Nuba soo ri jñanrra texe kʼo mama ne pajina

Nzhogu̷ge kja ne pajina yeje

Unu̷ge klik ngekʼua ri jñanrra yo ri xoru̷

Yo testigo e Jehová

jñatrjo

¿Kjo nge yo ntee yo na kjaji kʼo nee e Jehová yo paa yo ri ka̱ra̱jidya?

 XO̸RU̸ 3

¿Pje go tsjaji yo testigo e Jehová ngekʼua ro mba̱ra̱ji kʼo na kjuana?

¿Pje go tsjaji yo testigo e Jehová ngekʼua ro mba̱ra̱ji kʼo na kjuana?

Ga kjaba kʼo mi xo̷ru̷ji ne Biblia kja kʼe kje̷e̷ 1870

Kja kʼe kje̷e̷ 1879 go pjongu̷ji La Atalaya

Ngeje La Atalaya yo paa yo ri ka̱ra̱jidya

Kja ne Biblia mi mama pje ro kjogu̷ ma ro nrru̱u̱ e Cristo, mi mama ke kja o discípulo e Cristo ro bʼu̷bʼu̷ bʼe̷zo ke ro dyompu̷ji yo ntee, dya kja ro jichiji kʼo ma kjuana ja ma nee e Mizhokjimi (Hechos 20:29, 30). Je ba kjanu ba tsjaji, kʼua ja ma kjaa kʼu̷ ma ngijñiji nge kʼo mi jichiji kʼo ntee, xo mi jichiji kʼo mi kreo yo ntee kʼu̷ dya mi matrʼu̷ji Mizhokjimi. Mi manji mi kjaji kʼo mi mama e Mizhokjimi, pe dya mi jichiji kʼo na kjuana kʼo mi mama o jñaa e Mizhokjimi (2 Timoteo 4:3, 4). Je ba kjanu kʼu̷ ba kjogu̷, pe nudya, ¿pjekja yo ri testigojme e Jehová ri mangojme ke bʼemi ri pa̱rgojme pje mama ne Biblia?

E Jehová go mbo̷sʼu̷ bʼe̷zo ngekʼua ro mba̱ra̱ji kʼo na kjuana. Mi jingua e Mizhokjimi go mama ke yo paa yo ri bʼu̷njidya ro bʼu̷bʼu̷ ntee ke ro xo̷ru̷ji ne Biblia, ro mba̱ra̱ji pje nee ra mama kʼo junsʼu̷nu (Daniel 12:4). Kja kʼe kje̷e̷ 1870, o bʼu̷bʼu̷ bʼe̷zo ke mi nee ro mba̱ra̱ji pje mama ne Biblia, pe go unu̷ji nguenrra ke kja o nitsjimi ja mi poji dya mi jichiji kʼo ma kjuana. Kjanu go jmuru̷ji go xo̷ru̷ji o Biblia, e Jehová go mbo̷sʼu̷kʼo ngekʼua ro mba̱ra̱ji ja ma kjaa kʼo mi xo̷ru̷ji kja Biblia.

O bʼu̷bʼu̷ bʼe̷zo kʼo mi xo̷ru̷ji ja ma kjaa kʼo mama ne Biblia. Angezeji mi kjaji na punkju̷ trʼo̷nu̷, mi jodʼu̷ji kʼo mi mama ne Biblia, kjanu mi junsʼu̷ji kʼo mi to̷trʼu̷ji. Ma mi bʼu̷bʼu̷ dʼa texto kʼu̷ dya mi pa̱ra̱ji pje mi nee ro mama, mi sido mi xo̷ru̷ji ne Biblia jesta ma mi to̷trʼu̷ji texto kʼu̷ ro mbo̷sʼu̷ji ro tendioji na joo. Ga kjanu go mba̱ra̱ji pje ni chju̱u̱ e Mizhokjimi, pje ngeje o Reino, pje ra tsjaa kja ne Xoñijomu̷, o mba̱ra̱ji ja bʼu̷bʼu̷ kʼo ya nrru̱u̱ ñe ke e Jehová ra xosu̷ kʼo ya nrru̱u̱. O unu̷ji nguenrra kʼu̷ ma joo ke ro xo̷ru̷ji ne Biblia, ga kjanu ro mba̱ra̱ji kʼo na kjuana, dya kja ro tsjaji kʼo ma sʼoo ñe dya kja ro kreoji kʼo dya ma kjuana. Nudya, yo ri testigojme e Jehová ri xo̷ru̷jme ne Biblia kʼua ja ma tsjaji angezeji (Juan 8:31, 32).

In kjuarmagojme go unu̷ji nguenrra ke ma joo kʼo ma pjechiji, xo go unu̷ji nguenrra ke ma joo ma ro jichiji kʼo ntee pje mi mama ne Biblia, nu kje̷e̷ 1879 nge ma go mbu̷ru̷ji go tsjajikʼo. Kʼe kje̷e̷ go mbu̷ru̷ji go pjongu̷ji kʼe skuama: La Atalaya. Anunciando el Reino de Jehová. Ndizi kʼe kje̷e̷ asta yo paa yo ri ka̱ra̱jidya, yo ri testigojme e Jehová ri jichigojme yo ntee kja dosciento treinta y nueve país ñe seteciento idioma. Ri ka̱ra̱jme nrrexe kja ne Xoñijomu̷, ri pjo̷sʼu̷jme yo ntee ngekʼua ra mba̱ra̱ji kʼo na kjuana.

  • Ma go nrru̱u̱ e Cristo, ¿pje nge kʼo na sʼoo kʼo go tsjaji kʼo bʼe̷zo kʼo mi dyoji ko o discípulo e Cristo?

  • ¿Pje go tsjaji yo in kjuarmagojme ngekʼua o mba̱ra̱ji kʼo na kjuana?