Keta ifingi

Keta menu iyingi

Keta ifi filipo

Abaketi ba Yehova

Kyangonde

Mubamanyisyeghe Abana Binu

 MUTU 6

Davidi Akali Mogha

Davidi Akali Mogha

Uwe linga ubogha bukwaghile kubomba syafiki?— Lumo kuyoba kwa mama pamo kwa tata ukuti akutule. Loli alipo yumo uyu abaghile ukukutula. Umwene wamaka fiyo ukinda aliwesa. Ngimba um’menye ingamu yake?— Ee, yo Yehova. Lino tumanyile isya ndumyana yumo m’Baibolo ingamu yake Davidi. Davidi akali mogha papo amenye ukuti Yehova abaghile ukumutula.

Bo mwana, amanyisiwe na bapapi bake ukuti anganeghe Yehova. Yo nongwa umwene akali nubogha nalinga aghene ni fyakutilisya. Umwene amenye ukuti Yehova abaghile ukumutula papo ali m’manyani wake. Akabalilo kamo, bo Davidi ali pakutima ing’osi, ingalamu inywamu yakolile ing’osi yimo! Usimenye isi Davidi abombile? Ayibopile ingalamu, bo ayaghile aghoghile, loli akali ni ngili nayimo m’maboko. Bo akabalilo kakindilepo, ilipatama lyakolile ing’osi, yope aghoghile. Uwe kwinoghona ukuti yo aliku uyu alintulile Davidi?— Ee, momumo, yo Yehova.

Kalipo akabalilo kamo apa Davidi anangisye ubukifu. Abaisraeli balwagha na Bafilisiti. Abafilisiti bali nu msilikali yumo, umwene ali mtali fiyo kangi wamaka. Ingamu yake ali yo Goliyati. Umundu wamaka uyu anyozagha abasilikali ba Israeli na Yehova. Goliyati itufyagha ukuti abasilikali ba Israeli balwe nawe. Abaisraeli bosa batilagha ukulwa nawe. Bo Davidi apilike, ayobile kwa Goliyati atile: ‘Une tukuya pakulwa twesa! Yehova yo akundula, nguya pakutobesya!’ Ngimba uwe kwitikisya ukuti Davidi ali nkifu?— Ee, ali nkifu. Tumanyile muno syamalikile.

Davidi alyeghile ifyata kangi asalile na mabwe 5 gha sangalawe pakulwa na kalyoto wa bwite. Bo Goliyati ambwene Davidi, alyandile ukumpepula fiyo papo ali ntubwa. Ukwamula Davidi atile: ‘Uwe kwisa kumyangu ni ngwegho, loli une ngwisa kumyako mu ngamu ya Yehova!’ Alyeghile ifyata nulusangalabwe mu nyambi yake nukundasa Goliyati. Ulusangalabwe lwafikile pa kyeni nukwingila nkati!  Ilya kalyoto lyawile pasi nukufwa. Abafilisiti ubogha bwabakolile, bosa balyandile ubopa. Nongwa yafiki Davidi alintolile kalyoto wa bwite?— Yehova alintulile. Yehova ali wamaka ukukinda kalyoto wa bwite.

Davidi akali mogha papo amenye ukuti Yehova abaghile ukumutula

Uwe kumanyilapo findu fiki pa nkhani ya Davidi?— Yehova wamaka fiyo ukinda aliwesa. Umwene M’manyani wako. Linga ubogha bukwaghile ungibwagha ukuti Yehova abaghile ukukutula ukuti uye nkifu.

BELENGA MU BAIBOLO

  • Salimo 56:3, 4

  • 1 Samueli 17:20-54