutahoboka na isi umwana oyoba, mungabopelagha ukwamula pamo ukuyobapo bo umwana atamalisya

  • Mwinoghoneleghe muno umwe mwabombelagha bo muli bana

 3 MUKOLELANE PALIKIMO

ISI IBAIBOLO LIKUYOBA: ‘We mwana wangu, upilikisye isi ne tata wako ngukukumanyisya, kangi isi mama wako akukumanyisya.’ (Isya Mbupingamu 1:8) Yehova abapele abapapi bosa babili imbombo yakumanyisya abana. Abana binu mubamanyisye ukuti babapilikileghe nukubaghindika. (Baefesi 6:1-3) Linga umwe mukutoliwa ukupilikana nukuya ‘nyinoghono simosyene’ abana babaghile ukumanya. (1 Bakorinti 1:10) Linga mutoliwe ukupilikana pamo mupambene munjobelo, mungatatikanagha bo abana balipo.

ISI MUBAGHILE UKUBOMBA:

  • Muyobesanieghe kangi mukolelaneghe muno mubaghile ukubamanyikisya abana binu

  • Linga mwebapapi mutoliwe upilikana muno mubaghile ukumanyikisya abana, aliwesa aghele ukwinoghonelapo isi uyungi ayobile

 4 IPULANI YILONDIWA

ISI IBAIBOLO LIKUYOBA: ‘M’manyisya umwana ukwenda mu njila inunu.’ (Isya Mbupingamu 22:6) Ukwiyula kulondiwa ukuti umwana amanyisiwe kanunu. Mulembe isi mukolelene; ukubafunda abana kope kukulondiwa. (Salimo 127:4; Isya Mbupingamu 29:17) Ukubafunda abana kutaya kubapanisya ayi. Loli kokubatula abana ukumanya ubununu bwa ndaghilo isi mubapele. (Isya Mbupingamu 28:7) Mubamanyisye ukughaghana amasyu gha Kyala nubununu bwa ndaghilo sya Yehova. (Salimo 1:2) Isi sibaghile ukubatula ukuya nubundu ubununu.—Abahibuli 5:14.

ISI MUBAGHILE UKUBOMBA:

  • Mubatule abana ukumanya ukuti Yehova yo Kyala wabwanaloli kangi bamusubileghe

  • Mubatule ukumanya nukupaghuka kutuyilo utunyali pa Intaneti. Mubamanyisye ukuya maso na bandu aba boghona abana

‘M’manyisya umwana ukwenda mu njila inunu’