Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XORU̸ 4

Mizhokjimi ñe e Abrahán o ñaabi

Mizhokjimi ñe e Abrahán o ñaabi

E Abrahán o tsjaa kʼo o xipji e Jeoba. E Jeoba o xipji e Abrahán o suu ro musʼu̷ na tsʼitrʼi, o pjamilia ro iiji na punkju̷

MU̸ A gu kjogu̷ tresciento cincuenta kje̷e̷ nrreze ma go ñe̱je̱ kʼe Trʼadye̷bʼe̷ kʼu̷ o mbotrʼu̷ nrrexe yo ntee. E Abrahán mi bʼu̷bʼu̷ kja kʼe jñiñi Ur, me ma zo̷o̷trjonu, nujnu mi ka̱ra̱ ntee kʼu̷ me mi ju̷̱u̷̱ji na punkju̷ merio. Nuja bʼu̷bʼu̷dya kʼe jñiñi Irak, je mi bʼu̷bʼu̷nu kʼe jñiñi Ur. E Abrahán mi echʼe kja o mu̷bʼu̷ e Jeoba. Pero, ¿bʼemi kʼu̷ e Abrahán ro tsjaa kʼo mi nee e Mizhokjimi? Nge yo ra nugojidyaba.

Na nu paa e Jeoba o xipji e Abrahán: Pe̷dye̷ba nuja i̱ menzumu̷ge, ri maa mimi a Canaán. E Abrahán o dya̷ta̷ Mizhokjimi o mbe̷dye̷ kja Ur nuja mi menzumu̷, o maa a Canaán o zidyi nu suu Sara, nu sobrino Lot ñe nrrexe kʼo ntee kʼo mi ka̱ra̱ji kja o ngumu̷. Ma go za̷trʼa̷ji kja kʼe jñiñi dya mi ja̷bʼa̷ji ngumu̷, mi oxu̷ji kja tsʼingumu̷ kʼu̷ mi a̷trʼa̷ ko in salea yo añimale. Nukʼua e Jeoba o xipji e Abrahán: Por medio in pjamiliage ra bendecio nrrexe yo ntee kʼu̷ ka̱ra̱ji kja ne xoñijomu̷, in mboxbʼechege ra ii na punkju̷ nzakja na país, nutsʼkʼo ra unu̷go angezeji kʼe xoñijomu̷ a Canaán.

E Abrahán ñe e Lot, ma a ma punkju̷ o nzhenchju̷ru̷ ñe o nzhu̷nu̷. E Abrahán kʼu̷ me ma jonte o xipji o sobrino Lot: Juajnu̷ge pje ma xoñijomu̷ gi nee ngekʼua ri maa mimi. E Lot o juajnu̷ kʼe xoñijomu̷ ja mi bʼu̷bʼu̷ kʼe nrrareje Jordán, me ma joo kʼo jomu̷kʼo, o maa mimi bʼe̷xtrjo kja kʼe jñiñi a Sodoma. Kʼo mi ka̱ra̱jinu, mi kjaji kʼo ma sʼoo, e Jeoba dya mi nee jama mimiji kʼo ntee kʼo mi ka̱ra̱ a Sodoma.

Ma ya bi maa e Lot a Sodoma, e Jeoba go xipji e Abrahán: Ña̷sʼa̷ ajensʼe, pezhe yo seje je xo rga kjanu rga punkju̷ in mboxbʼechege. E Abrahán mi enchʼe kja o mu̷bʼu̷ yo jñaa kʼo bi xipji e Jeoba. Nu suu e Abrahán dya mi muxtrʼi. Ma e Abrahán mi e̷dyi 99 kje̷e̷ ñe e Sara mi e̷dyi komo 90 kje̷e̷ e Mizhokjimi o xipji e Abrahán: Ni suu ra nrrunte ra musʼu̷ na tsʼitrʼi. O tsʼaa ga kjanu, e Sara o musʼu̷ na tsʼitrʼi o jñuspʼu̷ji Isaac. Zo e Abrahán mi tsa̱ja̱ na punkju̷ chʼii, e Jeoba o mama ke kja o pjamilia e Isaac je rgui ñe̱je̱ kʼe Ntee kʼu̷ ro mbosʼu̷ yo ntee, ix ko mama kja e Edén, nukʼua nrro go mama ro pejñe kʼe ntee.

E Lot ma xe ma bʼu̷ntrjo a Sodoma, angeze dya mi kjaa kʼo na sʼoo jama kjaa kʼo ntee kʼo mi bʼu̷bʼu̷jinu. Na nu paa e Jeoba o mama ro kjuatu̷ kʼo ntee kʼo mi ka̱ra̱ a Sodoma, ngekʼua o mbejñe yeje anxe ro ma xipji e Lot ro mbe̷dye̷, ro moji kja trʼeje dya ro ñezheji axu̷trju̷. Nukʼua e Mizhokjimi o jya̷bʼa̷ sibi ñe azufre, o kjuatu̷ e Sodoma ñe e Gomorra o trjeze nrrexe kʼo mi ka̱ra̱nu. E Lot ñe ko xuntrʼi o dya̷ra̷ji dya o ñezheji, o suu dya go a̷ta̷ kʼo anxe, go ñezhe axu̷trju̷ kjanu o nrru̱u̱. Bʼu̷ma mi mbentrjo kʼo gui zogu̷.

(Nu kʼo gua e̱je̱ba xo ri jyodʼu̷ kja Génesis 11:1019:38.)