Nuba soo ri jñanrra texe kʼo mama ne pajina

Nzhogu̷ge kja ne pajina yeje

Unu̷ge klik ngekʼua ri jñanrra yo ri xoru̷

Yo testigo e Jehová

jñatrjo

Jichige in chʼii kʼo mama ne Biblia

 XO̸RU̸ 3

E Rahab mi enchʼe kja o mu̷bʼu̷ e Jehová

E Rahab mi enchʼe kja o mu̷bʼu̷ e Jehová

¿Kjo gi nee ri pa̱ra̱ pje go kjogu̷ mi jingua? Mi jingua kja kʼe jñiñi a Canaán mi bʼu̷bʼu̷ dʼa jñiñi kʼu̷ mi chju̱u̱ Jericó. Kʼo ntee kʼo mi ka̱ra̱ kja kʼe jñiñi dya mi kjaji kʼo mi mama e Jehová. Nujnu xo mi bʼu̷bʼu̷ na ndinxu kʼu̷ mi chju̱u̱ Rahab, angeze mi enchʼe kja o mu̷bʼu̷ e Jehová.

Ma mi tsʼixutrʼi e Rahab, mi a̷ra̷ ja gua mbo̷sʼu̷ e Jehová kʼo israelita ro ndo̱mpu̷ji chu̱ʼu̱ kʼo dyaja ntee kʼo mi nuji na u̷u̷. Nzakja ma e Jehová go mbo̷sʼu̷ e Moisés ro pjongu̷ kʼo israelita kʼo mi ka̱ra̱ a Egipto. ¡E Jehová go mbo̷sʼu̷ e Moisés ngekʼua ro xogu̷ a nrreʼe kʼe mar Rojo, akjanu go kjogu̷ji kʼo israelita! ¡Nudya e Rahab mi pa̱ra̱ ke yo israelita bʼe̷xtrjo bʼu̷ntrji kja Jericó, nu ja mi menzumu̷ angeze!

E Rahab mi enchʼe kja o mu̷bʼu̷ kʼo bi tsjaa e Jehová, ngekʼua go mbo̷sʼu̷ kʼo yeje israelita

Na xomu̷ yeje israelita go ma nubi ja ma kjaa kʼe jñiñi a Jericó. Ma go za̷trʼa̷bi kja o ngumu̷ e Rahab, go xipjibi ro oxu̷bi kja o ngumu̷. Ma go mba̱ra̱kʼo kʼe rey kʼu̷ mi manda a Jericó, go nrra̷ja̷ yeje bʼe̷zo ro mebi kja o ngumu̷ e Rahab ro ma jyodʼu̷bi yo bʼe̷zo. Pe ¿pje go tsjaa e Rahab? Go xipji yo yeje israelita ro ndesʼebi axesʼe nu ngumu̷ ngekʼua ro tsjo̱binu. Nudyakʼua go xipji yo bʼe̷zo kʼu̷ bi mbejñe kʼe rey: “Yo bʼe̷zo yo i jodʼu̷bi ya mebi, ma ri xa̷dʼa̷bi bʼu̷ma ri su̷ru̷bi”. ¡Je ga kjanu go mbo̷sʼu̷ e Rahab kʼo yeje israelita ngekʼua dya pje ro kjogu̷bi! ¿Gi nee ri pa̱ra̱ pjekja go tsjaakʼo?... Go tsjaa ga kjanu nange mi enchʼe kja o mu̷bʼu̷ kʼu̷ e Jehová ro mbo̷sʼu̷ kʼo israelita, ñe mi pa̱ra̱ kʼe yo israelita ro nrro̱mpu̷ji chu̱ʼu̱ kʼo mi ka̱ra̱ a Jericó ñe texe kʼo mi ka̱ra̱ kja kʼe xoñijomu̷ a Canaán.

Ma kʼo israelita dya bʼe mi pedyebi kja o ngumu̷ e Rahab, angezebi o xipjibi: “Ma Mizhokjimi ra chjotu̷ kʼo ntee kʼo ka̱ra̱ba a Jericó, nutsʼkʼe ñe in bʼedyi dya ri chu̱geji”. ¿Gi pa̱rge pje go xipjibi ro tsjaa e Rahab ngekʼua e Mizhokjimi ro mbo̷sʼu̷?... Kʼo yeje israelita go xipjibi: “Ri chju̷̱sʼu̷ kja in benrrana ne trju̷mu̷ kʼu̷ na mbaja ñe ri xipji in bʼedyi ra ne̱ ngenjiba kja in nzunge”. Je ga kjanu go tsjaa e Rahab. ¿Gi nee ke xi ra pechkʼe pje go kjogu̷?...

E Jehová dya go mbo̷trʼu̷ e Rahab ñe o bʼedyi

Ma o kjogu̷ yo paa, kʼo israelita go xinchpʼiji añu̷nu̷ kʼe jñiñi Jericó. Pama pama dʼatrjo ma xinchpʼiji kʼe jñiñi. Je ba kjanu go tsjaji ñanto paa, pe ma mi kjajikʼo dya pje mi nzheñeji. Kʼu̷ na yencho nu paa, kʼo israelita yencho ba xinchpʼiji a Jericó, nudyakʼua texe kʼo israelita go mapju̷ji na jensʼe. ¡Nukʼua e Jehová go tsjapu̷ ro nu̷gu̷ kʼo muralla a Jericó! Pe ¿pje go kjogu̷ o ngumu̷ e Rahab? O ngumu̷kʼu̷, dya go nu̷gu̷ nange mi nu̷nsʼu̷ na trju̷mu̷ kʼu̷ ma mbaja. ¿So̷o̷ ri jñanrra ne trju̷mu̷ kja ne dibujo?... ¡E Rahab ñe o bʼedyi dya go nrru̱ji!

 ¿Pjekja dya go nrru̱u̱ e Rahab?... Nange angeze go dya̷ta̷ e Jehová, mi pa̱ra̱ ke e Mizhokjimi ro mbo̷sʼu̷. Ma go mbechpeji ja gua mbo̷sʼu̷ Mizhokjimi o ntee, go ñenchʼe kja o mu̷bʼu̷kʼu̷. A gui pjechi pje go tsjaa e Jehová ngekʼua ro mbo̷sʼu̷ e Rahab. ¿Ri dya̷ta̷ e Jehová nzakja e Rahab?... ¡Ja̱a̱, so̷o̷ ri tsjage!

RA XO̸RU̸JI NE BIBLIA:

  • Josué 2:1-24; 6:1-5, 14, 15, 20-25

  • Hebreos 11:31