Keta ifingi

Keta menu iyingi

Keta ifi filipo

Abaketi ba Yehova

Kyangonde

Mubamanyisyeghe Abana Binu

 MUTU 3

Rahabu Asubilagha Yehova

Rahabu Asubilagha Yehova

Tufwanikisye ukuti tuli mu tawuni ya Yeriko. Itawuni iyi yili ku Kanani kuno abandu bake batikwiputa kwa Yehova. Rahabu ikalagha mu tawuni ya Yeriko.

Bo mwana, Rahabu apilike muno Mose apaghulile amisi gha mu Nyanja. Apawile amisi ukuti Abaisraeli bende kanunu ukusoka mu Egiputi. Umwene apilike muno Yehova abatulile Abaisraeli ukulwa ubwite na balughu babo. Loli akabalilo aka, Rahabu apilike ukuti Abaisraeli pali pabupipi na Yeriko!

Rahabu abatulile abatendesi nongwa yakuti ansubilagha Yehova

Isiku limo namayolo, Abaisraeli babili babukile pakutendela itawuni ya Yeriko. Bafikile ku nyumba ya Rahabu. Abingisye munyumba nukubapa amalo ghakwikala. Pakilo, malafyale apilike ukuti abatendesi bingile mu Yeriko. Apilike ukuti bafikile ku nyumba ya Rahabu. Malafyale atumile abandu ukuti bakabeghe. Rahabu abafisile abatendesi pamwanya pa nyumba, ayobile na bandu aba batumiwe na malafyale, atile: ‘Naloli abandu bala bisile kufika kumyangu, loli lino basokile babukile. Mubakonge mukwakubagha!’ Kwinoghona ukuti nongwa yafiki Rahabu abafisile abatendesi?— Umwene asubilagha Yehova kangi amenye ukuti na maka gha Yehova, Abaisraeli bakuya pakupoka ikisu kya Kanani.

Bo bakali ukubuka, abatendesi bapangene na Rahabu ukuti umwene pamopene na banyumba yake bakwisa kupona linga Yeriko akonangika. Usimenye isi bamubulile Rahabu ukuti abombe?— Batile: ‘Ubike ulughoye ulukesefu pa bwindo, po kwisa kupona na banyumba yako.’ Rahabu abombile syosa isi bayobile. Usimenye isi syabombiwe panyuma pake?—

Yehova alimpokile Rahabu na banyumba yake

Bo ghakindilepo amasiku manandi, Abaisraeli balyandile usyungutila Yeriko. Amasiku 6 basyungutilagha kamokene pisiku. Loli isiku lya 7 basyungutile mpaka ka 7. Abaisraeli bosa bakolile fiyo. Yehova apangisye umpanda pamo ilinga lya Yeriko ukuwa pasi. Yene inyumba iyi yali nu lughoye ulukesefu pa  bwindo yaponile! Uyibwene inyumba iyi pa chithuzithuzi?—Rahabu na banyumba yake baponile!

Ngimba kumanyila findu fiki kwa Rahabu?— Rahabu asubilagha Yehova nongwa ya findu ifi amanyile. Lino nuwe kumanyila ifindu fingi fya Yehova. Ngimba uwe kumusubila Yehova ngati yo Rahabu?— Tumenye ukuti nuwe kumusubila!

BELENGA MU BAIBOLO

  • Yoswa 2:1-24; 6:1-5, 14, 15, 20-25

  • Bahiburi 11:31