Nuba soo ri jñanrra texe kʼo mama ne pajina

Nzhogu̷ge kja ne pajina yeje

Yo testigo e Jehová

jñatrjo

¿Kjo gi nee ri pa̱ra̱ pje ni mbe k’o na kjuana?

¿Kjo gi nee ri pa̱ra̱ pje ni mbe k’o na kjuana?

TEXE yo ntee me dyonu̸ji na punkju̸ tr’o̸nu̸, mbuma xo ñets’k’e xi nrro i kjatsje yo tr’o̸nu̸. ¿Kjo gi nee ri pa̱ra̱ pje ni mbe k’o na kjuana yo tr’o̸nu̸ k’o mamaba?

  • ¿Kjo b’emi na kjuana k’e e Mizhokjimi me s’iyats’goji?
  • ¿Kjo ra sa̸ja̸ yo paa ma dya kja ra chu̱ji yo país? ¿Kjo ra sa̸ja̸ yo paa ma dya kja ra supjreji yo ntee?
  • ¿Pje k’o ra kjogu̸zgoji ma ra tu̸ji?
  • K’o ya nrru̱u̱ ¿kjo soo ra yepe ra minji na yeje?
  • ¿Jarga ra otu̸ji Mizhokjimi ngek’ua ra dya̸tka̸goji?
  • ¿Pje ni mbe k’o ra kjagoji ngek’ua ra mimiji na joo ñe me ra ma̸ja̸?

¿Janko ri jyod’u̸ ngek’ua ri pa̱ra̱ k’o na kjuana k’o mamaba? B’u̸b’u̸ na punkju̸ libro k’u̸ manji ra mbos’u̸ yo ntee ngek’ua ra pjechi k’o mamaba. Yo libro dya nrro manji d’atrjo jñaa nrre n’año ga manji. B’u̸nk’o manji na joo ga nrru̸ru̸ yo tr’o̸nu̸, pero ma kjogu̸ yo paa yo ntee dya kja ngotr’pu̸ji nguenrra yo libro, kjanu yo ntee k’e opju̸ yo libro nrro ga jñuspu̸ji na joo, ma jyo nrro ga tsjaji k’o d’adyo libro.

Pero b’u̸b’u̸ d’atrjo libro k’u̸ mama k’o na kjuana. Ma e Jesucristo go dyotu̸ e Mizhokjimi o mama: «In jñage [nge] k’u̸ na kjuana» (Juan 17:17, NTD). Ri pa̱rgoji k’e ne libro k’e man k’o na kjuana ngeje o jñaa e Mizhokjimi ne Biblia. Nudyaba ra nuji pje mama ne Biblia.

¿Kjo b’emi na kjuana k’e e Mizhokjimi me s’iyats’goji?

Da b’e̸zo a nrree nuja b’u̸b’u̸ na punkju̸ ntee

RA XITS’I PJENGA YO NTEE ME DYONU̸JI GA KJANU: Kja ne xoñijomu̸ b’u̸b’u̸ na punkju̸ ntee k’u̸ na s’onte dya juents’k’oji. Na punkju̸ religión manji k’e ri supjreji porke Mizhokjimi ga nee ga kjanu ni.

NE BIBLIA MAMA K’E: Dya ngeje e Mizhokjimi k’u̸ ga kjak’oji ra supjre. Romanos 9:14 mama akjaba: «¿Pje ra mangoji, ma? ¿Kjo ra mamaji k’u̸ dya joo k’u̸ kjaa Mizhokjimi? Jiyo. Me na joo ga tsjaa Mizhokjimi». E Mizhokjimi me s’iyats’goji ngek’ua mama ra tsjaa k’o me na joo, ra mboxk’u̸goji, ngek’ua e Jesús o mama ro dyotu̸ji e Mizhokjimi ga kjanu: «In tatats’u̸gojme k’u̸ in b’u̸b’u̸ ajens’e […] Ri ñeje ri tsjaa [Rey], ngek’ua texe yo ntee axes’e nu xoñijomu̸, ra tsjaji k’ua ja in nege, nzakja na kjaji ajens’e» (Mateo 6:9, 10, NTD). E Mizhokjimi me s’iyats’goji ngek’ua go peñe o tr’ii kja ne xoñijomu̸ o ne nrru̱u̱ por nuts’k’oji (Juan 3:16).

Ri xoru̸ yo texto k’o ju̸nsu̸ba Génesis 1:26-28; Santiago 1:13, y 1 Pedro 5:6, 7.

¿Kjo ra sa̸ja̸ yo paa ma dya kja ra chu̱ji yo país? ¿Kjo ra sa̸ja̸ yo paa ma dya kja ra supjreji yo ntee?

Yo xundaro

RA XITS’I PJENGA YO NTEE ME DYONU̸JI GA KJANU: Ma chu̱u̱ yo país ix na punkju̸ ntee ga nrru̱ji. Texezgoji nrre ri kjogu̸ji k’o na s’oo ngek’ua ri supjreji.

NE BIBLIA MAMA K’E: E Mizhokjimi ra kjuatu̸ texe yo chu̱u̱ k’u̸ kjaji yo país ñe ra tsjaa k’e yo ntee ra minji na joo kja ne xoñijomu̸. Ma ra manda nu Reino Mizhokjimi k’u̸ b’u̸b’u̸ ajens’e, texe yo ntee dya kja ra xotpu̸ji jarga tsjaji o chu̱u̱ ko yo país, ra nga̱ra̱ji na joo. Ixi mama k’u̸ yo trjedyi ñe yo zapju̸ ko ga potr’u̸nte, nge k’u̸ rgi tsjaji tr’opju̸ nge k’o rga uajmaji in juajma (Isaías 2:4). E Mizhokjimi ra kjuatu̸ yo ntee k’u̸ na s’onte k’e dya juents’k’oji. Ne Biblia mama pje nge k’o ra tsjaa e Mizhokjimi: «Mizhokjimi ra ndints’pi texe o ngizhoji. Dya kja ra nrru̱ji. Dya kja pje xe ra mbeñeji. Dya kja xo ra gueji. Dya kja xo ra zoji k’u̸ rra u̸u̸. Na ngeje texe k’o me bi supjridoji kja ne xoñijomu̸, dya kja ra supjridoji. Ya nde d’adyo texe, je ba xits’i akjak’ua k’e jñaa» (Apocalipsis 21:3, 4).

Ri xoru̸ yo texto k’o junsu̸ba Salmo 46:9; Miqueas 4:1-4, y 2 Pedro 2:9.

¿Pje k’o ra kjogu̸zgoji ma ra tu̸ji?

Da kaposanto

RA XITS’I PJENGA YO NTEE ME DYONU̸JI GA KJANU: B’u̸b’u̸ na punkju̸ religión k’u̸ manji k’u̸ ma tu̸u̸ yo ntee ga mbe̸se̸ in aljma. B’u̸nk’o manji k’u̸ yo a nrru̱u̱ ga nzhojtrjoji y kjak’oji k’o na s’oo, xo manji k’u̸ ma ra nrru̱u̱ yo ntee k’u̸ na s’onte, e Mizhokjimi ga pantr’aji kja sibi.

NE BIBLIA MAMA K’E: Ma nrru̱u̱ da ntee ixi kjuaru̸ nrrexe in bida dya kja pje soo ra tsjaa. Eclesiastés 9:5 mama ga kjanu: «Yo a nrru̱u̱ […] dya kja pje pa̱ra̱ji». Yo a nrru̱u̱ dya kja pje soji, dya kja soo ra pepji, dya soo ra kjak’oji nu k’o na s’oo ni soo ra mboxk’u̸goji (Salmo 146:3, 4).

Ri xoru̸ yo texto k’o junsu̸ba Génesis 3:19 y Eclesiastés 9:6, 10.

K’o ya nrru̱u̱ ¿kjo soo ra yepe ra minji na yeje?

Da ts’ixutr’i guee, o nru̱u̱ in pjamilia

RA XITS’I PJENGA YO NTEE ME DYONU̸JI GA KJANU: Nuts’k’oji dya ri nee ra tu̸ji, dya ri nee ra zogu̸ji in pjamilia, ri nee ra minji nrrexe yo paa ko angezeji ngek’ua me ra ma̸ja̸. Ngek’ua ma nrru̱u̱ in pjamilia me ti jonk’oji, ri dyonu̸ji: ¿kjo ra sa̸ja̸ na paa k’o xi ra nuji?

NE BIBLIA MAMA K’E: Ixi na punkju̸ ntee k’o ya nrru̱u̱ nrro ra minji na yeje kja ne xoñijomu̸. E Jesús jo mama «texe k’o ya ndu̱u̱. Texeji ra mbe̸se̸ji k’ua ja t’ogu̸ji» (Juan 5:28, 29). Ma ra yepe ra minji na yeje k’o ya nrru̱u̱, ra minji kja ne xoñijomu̸ k’u̸ me rga zo̸o̸. Texe yo ntee k’u̸ a̸ta̸ji Mizhokjimi ñe dya jiezi, ra soo ra minji kja ne xoñijomu̸ k’u̸ me rga zo̸o̸ texe yo paa ñe dya kja ra sodyeji. Ne Biblia mama: «Ka̱ra̱ o ntee k’o dya kjapu̸ na nojo, unu̸ o mu̸b’u̸ji ra dya̸ta̸ji Mizhokjimi […] nge nu rgi ma̸ja̸, na ngeje Mizhokjimi ra unu̸ ne xoñijomu̸» (Mateo 5:5).

Ri xoru̸ yo texto k’o junsu̸ba Job 14:14, 15; Lucas 7:11-17, y Hechos 24:15.

¿Jarga ra otu̸ji Mizhokjimi ngek’ua ra dya̸tka̸goji?

Da b’e̸zo k’u̸ ga otu̸ Mizhokjimi

RA XITS’I PJENGA YO NTEE ME DYONU̸JI GA KJANU: Na punkju̸ ntee k’u̸ pe̸s’i in religión ga dyotu̸ji Mizhokjimi. Dya nrrexe k’o otu̸ yo ntee ga dya̸ra̸ Mizhokjimi.

NE BIBLIA MAMA K’E: E Jesús o jizhi k’u̸ ma ra otu̸ji Mizhokjimi dya ra yepeji yo jñaa. O mama ga kjanu: «Ma ri dyotk’eji Mizhokjimi, dya ri yepeji k’o jñaa» (Mateo 6:7). Ngek’ua me na joo k’e ra pa̱rgoji pje nge k’o nee e Mizhokjimi, ra otu̸ji janzi ga nee angeze ngek’ua ra dya̸tka̸goji. Je ga kjanu mama 1 Juan 5:14: «Ma ra otu̸ji ja k’o nzi ga nee angeze, ri pa̱ra̱goji ra dya̸tka̸ji».

Ri xoru̸ yo texto k’o junsu̸ba Juan 9:31; 14:6, 14 NTD, y 1 Juan 3:22.

¿Pje ni mbe k’o ra kjagoji ngek’ua ra mimiji na joo ñe me ra ma̸ja̸?

Da nrrinxu̸ jyod’u̸ kja ne Biblia pje ni mbe k’o ra tsjaa ngek’ua ra mimi na joo ñe me ra ma̸ja̸.

RA XITS’I PJENGA YO NTEE ME DYONU̸JI GA KJANU: Ka̱ra̱ yo b’e̸zo ñe yo nrrinxu k’u̸ nee k’e na joo rga ñets’e in jmii, neji k’e me ti zo̸trjo, ngek’ua pje nrre kjapu̸ji a ñiji ñe a jmiji. Na punkju̸ ntee pepjiji na punkju̸ me nee ra nrronji na punkju̸ ch’opju̸ o merio, pje nrre nee ra pe̸s’i, mbeñeji k’e ga kjanu ra nga̱ra̱ji na joo ñe me ta ma̸ja̸ji. Pero ma ga pe̸s’iji nrrexe k’o neji, dya ma̸ja̸.

NE BIBLIA MAMA K’E: Me ra ma̸ja̸ rga minji ma ra kjaji janko go mama e Jesús, angeze go mama akjanu: «Ka̱ra̱ o ntee k’o pa̱ra̱ k’u̸ […] ni jyod’u̸ Mizhokjimi k’u̸ ra mbos’u̸ji. Zo akjanu k’o, pero nge nu rgi ma̸ja̸ na ngeje ya nge o [Rey] dya Mizhokjimi» (Mateo 5:3). Ma ra a̸ta̸ji Mizhokjimi, ma ra jyod’u̸ji ra pa̱ra̱ji k’o na kjuana ja ga kjaa angeze ñe ma ra pjechi pje ra tsjaa para ra mboxk’u̸goji, nge ma b’emi ra ma̸ja̸. Kja ne Biblia nge nu ri totr’u̸ k’o na kjuana jaga kjaa e Mizhokjimi ñe pje ra tsjaa para ra mboxk’u̸goji, ma ra xoru̸ji ra pa̱ra̱ji k’e ma ra kjaji k’o mama ne Biblia nge k’o na joo, dya nge k’o manji yo ntee. Ma ra kjaji k’ua janzi ga mama ne Biblia ra mink’oji na joo ñe me ra ma̸ja̸ (Lucas 11:28, NTD).

Ri xoru̸ yo texto k’o junsu̸ba Proverbios 3:5, 6, 13-18 y 1 Timoteo 6:10.

Nudyaba ro nuji ñanto tr’o̸nu̸ k’e ne Biblia na joo ga nrru̸ru̸. Ma xi gi nee ri pa̱ra̱ i kjage na joo, nzakjats’k’e xi «ka̱ra̱ o ntee k’o pa̱ra̱ k’u̸ […] ni jyod’u̸ Mizhokjimi k’u̸ ra mbos’u̸ji». Mbuma gi dyonk’e: ma mama e Mizhokjimi me nets’k’oji ¿pjenga angeze jiezi k’u̸ yo ntee ra kjaji k’o na s’oo y ra kjogu̸ji k’o dya joo? Mbuma gi nee ri pa̱ra̱ jargi mink’e na joo ko in pjamilia, k’o ra mboxk’u̸ ri pa̱ra̱ jargi nrru̸ru̸ yo tr’o̸nu̸ nu k’o i dyonge ngeje ne Biblia. Ne Biblia na joo ga nrru̸ru̸ yo tr’o̸nu̸ k’u̸ me dyonu̸ji yo ntee.

Ix na punkju̸ ntee dya nee ra xoru̸ ne Biblia. Ga manji yo ntee k’u̸ ne Biblia jñusu̸ na punkju̸ letra ma xoru̸ dya tendioji. ¿Pje ni mbe k’o ra mboxk’u̸ ngek’ua ri pa̱ra̱ pje mama ne Biblia? B’u̸b’u̸ da xiskuama k’u̸ ra dyak’u̸ yo nrrestigo e Jehová ngek’ua ri xoru̸.

Nu ne skuama je mama ga kjanu Nuts’k’e soo ri jobi na joo ko e Mizhokjimi, ko nu ne skuama ra mbos’u̸ji yo ntee k’u̸ ga pepji na punkju̸ ñe dya pe̸s’i tiempo ra xoru̸ji, ra nuji k’e ne Biblia na joo ga nrru̸ru̸ yo dyonu̸ji yo ntee. Da nrrestigo e Jehová k’u̸ pjechi pje mama ne Biblia ra ma jits’i kja in nzumu̸, ma dya nge kja in ngumu̸ge ra nge nu janko ri ñee, dya pje ri tsjontr’u̸, chju̸nma chju̸nma rga jits’i. Mi na punkju̸ ntee ga xoru̸ ko yo nrrestigo e Jehová, me ma̸ja̸ji manji k’e a totr’u̸ji k’o na kjuana.

Xo ñets’k’e soo ri unk’e nguenrra k’e ne Biblia mama k’o na kjuana ñe me na joo k’o mama. Ma ri pa̱rge nu k’o na kjuana k’u̸ mama ne Biblia dya kja ri kreo texe nu k’o dya ga kjuana, dya kja pje ri su̱u̱, nzakja yo ntee k’u̸ dya pa̱ra̱ji pje nge k’o ra kreoji, me ri ma̸ja̸ na nge ri pa̱rge pje nge k’o ra tsjaa e Mizhokjimi Jehová. E Jesús jo mama: «Ma ri [kreozu̸goji] yo jñaa yo ri ñaa, ri pa̱ra̱ji k’u̸ na kjuana ma. Ma ri pa̱ra̱ji k’u̸ na kjuana, ra empk’eji libre ma» (Juan 8:32).

1. Da b’e̸zo ga xoru̸ pje mama ne Biblia; 2. Da nrrinxu̸ ga xoru̸ pje mama ne Biblia