Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 11

¿Kjo nge kʼo bo dyopju̷ji kʼo bo tsjaa e Jesús?

¿Kjo nge kʼo bo dyopju̷ji kʼo bo tsjaa e Jesús?

¿So̷o̷ ri jñanrra yo bʼe̷zo kʼu̷ kuatrʼu̷ba kja ne retrato? Yo bʼe̷zo mi ngeje: E Mateo, e Marcos, e Lucas, e Juan, e Pedro, e Santiago, e Judas ñe e Pablo. Angezeji o mimiji kja kʼo paa ma go bʼu̷bʼu̷ e Jesús, bo dyopju̷ji kʼo bo tsjaa angeze. Kʼo skuama ñe kʼo carta ke bo dyopju̷jikʼo, so̷o̷ ra to̷trjidya kja nu Biblia. ¿Gi nee ri pa̱rge pje xo bo tsjaji kʼo bʼe̷zokʼo?... Mo ra nujima.

¿Kjo nge yo bʼe̷zoyo?

E Mateo, e Juan ñeje e Pedro mi apostole e Jesús, me mi joji na joo ko angeze. Angezeji mi poji ko e Jesús mi jichiji yo ntrʼee o jñaa e Yose. ¿So̷o̷ ri jñanrra kja ne retrato e Mateo,  e Juan ñeje e Pedro?... E Mateo ñe e Juan bo dyopju̷bi kja skuama kʼo bo tsjaa e Jesús ma mi bʼu̷bʼu̷ kja nu Xoñijoma. E Juan bo dyopju̷ nu skuama kʼu̷ ni chju̱u̱ Apocalipsis (o Revelación), ñeje jñii carta kʼu̷ ni chu̱ji Primera, Segunda ñe Tercera de Juan. Nu apóstol Pedro bo dyopju̷ yeje carta: Primera ñeje Segunda de Pedro. Kja nu yeje carta kʼu̷ bo dyopju̷, angeze bo mama ke dʼa nu paa ma mi bʼu̷bʼu̷ ko e Jesús, o dya̷ra̷ dʼa jñaa kʼu̷ bo ñe̱je̱ ajensʼe. Mi nge e Jehová kʼu̷ go ñaa, go mama akjaba: “Nujnu, nge in chʼigonu, me ri negojnu. Me ri ma̷ja̷ nange angeze kjaa kʼua ja nzi ri xikʼo”.

Kʼo dyaja bʼe̷zo kʼu̷ kuatrʼu̷ kja ne retrato nrre bo dyopju̷ji kʼo bo tsjaa e Jesús. Dʼaja kʼu̷ mi chju̱u̱ Marcos. Bʼu̷ma angeze bo nuu ma kʼo xundaro o zu̷ru̷ji e Jesús. Nu kʼu̷ dʼaja mi chju̱u̱ Lucas kʼu̷ mi joku̷ ntrʼee. Angeze bo mbu̷ru̷ bo kreo asta ma ya bi nrru̱u̱ e Jesús.

Kja nu retrato kuatrʼu̷ yee bʼe̷zo kʼo bo dyopju̷bi pje bo tsjaa e Jesús ma mi bʼu̷bʼu̷ kja ne Xoñijoma. Nzayezgui mi kjuarmagui e Jesús. ¿Gi pa̱rge kjo nge kʼo yee bʼe̷zo kʼu̷ mi kjuarmabi e Jesús?... Ja̱a̱, e Santiago ñe e Judas. Ma e Jesús bo mbu̷ru̷ bo jichi yo ntrʼee, e Santiago ñeje e Judas dya mi kreogui kʼo mi mama e Jesús. ¡Mi mangui dya mi trju̷mbeñe! Pe ma bo kjogu̷ yo paa o kreogui e Jesús.

Nudya ra nuji kʼo bo tsjaa e Pablo. ¿Gi janrra kja ne retrato e Pablo? Ma dya bʼe mi kreo e Jesús mi xiji Saulo. Angeze mi u̷mbu̷ kʼo ntrʼee kʼo mi kreo e Jesús, mi kjapu̷ ro supjreji. ¿Gi nee ri pa̱rge ja gua kreo e Jesús?... Dʼa nu paa, e Pablo mi paa kja nu ñʼiji kʼu̷ mi paa a Damasco, dʼango dya̷ra̷ na jñaa ajensʼe. ¿Kjo nge kʼu̷ mi ñaa? ¡Mi nge e Jesús! Kjanu e Jesús o dyo̷mbu̷: “¿Pjenga i kjapu̷ ra supjre yo ntrʼee kʼo kreozu̷go?”. Nakʼua e Pablo bo unu̷ nguenda kʼu̷ mi nesta ro jye̷zi kʼo ma sʼoo kʼo mi kjaa, ngekʼo ma bo kjogu̷ yo paa, bo tsjaa kʼo mi nee e Jesús. Bo dyopju̷ 14 skuama kʼu̷ gua e̱je̱ kja ne Biblia, pju̷ru̷ kja nu skuama Romanos ñe kjuaru̷ kja nu skuama Hebreos.

Pama pama ra zopju̷ji yo mama ne Biblia ngekʼo ra pjechiji trʼexe kʼo bo tsjaa e Jesús ma mi bʼu̷bʼu̷ kja ne Xoñijoma. ¿Xi gi nee ri pa̱rge pje bo tsjaa e Jesús?...

RA XO̸RU̸JI NE BIBLIA:

  • 2 Pedro 1:16-18

  • Marcos 3:21; 14:51

  • Judas 1, TNM

  • Hechos 9:1-18