Keta ifingi

Keta menu iyingi

Keta ifi filipo

Abaketi ba Yehova

Kyangonde

Mubaghile Ukuya Nulusekelo M’nyumba Yinu

 KIGHABA 3

Linga Mwaghene Nindamyo

Linga Mwaghene Nindamyo

‘Ulughano lukukupikila imbibi nyingi.’—1 Peteri 4:8

Indamyo sikuyapo linga umundu eghile pamo eghiwe. Indamyo sibaghile ukwisa nongwa yakuti mupambene muno mukwinoghonela, mukwipilikila na muno mubombela ifindu pa bumi bwinu. Lumo indamyo sibaghile ukwisa mu njila isingi.

Umundu atabaghila usibopa indamyo. IBaibolo likuti apa pali abandu indamyo sikuyapo. (Matai 5:23, 24) Ifundo sya m’Baibolo sibaghile ukubatula linga mwaghene nindamyo.

 1 MUYOBESANIE INDAMYO IYI YILIPO

ISI IBAIBOLO LIKUYOBA: ‘Pali akabalilo kakuyobela.’ (Undumbilili 3:1, 7) Muyeghe nakabalilo kakuyobesania indamyo iyi mwaghene nayo. Muyobeghe ubwanaloli ku nkasi winu pamo undume winu. Muyobeghe muno mukwipilikila kangi inyinoghono syinu pa ndamyo yinu. (Baefesi 4:25) Mungalwagha linga mukalele nongwa ya isi mukuyobesania. Ukwamula kanunu kubaghile ukubatula ukuti ubwite bungayangapo.—Isya Mbupingamu 15:4; 26:20.

Nalinga mutoliwe ukupilikana, ulughano lo luyeghe lwakwanda nukughindikana. (Bakolosi 4:6) Linga ifindu fitaya kanunu muyobesanieghe nakalinga.—Baefesi 4:26.

ISI MUBAGHILE UKUBOMBA:

  • Muye nakabalilo kakuyobesania indamyo

  • Upilikisyeghe linga kabalilo kakuti upilike. Uyobeghe apa linga akabalilo kako kafwanile.

 2 MUPILIKISANIEGHE

ISI IBAIBOLO LIKUYOBA: ‘Muyeghe nulughano ku bangi. Ulwimiko lo mukindilileghe ukwimikana.’ (Baroma 12:10) Ukupilikisania mbweghi kununu kangi kulondiwa. Aliwesa apilikisyeghe linga mukuyobesania kangi ‘mwesa muyeghe ninyinoghono simosyene, na balwiyisyo.’ (1 Peteri 3:8; Yakobu 1:19) Mupilikisyeghe ni mbulukutu syosa. Mulekeghe tasi ifi mukubomba linga mukuyobesania indamyo yimo pamo mupangane ukuti muyobe akabalilo akangi. Akabalilo kosa mutulaneghe nu nkasi winu pamo undume winu. Ukutatikana kutaya nubununu nabumo. ‘Mungayagha balyogho.’—Undumbilili 7:9.

ISI MUBAGHILE UKUBOMBA:

  • Mupilikisyeghe nalinga isi mukupilika mutikuhoboka nasyo

  • Mupilikisyeghe fiyo inyinoghono sya nkasi winu pamo undume winu

3 MUKONGEGHE ISI MUPANGENE

ISI IBAIBOLO LIKUYOBA: ‘Umundu uyu linga akwiyula atikupondwa, loli ukuyoba pamulomo pene kukuntwala ku bulondo.’ (Isya Mbupingamu 14:23) Ukwitikisya isi mupangene kununu, loli mukulondiwa kangi ukonga pamo ubomba isi mupangene. Ukwiyula kukulondiwa. (Isya Mbupingamu 10:4) Ifindu fikwenda kanunu linga mukubomba pamopene.—Undumbilili 4:9.

ISI MUBAGHILE UKUBOMBA:

  • Londa injila isi sibaghile ukubatula linga mwaghene nindamyo

  • Akabalilo kosa mwinoghonelengepo muno injila isi musalile sikubatulila