Keta ifingi

Keta menu iyingi

Keta ifi filipo

Abaketi ba Yehova

Kyangonde

Mubaghile Ukuya Nulusekelo M’nyumba Yinu

 KIGHABA 2

Musubilaneghe

Musubilaneghe

‘Aka linga akakungile Kyala nayumo angakatatulagha.’—Marko 10:9

Yehova olonda uswe tusubilaneghe “nukunangisya” ulughano. (Mika 6:8) Ukusubilana kulondiwa fiyo mbweghi. Ulughano lukwisa mbweghi linga ukusubilana kulipo.

Amasiku gha lino ukusubilana mbweghi kupala. Ukuti ifindu fyende kanunu mbweghi mukulondiwa ukonga ifundo sibili.

 1 UBWEGHI BUYEGHE PAKWANDA

ISI IBAIBOLO LIKUYOBA: ‘Muketesye ifi fikulondiwa fiyo ukuya pabwandilo.’ (Bafilipi 1:10) Ubweghi bwinu bwakulondiwa fiyo, bo buyeghe pabwandilo.

Yehova olonda ukuti inyinoghono syako siyeghe ku nyambala wako pamo ku nkasi wako nukuhoboka nawe “mbumi bwako.” (Undumbilili 9:9) Kyala atolonda ukuti yumo asilondeghe si syake mwene, loli aliwesa alondeghe injila yakumuhobokesya umwinake. (1 Bakorinti 10:24) Mubombeghe isyakuti aliwesa amanyeghe ukuti wakulondiwa kangi aghaniwe.

ISI MUBAGHILE UKUBOMBA:

  • Akabalilo kosa mwangaleghe pampene. Aliwesa apilikisye ku nine

  • Mwinoghonelaneghe akabalilo kosa

 2 UYIKETE KANUNU INDUMBULA YAKO

ISI IBAIBOLO LIKUYOBA: ‘Aliwesa uyu akunketa unkikulu mbunyonywe bwa bulowe, bo aloghilwe nawe mundumbula yake.’ (Matai 5:28) Ukuya ninyinoghono imbibi pamo isya bulowe kunangisya ukuleka kuya nsubiliwa ku mwinako.

Yehova oyoba ukuti “uyikete bununu indumbula yako.” (Isya Mbupingamu 4:23; Yeremiya 17:9) Ukubomba isi kulonda ukuti tupangane na maso ghitu. (Matai 5:29, 30) Ukukonga isi Yobu abombile kubaghile ukututula. Umwene apangene na maso ghake ukuti atisa kuketamo undindwana yumo nubunyonywe. (Jobu 31:1) Akayilo kakuketa ifithuzithuzi fya bandu aba batafwala imyenda kanyali. Akabalilo kosa mungitikisyagha ifindu ifi fibaghile ukwandisya ikinyonyo ku nyambala pamo unkikulu uyu ataya wako.

ISI MUBAGHILE UKUBOMBA:

  • Aba mukwangala nabo bamanyeghe ukuti uli pabweghi.

  • Mwinoghonelaneghe. Ukuya pabumanyani na bandu aba undume wako pamo unkasi wako atohoboka nabo kubibi.