Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 13

Ra pjo̷ru̷ji in bida kʼu̷ go dyaku̷ji

Ra pjo̷ru̷ji in bida kʼu̷ go dyaku̷ji

1. ¿Kjo nge kʼu̷ go dya̷ko̷ji?

E JEHOVÁ nge nu “Mizhokjimi kʼu̷ ix na kjuana kʼu̷ ixi bʼu̷bʼu̷tjo” (1 Tesalonicenses 1:9). E Jehová go dya̷ko̷ji ñe go dyaku̷ji kʼu̷ ra bʼu̷bʼu̷trjoji. Kja ne Biblia mama: “Ngetsʼkʼe bi dya̷tʼa̷ texe yo bʼu̷bʼu̷, texe yo kjaa. Mi ñege kʼu̷ ro bʼu̷bʼu̷yo, ngekʼua bi dya̷tʼa̷yo” (Apocalipsis 4:11). Ja̱a̱, e Jehová mi nee ke ro bʼu̷bʼu̷ji ngekʼua o dyaku̷ji in bida. Me na joo nu bida kʼu̷ o dyaku̷ji Mizhokjimi (xo̷ru̷ Salmo 36:9). *

2. ¿Pje ra kjaji ngekʼua ra bʼu̷bʼu̷ji na joo?

2 E Jehová dʼaku̷ji kʼo ni jyongu̷ji ngekʼua ra bʼu̷bʼu̷trjoji, dʼaku̷ji nrreje ñe pje kʼo ri siji (Hechos 17:28). Pe dya ngextrjokʼo, angeze nee ke ra ma̷ji rga mimiji (Hechos 14:15-17). Ma ri nee ra bʼu̷bʼu̷ji na joo, ni jyodʼu̷ ra a̷ta̷ji kʼo mandazu̷ji Mizhokjimi (Isaías 48:17, 18).

¿JA GA NUU E MIZHOKJIMI TEXE YO BʼU̸BʼU̸?

3. ¿Pje go tsjaa e Jehová ma e Caín go mbo̷trʼu̷ e Abel?

3 Kja ne Biblia mama ke in bidago̷ji ñe o bida yo dyaja ntee me ni mubi a jmii e Jehová. Nzakja ma e Caín, nu o trʼii e Adán ñe e Eva, me mi u̷mbu̷ nu kjuarma e Abel, e Jehová o zopju̷ e Caín go xipji ke dya ro nuu na u̷u̷ nu kjuarma. Pe e Caín dya go dya̷ta̷ Mizhokjimi, xe go nutrjo na u̷u̷ ngekʼua “go mbo̷trʼu̷ e Abel nu kjuarma” (Génesis 4:3-8). E Jehová go zu̷bu̷ e Caín nange bi mbo̷trʼu̷  e Abel (Génesis 4:9-11). Dya ra kjaji mbe̷kue̷ ñe dya kjo ra u̷mbu̷ji, ngejyo ni mbu̷ru̷ chu̱ʼu̱ ñe po̷trʼu̷nte. Na ntee ga kjanu dya ra so̷o̷ ra mimi nrrexe yo paa (xo̷ru̷ 1 Juan 3:15TNM). * Ma ri nego̷ji ke ra ma̷ja̷ e Jehová, ni jyodʼu̷ ra sʼiyaji texe yo ntee (1 Juan 3:11, 12).

4. ¿Pje jitsʼko̷ji naja ley kʼu̷ go unu̷ Mizhokjimi kʼo mi menzumu̷ a Israel?

4 Ma ya bi kjogu̷ na punkju̷ kje̷e̷, e Jehová go mama ke me ma mubi nu bida. Go mamakʼo kja kʼo ley kʼo go unu̷ e Moisés, naja ley mi mama: “Dya ri po̷trʼu̷nte” (Deuteronomio 5:17). Ma dʼa ntee ro mbo̷trʼu̷ o minte xo ro mbo̷trʼu̷ji angeze.

5. ¿Ja ga nuu Mizhokjimi ma dʼa nrrinxu ra mbo̷trʼu̷ o tsʼilele ma dya bʼe sa̷dʼa̷ ra musʼu̷?

5 ¿Ja ga nuu e Mizhokjimi ma dʼa nrrinxu ra mbo̷trʼu̷ o tsʼilele ma xe bʼu̷ntrjo kja o pjeme? E Jehová me nuu na joo o bida kʼe tsʼilele. Kja kʼo ley kʼo bi unu̷ e Jehová kʼo mi menzumu̷ a Israel go mama ke ma dʼa ntee pje kʼo ro tsjapu̷ dʼa nrrinxu ñe ro nrru̱u̱ o tsʼimbane, ro mbo̷trʼu̷ji kʼe ntee kʼu̷ go tsjakʼo (xo̷ru̷ Éxodo 21:22, 23; * Salmo 127:3). Nujyo jitsʼko̷ji ke dya joo ke dʼa nrrinxu ra mbo̷trʼu̷ o tsʼilele ma xe bʼu̷ntrjo kja o pjeme (jñanrra nu nota 28 kja nu página 222).

6, 7. ¿Pje ra kjaji ngekʼua ra jñetse ke ri pjo̷ru̷go̷ji in bidaji?

6 ¿Pje so̷o̷ ra kjaji ngekʼua ra jñetse ke ri nuji na mubi in bidaji ñe o bida yo dyaja ntee? Ra pjo̷nguenrraji yo ra kjaji,  ga kjanu kʼo dyaja ntee xo ñezgo̷ji dya pje ra kjogu̷ji kʼo na sʼoo. Ngekʼua dya ri su̷tʼu̷ji trju̱sʼu̷ ñe droga, nangeje ri pjo̷ru̷ji in bida ngekʼua dya ra tu̱ji.

7 E Mizhokjimi o dyaku̷ji in bida ñe in cuerpo (in nzero) ngekʼua ra pjo̷ru̷ji kʼua ja ga nee angeze. Ma dya ra kjaji ga kjanu, dya ra nuku̷ji na joo Mizhokjimi (Romanos 6:19; 12:1; 2 Corintios 7:1). E Jehová go dyaku̷ji in bida ngekʼua dya so̷o̷ ra matrʼu̷ji angeze ma dya ri pjo̷ru̷ji in bida kʼu̷ me na mubi. Zo̷ me na sʼe̷zhi ra je̷ziji kʼo kjaku̷ji ra tu̱ji, e Jehová so̷o̷ ra mbo̷xku̷ji ma ra jñetse ke ri nee ra je̷ziji kʼo na sʼoo ñe ra pjo̷ru̷ji in zaku̷ kʼu̷ me na mubi.

8. ¿Pje ra kjaji ngekʼua ra pjo̷ru̷ji in bidaji ñe o bida yo dyaja ntee?

8 A ro pjechiji ke e Mizhokjimi go dyaku̷ji in bida kʼu̷ me na mubi. E Jehová nee ke ra kjaji kʼo na joo ngekʼua ra pjo̷ru̷ji in bida ñe o bida yo dyaja ntee. Ri kjago̷ji ga kjanu ma pje kʼo ri e̷ji nzakja dʼa carro o dʼa moto. Dya ri eñego̷ji nu ja ra kjogu̷zu̷ji kʼo na sʼoo in bida ñe dya xo ri eñeji kja yo trʼeñe nu ja tsʼaa chu̱ʼu̱ (Salmo 11:5). Ri joku̷ji na joo in nzungo̷ji ngekʼua dya kjo pje ra kjogu̷ kʼo na sʼoo. E Jehová go xipji kʼo israelita: “Ma ri jya̷bʼa̷ na ngumu̷, axesʼe ri tsjo̱sbʼu̷ añu̷nu̷ ngekʼua dya kjo ra nrrogu̷, ga kjanu dya ra jya̷xkʼa̷ji ke bi nrru̱u̱” (Deuteronomio 22:8).

9. ¿Pje ni mbe kʼo dya ra kjapu̷ji yo añimale?

9 E Jehová me nuu ni mubi yo añimale ngekʼua ra pro̷ru̷jiyo. Angeze je̷zgo̷ji ra po̷trʼu̷ji yo añimale ngekʼua ra saji ñe ra a̷trʼa̷ji bʼitu kʼo ra jeji xo je̷zgo̷ji ra po̷tʼu̷ji yo añimale ma pje kʼo nee ra tsjaku̷ji (Génesis 3:21; 9:3; Éxodo 21:28). Pe dya so̷o̷ ra kjapu̷ji kʼo na sʼoo yo añimale ni xo ra eñeji rga po̷tʼu̷ji (Proverbios 12:10).

RA PJO̸RU̸JI IN BIDA KE ME NI MUBI

10. ¿Ja ga pa̱rgo̷ji ke nu kjii ngeje nu bida?

10 E Jehová me kjapu̷ na mubi ne kjii, nange ne kjii kjaku̷ji ra bʼu̷bʼu̷ji. Ma e Caín go mbo̷trʼu̷ e Abel, e Jehová  go xipji e Caín: “O kjii in kjuarmage matrʼku̷go̷ ndeze a jomu̷” (Génesis 4:10). O kjii e Abel mi nge o bida, ngekʼua e Jehová go jñu̷npu̷ nguenrra e Caín nange go mbo̷trʼu̷ e Abel. Ma go kjogu̷ nu trʼadyebʼe kʼu̷ go ñeje kja kʼo paa ma mi bʼu̷bʼu̷ e Noé, e Jehová xo go mama ke ne kjii nge ne bida. E Jehová go xipji e Noé ñe o pjamilia ke ro so̷o̷ ro zaji tsʼinge. E Jehová o xipji ga kjaba: “Nrrexe yo añimale yo bʼu̷bʼu̷ so̷o̷ ri sagejiyo. Xo ri sigeji yo pje nde ma kʼajna, ri dʼakʼu̷ji nrrexeyo”. Pe xo mi bʼu̷bʼu̷ kʼo dya mi so̷o̷ ro ziji, e Jehová go xipjiji: “Ngextrjo nu ngeʼe so̷o̷ ri sageji, dya so̷o̷ ri sigeji nu kjii” (Génesis 1:29; 9:3, 4).

11. ¿Pje go xipji Mizhokjimi kʼo mi menzumu̷ a Israel ke ro tsjapu̷ji nu kjii?

11 Ma ya bi kjogu̷ 800 kje̷e̷ ma e Jehová go xipji e Noé kʼu̷ dya ro ziji kjii, nrro go xipji o ntee: “Ma dʼa ntee kʼu̷ menzumu̷ a Israel o dʼa ntee kʼu̷ dya ri menzumu̷nu ra zu̷ru̷ na añimale o na sʼu̷u̷ kʼu̷ so̷o̷ ra zaa, ra mbo̷pkʼu̷ o kjii, kja rru̱ ngobʼu̷ a jomu̷”. Kjanu angeze go mama: “Dya ri sipkʼeji o kjii ni ri naja añimale” (Levítico 17:13, 14). E Jehová xe mi nee ke o ntee angeze ro nuji me na mubi ne kjii. Angezeji mi so̷o̷ ro zaji ngeʼe, pe dya mi so̷o̷ ro ziji kjii. Ma mi po̷trʼu̷ji na añimale kʼu̷ ro zaji, pe̷skʼu̷ ro mbo̷pʼku̷ji o kjii.

12. ¿Ja ga nuji ne kjii yo teñe e Cristo?

12 Ma ya bi kjogu̷ janzi kje̷e̷ ke bi nrru̱u̱ e Jesús, kʼo apostole ñe kʼo mi otrʼu̷ axojñi kja kʼo kjuarma kʼo mi ka̱ra̱ a Jerusalén, go manji pje mi junsʼu̷ kja kʼe Ley kʼu̷ go unu̷ji kʼo mi menzumu̷ a Israel ke xo ro tsjaji kʼo ntee kʼo mi teñe e Jesús (xo̷ru̷ Hechos 15:28, 29; 21:25). E Jehová go mbo̷sʼu̷kʼo ngekʼua ro meyaji ke me na mubi ga jñanrra ne kjii ñe kʼu̷ angezeji xo ro nuji ke me na mubi nu kjii. Kʼo ntee kʼo mi teñe e Cristo dya mi so̷o̷ ro ziji kjii ñe dya mi so̷o̷ ro zaji ngeʼe kʼu̷ dya ro mbo̷pʼku̷ji o kjii. Ngekʼua ma ro ziji kjii chjenjui kʼu̷ ro xo̷rpu̷ji yo tsʼita ñe ro tsa̱ji ndinxu  ñe bʼe̷zo. Ndeze kʼo paa, kʼo na kjuana mi teñe e Cristo dya mi siji kjii ñe dya mi saji ngeʼe kʼo dya ro mbo̷pkʼu̷ji o kjii. ¿Pje kjogu̷ yo padya? E Jehová xo nee ke ra janrraji ke me ni mubi nu kjii.

13. ¿Pjenga dya ri nego̷ji ke ra xichʼkiji kjii yo ri teñeji e Cristo?

13 Nujyo nee ra mama ke yo ri teñeji e Cristo dya ri sa̷kjo̷ji ra xichʼkiji kjii kja in ñitsji. Ri kjago̷ji ga kjanu nange e Jehová xitsiji ke dya ra siji kjii. Nzakja ma dʼa doctor ra xitsʼi ke dya ri sige pare, ¿so̷o̷ ri xichʼi kja in ñitsji? ¡Iyo, dya rgui tsjagekʼo! Xo ga kjanu ma e Mizhokjimi mama ke dya ra siji kjii, nujyo nee ra mama ke dya ra xichʼiji kjii kja in ñitsji (jñanrra nu nota 29 kja nu página 222).

14, 15. ¿Pjenga me na joo ke yo teñe e Cristo ra nuji me na mubi nu bida ñe ra dya̷ta̷ji e Jehová?

14 ¿Pje rgui tsjage ma dʼa doctor ro xitsʼi ke ri chu̱ge ma dya ri jye̷zi ke ra xichʼkʼiji kjii kja in ñitsji? Nzi dʼa ntee ra juajnu̷ ma nee ra dya̷ta̷ o ley Mizhokjimi nu ja mama ke me ni mubi nu kjii. Yo ri teñeji e Cristo ri janrraji ke me na mubi nu zaku̷ kʼu̷ go dyaku̷ji Mizhokjimi, ngekʼua ri jodʼu̷ji yo ra mbo̷xku̷ji ga kjanu dya ra tu̱ji; pe dya ra sa̷kjo̷ji kʼu̷ ra xichʼkiji kjii kja in ñitsji.

15 Ri nee ra bʼu̷nji na joo, nange in bidaji me na mubi a jmii e Mizhokjimi, pe dya ri sa̷kjo̷ji kʼu̷ ra xichʼkiji kjii kja in ñitsji. Xenrra na joo ra a̷ta̷ji e Jehová ke xe ra bʼu̷bʼu̷ji janzi paa ñe dya ra kjaji kʼo mama angeze. E Jesús go mama: “Ma kjo kʼo dya bʼu̷bʼu̷ dispuesto ra supjre o ra ndu̱u̱ ngekʼua dya ra nee ra ndenge ko nutsʼko̷, dya ra cho̷tʼu̷ji kʼu̷ rgi bʼu̷bʼu̷tjoji. Kʼo tenge ko nutsʼko̷, zo̷ ra mbo̷tʼu̷ji, pe ra cho̷tʼu̷ji kʼu̷ rgi bʼu̷bʼu̷tjoji” (Mateo 16:25). Ri sʼiyaji e Jehová ngekʼua ri a̷ta̷ji. Angeze pa̱ra̱ pje nge kʼo ra mbo̷xku̷ji ra minji na joo. Ra nuji na mubi ne bida kʼua ja ga nuu e Jehová (Hebreos 11:6).

16. ¿Pjenga a̷ta̷ji Mizhokjimi yo pe̷pi angeze?

 16 Kʼo pe̷piji Mizhokjimi dya ra jye̷ziji ra dya̷ta̷ji nu ley ke mama ke me na mubi ne kjii. Angezeji dya siji kjii ñe dya neji ke ra xichʼpiji kjii kja o ñitsji zo̷ ra manji yo joku̷nte. * Zo̷ dya sa̷jikʼo, jodʼu̷ji pje ra mbo̷sʼu̷ji ngekʼua dya ra ndu̱ji. Angezeji unu̷ji nguenrra ke e Mizhokjimi o unu̷ji o bida ñe nu kjii ngekʼua pa̱ra̱ angeze pje ra mbo̷sʼu̷ji ra mimiji na joo. ¿Gi enchʼe kja in mu̷bʼu̷geyo?

KʼO MAMA E JEHOVÁ KE SO̸O̸ RA KJAPU̸JI NU KJII

17. ¿Pje go xipji e Jehová kʼo mi menzumu̷ a Israel ro tsjaji?

17 Kja nu Ley ke e Mizhokjimi go unu̷ e Moisés, e Jehová go xipji kʼo mi menzumu̷ a Israel: “Nangeje o bida na ntee o na añimale bʼu̷bʼu̷ kja o kjii, ngekʼua ro dʼakʼu̷ji nu altar nu ja ri pa̷skʼa̷ji ne kjii ngekʼua ra perdonaotsʼu̷ji, nangeje ne bida ke bʼu̷bʼu̷ kja ne kjii nge nu ni perdonaotsʼu̷ji” (Levítico 17:11). Ma kʼo mi menzumu̷ a Israel mi kjaji kʼo ma sʼoo, mi o̷tu̷ji e Jehová ro perdonaoji, mi pa̷sbʼa̷ji dʼa añimale ñe mi o̷tu̷ji nu mbo̷kjimi ke ro xisi tsʼikʼe kjii axesʼe nu altar kja nu templo. E Jehová go xipji kʼo mi menzumu̷ a Israel ke ro tsjapu̷ji ga kjanu nu kjii.

18. ¿Ja rga mbo̷xku̷ji ke bi nrru̱u̱ e Jesús?

18 Ma e Jesús go e̱je̱ kja ne xoñijomu̷, dya kja mi jyodʼu̷ ro mba̷spʼa̷ji añimale nangeje angeze go nrru̱u̱ por nutsʼko̷ji ba pjodʼu̷ o kjii, ngekʼua ro perdonaozu̷ji in nzhubu̷ji (Mateo 20:28; Hebreos 10:1). E Jehová go xosu̷ e Jesús ro maa ajensʼe, me na mubi o bida e Jesús ngekʼua e Jehová so̷o̷ ra tsjaa ke ndexe yo ntee ra mimiji texe yo paa (Juan 3:16; Hebreos 9:11, 12; 1 Pedro 1:18, 19).

¿Pje ri tsjage ngekʼua ra jñetse ke gi nuu na mubi in bida ñe in tsjii?

19. ¿Pje ra kjaji ngekʼua dya ra nru̱u̱ yo ntee?

 19 ¡Me ri unu̷ji po̷jo̷ e Jehová kʼu̷ o dyaku̷ji in bida kʼu̷ me ni mubi! Nudya ri nee ra xipjiji yo ntee kʼu̷ ma ra ñenchʼeji kja o mu̷bʼu̷ e Jesús ra so̷o̷ ra mimiji nrrexe yo paa. Ri sʼiyaji yo ntee ñe ri jodʼu̷ji ja rga jichiji pje ra tsjaji ngekʼua so̷o̷ ra mimiji texe yo paa (Ezequiel 3:17-21). Nuʼma ra so̷o̷ ra mamaji nzakja kʼe apóstol Pablo: “Ma kjo kʼo bʼu̷bʼu̷tsʼu̷ji kʼu̷ dya ra salba, [...] dya nge in sʼoku̷go. Nange ro xitsʼkʼo̷ji texe kʼo nee Mizhokjimi ra pa̱ra̱go̷ji ñe ra kjaji; dya ro kobʼu̷go̷ ne ri na jñaa” (Hechos 20:26, 27). Jñetse ke ri nuji me ni mubi ne bida ñe nu kjii ma ri jichiji yo ntee ja ga kjaa e Jehová ñe ja ga nuu angeze nu bida kʼu̷ me na mubi.

^ par. 1 Salmo 36:9: “Nutsʼkʼe gi kjaa ke ra bʼu̷bʼu̷trjo texe; ngetsʼkʼe gi kjapu̷ ra jyasʼu̷ ngekʼua ri janrrago̷jme nu jyasʼu̷”.

^ par. 3 1 Juan 3:15: “Ma kjo u̷mbu̷ in kjuarma ngeje naja kʼu̷ po̷trʼu̷nte ñe nutsʼkʼeji gi pa̱rgeji ke kʼo po̷trʼu̷nte dya so̷o̷ ra mimiji nrrexe yo paa”.

^ par. 5 Éxodo 21:22, 23: “Ma ra chu̱ʼu̱ yeje bʼe̷zo nu ja ri bʼu̷bʼu̷ na nrrinxu kʼu̷ ri nrrunte ñe ma pje kʼo ra tsjapu̷ji kʼe nrrinxu ngekʼua ra mbe̷zi o tsʼilele, pe dya ra nrru̱u̱ o tsʼilele ra musʼu̷trjo na joo, nuʼma o xira kʼe nrrinxu ñe kʼe bʼe̷zo ra mebi kja kʼo juesi. Kʼe xira ra mamanu janzi ra ngontrʼu̷ kʼe bʼe̷zo. Pe ma ra nrru̱u̱ o tsʼilele o ma ra nrru̱u̱ kʼe nrrinxu, nuʼma pe̷ski ri po̷trʼu̷ge kʼe bʼe̷zo”.

^ par. 16 Ma xi gi nee ri pa̱rge pjenga dya ri sa̷ja̷ ra xichʼkiji kjii kja in ñitsji, ri xo̷ru̷ nu skuama kʼu̷ ni chju̱u̱: “Manténganse en el amor de Dios” kja nu página 77 a 79, nu skuama go dyopju̷ji yo testigo e Jehová kja jñangicha.