Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 19

Dya ri jye̷zi ri sʼiya e Jehová

Dya ri jye̷zi ri sʼiya e Jehová

1, 2. ¿Kjo so̷o̷ ra mbo̷xku̷ji ra se̷chiji yo nrrumu̷?

MBEÑEGE ke in nzhodʼu̷ge kja dʼa bʼatrju̷ kja yo paa ma e̱je̱ dyebʼe. Ga jmuru̷ yo ngo̱mu̷, me jue̷nsʼi ñe yu̷ru̷ na ze̷zhi, kjanu ñe̱je̱ dyebʼe. Nutsʼkʼe i jodʼu̷ ja ri tsjo̱jo. Bʼu̷ma me gi so̷ge na joo ma gi cho̷trʼu̷ ja ri tsjo̱jo ngekʼua dya ra mbo̷kʼu̷.

2 Xo ga kjanu ri bʼu̷nkʼo̷jidya. Texe yo kjogu̷ kja ne xoñijomu̷ ni ma ga sʼodʼu̷yo. Bʼu̷ma gi mange, “¿kjo so̷o̷ ra mbo̷xku̷go̷dya?”. Bʼu̷bʼu̷ na salmo kʼu̷ mama ga kjaba: “Ra xikʼo̷ e Jehová: ‘Ngetsʼkʼe gi pjo̷xku̷go̷ ñe gi kjako̷ [o gi dʼaku̷] ra ze̷zhigo̷. In Yosego̷ kʼu̷ ri ejmego̷’” (Salmo 91:2). Ja̱a̱, e Jehová so̷o̷ ra mbo̷xku̷ji ra se̷chiji yo nrrumu̷ yo ri pe̷sʼijidya, xo ri tebʼeji ke ra dyaku̷ji yo me na joo kja yo paa yo ra sa̷ja̷.

3. ¿Pje ra kjaji ngekʼua ra mbo̷xku̷ji e Jehová?

3 ¿Ja rga mbo̷xku̷ji e Jehová? So̷o̷ ra mbo̷xku̷ji zo̷ pje nrre ma nrrumu̷ ra pe̷sʼiji. E Jehová xenrra na ze̷zhi ngekʼua ra mbo̷xku̷ji ma yo ntee nee ra tsjaku̷ji kʼo na soʼo. Zo̷ ra kjogu̷zu̷ji yo na soʼo angeze so̷o̷ ra joku̷ texe kja yo paa yo ra sa̷ja̷. Ngekʼua nu Biblia mama: “[Dya ri jye̷ziji] ri sʼiyageji Mizhokjimi” (Judas 21NTD). Ma ri nego̷ji ra mbo̷xku̷ji e Jehová ra che̷zhiji a jmii angeze. ¿Ja rga kjago̷jiyo?

 SʼIYAGE MIZHOKJIMI JA GA SʼIYATSʼU̸

4, 5. ¿Ja ga jñetse ke e Jehová me sʼiyazu̷ji?

4 Ma ra pa̱rgo̷ji ke me sʼiyazgo̷ji e Jehová, nujyo ra mbo̷xku̷ji dya ra je̷zi ra sʼiyaji angeze. Ra mbeñego̷ji texe kʼo dʼaku̷ji e Jehová. Go dyaku̷ji ne xoñijomu̷ nu ja kjaa na punkju̷ zaʼa kʼu̷ kisʼi lulu ñe añimale yo me na zo̷o̷. Xo o dyaku̷ji jñonu̷ kʼu̷ na kijmi ñe nrreje kʼu̷ so̷o̷ ra siji. Kja ne Biblia e Jehová xitsʼko̷ji pje ni chju̱u̱ ñe texe ja ga kjaa angeze. Pe yo xenrra ni mubi nge kʼu̷ me sʼiyazu̷ji ngekʼua ba dyaku̷ji o trʼii ro ne ngu̷xku̷ji yo nzhubu̷ (Juan 3:16). Nange kʼu̷ o nrru̱u̱ e Jesucristo nutsʼko̷ji so̷o̷ ra tebʼeji ra dyaku̷ji yo me na joo kja kʼo paa kʼo ra sa̷ja̷.

5 E Jehová xo go ñʼeme o Reino nu ja ra manda o trʼii, nrreze ajensʼe ra joku̷ yo nrrumu̷ ngekʼua dya kja ra supjreji. Angeze ra joku̷ ne xoñijomu̷ ngekʼua me rna jotrjo, ga kjanu me ra ma̷ji rga mimi yo ntee nrrexe yo paa (Salmo 37:29). E Jehová me sʼiyazu̷ji ngekʼua jitsiji ja rga mimiji na joo yo padya. Xo xitsʼko̷ji ke so̷o̷ ra zopju̷ji ñe me nee ra dya̷ra̷ ma ra zopju̷ji. Nzi nazgo̷ji ri unu̷ji nguenrra ja ga sʼiyazu̷ji e Jehová.

6. ¿Ja rgi sʼiyage e Jehová ja kʼo ga sʼiyatsʼu̷?

6 ¿Ja rgi sʼiyage e Jehová ja ga sʼiyatsʼu̷? Jyodʼu̷ ja rgi unu̷ po̷jo̷ nange texe yo dʼakʼu̷. Ka̱ra̱ yo ntee yo dya unu̷ji po̷jo̷ e Mizhokjimi, ix ma tsjaji ga kjanu ma e Jesús o e̱je̱ kja ne xoñijomu̷. Na nu paa, e Jesús o joku̷ na dyechʼa bʼe̷zo kʼu̷ mi ja̷bʼa̷ o tsʼinge, pe dʼatrjo bʼe̷zo o unu̷ po̷jo̷ angeze (Lucas 17:12-17). Xo ga kjanu ni jyodʼu̷ ra kjago̷ji. Pama ra unu̷go̷ji po̷jo̷ e Jehová.

7. ¿Ja rga jñetse ke ri sʼiyaji e Jehová?

 7 Ra nuji pje ra kjaji ngekʼua ra jñetse ke ri sʼiyago̷ji e Jehová ja ga sʼiyazu̷ji. E Jesús o xipji kʼo mi teñe angeze ke mi jyodʼu̷ ro sʼiyaji e Jehová ko texe o mu̷bʼu̷ji, ko texe o in bidaji ñe ko texe o pjeñeji (xo̷ru̷ Mateo 22:37). ¿Pje nee ra mamayo?

8, 9. ¿Pje ra kjaji ngekʼua ra jñetse ke ri sʼiyaji e Jehová?

8 ¿Kjo ngextrjo ri mange ke gi sʼiyage e Jehová? Iyo, ma na kjuana ri sʼiyago̷ji e Jehová ko texe in mu̷bʼu̷ji, in zaku̷ji ñe in pjeñeji ra kjaji texe ja ga xitsiji angeze (Mateo 7:16-20). Ne Biblia mama ke ma na kjuana ri nego̷ji e Yose, pe̷ski ra kjaji ja nzi ga mama. ¿Na sʼe̷zhi ra kjaji ga kjanu? Iyo, nangeje dya “na jyu̷u̷ kʼo jñaa kʼo mama angeze ra kjaji” (xo̷ru̷ 1 Juan 5:3).

9 Ma ra kjaji ja ga xitsiji e Jehová ra mimiji na joo ñe ra ma̷ji (Isaías 48:17, 18). ¿Pje ra mbo̷xku̷ji ngekʼua dya ra je̷ziji ra sʼiyaji e Jehová? Ra nuji.

SIDO RI CHE̸ZHI A JMII E JEHOVÁ

10. ¿Pjenga sido ri pa̱ra̱ ja ga kjaa e Jehová?

10 ¿Ja bi pju̷ru̷ bi jogebi e Jehová? Ma bi xo̷ru̷ ne Biblia o mbo̷xkʼu̷ ri pa̱ra̱ ja ma kjaa e Jehová ngekʼua bi pju̷ru̷ bi jogebi. Chjenjui na sibi kʼu̷ sido za̷ra̷. Ne sibi ni jyodʼu̷ ra dyu̷trʼu̷ji o zaʼa ngekʼua dya ra juenchʼe, xo ga kjanu ma sido ri pa̱ra̱ ja ga kjaa e Jehová xenrra ri sʼiya angeze (Proverbios 2:1-5).

Nzakja na sibi kʼu̷ ni jyodʼu̷ zaʼa xo ri ñuu pje ri tsjaa ngekʼua dya ri jye̷zi ri sʼiya e Jehová

11. ¿Ja rgi so̷ge ma xe ri pa̱trʼpa̱ o Jñaa e Diosi?

11 Ma dya ri jye̷zi ri xo̷ru̷ ne Biblia, ra zichʼi kja in mu̷bʼu̷ yo ri pa̱rge. Ra nuji ja ma zo̷ʼo̷ yeje discípulo e Jesús ma o xipjibi ja rba za̷dʼa̷ kʼo jñaa kʼo bi xo̷ru̷bi.  O potu̷ ba mamabi: “Ma o xitsibi pje nee ra mama kʼo o jña Mizhokjimi, me go zichʼi in mu̷bʼu̷bi” (Lucas 24:32).

12, 13. a) ¿Pje ra kjogu̷ ma dya ra pjo̷nguenrraji zo̷ ri sʼiyaji e Jehová? b) ¿Pje ra kjaji ngekʼua dya ra je̷zi ra sʼiyaji e Jehová?

12 Ja kʼo ma zo̷ʼo̷ kʼo discípulo ma o mba̱ra̱bi o jñaa Mizhokjimi, bʼu̷ma me xo bi ma̷kje ma bi pa̱ra̱ pje mama ne Biblia, nujyo o mbo̷xkʼu̷ ri pa̱ra̱ ñe ri sʼiyage e Jehová. Ngekʼua dya gi nege ri jye̷zi ri sʼiya angeze (Mateo 24:12).

13 Ma gi jogebidya e Yose, pe̷ski ri ñuu pje ri tsjaa ngekʼua ri che̷zhi na joo a jmii angeze. Sido ri pjechi ja ga kjaa e Jehová ñe e Jesús, ri mbeñe ja ga kjaa yo na xo̷ru̷ ñe ri ñuu ja rgi tsjayo (Juan 17:3). Ma ri xo̷ru̷ge ne Biblia, na joo ri tsjatsje̷ge yo trʼo̷nu̷: “¿Pje  jitsʼko̷yo ja ga kjaa e Jehová? ¿Pjenga pe̷ski ra sʼiyago̷ angeze ko texe in mu̷bʼu̷ ñe in zaku̷?” (1 Timoteo 4:15).

14. ¿Pje ra kjogu̷ ma nrrajmetrjo ri zopju̷ e Yose?

14 Ma gi pa̱rge dʼa ntee, nrrajmetrjo gi ñabi ngekʼua ri jobi na joo. Xo ga kjanu ma nrrajmetrjo gi zopju̷ e Jehová ri jobi na joo angeze (xo̷ru̷ 1 Tesalonicenses 5:17). Me ni mubi o dyaku̷ji e Yose ra zopju̷ji. Ni jyodʼu̷ ra zopju̷ji ko texe in mu̷bʼu̷ji (Salmo 62:8). Dya ra yepeji kʼo ra xipjiji, ra xiji ja ga zo̷ʼo̷ in mu̷bʼu̷ji. Ya ro nuji, ma sido ra xo̷ru̷ji ne Biblia ñe ra zopju̷ji e Jehová ndizi kja in mu̷bʼu̷ji, dya ra je̷zi ra sʼiyaji angeze.

XIPJIGE YO DYAJA NTEE KJO NGE E JEHOVÁ

15, 16. ¿Ja gi ñuge ne bʼe̷pji ke pe̷skʼu̷ ri jichi yo ntee?

15 Ma dya ri nego̷ji ra jyambu̷ji e Jehová, pe̷skʼu̷ ra xiji yo ntee ja ga kjaa yo ri kreoji. Ma ri jichiji yo ntee kjo ngeje e Jehová me ni mubi ne bʼe̷pji (Lucas 1:74). E Jesús o mama ke texe yo na kjuana teñe angeze pe̷ski ra jichiji yo ntee. Nzi nazgo̷ji pe̷ski ra xiji yo ntee pje ra tsjaa o Reino Mizhokjimi. ¿Kjo ya na kjage ne bʼe̷pji? (Mateo 24:14; 28:19, 20).

16 E apóstol Pablo ma mi jichi kʼo ntee mi kjapu̷ me “ma mubi” ne bʼe̷pji (2 Corintios 4:7). Nu bʼe̷pji ke xenrra ni mubi ri tsjage, nge ma ri jichi yo ntee ja ga kjaa e Jehová. E Jehová dya ra jyombeñe ne bʼe̷pji nu ri tsjage (Hebreos 6:10). Ma dya ri jye̷zi ri tsjage ne bʼe̷pji, nutsʼkʼe ñe yo ntee yo ra dya̷tkʼa̷, ra so̷o̷ ri che̷zhiji a jmii e Jehová ñe ra dyakʼu̷ji ri mimiji texe yo paa (xo̷ru̷ 1 Corintios 15:58). ¿Kjo bʼu̷bʼu̷ na bʼe̷pji kʼu̷ xenrra ni mubi ñe ra tsjakʼu̷ ri ma̷ja̷?

17. ¿Pjenga ra xa̷dʼa̷ji ra zopju̷ji yo ntee o Jñaa e Yose?

 17 Ni jyodʼu̷ ra xa̷dʼa̷ji ra kjaji ne bʼe̷pji. Pe̷skʼu̷ ra ‘kjakjuana o ra xa̷dʼa̷ji rga zopju̷ji yo ntee’ (2 Timoteo 4:2). Yo ntee pe̷ski ra mba̱ra̱ji pje nge o Reino e Yose. Ne Biblia mama ke ya bʼe̷xtrjo kʼe paa ma ra jñu̷u̷ nguenrra e Jehová xo mama ke me xa̷dʼa̷ ñe ke dya ra mezhe ra sa̷ja̷ (Sofonías 1:14; Habacuc 2:3). Ja̱a̱, dya kja ra mezhe ra chjotu̷ e Jehová texe yo na sʼoo yo bʼu̷bʼu̷ kja ne xoñijomu̷ nu ja manda e Satanás. Pe otrʼu̷ ni jyodʼu̷ ra mba̱ra̱ yo ntee pje ra kjogu̷ ngekʼua ra juajnu̷ji ma nee ra mbe̷piji e Jehová.

18. ¿Pjenga ni jyodʼu̷ ra matrʼu̷ji e Jehová ko nujyo in kjuarmaji?

18 E Jehová nee ke ra matrʼu̷ji ko nujyo in kjuarmaji. Ne Biblia mama: “Xo ni jyodʼu̷ ra potu̷ rga zopju̷ji yo mi kjuarmaji, ngekʼua ra sʼiyaji yo nin minteji y ra pjo̷skʼo̷jiyo. Ka̱ra̱ o kjuarma kʼo dya kja jmuru̷ji ko kʼo nu kjuarmatsje̷ji. Dya ni jyodʼu̷ akjanu. Ni jyodʼu̷ ra jmuru̷go̷ji y ra potu̷ rga zopju̷ji. Ni jyodʼu̷ na punkju̷ ra kjaji akjanu, nangeje ri pa̱ra̱go̷ji ya ba che̷zhi kʼe paa” (Hebreos 10:24, 25). Pe̷ski ra kjaji texe yo ni jyodʼu̷ ngekʼua dya ra bʼe̷zhiji rga jmuru̷ji o rga mbejñiji. Ga kjanu ra potu̷ rga ze̷chi in mu̷bʼu̷ji.

19. ¿Pje ra mbo̷xku̷ji ra sʼiyaji yo in kjuarmaji ñe in kju̱ji?

19 Ma ri mage ja jmuru̷ (o mbejñiji) yo kjuarma ri cho̷trʼu̷ge kʼo ri jogebi ngekʼua ra mbo̷xkʼu̷ ri matrʼu̷ge e Jehová. Na punkju̷ kjuarma ñe kju̱ʼu̱ kʼu̷ ri pa̱ra̱ge xo kjaji texe kʼo ni jyodʼu̷ ngekʼua ra matrʼu̷ji e Jehová. Xo pe̷sʼiji nzhubu̷ bʼu̷ma jyopu̷ji. Ma ra jyu̷skʼu̷ji dya ri tsjapu̷ nguenrra (xo̷ru̷ Efesios 4:32). Ñuge kʼo na joo kʼu̷ kjaa yo kjuarma ñe yo kju̱ʼu̱, ga kjanu ra mbo̷xkʼu̷ ri sʼiya angezeji ñe ri jogebi na joo e Jehová.

 RA MIMIJI JA GA NEE E YOSE

20, 21. ¿Pje nee ra mama ke ra bʼu̷bʼu̷tjoji jakʼo nzi ga nee e Yose?

20 E Jehová nee ke texe yo joji angeze ra mimiji na joo. Ne Biblia jitsʼko̷ji ke kʼo paa kʼo ba e̱je̱ dya kja ra minji nzakja yo paa yo ri bʼu̷njidya.

E Jehová nee ke ri bʼu̷bʼu̷tjo, ¿xo gi negeyo?

21 Yo paa yo ra sa̷ja̷ ra minkʼo̷ji texe yo paa dya ngextrjo 70 u 80 kje̷e̷. Me ra ma̷kjo̷ji rga minkʼo̷ji kja nu xoñijomu̷ kʼu̷ me rga zo̷o̷, dya kja ra so̷dyeji ñe dya kja ra bʼu̷bʼu̷ chu̱ʼu̱. Ngekʼo mama ne Biblia ke ra bʼu̷bʼu̷tjoji jakʼo nzi ga nee e Yose. E Jehová nee ke ra minkʼo̷ji ga kjanu pe ra kjaji texe yo ni jyodʼu̷ ngekʼua ra nugo̷jiyo (1 Timoteo 6:12, 19TNM).

22. a) ¿Pje ra kjaji ngekʼua ra bʼu̷bʼu̷tjoji ja ga nee e Yose? b) ¿Pjenga dya so̷o̷ ra to̱go̱ji ke ra minkʼo̷ji texe yo paa?

22 ¿Pje so̷o̷ ra kjaji ngekʼua ra bʼu̷bʼu̷tjoji ja ga nee Mizhokjimi? Pe̷ski ra ‘kjaji na joo’ (1 Timoteo 6:18NTD). Nee ra mama ke ra kjaji kʼo junsʼu̷ kja ne Biblia. Pe dya ra to̱go̱ji ra minkʼo̷ji ja ga nee e Yose zo̷ pje nrre ra kjago̷ji. Nujyo, nge yo unu̷ e Jehová texe yo na joo ga mbe̷pi. Ga kjanu ga jñetse ke me sʼiyazu̷ji (Romanos 5:15). In tatago̷ji kʼu̷ bʼu̷bʼu̷ ajensʼe me nee ra unu̷ yo o mbe̷pji ra mimiji texe yo paa.

23. ¿Pjenga ri unu̷ in mu̷bʼu̷ ri dya̷ta̷ e Jehová?

23 Tsjatsje̷ge ne trʼo̷nu̷, “¿kjo ri matrʼu̷go̷ e Yose ja ga nee angeze?” Ma ri unu̷ nguenrra ke xe ni jyodʼu̷ ri potu̷ ja rgi mimi, ixti tsjagedya. Ma ri ejmego̷ji e Jehová ñe ri kjaji texe kʼo xitsiji, angeze pjo̷xku̷ji. E Jehová xo ra mbo̷ru̷ o mbe̷pji kja yo paa ma ra nguaru̷ ga manda e Satanás kja ne xoñijomu̷. Nuʼma, e Jehová ra tsjaa yo ni jyodʼu̷ ngekʼua ra mimigo̷ji kja ne xoñijomu̷  kʼu̷ me rga zo̷o̷ texe yo paa ja nzi ba mama angeze. Ja̱a̱, nutsʼkʼe so̷o̷ ri bʼu̷bʼu̷trjo ja ga nee e Yose ma ixti unu̷ in mu̷bʼu̷ ri dya̷ta̷ angeze.