Nuba soo ri jñanrra texe kʼo mama ne pajina

Nzhogu̷ge kja ne pajina yeje

Unu̷ge klik ngekʼua ri jñanrra yo ri xoru̷

Yo testigo e Jehová

jñatrjo

E Mizhokjimi jitsʼkoji kʼo me na joo

 Xoru̷ 13

¿Pje ra tsjapu̷ e Mizhokjimi yo relijion kʼo dya ga kjuana?

¿Pje ra tsjapu̷ e Mizhokjimi yo relijion kʼo dya ga kjuana?

1. ¿Nrrexe yo relijion kjaji kʼo na kjuana?

Nrrexe kja yo relijion bʼu̷bʼu̷ ntee kʼo nee ra tsjaji kʼo na joo. E Jeoba ra mbo̷sʼu̷kʼo. Pe na punkju̷ ntee kʼo otrʼu̷ axojñi kja o relijion kjaji kʼo na sʼoo (2 Corintios 4:3, 4, TNM; 11:13-15). Kja telebision ñe kja periodiko bʼu̷ma gi a̷ra̷ ke yo relijion dya pje manji ma kʼo mbo̷kjimi kjapu̷ji kʼo dya ga joo yo tsʼitrʼi. Xo bʼu̷bʼu̷ relijion kʼu̷ pjo̷sʼu̷ji yo ntee kʼo kjaji chu̱ʼu̱ kja yo pais, ma bʼu̷bʼu̷ ntee kʼo u̷mbu̷ji potrʼu̷ji. Na punkju̷ ntee kʼo nee ra tsjaji kʼo na joo, ma ga dya̷ra̷ji jaga kjaa kʼu̷ na kjaa o relijion u̷dʼu̷ji, nange pa̱ra̱ji ke Mizhokjimi dya nee ke ra tsjajikʼo. Xoru̷ge kja Mateo 24:3-5, 11, 12.

E Jeoba nee kʼe relijion kʼu̷ kjaa kʼo na joo, dya nee yo relijion kʼo kjaa kʼo na sʼoo. Na punkju̷ relijion dya jichiji kʼo na kjuana, manji ke e Mizhokjimi kjakoji ra kjogu̷ji kʼo na sʼoo, manji ke e Mizhokjimi pa̱ntrʼa̱ kja ñixua yo ntee kʼo kjaa na sʼoo. Dya ga kjuanakʼo ngekʼua Mizhokjimi nee ke ra xoru̷ji ne Biblia ngekʼua ra pa̱ra̱ji jaga kjaa angeze. Xoru̷ge kja Ezequiel 18:4; 1 Timoteo 2:3-5.

2. ¿Pje ra tsjapu̷ e Jeoba yo relijion kʼo dya ga kjuana?

Yo relijion manji ke kjaji kʼo mama ne Bibliani, pe e Mizhokjimi janrra ke dya kjaji kʼo na joo, kjaji kʼo na sʼoo jaga nee e Satanás (Santiago 4:4). Kʼo paa ma dya mi bʼu̷bʼu̷ e Noé, kʼo ntee kʼo mi bʼu̷nji a Babilonia go mbu̷ru̷ bo tsjaji kʼo dya ga joo, dya mi kjaji kʼo mi nee e Jeoba. Ngekʼua kja o Jñaa e Mizhokjimi mama yo relijion kʼo dya kjaji jaga nee e Jeoba nge nzakja jama kjaa kʼe “ndajñiñi a Babilonia”. Dya kja ra mezhe kʼe paa ma e Jeoba ra chjotu̷ yo relijion kʼo kjaa kʼo dya ga joo ñe ompu̷ yo ntee. Xoru̷ge kja Apocalipsis 17:1, 2, 5, 16, 17; 18:8.

E Jeoba dya jyombeñe yo ntee kʼo na jonte kʼo jmuru̷ji kja kʼo relijion kʼo dya ga kjuana, ngekʼua pejñe o ntee ra ma jyodʼu̷ji yo ntee kʼo na jonte ngekʼua ra jichiji kʼo na kjuana. Xoru̷ge kja Miqueas 4:2, 5.

Kʼe relijion kʼu̷ na kjuana pjo̷sʼu̷ yo ntee ngekʼua ra tsjaji kʼo na joo

 3. ¿Pje ni jyodʼu̷ ra tsjaa kʼo ntee kʼo nee ra dya̷ta̷ Mizhokjimi?

E Jeoba me nee yo ntee yo kjaji kʼo na joo, nee ra mbo̷sʼu̷jikʼo, dya nee ke ra nrru̱ji ngekʼua xipji yo ntee ra mbedyeji kja kʼo relijion kʼo dya kjaji kʼo na kjuana. Ma yo ntee sʼiyaji e Jeoba dya kja ra tsjaji kʼo na sʼoo kʼo kjaji yo relijion. Xoru̷ge kja Apocalipsis 18:4.

Kja kʼe siglo dʼaja, ma kʼo ntee mi a̷ta̷ji kʼo mi jizhi kʼo apostole me mi ma̷ji, mi pjechiji kʼo na joo ke ro tsjaji xo mi pjechiji pje ra tsjaa o Reino e Mizhokjimi. Ngekʼua dya kja mi kjaji kʼo na sʼoo, mi a̷ta̷ji e Jeoba. Ngekʼua ma ra jitsʼkoji kʼo mama ne Biblia, na joo ke ra kjaji jagua tsjaji angezeji. Xoru̷ge kja 1 Tesalonicenses 1:8, 9; 2:13.

E Jeoba nee ke ri jye̷zge kʼe relijion kʼu̷ dya ga kjuana, ma ri tsjage ga kjanu ri jobige na joo ko angeze xo ri pe̷sʼige na punkju̷ kju̱ʼu̱ ñe kjuarma kʼo ra netsʼkʼe ñe ri minkʼe nrrexe yo paa kja ne Xoñijomu̷ ma me rga zo̷o̷. Xoru̷ge kja Marcos 10:29, 30; 2 Corintios 6:17, 18.

4. ¿Pje nge kʼo na joo kʼo ra tsjaa Mizhokjimi?

Na joo ma dya kja ra bʼu̷bʼu̷ relijion kʼo dya ga kjuana, yo ntee ra nga̱ra̱ji na joo ko o minte, dya kja ra chu̱ji, nrrexeji ra dya̷ta̷ji ñe ra tsjaji kʼo mama e Jeoba. Xoru̷ge kja Apocalipsis 18:20, 21; 21:3, 4.