Skip to content

Skip to secondary menu

Skip to table of contents

Testemuña ba Jeová

Mambae (Ermera)

Gaeshua Koden Dar Maromak

 LISAUN 10

Mansapa it leb ten relijaun kid dlon?

Mansapa it leb ten relijaun kid dlon?

1. Relijau dlon, nei ka baʼni?

“Matan-mori kdia la propeta palsu ro.”MATEUS 7:15.

Jesus denu ni dixipulu ro tu nei se relijaun id mesa pe dlo. Idia pe man se daʼa id la morin. Kdia la daʼa idia, Jesus dale: “Atuba koskans pe hi et idia.” (Mateus 7:14) Maromak teh adorasaun dlon dar se Biblia. Atub kristau dlon put ni se fiar id mesa.Lee João 4:23, 24; 14:6; Éfeso 4:4, 5.

2. Sapa pe Jesus dale kdia la kristaun palsu?

“Rom dale tuse . . . rom ten Maromak, mais dar rom pun-pupun rom nega Maromak.”TITO 1:16.

Jesus dale sai mun tuse, propeta palsu hi oid hanorin palsu tbae ma ni relijau kristaun kid dlon. Ko dar ehan, rom man atub seir beʼpe adora Maromak ni daʼa dlon. Rom meit gau lolo man atub kristaun. Mais it leb ten rom atub ahe mansapa. Tan rom ba kok pun-punun seir beʼpe Biblia laka atub kristau dlon pun.Lee Mateus 7:13-23.

3. Dar sapa pe it leb ten sé pe atub kristau dlon?

Tgu tnaer sano lim beʼpe atub kristau dlon hi kok:

  • Atub kristau dlon respetu Biblia man Maromak ni Gaeshuan. Rom nae mori nahati dar sapa pe Biblia denun. Tan idua, relijau dlon ba hanesa nor relijaun kid dar se atuba ni hanoin. (Mateus 15:7-9) Atub kristau dlon ba denu san id loin, depois pun hel san selun.Lee João 17:17; 2 Timóteo 3:16, 17.

  • Atub kristau dlon hahiʼi Maromak ni galan, Jeová. Jesus hahiʼi Maromak ni galan oid denu kdia la idia. Ua denu atub selun oid tadlo kdia la Maromak, ua  meit denu rom pun orasaun la Maromak oid pun ni galan sai santu. (Mateus 6:9) Her it hatin, relijaun kid beʼpe gase la atub selun kdia la Maromak ni galan?Lee João 17:26; Roma 10:13, 14.

  • Atub kristau dlon gase la atub selun kdia la Maromak ni Ukun, ka ni Reinun. Maromak laka Jesus gase la atub selun gaeshua koden kdia la ni Ukun. Dar se Maromak ni Ukun mesa pe atuba leb gnan mori koden ni ada-airu. Jesus gase la atub selun kdia la Ukun kidia rat se ua mate. (Lucas 4:43; 8:1; 23:42, 43) Ua meit dale la ni dixipulu ro oid gase la atub selun kdia la Maromak ni Ukun. Se atuba id ma pdesi la it oid gase kdia la Maromak ni Ukun, atub idua dar relijaun kid be?Lee Mateus 24:14.

  • Jesus ni dixipulun ro ba pun dar sapa pe mundu klaon ia pun. It leb ten sé pe atub kristau dlon tan la rom ba mete la politik nin ka problema her komunidade ni lalan. (João 17:16; 18:36) Rom meit ba pun dar atub selun ni pun-punu klaon.Lee Tiago 4:4.

  • Atub kristau dlon kok domin la ro. Biblia denu rom oid respetu atub selun nor rasa ka nasaun ahe-ahe. Maski relijaun palsu ne apoiu la huna dotu, mais atub kristau dlon ba pun manua. (Miquéias [Mikha] 4:1-3) Atub kristau dlon ne rom tempu nor san-soin oid tulun atub selun.Lee João 13:34, 35; 1 João 4:20.

4. Mansapa pe it leb ten sé pe dar relijau kid dlon?

It notar tnaer, relijaun id beʼpe denu Maromak ni Gaeshuan man puun la sapa pe rom denun, nor hahiʼi Maromak ni galan? Relijaun id beʼpe ne sai tu Maromak ni Ukun mesas pe atuba leb gnan ni ada-airu? Relijaun id beʼpe kok domin la ro, rom meit ba pun huna nor atub selun?Lee 1 João 3:10-12.