Nuba soo ri jñanrra texe kʼo mama ne pajina

Nzhogu̷ge kja ne pajina yeje

Unu̷ge klik ngekʼua ri jñanrra yo ri xoru̷

Yo testigo e Jehová

jñatrjo

¿Pje jitsʼko̷ji ne Biblia?

 XO̸RU̸ 15

¿Ja ga nee Mizhokjimi ra matrʼu̸ji?

¿Ja ga nee Mizhokjimi ra matrʼu̸ji?

1. ¿Kjo nge kʼu̷ so̷o̷ ra xitsʼko̷ji ja rga matrʼu̷ji Mizhokjimi?

NA PUNKJU̸ religión manji ke jizhiji kʼo na kjuana ja ga kjaa Mizhokjimi. Pe dya nge ga kjanu, nange yo religión nʼaño ga jizhiji ja ga kjaa Mizhokjimi ñe ja rga matrʼu̷ji angeze. ¿Ja rga pa̱rgo̷ji ja ga nee e Mizhokjimi kʼu̷ ra matrʼu̷ji? Ngextrjo e Jehová so̷o̷ ra xitsʼko̷ji ja rga matrʼu̷ji angeze.

2. ¿Ja rgi pa̱rge ja ga nee e Mizhokjimi ri matrʼu̷?

2 E Jehová go dyaku̷ji ne Biblia ngekʼua ra pa̱rgo̷ji na joo ja rga matrʼu̷ji angeze. Ni jyodʼu̷ ri xo̷ru̷ ne Biblia ngekʼua ra mbo̷xkʼu̷ e Jehová ri meya na joo yo ri xo̷ru̷ ga kjanu ri minkʼe na joo (Isaías 48:17).

3. ¿Pje nee Mizhokjimi ra kjago̷ji?

3 Bʼu̷bʼu̷ ntee kʼo manji ke e Mizhokjimi sa̷ja̷ texe yo kjaa yo religión, pe dya nge kʼo go mama e Jesús. Angeze go mama ga kjaba: “Na punkju̷ kʼo ra xitsʼko̷: ‘Nutsʼkʼe in Jmutsʼu̷go̷’ ra ñenzgo̷ji. Pero dya texeji ra kjogu̷ji kʼua ja manda Mizhokjimi. Kʼo ra kjogu̷nu, ngextjo kʼo ra tsjaa kʼua ja nzi ga nee kʼu̷ mi Tatago̷ kʼu̷ bʼu̷bʼu̷ ajensʼe”. Ngekʼua ni jyodʼu̷ kʼu̷ ra pjechiji pje mama Mizhokjimi ñe ra kjaji yo ra pjechiji. Me na joo ma ra kjaji ga kjanu nangeje e Jesús go mama ke yo ntee yo dya a̷ta̷ Mizhokjimi ‘kjaji yo na sʼoo’ (Mateo 7:21-23).

4. ¿Pje go mama e Jesús ro tsjaa yo ntee yo a̷ta̷ Mizhokjimi?

4 E Jesús go mama kʼu̷ ma ra kjaji kʼo mama Mizhokjimi, ra to̷trʼu̷ji nrrumu̷. E Jesús go mama: “Ri tsjogu̷ji kja kʼe ngoxtrʼi kʼu̷ sʼichʼi, nangeje na mba̷trʼa̷ nu ngoxtrʼi ñe nu ñʼii nu ja paa na punkju̷ ntee kʼo ra nrru̱u̱; kja kʼe ñʼii ñe kʼe  ngoxtrʼi kʼu̷ sʼichʼi janzitrjo ntee panu, nujyo ra mimiji nrrexe yo paa” (Mateo 7:13, 14TNM). Nu ñʼii kʼu̷ sʼichʼi nge yo pa̱ra̱ji ja rga matrʼu̷ji Mizhokjimi ñe ra mimiji texe yo paa. Kʼe ñʼii kʼu̷ na mba̷trʼa̷ nge yo dya matrʼu̷ Mizhokjimi ja ga mama angeze, kʼo nzhodʼu̷nu ra nrru̱ji. Pe e Jehová dya nee ke yo ntee ra nrru̱ji, angeze nee ke nrrexe yo ntee ra mba̱ra̱ji angeze (2 Pedro 3:9TNM).

¿JA GA NEE E MIZHOKJIMI RA MATRʼU̸JI?

5. ¿Ja rga pa̱rgo̷ji kjo nge kʼo matrʼu̷ Mizhokjimi ja ga nee angeze?

5 E Jesús go mama ja rgua pa̱rgo̷ji kjo nge kʼo matrʼu̷ji Mizhokjimi ja ga mama angeze. So̷o̷ ra pa̱rgo̷ji ma ra xo̷ru̷ji kʼo kreoji ñe kʼo kjaji yo ntee. Angeze go mama: “Kʼu̷ rgi pa̱ra̱geji kʼo xo̷pu̷te, ri u̷nkʼeji nguenda ja ga mimikʼo”. Ñe xo go mama kʼu̷ “je xo ga kjatjonu texe o zaʼa kʼo na joo, kisʼi kʼo na joo” (Mateo 7:16, 17). Nujyo dya nee ra mama ke kʼo matrʼu̷ji Mizhokjimi dya kjaji kʼo na sʼoo. Pe kʼo ntee kʼo pe̷pi Mizhokjimi dya je̷zi ga tsjaji kʼo na joo. Ra nuji pje ra mbo̷xku̷ji ra pa̱ra̱ji kjo nge kʼo matrʼu̷ji Mizhokjimi ja ga nee angeze.

6, 7. ¿Pjenga ni jyodʼu̷ ra jichiji yo ntee yo mama ne Biblia? ¿Pje go tsjaa e Jesús ngekʼua xo ra kjago̷ji?

6 Ni jyodʼu̷ ra jizhiji yo mama ne Biblia. Ne Biblia mama ga kjaba: “Texe kʼo o dyopju̷ o jñaa Mizhokjimi, nge o [e]spíritu Mizhokjimi o ñʼu̷nbu̷ o mu̷bʼu̷ji o dyopju̷ji. Me ni mubi o jñaa Mizhokjimi para ra jichkʼo̷ji yo ntee kʼu̷ na kjuana ja ga kjaa Mizhokjimi, ñe ja rga pjo̷nguendaji kja kʼo dya kjuana. Me xo ni mubi o jñaa Mizhokjimi para ra zopju̷ji kʼo kjaa na sʼoo, ngekʼua ra jye̷zijikʼo, ra tsjaji kʼo na joo. Me xo ni mubi para ra jichiji pje ni mbe kʼo na joo kʼo ra tsjaji. Mizhokjimi o dyaku̷ji o jñaa, ngekʼua nutsʼko̷ji o tʼizgo̷ji ra kjaji texe kʼua ja nzi ga nee angeze kʼo na joo” (2 Timoteo 3:16, 17). E apóstol Pablo go xipji kʼo ntee kʼo mi a̷ta̷ e Jesús ga kjaba: “Ma ro xitsʼkʼo̷jme o jñaa Mizhokjimi,  dya bi dya̷ra̷tjoji nzakja ma ri nge o jñaa yo ntee. Pero bi jye̷ziji o zichʼi in mu̷bʼu̷ji nangeje bi u̷nkʼeji nguenda kʼu̷ ngeje o jñaa Mizhokjimi. Y ix na kjuana ngeje o jñaa angezekʼu̷” (1 Tesalonicenses 2:13). Kʼo na kjuana matrʼu̷ Mizhokjimi kjaji yo mama ne Biblia, dya kjaji yo manji yo ntee ñe dya kjaji ja ga tsjaa yo ntee yo dya matrʼu̷ Mizhokjimi.

7 Texe kʼo o jizhi e Jesús mi mama kja o jñaa Mizhokjimi (xo̷ru̷ Juan 17:17NTD). Angeze mi jichi kʼo mi junsʼu̷ kja o jñaa Mizhokjimi (Mateo 4:4, 7, 10). Kʼo na kjuana pe̷pi Mizhokjimi, kjaji ja ba tsjaa e Jesús ñe jichiji yo ntee yo ba e̱je̱ kja ne Biblia.

8. ¿Ja ba jitsʼko̷ji e Jesús ngekʼua ra matrʼu̷ji e Jehová?

8 Ngextrjo e Jehová ra matrʼu̷ji. Kja Salmo 83:18 mama ga kjaba: “Ni chju̱tsʼkʼe Jehová, ixi ngextrjotsʼkʼe me na notsʼkʼe kja texe ne xoñijomu̷”. E Jesús mi nee ke kʼo ntee ro mba̱ra̱ji ja ga kjaa e Mizhokjimi ñe go jichi kʼo ntee o trju̱u̱ Mizhokjimi (xo̷ru̷ Juan 17:6NTD). E Jesús go mama ga kjaba: “Ra ndu̷ñijomu̷jme ra matʼu̷jme Mizhokjimi [Jehová] kʼu̷ nge in Jmuji. Y ngextjo angeze ra pe̷pijme” (Mateo 4:10). Texe yo pe̷pi Mizhokjimi kjaji kʼua ja nzi go tsjaa e Jesús, jichiji yo ntee o Jñaa Mizhokjimi. Ngextrjo e Jehová ra matrʼu̷ji, ra jichiji yo ntee o trju̱u̱ angeze ñe pje ra tsjaa ngekʼua ra mbo̷xku̷ji.

9, 10. ¿Pje ri kjaji ngekʼua ri potka sʼiyaji?

9 Ni jyodʼu̷ ra sʼiyaji yo ntee ko texe in mu̷bʼu̷ji. E Jesús go xipji o discípulo ro potka sʼiyaji (xo̷ru̷ Juan 13:35). Ri kjajiyo zo̷ nrre nʼaño ri menzumu̷ji ñe ja ga mimiji, zo̷ ri ju̷̱ji merio o dya pje ri pe̷sʼiji. Texezu̷ji ri potka sʼiyaji in kjuarmaji ñe in kju̱ji, nzakja na pjamilia (Colosenses 3:14). Dya ri poo kjaa chu̱ʼu̱ ngekʼua ra po̷trʼu̷ji yo ntee. Kja ne Biblia mama ga kjaba: “Ngekʼua rga pa̱ra̱go̷ji kjo nge o tʼii Mizhokjimi, ñe kjo nge o tʼii kʼu̷ dya joo. Ma kjo kʼo dya kjaa kʼo na joo, ñe ma dya xo sʼiya o kjuarma, nuʼma, dya nge o tʼii Mizhokjimimakʼu̷”. Ne Biblia xo mama: “Ni jyodʼu̷ ra potka  sʼiyaji. Dya ra kjaji kʼua ja nzi ba tsjaa e Caín. Nukʼu̷, o tsjaa kʼo na sʼoo kʼo o bʼe̷pji e Satanás kʼu̷ dya joo, o mbo̷tʼu̷ kʼu̷ o kjuarma” (1 Juan 3:10-12; 4:20, 21).

10 Ri xo̱ku̷ji nrrajme ngekʼua ri pjo̷sʼu̷ji in dyokjo̷ji, ri unu̷ji kʼo ni jyodʼu̷ji ñe ma so̷xiji ri ze̷tsʼpiji o mu̷bʼu̷ (Hebreos 10:24, 25). Xo “Ni jyodʼu̷ ra pjo̷sʼu̷ji texe yo nin mintego̷ji” (Gálatas 6:10).

11. ¿Pjenga ni jyodʼu̷ ra kjaji yo mama e Jesús?

11 Ra ejmego̷ji ke e Mizhokjimi go pejñe e Jesús ngekʼua ro ngu̷xku̷ji. Kja ne Biblia mama: “Otjo xe naja kʼu̷ ra joku̷zu̷ in mu̷bʼu̷ji kʼo na sʼoo; ngextjo e Jesucristo. Dya kjo xe ra nda̷ja̷ Mizhokjimi ra e̱ salbazu̷ji; ngextjo e Jesús” (Hechos 4:12). Kja nu xo̷ru̷ 5 ro pjechiji ke e Jehová go pejñe e Jesús kja ne xoñijomu̷ ngekʼua go nrru̱u̱ ba ngu̷xku̷ji in nzhubu̷ji yo ri a̷ta̷ji Mizhokjimi (Mateo 20:28). E Jehová go ñʼeme e Jesús kja nu Reino ngekʼua ra manda kja ne xoñijomu̷. Ngekʼua ne Biblia mama ke ni jyodʼu̷ ra kjaji yo mama e Jesús ga kjanu ra so̷o̷ ra mimiji ndexe yo paa (xo̷ru̷ Juan 3:36).

12. ¿Pjenga dya ri kichkʼo̷ji kja política?

12 Dya ra kichkʼo̷ji kja política. E Jesús dya go ngichi kja política. Ma nu bʼe̷zo kʼu̷ mi chju̱u̱ Pilato ma ju̷mpu̷ nguenrra e Jesús, angeze go xipji: “In reino dya tsjaba kja ne xoñijoma” (xo̷ru̷ Juan 18:36TNM). * Nzakja e Jesús ri ejmego̷ji ke o Reino Mizhokjimi kʼu̷ bʼu̷bʼu̷ ajensʼe ra mbo̷xku̷ji, ngekʼua zo̷ ja ri menzumu̷ji dya ri kichkʼo̷ji kja política. Pe ne Biblia xitsʼko̷ji: “Ni jyodʼu̷ ri dya̷ta̷ji yo pje pje̷zhi”, yo pje pje̷zhi nge yo manda kja ne xoñijomu̷ (Romanos 13:1). Nu ja ri menzumu̷ji ri a̷ta̷go̷ji yo ntee yo manda. Pe ma ra xitsʼko̷ji ra kjaji kʼo dya nee e Mizhokjimi, ra  kjago̷ji nzakja kʼo apostole kʼo go manji: “Xenda ni jyodʼu̷ ra a̷ta̷jme Mizhokjimi kʼu̷ manda ke na ngeje yo bʼe̷zo” (Hechos 5:29, TNM; Marcos 12:17).

13. ¿Pje ri jichiji yo ntee ke ra tsjaa o Reino Mizhokjimi?

13 Ri ejmego̷ji ke ngextjo o Reino Mizhokjimi ra joku̷ texe yo ndumu̷ kja ne xoñijomu̷. E Jesús go mama ke “ra jichiji pje ra tsjaa nu Reino Mizhokjimi” kja texe ne xoñijomu̷ (xo̷ru̷ Mateo 24:14TNM). * Yo manda dya so̷o̷ mbo̷xku̷ji kʼua ja nzi ra tsjaa o Reino Mizhokjimi (Salmo 146:3). E Jesús o mama ke ro o̷tu̷ji ro ne̱ manda o Reino Mizhokjimi, angeze go mama: “Penkejme in reino ngekʼo nrrexe yo ka̱ra̱ ajensʼe ñe kja ne xoñijomu̷ ra dya̷tkʼa̷ji” (Mateo 6:10TNM). Ne Biblia mama ke o Reino Mizhokjimi ra chjotu̷ texe yo ntee yo manda ñe “ngextrjo o reino Mizhokjimi ra manda” (Daniel 2:44).

14. Pje i mange, ¿kjo nge yo na kjuana matrʼu̷ Mizhokjimi?

14 Nudya ke gi pa̱rge texe yo ya ro xo̷ru̷ji, so̷o̷ ri mange: “¿Kjo nge yo jichi kʼo mama ne Biblia? ¿Kjo nge yo jichi yo ntee o trju̱u̱ Mizhokjimi? ¿Kjo nge yo na kjuana sʼiya yo dyaja ñe ejmeji ke Mizhokjimi go pejñe e Jesús ro ne̱e̱ ngu̷xku̷ji? ¿Kjo nge yo dya kichʼi kja política? ¿Kjo nge yo jichi yo ntee ke ngextrjo o Reino Mizhokjimi so̷o̷ ra joku̷ yo nrrumu̷?” Ngextrjo yo testigo e Jehová kjajiyo (Isaías 43:10-12).

¿PJE RI TSJAGE?

15. ¿Pje ra kjaji ma ri nego̷ji ke e Mizhokjimi ra nuu na joo ja rga matrʼu̷ji?

15 Dya ngextrjo ra ejmeji ke bʼu̷bʼu̷ Mizhokjimi, nange je xo ga kjanu ga tsjaa yo demonio, pe dya a̷ta̷jikʼu̷ (Santiago 2:19). Ma ri nego̷ji ke e Mizhokjimi ra nuu na joo ja rga  matrʼu̷ji, ni jyodʼu̷ ra kjaji kʼo mandazu̷ji ñe dya xo ra ejmetrjoji ke bʼu̷bʼu̷ angeze.

16. ¿Pjenga ra pedyeji kja religión kʼu̷ dya ga kjuana?

16 Ma ri nego̷ji ke e Mizhokjimi ra nuu na joo kʼo ri kjaji, ni jyodʼu̷ ra pedyeji kja religión kʼu̷ jizhi kʼo dya ga kjuana. E Isaías go mama: “Gi bʼu̷nkʼeji a nrree angezeji ix ti pedyeji, dya ri po̷ru̷ji” (Isaías 52:11; 2 Corintios 6:17). Ngekʼua ni jyodʼu̷ kʼu̷ dya ra kjaji nza kja yo religión kʼo dya ga kjuana.

17, 18. ¿Pje nge “ne ndajñiñi a Babilonia” ñe pjenga ni jyodʼu̷ ri jye̷zi yo religión yo dya ga kjuana?

17 ¿Pje kjaa yo religión yo dya ga kjuana? Dya jichiji kʼo mama ne Biblia kʼu̷ na kjuana ja rga matrʼu̷ji Mizhokjimi. Kja ne Biblia mama ke yo religión yo dya ga kjuana ngeje “ne ndajñiñi a Babilonia” (Apocalipsis 17:5). ¿Pjenga? Kja kʼo paa e Noé go ñe̱je̱ na trʼadyebʼe, ma go kjogu̷ kʼo paa go bʼu̷bʼu̷ na ndajñiñi kʼu̷ mi chju̱u̱ Babilonia, nunu mi jichiji kʼo ntee na punkju̷ kʼo dya ma kjuana. Texe kʼo mi jichijinu xo go tsjaji kja texe ne xoñijomu̷. Kʼo ntee kʼo mi bʼu̷nji a Babilonia mi xo̷rpu̷ji mizhokjimi nzakja na trinidad. Yo padya, na punkju̷ religión xo jichiji ke e Mizhokjimi ngeje na Trinidad, pe kja ne Biblia mama ke bʼu̷bʼu̷ natrjo Mizhokjimi kʼu̷ na kjuana, nukʼu̷ ni chju̱u̱ Jehová ñe o trʼii kʼu̷ ngeje e Jesús (Juan 17:3). Kʼo ntee kʼo mi bʼu̷bʼu̷ a Babilonia xo mi ejmeji ke bʼu̷bʼu̷ kʼo pedyezu̷ji ma ri tu̱ji kʼu̷ xi ga mimi ñe ga maa a linpjiernu nu ja ra supjre. Pe dya ga kjuanakʼo (jñanrra nu nota 14 kja nu página 213, nu nota 17 kja nu página 214 ñe nu nota 18 kja nu página 215).

18 E Mizhokjimi go mama ke dya kja ra mezhe ma ra kjuatu̷ texe yo religión yo dya ga kjuana (Apocalipsis 18:8). ¿Gi u̷nkʼe nguenrra pjenga ni jyodʼu̷ ri jye̷zi yo religión yo dya ga kjuana? E Mizhokjimi Jehová nee kʼu̷ nutsʼkʼe ri jye̷zi nu religión kʼu̷ dya ga kjuana ante kʼu̷ ra sa̷ja̷ nu paa ma dya kja ra so̷o̷ (Apocalipsis 18:4).

Pe̷pige e Jehová ngekʼo ri bʼu̷nkʼe kja o pjamilia nu pe̷sʼi kja texe ne xoñijomu̷

19. ¿Ja rga mbo̷xkʼu̷ e Jehová ma ri tsjage yo mama?

 19 Ma ri jye̷zi yo religión yo dya ga kjuana ñe ri tsjage yo mama e Jehová, yo ntee yo i jogebi o in pjamilia dya ra meyaji pjenga gi jye̷zi nu religión, ñe bʼu̷ma pje nrre ra tsjakʼu̷ji ngekʼua dya ri so̷ge na joo. Pe e Jehová dya ra jye̷tsʼkʼi, ra mbo̷xkʼu̷. Nutsʼkʼe so̷o̷ ra ngetsʼkʼe dʼaja o ntee Mizhokjimi, so̷o̷ ri dyokjeji na punkju̷ ntee ke ngeji nzakja na pjamilia ke me potka sʼiyaji ñe ri so̷o̷ ri mimi texe yo paa kja nu dʼadyo xoñijomu̷ kʼu̷ me rga zo̷o̷ (Marcos 10:28-30). Bʼu̷ma yo ntee yo i jogebi ñe in pjamilia dya neji kʼu̷ ri tsjage kʼo mama e Jehová, pe ma ra kjogu̷ yo paa bʼu̷ma ra nee ra xo̷ru̷ji ne Biblia.

20. ¿Pjenga me na joo ke ra matrʼu̷ji Mizhokjimi kʼua ja nzi ga mama?

20 Dya kja ra mezhe ma e Mizhokjimi ra kjuatu̷ kʼo na sʼoo ñe o Reino ra manda kja ne xoñijomu̷ ndeze ajensʼe (2 Pedro 3:9, 13TNM). ¡Me rga joo ma ra za̷dʼa̷kʼo! Texe yo ntee ra matrʼu̷ji e Jehová ñe ra kjaji kʼua ja nzi ga nee angeze. Nudya nge yo paa ke ra jodʼu̷ji Mizhokjimi ñe ra matrʼu̷ji kʼua ja nzi ga mama angeze.

^ par. 12 Juan 18:36: “E Jesús go nrru̷ru̷: ‘In reino dya tsjaba kja ne xoñijomu̷. Ma in reino ro tsjaba kja ne xoñijomu̷, kʼo ntee kʼo tengego̷ ro chu̱ji ngekʼua dya ro zinzgo̷ji kja yo judío. Pe in reino dya tsjaba’”.

^ par. 13 Mateo 24:14: “Kja texe ne xoñijomu̷ ra nga̱ra̱ ntee kʼu̷ ra jichiji pje ra tsjaa nu reino Mizhokjimi ngekʼua nrrexe yo ntee ra mba̱ra̱jikʼo; nuʼma, ra nguaru̷ texe [yo na sʼoo]”.