Nuba soo ri jñanrra texe kʼo mama ne pajina

Unu̷ge klik ngekʼua ri jñanrra yo ri xoru̷

 XO̸RU̸ 12

Dya pje mi su̱u̱ nu sobrinu e Pablo

Dya pje mi su̱u̱ nu sobrinu e Pablo

Mi jingua go mimi na trʼii kʼu̷ go mbo̷sʼu̷ e Pablo ngekʼua dya ro mbo̷trʼu̷ji. Dya ri pa̱rgoji pje mi chju̱u̱ kʼe trʼii, pe mi ngeje nu sobrinu e Pablo. Kʼe trʼii dya pje mi su̱u̱. ¿Gi nee ri pa̱ra̱ pje go tsjaa?...

A Jerusalén je mi oʼo a pjo̷ru̷ e Pablo. Go zu̷ru̷ji nange mi jichi yo ntee kʼo go tsjaa e Jesús. Mi bʼu̷bʼu̷ bʼe̷zo kʼo mi u̷mbu̷ji e Pablo ñe mi nuji ja rgua tsjapu̷ji kʼo ma sʼoo. Mi nee ro ma xipjiji kʼe bʼe̷zo kʼu̷ mi manda yo xundaro: “Pejñe yo xundaro ra zidyiji e Pablo nu ja ju̷mpu̷ji nguenda yo ntee”. Angezeji ro tsjo̱ji kja kʼe ñʼii ngekʼua ma ro kjogu̷nu e Pablo ro mbo̷trʼu̷ji.

Nu sobrinu e Pablo go xipji in tío pje mi nee ro tsjapu̷ji, kjanu go ma xipji kʼe bʼe̷zo kʼu̷ mi manda yo xundaro

Ma o mba̱ra̱kʼo nu sobrinu e Pablo, ¿pje go tsjaa? Go ma xipji nu tío pje mi nee ro tsjapu̷ji yo ntee. Nudyakʼua e Pablo go xipji: “Xa̷dʼa̷ ri ma xipji texe kʼo gui dya̷ra̷ nu bʼe̷zo kʼu̷ manda yo xundaro”. Kʼe bʼe̷zo mi mero manda kja yo xundaro, ngekʼua dya kjo mi nee ro ma bobʼu̷ a jmiikʼu̷. Zo mi nge ga kjanu, ¿pje go tsjaa kʼe trʼii?... Dya go zu̱u̱, go maa ja mi bʼu̷bʼu̷ kʼe bʼe̷zo go ma xipji texe.

Kʼe bʼe̷zo kʼu̷ mi manda kja yo xundaro go dya̷ra̷ kʼe trʼii. Nukʼua go mbejñe quiniento xundaro ro zidyiji e Pablo kja kʼe jñiñi nu mi chju̱u̱ Cesarea, o xipjiji ro mbo̷ru̷ji ngekʼua dya pje ro tsjapu̷ji. Kʼe bʼe̷zo go xipji yo xundaro: “Ri sidyiji e Pablo nu xomu̷dya”. ¿Go mbo̷trʼu̷ji e Pablo yo ntee kʼo mi u̷mbu̷ji? ¿Pje gi mange?... ¡Iyo, dya go mbo̷trʼu̷ji! Yo bʼe̷zo kʼo mi u̷mbu̷ji dya pje go tsjapu̷ji e Pablo.

¿Pje jitsʼi yo ro xo̷ru̷ji?... ¿Gui unkʼe nguenrra ke dya go zu̱u̱ in sobrinu e Pablo? Xo ñetsʼkʼe, ¡so̷o̷ ri tsjage nzakja angeze! Ra o̷tu̷ji e Jehová ra mbo̷xkoji ngekʼua dya ra su̱ji rga zopju̷ji yo ntee o Jñaa angeze. Natsʼkʼe, ¿dya ri su̱u̱ ri zopju̷ yo ntee yo mama e Jehová?... Mi na joo ma ra jichiji yo ntee kʼo mama e Mizhokjimi. Akjanu na punkju̷ ntee ra so̷o̷ ra mimiji kja ne Xoñijomu̷ ma me rga zo̷o̷.

RA XO̸RU̸JI NE BIBLIA:

  • Hechos 23:12-24

  • Mateo 24:14; 28:18-20

  • 1 Timoteo 4:16