Nuba soo ri jñanrra texe kʼo mama ne pajina

Nzhogu̷ge kja ne pajina yeje

Unu̷ge klik ngekʼua ri jñanrra yo ri xoru̷

Yo testigo e Jehová

jñatrjo

¿Pje jitsʼko̷ji ne Biblia?

 XO̸RU̸ 9

Ya ba che̷zhi kʼo paa ma ra nguaru̷ kʼo na sʼoo

Ya ba che̷zhi kʼo paa ma ra nguaru̷ kʼo na sʼoo

1. ¿Ja nge nu ra xo̷ru̷ji ngekʼua ra pa̱rgo̷ji kʼo ra kjogu̷ axojñi?

MA GI janrrage yo pedye kja televisión, po gi mange, ¿kjo xi ra kjogu̷ kʼo na sʼoo? Yo padya kjogu̷ na punkju̷ kʼo na sʼoo ñe yo ntee me na sʼoji ngekʼua bʼu̷bʼu̷ yo manji ke dya kja ra mezhe ma ra nguaru̷ ne xoñijomu̷. ¿Kjo na kjuana ra kjogu̷kʼo? ¿Kjo so̷o̷ ra pa̱rgo̷ji pje ra kjogu̷ axojñi? Ja̱a̱. Zo̷ dya pa̱ra̱ yo ntee pje ra kjogu̷ axojñi e Jehová pa̱ra̱ pje ra kjogu̷. Angeze xitsʼko̷ji kja ne Biblia pje ra kjogu̷zu̷ji ñe pje ra kjogu̷ axojñi kja ne xoñijomu̷ (Isaías 46:10; Santiago 4:14NTD).

2, 3. ¿Pje mi nee ro mba̱ra̱ji kʼo o discípulo e Jesús ñe pje go xipjiji angeze?

2 Ma ri xo̷rgo̷ji kja ne Biblia ke ra nguaru̷ o ra nginsʼi ne xoñijomu̷, dya nge kʼu̷ ra chjotu̷ji, ngextrjo ra chjotu̷ji yo na sʼoo. E Jesús go jichi yo ntee ke nu Reino Mizhokjimi ra manda ndeze a jensʼe kja ne xoñijomu̷ (Lucas 4:43). Kʼo o discípulo e Jesús mi nee ro mba̱ra̱ji jingua ro manda o Reino Mizhokjimi, ngekʼua o dyo̷nu̷ji e Jesús: “¿Jingua ra za̷dʼa̷ yo i xitsijme, ñe pje ra kjogu̷ ke ra pa̱ra̱jme ke ri bʼu̷nkʼe ko nutsʼko̷jme ñe ma ya rgua che̷zhi kʼo paa ma ra nguaru̷ yo bʼu̷bʼu̷ kja ne xoñijomu̷?” (Mateo 24:3TNM). E Jesús dya go mama jingua ro za̷dʼa̷kʼo, pe angeze go mama pje ro kjogu̷ ma ya ri bʼe̷xtjo ro nguaru̷ yo na sʼoo yo bʼu̷bʼu̷ kja ne xoñijomu̷. Kʼo go xipji e Jesús kʼo o discípulo nge yo na kjogu̷ yo padya.

 3 Kja ne xo̷ru̷ ra pjechiji ke ri ka̱rgo̷ji kja yo paa kʼo go mama e Jesús ke jñetse ke dya kja ra mezhe ra nguaru̷ kʼo na sʼoo. Otrʼu̷ ra nuji pje ma chu̱ʼu̱ kʼo o tsʼaa ajensʼe ngekʼua ra meyaji pjenga na kjogu̷ kʼo na sʼoo kja ne xoñijomu̷.

O TSʼAA NA CHU̱ʼU̱ AJENSʼE

4, 5. a) ¿Pje go kjogu̷ ajensʼe ma kja bi mbe̷zhi Rey e Jesús? b) Kʼua ja nzi ga mama kja Apocalipsis 12:12, ¿pje go kjogu̷ kja ne xoñijomu̷ ma e Satanás go sjo̷bu̷ji?

4 Kja nu xo̷ru̷ 8 ro pjechiji ke e Jesús go mbe̷zhi Rey ajensʼe kja kʼe kje̷e̷ 1914 (Daniel 7:13, 14). Kja nu libro Apocalipsis xitsʼko̷ji pje go kjogu̷: “Kjanu o tsʼakʼua na chu̱ʼu̱ ajensʼe, e Miguel [kʼu̷ ngeje e Jesús] ñe kʼo o anxe Mizhokjimi kʼo mi dyoji, o chu̱ji ko kʼe kʼijmi [kʼu̷ ngeje e Satanás]. Me mi chu̱ʼu̱ kʼe kʼijmi ñe kʼo anxe kʼo mi dyoji kʼe kʼijmi”. * E Satanás ñe yo demonio dya go nrro̱nji kʼe chu̱ʼu̱ ñe go zo̷bu̷ji kja ne xoñijomu̷. ¡O anxe Mizhokjimi me go ma̷ji! Pe ¿pje go kjogu̷ji yo ntee kja ne xoñijomu̷? Ne Biblia mama ke me ro kjogu̷ji kʼo na sʼoo ñe me ro so̷xiji. ¿Pjenga ro mimiji ga kjanu? Nu kʼu̷ dya joo me go tsjaa mbe̷kue̷, nange “pa̱ra̱ na joo kʼu̷ dya kja ra mezhe paa kʼu̷ xe so̷o̷ ra tsjaa texe kʼo na sʼoo” (Apocalipsis 12:7, 9, 12).

5 E Satanás kjaa na punkju̷ kʼo na sʼoo kja ne xoñijomu̷. Me mbe̷kue̷ nange dya kja ra mezhe ma Mizhokjimi ra chjotu̷kʼu̷. Ra nuji kʼo go mama e Jesús ke ro kjogu̷ kja yo paa yo ni nguaru̷ (jñanrra nu nota 24 kja nu página 220).

 YO PAA YO NI NGUARU̸

6, 7. ¿Pje kjogu̷ kja yo chu̱ʼu̱ ñe pjenga bʼu̷bʼu̷ tjijmi yo padya?

6 Chu̱ʼu̱. E Jesús go mama ga kjaba: “Yo país ra chu̱ji ko yo ñaja país. Kʼo rey ra chu̱ji ko kʼo ñaja rey” (Mateo 24:7). Yo padya na punkju̷ ntee ga nrru̱ji ma tsʼaa chu̱ʼu̱ ke na nge mi jingua. Nu organización kʼu̷ nuu yo kjogu̷ kja ne xoñijomu̷ mama ke ndeze nu kje̷e̷ 1914, texe kʼo chu̱ʼu̱ kʼo o tsʼaa ixi kjogu̷ 100 millón ntee ke ya go nrru̱ji. Kʼo ntee kʼo go nrru̱ji kja kʼo chu̱ʼu̱ nu kje̷e̷ 1900 a 2000 xenrra ma punkju̷ ke nange kʼo go nrru̱ji ma dya bʼe mi sa̷dʼa̷ nu kje̷e̷ 1900. ¡Mbeñe ja ga zo̷ji yo ntee kja yo chu̱ʼu̱, me so̷xiji ñe me zichʼiji o mu̷bʼu̷ji!

7 Tjijmi. E Jesús go mama ga kjaba: “Na punkju̷ kʼua ja ra supjreji o tjijmi” (Mateo 24:7). Zo̷ me bʼu̷bʼu̷ na punkju̷ jñona, na punkju̷ ntee dya pe̷sʼiji pje ra ziji. ¿Pjenga kjogu̷ ga kjanu? Yo ntee dya pe̷sʼiji merio ngekʼua ra nrro̱mu̷ji pje ra ziji o dya trje̷ji juajma ja ra ndujmu̷ji. Ixi kjogu̷ mil millón ntee kʼu̷ dya pe̷sʼiji merio, dya ni zoo kʼu̷ ra ziji. Nu Organización Mundial de la  Salud mama ke nzi na kje̷e̷ na punkju̷ millón tsʼitrʼi ñe tsʼixutrʼi ga nrru̱ji trjijmi.

8, 9. E Jesús go mama ke ro mbii ne xoñijomu̷ ñe ro nzhodʼu̷ ngijeme, ¿ja ga pa̱rgo̷ji ke ya za̷dʼa̷kʼo?

8 Mbii ne xoñijomu̷. E Jesús go mama ga kjaba: “Ra mbii na ze̷zhi ne xoñijomu̷” (Lucas 21:11). Yo científico tebʼeji ke tsje̷ma tsje̷ma xe ra mbii na ze̷zhi ne xoñijomu̷. Ndeze nu kje̷e̷ 1900, ixi kjogu̷ yeje millón ntee ke go nrru̱ji ma go mbii na ze̷zhi ne xoñijomu̷. Zo̷ yo tecnología pjo̷sʼu̷ji yo ntee ra mba̱ra̱ji jingua ra mbii, pe xe tu̱trjo na punkju̷ ntee.

9 Nrrotkʼijeme. E Jesús go mama ke ro “nzhodʼu̷ o ngeme kʼo me na sʼe̷zhi”. Yo nrrotkʼijeme kʼu̷ na sʼe̷zhi me ro nzhodʼu̷ji ñe ro nrru̱ji na punkju̷ ntee (Lucas 21:11). Zo̷ yo joku̷nte pa̱ra̱ji pje ma ñechje ra unu̷ji yo ntee ngekʼua ra nrrisʼiji o ngijeme, pe bʼu̷bʼu̷ ngijeme kʼu̷ otrjo ñechje kʼu̷ ra nrrisʼiji. Manji ke nzi na kje̷e̷, na punkju̷ millón ntee tu̱ji nangeje so̷dyeji, nzakja nu nrrotkʼijeme tuberculosis, nu malaria ñe nu cólera. Dya ngextrjokʼo, yo  joku̷nte a go cho̷trʼu̷ji treinta nrrotkʼijeme kʼu̷ kja dʼadyo, pe dya to̷trʼpu̷ji ñechje.

¿JA RGA NGE YO NTEE KJA YO PAA YO NI NGUARU̸?

10. ¿Pje mama kja 2 Timoteo 3:1-5 ke rgua tsjaji yo ntee yo padya?

10 Ne Biblia mama kja 2 Timoteo 3:1-5: “Ixti u̷nkʼe nguenda yo kje̷e̷ yo ya ba che̷zhi [...], ra za̷dʼa̷ kje̷e̷ kʼo me rru̱ sʼe̷zhi”. Nu apóstol Pablo go dyopju̷ ja rgua mimiji na punkju̷ ntee kja yo paa yo ni nguaru̷. E Pablo go mama ke yo ntee:

  • Ro sʼiyatsje̷ji

  • Me ro neji o merio

  • Dya ro dya̷ta̷ji o tataji

  • Dya kjo ro respetao

  • Dya ro sʼiyaji o bʼedyi

  • Kʼo ro mbeñeji ixto tsjaji

  • Ro chjenjui yo añimale yo na sate

  • Dya ro neji e Yose, ro sʼiyatsje̷ji

  • Ro tsjapu̷ji ri matʼu̷ji e Yose, pe dya ro dya̷ta̷ji

11. Kʼua ja nzi ga mama kja Salmo 92:7, ¿pje ra kjogu̷ yo na sʼonte?

11 ¿Je ga kjanu ga mimiji yo ntee nu ja i menzumu̷ge? Kja nrrexe ne xoñijomu̷ na punkju̷ ntee kjaji yo na sʼoo.  Pe bʼu̷bʼu̷ kʼo ra tsjaa e Mizhokjimi, angeze mama ga kjaba: “Ma ra nga̱ra̱ kʼo na sʼonte nzakja ma ga mbesʼe na punkju̷ pjiño, nge ma ra chjotu̷jikʼo” (Salmo 92:7).

RA KJOGU̸ YO NA JOO KJA YO PAA YO NI NGUARU̸

12, 13. ¿Pje jitsʼko̷ji e Jehová kja yo paa yo ya ni nguaru̷?

12 Kja ne Biblia go dyopju̷ji kʼo ra kjogu̷ kja yo paa yo ni nguaru̷, kja ne xoñijomu̷ yo ntee ro zo̷ji na u̷u̷ ñe ro supjreji. Pe kja ne Biblia xo mama ke ra kjogu̷ kʼo na joo.

“Kja texe ne xoñijomu̷ ra nga̱ra̱ ntee kʼu̷ ra jichiji pje ra tsjaa nu reino e Mizhokjimi.” (Mateo 24:14TNM)

13 Ra meyaji yo mama ne Biblia. E Daniel o dyopju̷ pje ro kjogu̷ kja yo paa yo ni nguaru̷. Angeze go mama ga kjaba: “Na punkju̷ ra so̷o̷ ra mba̱ra̱ji ñe na punkju̷ kʼo ra meyaji” (Daniel 12:4). E Mizhokjimi ro unu̷ o jñiñi kʼu̷ ro mba̱ra̱ji na joo pje mama ne Biblia. E Jehová go tsjaa ga kjanu ndeze nu kje̷e̷ 1914. Nudya ri pa̱ra̱ji pjenga me ni mubi o trju̱u̱ ñe pje ra tsjaa kja ne xoñijomu̷, ri pa̱ra̱ji pjenga o pejñe o trʼii ro e̱ ngu̷xku̷ji, ri pa̱ra̱ji pje kjogu̷ ma ri tu̱ji ñe ra xosu̷ji kʼo ya nrru̱u̱. Ya ro pjechiji ke o Reino Mizhokjimi ra joku̷ texe yo ndumu̷ yo ri pe̷sʼiji. Ya xo ro pjechiji pje ra kjaji ngekʼua ra ma̷ji ñe ja rga minji ngekʼua ra ma̷pa̷ji o mu̷bʼu̷ Mizhokjimi. ¿Pje kjaji yo o mbe̷pji Mizhokjimi ma pjechiji yo mama ne Biblia? Ra nuji pje mama ne Biblia ke ro kjogu̷ (jñanrra nu nota 21 kja nu página 216 ñe nu nota 25 kja nu página 221).

14. ¿Janzi país ñe idioma nge nu na jichiji o Reino Mizhokjimi ñe kjo nge yo na kjaa ne bʼe̷pji?

14 Kja nrrexe ne xoñijomu̷ jizhiji o Jñaa Mizhokjimi. Ma ya rgui ka̱rgo̷ji kja yo paa yo ni nguaru̷, e Jesús go mama: “Kja texe ne xoñijomu̷ ra nga̱ra̱ ntee kʼu̷ ra jichiji pje ra tsjaa nu reino e Mizhokjimi” (Mateo 24:3, 14TNM). Ixi kjogu̷ 230 país ñe xo kjogu̷ 700 idioma nu jichiji yo ntee kʼo ra tsjaa o Reino Mizhokjimi. Ja̱a̱, kja nrrexe ne xoñijomu̷ yo testigo e Jehová jizhiji “texe  kja yo ndajñiñi ñe texe kja yo jñiñi”, pjo̷sʼu̷ji yo ntee ngekʼua ra mba̱ra̱ji kʼo ra tsjaa o Reino Mizhokjimi ñe ja rga mbo̷xku̷ji (Apocalipsis 7:9). Dya pje to̱nji ma jichiji yo ntee. Zo̷ u̷mbu̷ji yo ntee ñe kjapu̷ji kʼo na sʼoo, dya je̷ziji ga jichiji yo ntee o Jñaa Mizhokjimi ja ba mama e Jesús (Lucas 21:17).

¿PJE RI TSJAGE?

15. a) ¿Gi ejme ke ri ka̱ra̱ji kja yo paa yo ni nguaru̷ ñe pjenga gi mangekʼo? b) ¿Pje ra kjogu̷ji kʼo a̷ta̷ji e Jehová ñe kʼo dya a̷ta̷ji?

15 ¿Gi ejme ke ri ka̱ra̱ji kja yo paa yo ni nguaru̷? Na punkju̷ kʼo mama ne Biblia ke ro kjogu̷ kja kʼo paa kʼo ya ni nguaru̷ ya na kjogu̷dya. Dya kja ra mezhe ma e Jehová ra mama ke dya kja ra jichiji yo ntee yo dʼadyo jñaa ñe “ra nguaru̷ texe [yo na sʼoo]” (Mateo 24:14TNM). ¿Pje nee ra mama ke ra chjotu̷ texe? Nge kja e Armagedón ma e Mizhokjimi ra kjuatu̷ texe kʼo na sʼoo. E Jehová ra jye̷zi ke e Jesús ñe yo anxe ra chjotu̷ji texe yo dya nee ra dya̷ta̷ji angeze ñe o trʼii (2 Tesalonicenses 1:6-9). Nuʼma, e Satanás ñe yo demonio dya kja ra jyotrʼu̷ji yo ntee. Texe yo nee ra dya̷ta̷ji Mizhokjimi ñe ejmeji yo ra tsjaa o Reino Mizhokjimi ra jñanrraji ndexe kʼo ra tsjaa angeze (Apocalipsis 20:1-3; 21:3-5).

16. Dya kja ra mezhe ma Mizhokjimi ra kjuatu̷ yo na sʼoo, ngekʼua ¿pje ni mbe kʼo ri tsjage?

16 Dya kja ra mezhe ma ra chjotu̷ji texe yo na sʼoo yo bʼu̷bʼu̷ kja ne xoñijomu̷. Ngekʼua na joo kʼu̷ nzi nazgo̷ji ra mbeñeji na trʼo̷nu̷: “¿Pje ni jyodʼu̷ ra kjago̷?”. E Jehová nee ke ri pa̱rge ne Biblia, ngekʼua me na joo ke ri xo̷ru̷nu (Juan 17:3). Yo testigo e Jehová jmuru̷ji texe yo ngoʼo ngekʼua ra mbo̷sʼu̷ji yo ntee ra mba̱ra̱ji kʼo mama ne Biblia. So̷o̷ ri ñuu pje ri tsjaa ngekʼua dya ri jye̷zi ri mage ja jmuru̷ji (xo̷ru̷ Hebreos 10:24, 25). Ma ri unkʼe nguenrra  ke ni jyodʼu̷ ri jye̷zi kʼo na sʼoo, ri jye̷zikʼo. Ma jmanchʼa jmanchʼa ri tsjage kʼo na joo, me ri jogebi na joo e Jehová (Santiago 4:8).

17. ¿Pjenga na punkju̷ ntee dya go tsjapu̷ji nguenrra ma ya ro che̷zhi kʼo paa ma ro kjuatu̷ji kʼo na sʼoo?

17 Kʼe apóstol Pablo o mama ke ma ro kjuatu̷ji yo na sʼonte ngeje ma na punkju̷ ntee dya ri tebʼejikʼo. O mama ke ro “chjentjui nzakja ma ra e̱je̱ na mbe̱ʼe̱ ma xomu̷” (1 Tesalonicenses 5:2). E Jesús o mama ke na punkju̷ ntee dya ro tsjapu̷ji nguenrra ke ro mimiji kja yo paa yo ni nguaru̷. E Jesús go mama ga kjaba: “Kʼua ja nzi ma kjaa kʼo paa ma go mimi e Noé, ga kjanu ra ngeje ma ra bʼu̷bʼu̷ o Trʼii e bʼe̷zo [o yo paa yo ni nguaru̷]. Nangeje kʼo pakʼo ma dya bʼe mi e̱je̱ nu trʼadyebʼe, mi ñonaji ñe mi siji, yo bʼe̷zo ñe yo nrrinxu mi chju̷ntu̷ji, jesta kʼe paa ma e Noé go ngichi kja nu arca; ñe dya go tsjapu̷ji nguenrra jesta ma go ñe̱je̱ nu trʼadyebʼe ñe go mbaxu̷ji texeji, ga kjanu ra ngeje ma ra bʼu̷bʼu̷ o Trʼii e bʼe̷zo” (Mateo 24:37-39TNM).

18. ¿Pje go mama e Jesús ke ro pjo̷nguenrraji?

18 E Jesús go mama ke ra pjo̷nguenrraji, ngekʼua ‘dya ra ti̱ji, dya ra kjopku̷ji jñonu̷’ ñe dya ra so̷xiji ja rga to̷trʼu̷ji kʼo ni jyongu̷ji. O mama ke ma ra kjuatu̷ji kʼo na sʼoo ra chjenjui “nzakja dʼaja trju̷mu̷ kʼu̷ ra jyu̷trʼu̷” texe yo ntee. Xo go mama e Jesús: “Xampageji, dyo̷tu̷geji Mizhokjimi pamu̷ pamu̷ ngekʼua dya ri so̷geji mu̷ ra kjogu̷ texe nujyo na sʼoo. Dya xo ri su̱geji ri bobʼu̷geji a jmii o tʼii e bʼe̷zo” (Lucas 21:34-36NTD). ¿Pjenga me na joo ra pjo̷nguenrra kʼo go mama e Jesús? Nangeje dya kja ra mezhe ma e Mizhokjimi ra kjuatu̷ kʼo na sʼoo yo bʼu̷bʼu̷ kja ne xoñijomu̷. Ngextrjo yo nuu na joo e Jehová ñe e Jesús xe ra mimitrjoji ma ra kjuatu̷ji yo na sʼoo ñe ra mimiji nrrexe yo paa kja nu dʼadyo xoñijomu̷ (Juan 3:16; 2 Pedro 3:13).

^ par. 4 E Jesucristo xo ni chju̱u̱ Miguel. Ma xi gi nee ri pa̱ra̱, jñanrra nu nota 23 kja nu página 220.